1 Reis 1 - Kaxinawá Bíblia (BR)

Davi anibuhairai eskanikiaki, na hãtxarã

¹ Shanẽ ibu Davi anibui mestebuhairaya tari itxapa sawemakĩ dakukuti itxapawẽ yabuhairabiabu hawa shanamahairakẽ

² haskawẽ taeshũ hawẽ merabewanikabũ shinãbaũ yuikĩ: “Txipash beneumatũ merabewakĩ mia mekei mibe ushakĩ hau mia shanawakubaĩshanũ mĩ shanẽ ibu beshmasbũ hau mia txipash benashũbaũtanũbũ hatu yunuwe”, akabu

³ haska shinaĩbu keska Davĩ hatu yunua Israelĩ enabũ mai pakea hirabi anu txipash hawẽrua benakubaũkĩ atimas mae betsa hawẽ kena Suném anu txipash betsa hawẽ kena Abisague betxitã shanẽ ibuhaira Davi anu iweshunimabu

⁴ Abisague hawẽruahairatũ shanẽ ibuhaira Davi merabewai habe ushabiakũkainaya Davĩ hawa mekĩ txutamahaira ikũkainikiaki.

Hawẽ epã shãtukũ Adonias ibubis shanẽ ibunũ ika kẽnikiaki, na hãtxarã

⁵ Habiatiãri Davĩ aĩ Hagitẽ hawẽ huni bake Adonias, iyuamabia hawẽ epã shãtukũ ea shanẽ ibuhairanũ ika ibubis benikauã hatu yuikĩ: “Earã, Israelĩ enabũ shanẽ ibuhaira ẽ matu ishũshanaii”, ikũkaĩkĩ detenamenikabu cavalõ tarãbaĩti betsa betsapa hawẽ ibuana katukĩ itxawakubaĩkĩ detenamenikabu cavalo katsaumemisbu katukĩ habũ meketi wakĩ 50 hunibu hawena wakĩ katutã hiwekũkaĩkĩ

⁶ haska Adoniasĩ akai Davi yuibiabu hawẽ bake Adonias nemakubaĩsma inũ ha haskaitiã: “Mĩ haskanũ ika ikai?” iwanã, bebũkiri unãkĩ yukaisma inikiaki. Hanua Absalão ha dukũ kaini hawẽrua inikẽ ha katxu Adonias kaĩriani habiaskari hawẽrua irianikiaki.

⁷ Hau Adonias hatũ shanẽ ibuhairanũ, iwanã, Zeruiã bake Joabe inũ hawenabu Deusbe hãtxashunika Abiatarbe yubakaimawẽ taeshũ ha dabetũ Adonias merabewakubainaibũ

⁸ hakia hawenabu Deusbe hãtxashunika Zadoque inũ Joiadã huni bake Benaia inũ, Deusũ hãtxa yuishunika Natã inũ, Davĩ haibuhaira merabewanika Simei inũ, Reí inũ, detenamenikabũ Davi merabewamisbũ habu kushipabũ Adonias betxipaikatsi ikabumakẽ

⁹ shaba betsatiã: “Ẽ hatũ shanẽ ibuhaira ishanaii”, ikĩ hatu unãti wamanũ, iwanã, besi itamama wakatsi hawẽ tsumabu yunua Rogelĩ ũpash txatxa dapi Zoelete mai pakea kesha unãti mishki ewapa anushũ txashuwã inũ ina awa inũ ina awa bene yume bena hawẽ hubu meshtemisbu shuahairabu tesẽ keyushũ dashpe keyushũ hawẽ nami bawakĩ keyuriabuma Adoniasĩ betsabu Davĩ huni bake betsabu besti inũ Judá enabũ shanẽ ibuhaira Davi dayashũmisbu hatubetã pi benimakatsi Adoniasĩ hatu kena bea itxabũ

¹⁰ hakia hati hatu kenamarã, Deusũ hãtxa yuishunika Natã inũ Davĩ mekemisbu shanẽ ibu Benaia inũ, Davi detenamenikabũ merabewamisbu inũ, hawẽ betsa Salomão Adoniasĩ habube iama ikẽ

¹¹ haskaibu Natãnẽ nĩkatã Salomãonẽ ewa Bate-Seba anu kashũ habe hãtxakĩ yuikĩ: —Davi nukũ shanẽ ibuhaira ma tsuã banabimawana ikimẽkaĩ. Ha hawẽ aĩ betsa Hagitẽ bake Adonias: “Ẽ matũ shanẽ ibuhaira benaki”, ikĩ yuikĩ hatu pimai benimairã, mĩ ma nĩkamẽ?

¹² Mia inũ mĩ bake Salomão mã mawayamashanũ unanepa hãtxa ẽ mia tapĩmai ea nĩkawe.

¹³ Shanẽ ibu Davi anu kashũ eska yuitãwẽ: “Ẽ shanẽ ibuũ, ẽ bake Salomãonẽ Israelĩ enabu yunui hau hatũ shanẽ ibuhairashũkũkaĩshanũ mĩ ebe yubakabiaimakẽ haskai Adonias shanẽ ibui taeimẽkaĩ?” akĩ na habias hãtxa mĩ yuiaya

¹⁴ eari hikitã haska mĩ yuiai keskari eãri habiasri Davi ẽ mia yuishuni kaii— aka

¹⁵ hawẽ hãtxa nĩkatã hanu Davi ushamis dĩtu anu Bate-Seba kai hikia shanẽ ibuhaira Davi anibuhaira Suném anua txipash Abisague merabewaya

¹⁶ Bate-Seba dãti iki beti ika dakakẽ shanẽ ibuhaira Davĩ yukakĩ: —Mĩ hawa ea yuikatsis ikai?— aka

¹⁷ kemakĩ yuikĩ: —Ẽ shanẽ ibuũ, mia yuipa? Mia katxu mĩ bake Salomão Israelĩ enabu shanẽ ibui mĩ shanẽ ibui tsaumis anu tsaushũ hau hatu yunukubaĩshanũ mĩ mekenika Senhor Deusũ kenawẽ mĩ ma ebe yubakabiaimakẽ

¹⁸ mia hawa banabimamabia: “Ẽ matũ shanẽ ibuhaira benaki”, ikĩ Adoniasĩ hatu yuikiaki, ikisrã.

¹⁹ Ina awa inũ ina awa hubuuma shuahairabu inũ txashuwã itxapa tesẽshũ dashpeshũ hawẽ nami ma pewabu hau habetã pinũbũ mĩ huni bake betsabu inũ Deusbe nukunabu hãtxashunika Abiatar inũ detenamenikabu shanẽ ibu Joabe Adoniasĩ hatu kenashũ ma hatu pimaikiaki. Hakia mĩ merabewanika mĩ bake Salomão kenamaki.

²⁰ Mia katxu tsuara Israelĩ enabu shanẽ ibuhaira ikũkaĩshanai mĩ katushanai unãkatsi dasibitũ manakanikiki.

²¹ Mĩ hawa katuama Adonias shanẽ ibukũkaĩkĩ mĩ mawakẽ mĩ bake Salomão inũ ea tenãtiruki— iki

²² habe hãtxai heneriamakẽ hawẽ dĩtu hikiti shui anu Deusũ hãtxa yuishunikari Natã ma hua hikikatsi ikaya

²³ Davi mekemisbũ yuiabu hau hikinũ Davĩ hatu yunua hanushũ bitxiabu Bate-Seba kaĩkiranaya Natã hikia dãti iki beti ishũ

²⁴ Davi yukakĩ: —Mia katxu Adonias shanẽ ibuhairakũkaĩshanai mĩ ma yunuamẽ?

²⁵ Na habiatiã ina awa inũ ina awa hubu meshtemisbu shua inũ txashuwã itxapa tesẽshũ dashpeshũ ma bawabu mĩ huni bake betsabu inũ mĩ detenamenikabu shanẽ ibubu inũ nukunabu Deusbe hãtxashunika Abiatar Adoniasĩ hatu kena butubaĩ habetã pikĩ mabesh neshui benimakĩ hui kushipawẽ yuikĩ: “Nukũ shanẽ ibuhaira Adonias hau hiwekũkainũwẽ”, ikaibũ

²⁶ hakia ea inũ, nukunabu Deusbe hãtxashunika Zadoque inũ, mia mekemisbu shanẽ ibu Benaia Joiadã bake inũ, mĩ bake Salomão Adoniasĩ nuku habu pimakatsi kenamaki.

²⁷ Mĩ shanẽ ibunã, mĩ ma hatu yunuamẽ? Ẽ mĩ dayaru ea yuiama haskakĩ haratu mĩ bake mia katxu shanẽ ibushanai mĩ ea banabimamamẽ?— aka

Hau Salomão shanẽ ibuhairashanũ Davĩ shabakabi hatu yununikiaki, na hãtxarã

²⁸ hawẽ aĩ Bate-Seba ana hau kenanũbũ Davĩ hatu yunua ma iweaibũ Natã kaĩkainaya Bate-Seba ana hikia shanẽ ibuhaira Davi bebũ nia

²⁹ Davĩ hãtxa wakĩ yuikĩ: —Ea txakabuwakubaĩkĩ ea datepayabu ea hatu beshteshũmis Senhor Deusũ ea nĩkaya shabakabi ẽ mia yuiaii.

³⁰ Ea katxu mĩ bake Salomão ẽ hanu shanẽ ibui tsaumis anu tsaushũ Israelĩ enabu dasibi yunui shanẽ ibuhairakũkaĩshanai ikis nukũ bake Salomão ẽ mia katushunaii. Israelĩ enabu mekenika Senhor Deusũ ea nĩkaya ẽ mibe yubakaii— akaya

³¹ shanẽ ibuhaira Davi bebũ nia ana haki dãti iki beti ishũ hui kushipawẽ yuikĩ: —Ẽ shanẽ ibuhaira Davi hau hiwepakenũwẽ!— ikaya

³² hanushũ nukunabu Deusbe hãtxashunika Zadoque inũ Deusũ hãtxa yuishunika Natã inũ Joiadã bake Benaia hau benũbũ Davĩ hatu yunua hatu yuiabu ha dabe inũ besti shanẽ ibu bebũ ma bea mapuabũ

³³ hatu yuikĩ: —Ea dayashũmisbu ẽ shanẽ ibububetã ẽ bake Salomão iyukĩ ẽ mula ea besti ẽ haki katsaumekaĩmis katsaũtã ha pashku deti ika hawẽ kena Giom anu ẽ mulaki katsaũbaĩkĩ iyutãkãwẽ.

³⁴ Harishũ Israelĩ enabu shanẽ ibuhaira hau hatu ishũshanũ hatu unãti wamakĩ mĩ nukunabu Deusbe hãtxashunika Zadoque inũ Deusũ hãtxa yuishunika Natãnẽ harishũ sheni ininipawẽ maukatãkãwẽ. Haska watã txashuwã mashũ hatu txã txã amakĩ: “Shanẽ ibuhaira Salomão hau hiwekũkaĩshanũwẽ”, akĩ dasibibũ hui kushipawẽ hatu yuimakubirãtãkãwẽ.

³⁵ Hanushũ Israelĩ enabu inũ Judá enabu yunui hau shanẽ ibuhairakũkaĩshanũ ẽ ma katuawẽ taea iwekĩ ẽ shanẽ ibui hanu tsaumis anu tsaua ẽ shãtukũ ha shanẽ ibuhairai ikũkaĩshanai ẽ hiwe hawẽrua ewapa anu habe betãkãwẽ— hatu wa

³⁶ Joiadã bake Benaiã kemakĩ yuikĩ: —Habiaskaki! Ẽ shanẽ ibuhaira Davĩ mekenika Senhor Deusũ hau habiaskari yunukubainũwẽ!

³⁷ Haska mia merabewakubirãmis habiaskari wakĩ Senhor Deusũ hau Salomão merabewakubainũwẽ, shanẽ ibu kushipahaira wakĩ mĩ imis mia binumakinã— ikaya

³⁸ hanua hawenabu Deusbe hãtxashunika Zadoque inũ Deusũ hãtxa yuishunika Natã inũ Joiadã bake Benaia detenamenikabu Quereteu nawabu inũ Peleteu nawabũ Davi mekemisbube bushũ Davĩ mula Salomão katsaũtã pashku debu deti ika Giom anu iyushũ

³⁹ Deuski nukuti tari hiwe pũtenibu anushũ sheni inĩti mashũkia bitã Israelĩ enabu shanẽ ibuhaira hatu unãti wamakĩ Deusbe nukunabu hãtxashunika Zadoquẽ Salomão sheni ininipa maukatã txashuwã mashũ hatu txã txã amakĩ dasibi ha hatube buabũ hui kushipawẽ yuikĩ: “Shanẽ ibuhaira Salomão hau hiwekũkaĩshanũwẽ!” akubaĩkĩ

⁴⁰ haria dasibibu benima txakayamabirãkĩ teperewe mawakubaĩkĩ Salomão mula katsaumekainai dasibibũ txibaĩ sai sai iki xãxãki itxakayamakubainaibũ mai beshakũkainaya

⁴¹ Adonias inũ ha hatubetã pikĩ meneaibũ Jerusalém anu bei sai sai iki xãxãki ikubiranaibu habũ ana nĩkaya txashuwã mashũ txã txã akubiranaibu Joabẽ hatubetã nĩkai yuka iki: —Hawamẽ? Haskai hãtxawãtxakayamakanimẽkaĩ, Jerusalém anuarã?— ikaya

⁴² Joabe hãtxa heneriama nukunabu Deusbe hãtxashunika Abiatarĩ bake Jônatas Jerusalém anua kai hikiai Adoniasĩ uĩtã yuikĩ: —Hikiwe, mĩ huni mẽtsisipa kushipawẽ taea kaka pepa mĩ nuku beshuĩmẽkainã— aka

⁴³ Jônatasã kemakĩ Adonias yuikĩ: —Haskamaki. Shanẽ ibuhaira Davi yununikatũ Salomão katukĩ Israelĩ enabu nukũ shanẽ ibuhaira washuki.

⁴⁴ Deusbe nukunabu hãtxashunika Zadoque inũ, Deusũ hãtxa yuishunika Natã inũ, Joiadã bake Benaia inũ, Davi mekenikabu Quereteu nawabu inũ, Peleteu nawabũ hau Salomão iyukĩ mekebainũbũ shanẽ ibuhaira Davĩ hatu yunushuki. Shanẽ ibũ hatu yunua hawẽ mulaki Salomão haki katsaũtã Giom anu iyuabu

⁴⁵ Israelĩ enabu shanẽ ibuhaira hatu unãti wamakĩ Deusbe nukunabu hãtxashunika Zadoque inũ Deusũ hãtxa yuishunika Natãnẽ Salomão sheni ininipa maukai dasibibũ uĩtã benima txakayamai txĩtũbirãkanikiki, haskawẽ taea Jerusalém anu hiweabu sai sai itxakayamakubiranaibu mã nĩkairã.

⁴⁶ Ha dikabi shanẽ ibuhairatũ tsauti ibuwai Salomão ma inai haki tsaushuki.

⁴⁷ Haska bestima Davĩ dayarubu dasibi benimai bushũ yuikĩ: “Deusũ hau Salomão duawakubaĩshanũwẽ, shanẽ ibu kushipa wakĩ mia binumakinã”, akeakeaibũ shanẽ ibuhaira Davĩ Deus kẽwaĩ hawẽ dakati anu beti ishũ

⁴⁸ hatu yuikĩ: “Ẽ bake kayabi shanẽ ibuhairai shanẽ ibuhairatũ tsauti anu ma tsaua ẽ beruwẽ ẽ uiaĩwẽ taeshũ Israelĩ enabu mekenika Senhor Deus benimawakĩ duawakĩ hau kẽwãkubaĩshanũbũwẽ”, akai nĩkashũ ea yuikãshuki— akĩ Jônatasã Adonias yuia

⁴⁹ Adonias shanẽ ibuhairanũ, iwanã, hatu itxawatã pimai habũ nĩkatã haki datei saki saki iki taei benitã bestibu tibi pashaibũ

⁵⁰ hatu haska waiwẽ taea: “Salomãonẽ ea detetiruki”, ika datei Adonias hari benikaini Deuski nukuti tari hiwe pũtenibu anu ka hau Salomãonẽ ea kupikĩ tenãyamanũ ika hawẽ kẽwãti txi tapu mashũ keska hawẽ ĩshtxãkã tsuma dakakẽ

⁵¹ uĩbaĩ tsuara kashũ Salomão yuikĩ: —Mĩ shanẽ ibuhairaiwẽ taea miki Adonias datei hau mĩ deteyamanũ Deuski nukuti tari hiwe anushũ hawẽ kẽwãti txi tapu mashũ keska Adoniasĩ tsuma dakashũ yuikĩ: “Hau ea tenãyamanũ, ishũ shanẽ ibuhaira Salomão ebe yubakatiru ẽ ea akaii”, itã haska hawẽ hãtxa ea bemashuki— aka

⁵² Salomãonẽ nĩkatã yuikĩ: —Peki. Huni pepa keska ikũkainaya hawa txakabuma ishanikiki. Hawẽ yurakiri ẽ hawa meamahaira ishanaii. Hakia hawara txakabu hakiri ẽ betxiarã, mawashanikiki— itã

⁵³ Deus kẽwãti txi tapu anua hau iwenũbũ Salomãonẽ hatu yunua kashũ Adonias iweabu hau hawẽ nuinũ shanẽ ibuhaira Salomão bebũ Adonias di iki beutã beti ika daka Salomãonẽ yunukĩ: “Hawa txakabuwama mĩ hiwekũkaĩkatsis ikairã, mĩ hiwe anu unanuma kariwe”, aka hawa yuiama benimai kaĩkaĩkẽ