Isaías 8 - Kaxinawá Bíblia (BR)

Hawenabu hawẽ hatu unãtirubukiri Isaíasĩ hawẽ bake kenanikiaki, na hãtxarã

¹ Senhor Deusũ ea yuikĩ: “Hi besha ture sapa bitã haki mĩ hãtxa kuĩwẽ eska kenewe: ‘Maer-Salal-Hás-Baz’, wakinã.

² Haska mĩ wai habũ uĩtã txanitirubu huni dabe txanitxakaisma Deusbe hawenabu hãtxashunika Urias inũ betsa Jeberequiasĩ huni bake Zacarias hau unanũ hatu bebũshũ kenewe”, ea wa

³ txipu ẽ aĩ Deusũ hãtxa yuishunikabe ẽ habe txutanameima ha tuyatã huni bake kainiki. Hanushũ Senhor Deusũ ea yuikĩ: “Mĩ bake kenakinã, ‘Maer-Salal-Hás-Baz’, washãwẽ, nukũ hãtxawẽ yuiarã, ‘Hawairakirã atxishũ yamawaki’, akinã.

⁴ Mĩ bake kaĩma hawa hãtxa pesei kenãnamei: ‘Papaii’, iki ‘Mamaiĩ’, iriamakẽ Damasco inũ Samaria anu hiweabu Assíria nawabũ hatu atxishũ yamawatã hatũ mabu hawẽrua hatũ shanẽ ibũ hiwe ewapa anu bushãkanikiki”, ea watã

⁵ Deusũ ana ea yuikĩ:

⁶ “Assíria shanẽ ibu Rezim inũ Remaliasĩ bakẽ hatu datekĩ atxikatsis ikaibuwẽ taea Judá enabu hatuki dateaibũ Siloé hene pes daka unãshubira habamis Judá enabũ itxakawakanikiki.

⁷ Haskawẽ taeshũ Hene Eufrates Senhor Deusũ mata wakĩ hatu atximashanikiki. Haska yuiarã, Assíria shanẽ ibũ hawẽ kushipawẽ hatu atxi keyushanikiki. Hawẽ pashku teshesha tibiwẽ hene hikibaĩkĩ dasibi kẽku mataismabia atxikĩ keyukĩ

⁸ Judá mai pakea hari binubaĩ hari kesuismabia kẽku tsakashanikiki. Isa hawẽ pei pexa dakamis keskakĩ, Emanuelĩ, mai hirabi mĩ atxi keyushanaii.

⁹ Nawa shukua tibibuũ, matunabube itxatã hatu deteshãkãwẽ. Mai pakea txai tibi anu hiweabuũ, mã eskashanai nĩkakãwẽ. Detenamenũ ishũ matũ pia mã bibiabauna txanima mã datehairashanaii.

¹⁰ Mã nukukiri yubakabia mã akama ishanaii. Haska betxipaikĩ mã katushũ yuibia mã nuku akama iriashanaii, Deus nukube nashui itã nuku mekeawẽ taearã.”

Senhor Deuski besti mesei haki datetikiaki, na hãtxarã

¹¹ Senhor Deusũ ea tsuma mestẽwãtã ha huni txakabubũ shinã ẽ hatu txibãyamanũ bebũkiri ea unãmakĩ nemakĩ ea yuikĩ:

¹² “Habu matukiri yubakaibũ hatubebis yubakayamakãwẽ. Habũ matu datekĩ mesewabiaibũ hatuwẽ dateyamakãwẽ.

¹³ Senhor Deusũ dasibi binua meribi pepa hatũ nema keyutiru bestiki datekãwẽ. Ha bebunua besti mã haki datetiruki.

¹⁴ Earã, matuwẽ taea ẽ eskaki. Ẽ matũ itxati hiwe meribi keskaki. Hakia Israelĩ bakebũ shanẽ ibu dabe ẽ mishki daka haki huti itirubu keskaki. Eki huti ika keskatã ea danaĩ ha shanẽ ibu dabe hatunabube di ishãkanikiki. Jerusalém merã hiweaburã, ẽ birũ keska anu hikitã haburi harakiri kaĩtima nuitapashãkanikiki.

¹⁵ Itxapahaira eki huti ishãkanikiki. Eki huti itã di iki mawashãkanikiki. Haburã, birũ merã hikiaibu hatu bepuabu harakiri kaĩtirubuma ishãkanikiki”, itã,

Hawẽ tsumabu bebũkiri haskashanaibu Isaías hatuki txaninikiaki, na hãtxarã

¹⁶ ana Senhor Deusũ ea yuikĩ: “Na ẽ hãtxarã, arukĩ pewawe. Haska ẽ mia yusĩkĩ unãmashurã, mestẽwãtã miki txiti ikabu hatu yusĩkubaĩwẽ”, ea waya

¹⁷ Senhor Deusũ hawẽ hãtxa Jacó enabukiri hunebiaya eanã, ikũwaĩ ẽ haki txiti ikaii.

¹⁸ Senhor Deusũ hawẽ bake betsabu ea anu inãkĩ yunua habubetã Israelĩ enabu Senhor Deusũ haska betxipaiai hawẽ kushipa unãmakĩ shabakabi wati nũ ikũkainaii. Mati keyatapa Sião anu hiweshũ Senhor Deus dasibi kushipa binuatũ nuku yunua nũ akai nũ hawena nuku uĩshãkanikiki.

¹⁹ Hakia huni betsabũ matu yuikĩ: “Mawabũ yushĩbe hãtxamisbu yukakãwẽ. Ha huni mukayabu hatũ yushĩbe hãtxai shei ikawẽ tsuã nĩkatirumawẽ hãtxamisbuki. Yurabu hatũ yushibube hãtxakinã, mawabũ unanepa hãtxa yukatimamẽ, hiweabunã,

²⁰ haskashanaibu tapĩkinã? Haska hakiri hãtxakĩ yukabiamisburã, habũ yuiairã, patapa unaĩsmapabuki!

²¹ Ha huni shinã pewama buni paepai buni bestiwẽ nui sinatai mapubaũshãkanikiki. Haskakĩ hatũ shanẽ ibuhaira inũ hatũ yushibu yupui hatuki hãtxa txakabushãkanikiki. Manaũri nai teskãshũ uĩtã

²² hanushũ txipu maĩ tinĩtã hawa pepaki nukuama nuitapahairai inũ meshu merã bika besti tenei dasibi meshũ besti atxia uĩshãkanikiki. Habũ hatu atxia harakiri shinãbaini pashatirubuma ishãkanikiki.