Kàseegèle 1 - Cebaara Bible 2010

¹ Salomɔn wi lè Davidi jáaw, ní i nyɛ Isirayɛli ye fànʔafɔw, woro kàseegèle.

Sɛ́bɛw nyúngo

² Ke jooli nyúngo gi nyɛ bi sícilimi ní tamani cán, bi kacánni syɛ́ɛnrɛ kɔ́rɔ cán,

³ bi tamajanna taa bi fàra sínni, ní katèeli, ní kányɛɛgi na,

⁴ bi kɔ̀rɔsiile kaan kanaa-sìnjánbèle ma, bi cánna, ní keele sɔ̀ngurɔ kaan nìgɔcariɔ ma.

⁵ Síciliw n yɛlɛ waa lúro, wi a kàa fàra wi cánni na, ní wee wi nyɛ lè kacaɔn, wi a wi tánʔaganmi sícilimɛ taa,

⁶ bi kàseele ní syɛɛnpɔ́rɔ kɔ́rɔ cán, bi sícilibèle syɛ́ɛnrɛ, ní be kàseegèle kɔ́rɔ cán.

⁷ Yawe yɛ́ɛgi fyáara di nyɛ cánni sélimɛ. Nilabalabèle i sícilimi ní tamani faari.

Bàā miyɛɛ kɔ̀rɔsíi nìgɔcaripeebèle na

⁸ Ni pyà, da mɔ tóow tamana lúro, mɔ si a kɔ́ mɔ nɔ́ɔw tamana cée í.

⁹ Níì cán koro i nyɛ kpɔʔɔrɔ nyùndɔnnɔ mɔ nyúngi kéele na, ní kɔ́nɔtiriye mɔ yátiigi kéele na.

¹⁰ Ni pyà, kapeebyebèle ga ni caa bi mɔ kárima, mɔ a kɔ́ fɔ̀lɔ í.

¹¹ Pe ga jo: «Da maa ní wolo ní wo ba làra waa sige, wo sìsyaan wo, wó karinyanya le tɛɛlɛ fun syɔ́ɔnw na nyùngo fun ni,

¹² wo be myɛ jɔ́ɔ woweebèlē ní àmɛɛ kúbèle tɛɛkòrogo gi kpéʔele lè, wo be jɔ́ɔ wobobéle ní àmɛɛ bele nyɛ be tíri weecurugi ni lè.

¹³ Wolo a lɔgbanra yáriri féleye myɛ taa, wolo a wolo kpáayi nyìn kapɛɛnni yataara na.

¹⁴ Mɔ a mɔ lɛɛli taa ní wolo ní, wo a wɔ́ɔ lɔrɔ yalege nibin na.»

¹⁵ Ni pyà, mɔ a kɔ́ kologo pínɛ ní be ní í. Mɔ tɔ́lɔgi yirige be kólogi ni.

¹⁶ Níì cán pe i fé be tɔ́lɔyi na ni syée kapeʔe pyele kurugo. Pe n wári sìsyaanw wolo kurugo.

¹⁷ Parà ga le fókaanya yala o fókaanya yala nyɛ́nɛ na, ti n le gbanzan.

¹⁸ Pe tiimaa sìsyaanw pe làra ni sige bi wo. Pe sìíw na be karinyanya nii.

¹⁹ Bele myɛ be tɔ̀nɔpeew caa lè, poro kóloyi yi nyɛ nya. Wi i wi taafɔbèle bɔ̀nɔ́ be sìíw ni.

Kayele ní sàmina sícilimi kéele na

²⁰ Sícilimi i yákpoli wáa kàlari-kóloyi ni. Pi i bi yákpoli wáa kadàlayi na.

²¹ Pi i yákpoli wáa syɛɛnnɛʔɛmi tɛɛsɔ̀lɔyɔ ni. Pi i bi syɛ́ɛnri nyuu kpàánweegèle na kěgi ni níì jo:

²² «Yele nidoliyi, làla jòorí yele caa bi kwɔ́ɔ nidolimi ni? Làlìí ni nɛ̀ɛnyɛnɛgi fɔ̀ɔlɔ a láʔa nɛ̀ɛnyɛnɛgi na, nilabalabèle si láʔa cánni faʔala na?

²³ Ye kàri ye mii syɛɛngbanri lóʔo. Ye wéle, mii a mii pǐli tìrige yele ma. Mii a gi yaʔa yele í mii syɛ́ɛnri cán.

²⁴ Amɛɛ mii yeri lè, yele si ga fɔ̀lɔ í, àmɛɛ mii mii kɔ́gi sánʔa lè, syɔɔn faala si ga gi córo í,

²⁵ ní àmɛɛ yele mii láliiw myɛ cée lè, yele ga wɔ́ɔ̀ fɔ̀lɔ mii syɛɛngbanri na í,

²⁶ mii wɔ́ɔgēle mii a ba ra tɛ́ʔɛ lǎli ni yele ga baa pye wɔʔɔgi ni lè, lǎli ni fyáakpɔɔri ga baa yele cò lè, mii a ra niyɛɛ nyɛ́nɛ.

²⁷ Lǎli ni fyáakpɔɔri ga baa yele tɔ́n àmɛɛ káfalakpɔʔɔ nyɛ lè, á wɔʔɔli baa nan yele na àmɛɛ káfala-sìnjinnɛ nyɛ lè, lǎli ni wɔʔɔgbɔɔgi ní fɔ̀rɔgi ga baa yele tɔ́n lè,

²⁸ lǎli bee ni pe a ra mii yiri, mii si a syɔɔ í. Pe a ra mii caa, pe si a mii nyaa í.

²⁹ Níì cán cánni n be bɛɛn. Pe ga mii Yawe yɛ́ɛgi fyáara nyɛ́nɛ n wòlo í.

³⁰ Níì cán pe ga fɔ̀lɔ mii láliiw na í. Pe n mii syɛɛngbanri myɛ faʔa.

³¹ Pe a ba be tánʔaganmi yasanra lìi si tín pe tiimaa láliiw na.

³² Níì cán nidoliyi céemɛ i yi kúu, nilabalabèle sìnzɔngumɔ si i be kálagi.

³³ Wee si wi lúro mii ma lè, wi a tɛ́ɛn yɛɛ̀nyinge na wi tɛɛkòrogi ni. Wi a tɛ́ɛn sági, wi a ra fɛ̀ɛgí wɔ́ʔɔgɔ kéele na í.»