Romanos 11 - Kaxinawá Bíblia (BR)

Deusũ hawenabu wakatsi ikĩ Israelbu bebũkiri hatu katunikiaki, na hãtxarã

¹ Nukũ shenipabu katukĩ hawenabu hatu wanishũ nuku danaĩsmaki, txanimarã. Haskawẽ taea earã, ẽ shenipabu kayabirã, Abraãoki. Hanua hawẽ baba betsa Israel ẽ shenipaburiki. Ha hawẽ bake betsa Benjamim anua ẽ habiariki. Haska Deusũ nuku yubani xinãkĩ Jesus Cristo ẽ ikũwaĩwẽ taeshũ ea danãma ẽ txakabu buanishũ ma ea mekeikiki, haska Israel tibi anuabũ tsuabũra Jesus Cristo ikũwaĩbu hatu mekeshanai keska wakinã.

² Bebũkirihaira Israelbu habu katukatsis ikĩ Deusũ katunishũ nuku danãma imiskiri matu shabakabi yusĩkĩ hawẽ hãtxa yuishunika pepa Eliaskiri ẽ matu yuiai nĩkakãwẽ. Hawenabukiri hawara Elias Deuski ha ikĩ haki txania hawẽ hãtxa yuishunika betsã keneshũkĩ:

³ “Yavé Deus Hiweatuũ, mĩ hãtxa yuishunikabu tenãkĩ keyutã hanushũ mixki txi tapu fogão sa akĩ keyutã eã besti ẽ mia ikũwaĩ ea tenãriabuma ma ea tenãkatsis iriakanikiki”,

⁴ aka Deusũ Elias yuikĩ: “Dateyamawe. Mĩ mimestimaki. Enababu betsa habu ẽ hatu mekea 7.000 hayabuki, habũ ea txibaĩ txĩtuãbuma ha yushĩ betsa Baal dami ha namã dãti itã habũ kẽwãbumarã”, akĩ Elias yuiniki.

⁵ Haskawẽ taea na habiatiãri Israelbu ana hatirama hatuwẽ nuikĩ Deusũ hawẽ duapawẽ hawenabu wakatsi ma nukuri katuniki, hau Jesus habũ nũ ikũwãshanũbunã.

⁶ Na haska nũ habũ txibaĩnã, hawẽ yunuti inũ hawẽ nemati txibaĩ nukũmebi nũ pepaiwẽ taeama hakia hawẽ pepawẽ nukuwẽ nuikĩ Deusũ nuku kenakĩ nuku katukubainikiki, hau habũ Jesus nũ ikũwanũbunã. Haska nuku wamarã, Deusũ pepa hayama ikeanaii.

⁷ Haskakẽ Israelbu pepatirubu mirimabũ tapĩpaibiabu kanei huĩti kuxikĩ unãbuma Deusũ hãtxa hawẽ hiwekaĩti biama inibuki. Haskabiaibũ hatiri Deusũ katuabũ habũ hatũ hiwea binibuki.

⁸ Haska Deus nĩkama huĩti kuxibukiri Deusũ hãtxa yuishunikatũ kenekĩ: “Hatũ pabĩki pata keska hatu wakĩ hatũ beru bekũ keska hatu wakĩ hatũ xinã Deusũ beshekĩ hatu haska waniwẽ taea natiãri habũ hawẽ yusĩa txibãtirubuma ikubaĩkanikiki”, haska yuini keskairã.

⁹ Haska inũ, ana Deus txibãbuma ishanaikiri Davĩ yuikĩ: “Hamapai piti betsa betsapa haya hawẽ besti beyusi unaĩsmapai harakiri pashai kaĩtirubumaki, nawatikis ikabu hau Deusũ hatu kupinũwẽ.

¹⁰ Ha inũ, hau hawa ana uĩyamanũbũ Deusũ hau hatu beshush wanũwẽ. Ha inũ, hamapai bika tenei dayakĩ shãkamahaira ia kakui tinĩkũkaini hau ana tenehairakubainũbũwẽ”, iniki.

Habu Israelbumabiakẽ Jesus ikũwaĩbuwẽ taeshũ Deusũ hawenabu hatu wakubainikiaki, na hãtxarã

¹¹ Hanua mã xinãnã, Israelbũ Jesus danaĩbũ Deusũ hatu hene keyunimẽ, ana ikũwãtirubumarã? Haskamahairaki. Hakia Israelbu hawenabubia habũ Jesus danaĩbũ hanushũ Deusũ habu Israelbuma hawẽ kakape Jesus Cristowẽ hatu mekekĩ taewaniki, hatu haska wa Jesus Cristo Israelbumã ikũwaĩbu uĩ hau hatuwẽ kemukĩ Israelbũri ana xinã betsa watã habũ mekenã Jesus Cristo hau ikũwãriashanũbunã.

¹² Haskakẽ hawara Deusũ abuai Israelbũ danãkĩ betsa betsapa wabiaibũ ha habu Israelbumã hawẽ bake Jesus Cristo danãma habũ abukĩ Deusũ kakape Cristokiri nĩkatã habũ akai Israelbũ xinaĩ txanima habuwẽ taeshũ Israelĩ baba mirimabũri hawẽ hãtxa ikũwaĩ bepesheshãkanikiki, Deusũ hatu ana duahairawakĩ ibu wayarã.

^13-14 Mã ebetã Jesus ikũwaĩ Israelbumaã, ẽ eskaki, matu yuinũ nĩkakãwẽ. Hau Israelbuma betsa betsapabu anu ẽ hatu yusĩkubaũshanũ Deusũ hãtxa yuishunika hawẽ kuxipaya Jesusũ ea washũ ea nitxĩniwẽ taea ẽ hawẽ daya pe haya ashuĩ ẽ benimakũkainaii. Haskakẽ matu yusĩkubaũkĩ haska Jesus Cristo mã ikũwaĩbu enabu Israelbu hatu ikũwãmakatsis ikĩ haska mã ikũwaĩ hawẽruai benimaibũ hawẽ hatu kemumakĩ hatiriburi hatũ xinã ẽ betsa wamakatsis ikũkainaii, hau Deusũ hatu mekeriashanunã.

¹⁵ Haska enabu Israelbũ Jesus Cristo danaĩbuwẽ taeshũ yurabu mai hirabi anu manibaũshũ Deusũ kakape habũ Jesus Cristokiri ikũwãbaunaibuwẽ taeshũ enabũ ikũwãkĩ taewariakĩ hatũ txakabu henei haki petxitã yura mawa ana besteã keskai hiwe kuĩa biriai benimashãkanikiki.

¹⁶ Haska inũ, misi kapamanai ma bai keyua ha dukũ ture Deus inãkatsi ikĩ pashkabu meribi inãtikẽ habias ha misi kapamanaria habiaskari hirabi meribiriki. Haska keskari hi tapũ betsa yumei ha Deus ibu wamakĩ meribi wa hawẽ pũyãri Deusunamiski, meribirã. Haska keskai Abraão inũ, Isaque inũ, Jacó habu meribi pepabuwẽ taea habu hawenburi meribi ishãkanikiki.

¹⁷ Nũ judeuburã, oliveira hi kayabi keskabuki. Hakia hawẽ pũyã babu betsa meshtetã oliveira mebi betsa kuxipa haki tsamĩtã nea dasibi habias tatxanua hawẽ shuku hawẽ namibe husitã habias yumemis keska Abraãonẽ bababu Deusũ hatu watã Israelĩ baba betsabũ Deus txibãkĩ ikũwãbuma Deusũ oliveira pũyã meshtea keska wakĩ hatu danãtã maturi Deusũ hawenabu wakĩ Abraão matũ shenipabu keska matu wariakeakeikiki. Haskakẽ Deus hawenabu Israelbuwẽ nuikĩ hatu duawakubaĩshanai Deusũ Abraão yubani keska wakĩ mã Israelbuma matuburi Abraãonẽ bababu keska watã matuwẽ nuikĩ matu duawaikiki, oliveira kuxipaki tsamĩa haki nea keskawakinã.

^18-19 Hanua tsuabura hãtxai: “Earã, ẽ Israelĩ babamabia Deusũ hawenabu ea wakatsis ikaiwẽ taeshũ haki ea dasiwanũ, iwanã, Israelbu danãtã hawenabu ea waniki”, iki matũmebi kẽkĩ xinã txakai hatukiri ẽ hẽ iyamakãwẽ. Hakia mã tatxa ibumabia mã hawẽ pũyã besti mã haki neaki, hawẽ tatxã matu hiwemairã. Deusũ besti hawenabu matu waiwẽ taea keãma Deus besti xinãkĩ duawakĩ kẽhairawakubaĩkãwẽ.

²⁰ Eskawẽ taeshũ hatu meshtea keska wanirã, matu yuinũ nĩkakãwẽ. Habunã, Deusũ hãtxa ikũwãbumawẽ taeshũ hatu heneniki. Hakia matubu mariastũ mã ikũwaĩburã, hawenabu matu waikiki. Haskawẽ taea hawẽ keãma Deus bestiki mesekubaĩkãwẽ.

²¹ Txanima Deusũ Israelbu dukũ katubianishũ hatu danãniki. Mã habu keskarikẽ matu habiaskari wakĩ danãtiruki. Xinaĩrakubaĩkãwẽ.

²² Uĩkãwẽ, Deusrã, nuikipa hawẽruaki. Haskabia hawẽ yunua mestẽ binumaismaki. Habu txĩtuaĩbu danãkĩ hatu kupimisshũ matu mã Israelbumabiakẽ matuwẽ nuikĩ duawakĩ hawenabu matu wakeakekubainikiki. Hakia haska hi pũyã babu meshteshũ putamisbu keska wakĩ matũri hawẽ xinã txibãma mã txĩtuaĩbu Deusũ matu danãtã matu kupiriashanikiki.

²³ Haska inũ, Israelbu haratubũra hatũ xinã txakabu henetã txĩtũkirã ana ikũwãkatsis ikaibu ana Abraãonẽ bababu kayabi wakĩ Deusũ ana hawenabu hatu washanikiki, hiki ana netã keska wakinã.

²⁴ Hamẽ mã judeubumã bari itxapa Deus mã danãbiakubainaya atimas Deus matuwẽ nuiaya hawẽ kakape Jesus Cristokiri nũ matu yusĩayã xinã betsa watã mã ikũwaĩbũri ana habiaskari wakĩ Israelĩ baba kayabibũ xinã betsa wariatã itxapabũ ana txĩtũkirã txanima Jesus ikũwãriashãkanikiki, bebũkiri Deusũ hatu katunibunã.

Israelbũ Jesus Cristo atimas ikũwaĩbu Deusũ hatu mekeshanikiaki, na hãtxarã

²⁵ Ẽ betsabu inũ ẽ puibuũ, Deusũ kuxipawẽ unãnepai hawẽ mã kẽyamashanũbũ hawara Deusũ matu ashũkatsis ikai haska hawẽ yubaka hunea hãtxani mã unã keyushanũbũ matu yuinũ nĩkakãwẽ. Haskai Israelbu huĩti kuxikĩ itxapabũ Jesus ikũwãbumaki. Haskakẽ Israelbuma hatira Deusũ meketã hanushũ itxapabu Deusũ Israelbu habu ana mekeriashanikiki.

²⁶ Habu haskabaunaibũ Israelbu mirimabũ ikũwãriaibu Deusũ hawenabu hatu watã hatu mekeriashanikiki. Haska wai kaikiri hawẽ hãtxa yuishunikatũ kenekĩ: “Matũ mekenã Messias Israelĩ baba Jerusalém anua kaĩtã Jacõ bababu hatũ xinã txakabu betsa wamakĩ

²⁷ haska ea Deus ẽ hatukiri yubakani habũ txakabu buatã ẽ ana xinãma ishanaii, hatũ mekenã Messias hukenã”, iniki.

^28-29 Hanushũ tsuabura Deusũ katutã habuwẽ nuikĩ duawamis inũ hawara hatuki tanani hawẽ xinã Deusũ betsa waismawẽ taeshũ Abraão inũ Isaque inũ Jacó hatu katuni habũ bababũ kakape Cristokiri danaĩbu Deus hatuki sinatayuikiki. Haskawẽ taea ha hatu maebaũ matu hawenabu wariayuikiki. Haskabia hatũ shenipabũ ikũwãnibu hakimama hatuwẽ nuikĩ Deusũ Israelbu heneama hatu xinãriaikiki.

³⁰ Uatiã hawa Jesus Cristokiri unãma Deus mã nĩkama iyupaunibuki, matubunã. Habiaska keskariai natiã Israelbũ Jesus Cristokiri xinãkĩ Deus nĩkabumariki, mã inibu keskakinã. Haskakẽ Deus natiã matuwẽ nuikiki.

³¹ Haska inũ, natiã hawẽ nuiwẽ Deusũ matu hawẽ duapa uĩmakĩ matu duawaikiki. Habiaska keskari wakĩ ha Israelbu hatuwẽri nuiriashanikiki.

³² Dasibi yurabu txakabubiakẽ Deusrã, dasibiwẽ nuikĩ hanu hawẽ nui hatu shabakabi uĩmakatsis ikikiki, tsuara Israelbu inũ tsuara Israelbumakiri hawa xinãmarã.

³³ Haskakẽ nukũ Epa Deusrã, hawa yupaismaki. Dasibi nĩkai inũ xinaĩ unãnepahairaki. Ha inũ, haska wakatsis ikĩ Deusũ xinãkĩ hamapai akubaĩmisrã, hawẽ akarã, nũ haska washũ tapĩtirumahairaki.

³⁴ Ha inũ, haskarara Deusũ xinãmis hawẽ hãtxa yuishunikatũ kenekĩ: “Deusũ xinãnã, tsuã nĩkatirumaki. Ha inũ, Deusũ harakirira xinãyã tsuã merabewakĩ shabakabi ana haska washũ yusĩtirumaki”,

³⁵ iwanã, ana yusĩkĩ: “Hamapai betsa betsapa tsuãra Deus ashũbiatã hawẽ dayawẽ taeshũ duawakĩ hau eari inãshanũ, iwanã, haska xinãtimahairaki, menã akinã”, iniki.

³⁶ Haskakẽ betsa tukama tibi Deusũ damiwanirã, hawenaski. Hawẽ kuxipawẽ dasibibu maniabuki. Dasibibu ha hiweabuwẽ Deus benimakũkaĩshanũ, iwanã, habu tibi damiwaniki. Haskakẽ kẽwãkĩ heneyamakubainãkãwẽ, Deusrã. Haskakirã.