Ɛsidirasi 1 - Cebaara Bible 2010

Sirusi n kologo kaan pe ní kpɔ̀ʔɔrɔli kpaʔa faan

¹ Pɛrisi fànʔafɔw Sirusi fǎngi yɛɛzelile na, a Yawe sɔ̀ngurɔ lége Pɛrisi fànʔafɔw Sirusi ni, koro ga pye Yawe syɛ́ɛnri ti da yiri Zyeremii nyɔ́ɔgi ni lè di foro. A Sirusi be pye a be kéeli naa jáari nyɔɔ, ní sɛ́bɛ ni wi fǎngi tɛ́ɛyɛ myɛ ni n gi joo níì jo:

² «Pɛrisi fànʔafɔw Sirusi n jo: ‹Yawe wi lè nyɛ̀ʔɛni Kolocɔlɔɔ, wi n tári fànya myɛ kaan mii ma, níì mii pye mii í kpaʔa faan woro ma Zyerusalɛmi ni, ki nyɛ lè Zyuda ni.

³ Wee wi ga pye lè yele ni wi syɔɔnwaa, ki n yɛlɛ wi Kolocɔlɔw í pye ní wi ní, wí lúgu wi kári Zyerusalɛmi ma, ki nyɛ lè Zyuda ni, wi sa Yawe kpáagi faan wi lè Isirayɛli Kolocɔlɔw. Woro wi nyɛ Kolocɔlɔw, wi nyɛ lè Zyerusalɛmi ni.

⁴ Bele myɛ be kòro lè syɛɛnfelegi ni, tɛʔɛ o tɛʔɛ ni pe ga pye lè wodɛ́ɛnbéle ní, tɛ́ɛgi bee syɛ̀ɛnnɛ n yɛlɛ bi wálifiio, ní tɛɛ̀, ní kɔlɔ̀ yataara kaan be ma, n fàra yaweere, ní kínidɛnɛgɛ yakaanra na, Kolocɔlɔɔ kpáagi kéele na wi nyɛ lè Zyerusalɛmi ni.› »

⁵ Lǎli bee ni a Zyuda ní Bɛnzyamɛ narigbaayi kùndigibéle yìri n fàra sáriga-wòlobèle, ní Levii ye na, bele myɛ fúnyo ni Kolocɔlɔɔ da sɔ̀ngurɔ lége lè, a poro yìri n kári sa Yawe kpáagi faan wi nyɛ lè Zyerusalɛmi ni.

⁶ Bele myɛ pe da be màʔa lè a poro be dɛ̀ɛmɛ ní wálifiio, ní tɛɛ̀ yárira ní n fàra kɔlɔ̀ yataara, ní yaweere, ní lɔnɛʔɛrɛ na, n wɔ́ɔ̀ fàra kínidɛnɛgi yakaanra féleye myɛ na.

⁷ Yawe kpáagi yárira Nebukadinezari da láa n yirige Zyerusalɛmi ni n sáà tɛ́ʔɛ wi kolocɔlɔw kpaʔa ni lè, a fànʔafɔw Sirusi toro lúrugo n kaan.

⁸ Sirusi wi lè Pɛrisi fànʔafɔw, a woro lɔ́ri tɛ́ʔɛfɔlɔ Mitiredati pye a wi di wòlo n córo n kaan Zyuda fànʔafɔbili Syesyibasari ma.

⁹ Ti nyɔ́ɔgi gi nyɛ gee naa: tɛɛ̀ tásaaya toko ní kpɔrigɔ ní wálifiio tásaaya saala kagunɔ, ní ŋɔgéle toko ní kpanjɛrɛ,

¹⁰ ní tɛɛ̀ yagbaagéle toko ní kpɔrigɔ, ní wálifiio yagbaagéle saala siin ní kpɔrigɔ ki tɛ́ɛyɛ siin, ní yayigeleraa nikwɔɔ saala kagunɔ.

¹¹ Tɛ́ɛw ní wálifiiw yárira myɛ nyɔ́ɔ maa pye selebingéle siin ní saala kɔrɔsiin. A Syesyibasari be pye a be lúgu ní di myɛ ní n kári tári ma lǎli ni wojobèle da yiri Babilɔni ni ni maa Zyerusalɛmi ma lè.