Yirile 1 - Cebaara Bible 2010

KOLOCƆLƆƆ N ISIRAYƐLI YE YIRIGE EZYIPITI NI Isirayɛli ye i nyɛ pulobèlē Ezyipiti ni

¹ Isirayɛli wi lè Zyakɔbi, woro jáabèle mɛ́ɛyɛ yi nyɛ yee naa, poro bele be pínɛ n pan ní wi ní Ezyipiti ma lè. Pe myɛ nibin nibin maa be kpáayi wòolo kɔ́ri n pan.

² Poro be nyɛ: Wurubɛn, ní Simeyɔn, ní Levii, ní Zyuda,

³ ní Isakari, ní Zabulɔn, ní Bɛnzyamɛ,

⁴ ní Dan, ní Nɛfitalii, ní Gadi, ní Azɛɛri.

⁵ Syɛ́ɛnbèle bele be yiri Zyakɔbi ni lè, pe nyɔ́ɔgi n pye togoye taanri ní kpɔrigɔ. Zyozɛfu si na, woro maa pye yaà n kwɔ́ɔ Ezyipiti ni.

⁶ A Zyozɛfu ní wi senyɛnbèle baa kùu n fàra lǎli bee syɛ̀ɛnnɛ myɛ na.

⁷ A Isirayɛli ye tɔ̀nɔ n baa pìinɛʔɛrɛ see n pye saʔa, a be fǎngi i kpɔ́ʔɔgi ni syée gbanʔama. A tári tɔ̀nɔ n nyìn be na.

⁸ A fànʔafɔwaa nikwɔɔ kɔ́ baa tɛ́ɛn fǎngi na Ezyipiti tári nyúngo na, wee wi lè wi da kàa cán Zyozɛfu kéeli ni í.

⁹ A wee bee gi joo wi syɛ́ɛnbèle ma níì jo: «Ye wéle, Isirayɛli syɛ́ɛnbèle n nɛʔɛ n sɔ̀lɔ wolo na, a be fǎngi wɔ́ɔ̀ kpɔ́ʔɔ n sɔ̀lɔ wolo wógi na.

¹⁰ Ye tíi wo kanmaa caa wo be nɛʔɛni yérige nya. Ki ga kòro gee naa na, kapɛɛnnɛ ga kɔ́ɔ̀ yìri, pe a pínɛ ní wolo nígoobèle ní bi kapɛɛnni kpúmɔn ní wolo ní. Koro kàdoʔo ma si yiri tári ni.»

¹¹ Lǎli bee ni a be fala n pɔ́rɔtɔɔ-fáli kùndigibéle nyɛ́nɛ n wòlo n télege be nyúngi na, jàngó bele bee í pɔrɔtɔɔri fáli gbàn be na gbanʔama. Kánmi bee na be kèye siin faan Faraɔnw ma a yi pye wi lɔ́ri tɛɛkɔnyɔ. Kěyi bee yi nyɛ Pitɔmi, ní Aramisɛsi.

¹² Kàjáa kánmee na be da ni kàa taari be wɔʔɔli na lè, a kàa wɔ́ɔ i fàrá be nɛʔɛni na ni syée nya. A Isirayɛli ye kéeli tɔ̀nɔ n be bɛɛn.

¹³ A Ezyipiti ye tɔ̀nɔ n pɔrɔtɔɔri fáli gbàn Isirayɛli ye na gbanʔama.

¹⁴ Pe maa tɔ̀nɔ n be yɛ́ɛyi wáriga ní faligbanw ní, wi lè póori fáli, ní jùfaakpumɔnri, ní séyi fáli féleye myɛ. Gee bee n jo pe maa tɔ̀nɔ n pɔrɔtɔɔri fáli gbàn be na n baa sɔ̀lɔ.

Faraɔnw i Heburubèle wɔʔɔ

¹⁵ A Ezyipiti fànʔafɔw wɔ́ɔ̀ joo ní Heburubèle fícaricobēle ní, pe maa ni wàa yiri Syifira, ní i wee yiri Puwa.

¹⁶ Níì be pye: «Lǎli ni yele ga ni Heburucebèle dɛ̀ɛmɛ́ lè pe làrizeeli ni, wàa ga ni sii, ye pìíw sámaga ye wéle. Ye ga wi nyaa nànbile, ye wi kpóo. Ye si ga wi nyaa calipile, ye wi yaʔa sìi na.»

¹⁷ Kàjáa fícaricobèle maa ni fɛ̀ɛgí Kolocɔlɔɔ na. Pe ga fɔ̀lɔ ni gi kpéʔele n yɛlɛ ní syɛ́ɛnri ní, dee Ezyipiti fànʔafɔw da joo be ma lè í, a pe i nànbiigèle yaari sìi na.

¹⁸ A Ezyipiti fànʔafɔw fícaricobèle yeri ní baa be pye: «Nyàʔá na yele gi kpéʔele kánmi bee na, ní i nànbiigèle yaari sìi na?»

¹⁹ A fícaricobèle Faraɔnw yari: «Gee bee nyúngo i nyɛ, ncan Heburucebèle ní Ezyipiti ye cébèle o nyɛ sèjira í. Heburucebèle n seemɛ dɛ́nɛ n sɔ̀lɔ. Pe i pìíbèle sii, fícaricow n si náà nan yaà.»

²⁰ A Kolocɔlɔɔ kacànna pye fícaricobèle na. A Isirayɛli syɛ́ɛnmi tɔ̀nɔ́ i nɛʔɛgi ni syée, a be fǎngi tɔ̀nɔ n baa kpɔ́ʔɔ gbanʔama.

²¹ Amɛɛ fícaricobèle da ni fɛ̀ɛgí Kolocɔlɔɔ na lè, a Kolocɔlɔɔ wɔ́ɔ̀ pe narigbaayi yaʔa a yi búgu.

²² Lǎli bee ni a Faraɔnw syɛ́ɛnri naa joo n gbàn wi syɛ́ɛnbèle myɛ ma níì jo: «Nànbile o nànbile pe ga see lè, ki n yɛlɛ ye sa li wáa Niili cábigi ni, yáā calipiigèle myɛ yaari sìi na.»