Ezayi 1 - Cebaara Bible 2010

SƐBƐW TILAZELIGE ( 1—39 )

¹ Ezayi wi lè Amɔsi jáaw, woro yanyaagi, Zyuda, ní Zyerusalɛmi kéeli na, koro gee wi nyaa lè Ozyasi, ní Yotami, ní Akazi, ní Ezekyasi lǎli ni be pye lè Zyuda fànʔafɔbèle.

Syɛɛnfelegaa, gee gi lè ki ga yafyɛn cán í

² Nyɛ̀ʔɛgèle, ye lóʔo! Tári, mɔ líiyi cáan! Níì cán Yawe i nyuu, wi n jo: «Mii n jaafɔɔlɔ gbóo a be lɛɛ, kàjáa pe n mii cée.

³ Nɔ̀ɔ n wi kàfɔw cán, a jòfani wi kàfɔw cán, wee wi wi kaangi wi i líi lè, kàjáa Isirayɛli ga yafyɛn cán í, mii syɛ́ɛnbèle ga yarigaa cán í.»

Yacanga ga níì kòro Zyuda tári ni í

⁴ Wɔʔɔlɔ i nyɛ kapeebye-syɛɛnfelegi na, syɛ́ɛnbèle bele na poro bele na kolomi kèlē túgoro nyɛ lè, kaŋágabye-syɛɛnfelege, pìikálagiya! Pe n Yawe yaʔa, pe n Isirayɛli Wojanw faʔa, pe n lúru wi kurugo.

⁵ Sán pe a ní yele kpúmɔn, àmɛɛ yele ní i kàa fàrá yele céemi kèlē na lè? Nyǔngi wobogo i yáa, a fúngi myɛ i nyɛ wɔʔɔgɔ na.

⁶ N séli yédaagèle na n sáà nan nyǔngi na, yaama fun tɛ́ɛlɛ o yaà í, fwɔɔ kpàliyi, ní kpumɔnnamiyi, ní namikaayi, tiinmɛ ga pye yi na í. Yi ga pwɔɔ í, sìnmɛ ga taʔa yi na í.

⁷ Yele tári n kòro syɔɔn fun, naà n yele kěyi sórigo. Nibɔɔnnɔ i yele tári yafálara líi yele nyɛ́nɛ na. Wɔʔɔlɔ lii, àmɛɛ gàlagí nyɛ, wee nibɔɔnnɔ kpéʔele lè.

⁸ Siyɔn calipili n kòro àmɛɛ kpáala nyɛ lè ɛrɛzɛn séʔe ni, àmɛɛ vògo nyɛ lè kɔnkɔnbiri séʔe ni, ní àmɛɛ be tɛ́ɛn kàʔa taana kapɛɛnnɛ kánma na lè.

⁹ Nyɛ̀ʔɛni Sùlasiibéle Kafɔlɔ wi lè Yawe, kapye wi da wolo pèle cɛɛri yaʔa a wo kòro í, wolo mǎà dée pye àmɛɛ Sodɔmi nyɛ lè, wolo mǎà dée Gomɔri wíri.

Kpɔ̀ʔɔrɔli li lè yanɔnʔɔgɔ Kolocɔlɔɔ ma

¹⁰ Yele Sodɔmi kùndigibèle, ye Yawe syɛ́ɛnri lóʔo. Gomɔri syɛ́ɛnbèle, ye líiyi cáan wolo Kolocɔlɔw làlwa ma.

¹¹ Yawe n jo: «Nyàʔá yele sáriganɛʔɛw a nyɔɔ mii na? Bàpɔbèle sáriga-sórigoo, ní náapiiyi sìnmɛ n mii tín. Náapegèle, ní bàpiigèle, ní sikepɔbèle sìsyaan ga mii dɛ́nɛ í.

¹² Lǎli ni yele ga pan ba yére mii yɛ́ʔɛ ma lè, wìí wi gáà yele pye yaa mii kadàágèle tánʔana yaa máari?

¹³ Ye a ní kɔ́ ra maa ní gbanzan yakaanyi ní í. Nùndaanni yasorigogo i nyɛ mii ma yanɔnʔɔgɔ. Yevɔnyi, ní cândɛnɛyi, ní kpóʔorogèle ga mii dɛ́nɛ í. Kakoloyi, ní kpóʔorojǎngèle n nyáʔami tiyɛɛ ni.

¹⁴ Yele yevɔnyi, ní yele fɛ́tiibèle n mii bɛɛn, pe i nyɛ mii na tugoro, mii n fɔ̀rɔ be kpàracogi na.

¹⁵ Yele ga yele kɔ́yi sánʔa lǎlee ni lè, mii n mii nyapiigèle yirige yele ni. Alí yele ga yele nyɛ́ɛriyi nɛʔɛ, mii o yi lúro í. Yele kɔ́yi n nyìn sìsyaanw na.

¹⁶ Ye wéli, ye yeyɛɛ jée ye mùnu, ye yele péemi kapyere yirige yaà mii yɛ́ʔɛ ma. Ye láʔa kapeebyeri na.

¹⁷ Ye kacànbyeri tama, yáā kányɛɛgi caa. Wee be wɔʔɔ lè, ye wi dɛ̀ɛmɛ. Ki n yɛlɛ yaa síngi círiw ma. Yaa lɔgucew tánʔa nyuu.

Yele ga kòro niceebéle…

¹⁸ «Yaa maa wo ba joo.» Yawe wi jo nya. «Alí yele kapeegèle ga nyɛ́nɛgɛ, ke a ba fílige àmɛɛ lànɛɛzyiw nyɛ lè, àlí ke ga nyɛ́nɛgɛ n baa wɔ́ɔ, ke a ba fílige àmɛɛ bàsiire nyɛ lè.

¹⁹ Yele ga gi kɔ̀rirɔ n tímana ni lúro, yele a ra tári yacanra líi.

²⁰ Kàjáa yele ga pye yele ga fɔ̀lɔ í, níì yeyɛɛ bye niceebéle, ŋɔséew a yele lìi,» Yawe nyɔ́ɔgi gi jo nya.

Zyerusalɛmi jéemununi kéele

²¹ Hàán! Kèkpɔɔgi ki da pye lè tágala kegi, ki n baa kàri kanɔnʔɔbyecɔɔ̀! Ki maa nyìn kányɛɛgi na, sínni maa tɛ́ɛn gi ni, tɔ́ɔliw si ni, syɛɛnkpoobéle be nyɛ gi ni!

²² Mɔ wálifiiw n kàri tunmɔvire, mɔ duvɛɛncǎnw n ceri n pye lɔ̀ʔɔ.

²³ Mɔ kundigibèle i nyɛ niceebéle, ní kàyuubēle pínɛnyɛ̀nnɛ, námara kpɔ́ʔɔri kéele n pe myɛ dɛ́nɛ, a be i fé tɔ̀nɔw kurugo. Pe o tànʔa kaangi círio ma í, pe o nyɔɔ cáan lɔgucaa kútii kéele ni í.

²⁴ Gee bee na Kàfɔw Yawe wi lè Nyɛ̀ʔɛni Sùlasiibéle Kafɔlɔ, Isirayɛli ye Séekpɔɔw Fɔ́lɔ, wi n jo: «Awá! Mii a niyɛɛ kpɛʔɛlɛ ní mii kàsiitun-nyɛ́nbèle kéele ní, mii a mii gɔ̀lɔ́w wòlo mii nigoobèle na.

²⁵ Mii a ní mii kɔ́gi taʔa mɔ na, mii a mɔ tunmɔviri láʔa tunweele na àmɛɛ sɛ́ʔɛ gi kpéʔele lè, mii a mɔ yanɔnʔɔri myɛ yirige mɔ ni.

²⁶ Mii a mɔ kútiijoobèle lúrugo pye àmɛɛ ki da pye lè booma ni, bi wɔ́ɔ mɔ yarifɔbèle lúrugo pye àmɛɛ ki da pye lè sélimi na. Koro kàdoʔo ma pe a ra mɔ yiri Sínni Kàʔa, ní Tágala Kekpɔɔgi.»

²⁷ Siyɔn a ba syɔɔ kányɛɛgi báriga ni, ní bele pe a kàri lè, poro a syɔɔ sínni báriga ni.

²⁸ Niceebèle ní kapeebyebèle si a pínɛ tɔ́nʔɔnɔ. Bele be Yawe yaari lè, pe a kùu.

²⁹ «Lǎli bee ni terebɛnti tíiyi kéele li yele dɛ́nɛ lè, fɛ̀ɛrɛ a syɔɔn taa ní yi kéeli ní. Nángwɔɔbèle yele nyɛ́nɛ n wòlo lè, pe kéeli a pye yele ma nɔ́nkɔn.

³⁰ Níì cán yele a pye àmɛɛ terebɛnti tíige nyɛ, gee wára di fánagi lè, ní àmɛɛ lɔ̀ʔɔ fun nángwɔɔ nyɛ lè.

³¹ Fànnɛʔɛgɛ nanw a pye àmɛɛ yòmíimɛ nyɛ lè, wi fáliw a pye àmɛɛ naànijemu nyɛ lè. Ti siinw a ba pínɛ sógi, syɔɔn faala a taa bi di fígi í.»