Romanos 12 - Kaxinawá Bíblia (BR)

Hiwea benawẽ hiwei merabenamekũkaĩtikiaki, na hãtxarã

¹ Ẽ betsabu inũ ẽ puibuũ, nukuwẽ dabanã ikĩ Deusũ nuku duawakubaĩmiswẽ taeshũ hawara xinãkĩ abuai natiã mã ashũkubainũbũ shabakabi ẽ xinaĩ matu yununũ nĩkakãwẽ. Haska Deus kẽwãkĩ yuinaka detetã menukĩ inãkĩ apaunibu keskama hakia natiã matũ hiweawẽ Deus duawanũ, iwanã, meribi pashkai pepatã Deus matũ yura inãkuĩa keska wakĩ hawẽ kemutapai benimawakubaĩkãwẽ. Haska wakinã, txanima kayabi mã Deus kẽwaiĩ.

² Haska habũ ikũwãbuma natiã mai anu hiwe bestishũ hamapai tibi akĩ xinãmisbu keskakĩ ana xinãma hakia xinã betsa watã haska Deusũ matu hiwemakatsi ikai haska abuai besti tapĩkubaĩkãwẽ. Eska hiweirã, haska Deusũ abumis mã tapĩkubaĩshanaii, pepakinã, Deus benimawai kemutapakinã, kanei hawa txĩtuãmarã.

³ Haskakẽ Deus ewẽ nuikĩ ea duawakĩ hawẽ hãtxa yuishunika kuxipa ea waniwẽ taeshũ matu yusĩnũ ea nĩkakãwẽ. Haska matu tibibu Deusũ duawakĩ matu ikũwãmakeakea xinãkĩ unãtã matũmebi xinã txakakĩ yuikĩ: “Ẽ huni pepakẽ Deusũ ea katuniki”, iwanã, xinaĩ ibubis kẽhairayamakubaĩkãwẽ, betsabube hãtxairã.

⁴ Haska inũ, nukũ yura hirabi ha pabu tibi nebauna daya betsa tibi hayaki, haskasmarã.

⁵ Haska keskari nũ yura itxapabubia Cristoki dasia nũ yura bestitxai keskaki, nũ habũ Cristo dayashunai pabu betsa tibibia nũ habias yura bestitxai keskabuki.

⁶ Nũ haskawẽ taeshũ nuku tibi hawẽ dayati kuxipa nuku inãmiski, haska nuku tibi nuku inãkatsis ikĩ inãkinã. Haskakẽ Deusũ hawẽ hãtxa yuishunika haratura matu katua ikũhairawai hawẽ kuxipa hayakĩ shabakabi hawẽ kakape hatu yusĩ hãtxakubaĩkãwẽ.

⁷ Haska inũ, tsuabura hawẽ merabenãti kuxipa hatu inãkẽ hau habias merabenãti kuxipawẽ ikũwaĩ betsabu hau hatu uĩmakĩ merabewakubainũbũwẽ. Haska inũ, tsuabura Deusũ hãtxa yusĩnã kuxipa inãkẽ ikũwaĩbu kuxipa wakĩ hatu yusĩkĩ hau tapĩmakubainũbũwẽ.

⁸ Haska inũ, tsuabura Deus anua xinã txãkãwẽ hatu txibãmatiru kuxipa bitã ikũwaĩbu betsabu merabewakĩ hau Jesus Cristo hatu txibãmakubainũbũwẽ. Haska inũ, tsuãra hawara bitã merabenãkatsis imisburã, yauxiama hau hatu inãkĩ uĩmakubainũbũwẽ. Haska inũ, tsuabura ikũwaĩbu betsabu merabewakĩ meketiru kuxipa wakĩ haya waburã, kaneama hau uĩrakubainũbũwẽ. Haska inũ, tsuabura yura betsa nuitapaibuwẽ nuimis kuxipa haya xinã txãkãwẽ hau hatu merabewariakubainũbũwẽ.

Jesus txibaĩ haskai hiwetikiaki, na hãtxarã

⁹ Ẽ betsabu inũ ẽ puibuũ, yura betsabuwẽ nui abukĩ tsua parãma txanima kayabi uĩmakĩ hatu merabewakubaĩkãwẽ. Haska inũ, hawara pe besti beya wakĩ hawara txakabu akama henekĩ danãkubaĩkãwẽ.

¹⁰ Ha inũ, matũ betsa kayabi keska wakĩ ikũwaĩbu betsabu hawara pepa mã amis xinãma hakia ikũwaĩbu betsabube merabenamekĩ habube nuinamei duanamekubaĩkãwẽ.

¹¹ Ha inũ, hawara nukũ Shanẽ Ibũ abuai dayashũkĩ ibubis txikixama hamapai tibi xinãkĩ huĩtinĩ xinaĩ benima paewẽ ashũkubaĩkãwẽ.

¹² Ha inũ, Deusũ matu yubani hawa betsa wama ishanai unãkĩ mã manaiwẽ taea benimai hiwekubaĩkãwẽ. Ha inũ, matu itxakawaibu bika tenei txĩtuãma mestẽkubaĩkãwẽ. Haskakĩ Deusbe hãtxakĩ hamapai tibikiri yukai heneyamakubaĩkãwẽ.

¹³ Ha inũ, matubetã ikũwaĩ betsabu mabu yupaibu hawara mã haya pashkashũkĩ hatu merabewakubaĩkãwẽ. Ha inũ, ikũwaĩ betsabu haniara matuki bai beabu matũ hiwe anu ishũ pimatã hatu ushãkubaĩshãkãwẽ.

¹⁴ Ha inũ, tsuãra matu itxakawaibu habiaskari ana xinãma hatukiri pe besti yuikĩ hatu hãtxa wakubaĩkãwẽ. Haska wakĩ pepakiri Deus hatu yukashũkubaĩkãwẽ, txakabukiri yupukĩ Deus hatu yukashunamarã.

¹⁵ Ha inũ, tsuara huĩti benimai xinã txãkaĩbube habiaskariai hatuberi benimai xinã txãkãkubaĩkãwẽ. Ha inũ, tsuara bika teneai huĩti nixma punu nukakẽ habiaskari habetã xinãriakubaĩkãwẽ.

¹⁶ Ha inũ, mã hatubetã ikũwaĩ habube hiwearã, hatube ha ikama duanamei unãnuma hiwekubaĩkãwẽ. Matũmebi keãmarã, habũ hawara hatũ hamapai xinãma hakia habu xinã pepa haya keĩsbumabe haibunamekubaĩkãwẽ. Tsuãra xinaĩ: “Ea besti unãnepakĩ ẽ pewamiski”, ikĩ hatu mesewakĩ dakewayamakubaĩkãwẽ.

¹⁷ Ha inũ, yura betsabũ matu itxakawabu ana hatube manakunãyamakubaĩkãwẽ. Ha inũ, hawara pepa yura betsabũ abukĩ matu yunuabu txibãkĩ mã haskari akairã, hatu bebũshũ shabakabi ashũkĩ uĩmakubaĩkãwẽ.

¹⁸ Ha inũ, yura betsabu duawanũ, iwanã, dasibi pepa mã akubaĩtirubu besti aki hatube unãnuma hiwei pekatsis mã ikairã, dasibibu daewakubaĩkãwẽ.

¹⁹ Ẽ betsabu inũ ẽ puibuũ, matuwẽ nuikĩ matu yuinũ ea nĩkakãwẽ. Yavé Deusũ hatu yuikĩ: “Tsuãra matu txakabuwai ibubis ẽ hatu kupishanaii”, ikaya nuku keneshuniki. Haskawẽ taea tsuãra matu txakabuwakĩ itxakawayarã, hau Deusũ hatu kupishanũ ibubis hatu kupiama teneyukubaĩkãwẽ.

²⁰ Hakia Davĩ bake Salomão unãnepatũ hatu yusĩkĩ: “Matuki pubẽbiamisbu habu buniaibu hatu pimakubaĩkãwẽ. Ha inũ, ũpash manuriaibu amariakãwẽ. Mã hatu haska wairã, pepa besti mã hatu ashũkubaĩkatsis ikai uĩ dakei besu shanabiri ishãkanikiki”, anikiri habiaskari xinãkĩ txibãriakubaĩkãwẽ.

²¹ Ha inũ, hau txakabũ matu maemakĩ binuyamanũ haskawẽ taea matunã, pepawakĩ txakabu binumakubaĩkãwẽ.