Danyɛli 1 - Cebaara Bible 2010

Danyɛli ní wi pínɛnyɛnbèle Babilɔni ni

¹ Zyuda fànʔafɔw Yehoyakimi fǎngi yɛɛdaanri wólo na, a Babilɔni fànʔafɔw Nebukadinezari pan n baa tɛ́ɛn Zyerusalɛmi taana kapɛɛnni kánma na.

² A Kàfɔw Zyuda fànʔafɔw Yehoyakimi le wi kɔ́yi ni n fàra Kolocɔlɔɔ kpáagi yáriraa na. A wi kári ní yáriri ní Syineyari tári ma n sáà lége wi kolocɔlɔw kpaʔa ni, n tɛ́ʔɛ wi kolocɔlɔw lɔ́rɔ tɛɛkɔngɔ kpaafungo ni.

³ A fànʔafɔw gi joo Asyipenazi ma, wi pye lè woro kpáagi falipyenànbēle kundigi, níì wi pye wi pan ní Isirayɛli wóbèle pèle ní, pe pye fàndulugi wóbèle pèle wàlá mɛ́ɛyɛ fɔɔlɔ narigbaaya wóbèle pèle,

⁴ nìgɔcaribèle pèle, bele cére ti a pye lè tɛɛlɛ fun, bele pe a wélemɛ dɛ́nɛ lè, si cìlige gbanʔama, si pye kacanbèlē, sáā kérigèle cángi da láʔala, poro bele pe a gbǎn ra báara fànʔafɔw fànʔafɔ-gbaʔa ni lè, wi pan ní bele bee ní, pé ba be tama Kalide ye sɛ́bɛri, ní Kalide ye syɛ́ɛnri na.

⁵ A fànʔafɔw jo kàa í da wóo woro yaliitaanri, ní woro dùvɛɛngbaaw ni bàā kaangi be ma canʔa o canʔa, páā be tama yɛ̀ʔɛlɛ taanri fúngo ni, koro kàdoʔo ma pé náa jée fànʔafɔw fáli ni.

⁶ Danyɛli, ní Hananya, ní Misyayɛli, ní Azariya, be pye lè Zyuda yòdaʔaya, poro maa pye be ni.

⁷ A falipyenǎnbèle kùndigi mɛ́ɛyɛ le be na, Danyɛli wógi gi pye Bɛlitisyasari, Hananya wógi si i nyɛ Syadiraki, Misyayɛli wógi si i nyɛ Mesyaki, Azariya wógi si i nyɛ Abɛdi-Nego.

⁸ A Danyɛli gi kɔ̀rirɔ n tímana n jo woro ga yɛlɛ bi wiyɛɛ nɔ́nʔɔ ní fànʔafɔw yaliitaanra, ní wi dùvɛɛngbaaw ní í, a wi falipyenǎnbèle kùndigi nyɛ́ɛri gbanʔama, níì wi pye wi a kɔ́ woro ŋàʔana woro í wiyɛɛ nɔ́nʔɔ í.

⁹ A Kolocɔlɔɔ si Danyɛli kéeli yaʔa a li falipyenǎnbèle kùndigi dɛ́nɛ, a woro nyinimɛ taa wi na.

¹⁰ A falipyenǎnbèle kùndigi si Danyɛli pye: «Mii i fɛ̀ɛgí mii kàfɔw na wi lè fànʔafɔw, woro wi yele lìíli kéele ní yele yagbaagi kéele cɔɔnri. Nyàʔá na gi yɛlɛ yele yɛ́ɛcɔɔgèle í kɔ́ ba waʔa bi yiri yele nìgɔcarinyɛnbèle wòʔolo ni? Koro ga pye yele a mii nyúngi le kagbanna ni fànʔafɔw yɛ́ʔɛ ma.»

¹¹ Lǎli bee ni yaliiri kaanfɔwee má falipyenǎnbèle kùndigi da Danyɛli, ní Hananya, ní Misyayɛli, ní Azariya ye kàlifáa lè, a Danyɛli wee bee pye:

¹² «Mii i mɔ nyɛ́ɛri, mɔ falipyebèle sɛʔɛ mi wéle canya kɛɛ fúngo ni. Ki n yɛlɛ nángwɔɔw yafálara yagana í da kaangi wolo ma wolo yaliiri, lòtelegi yagana si wɔ́ɔ ra kaangi wolo ma wolo yagbaagi.

¹³ Koro kàdoʔo ma mɔ a wolo yɛ́ɛyi tímana wéle ní wolo nìgɔcarinyɛnbèle wóyo ní, poro bele be fànʔafɔw lìidaanna líi lè, mí gi kpéʔele mɔ falipyebèle na bi yɛlɛ ní gee ní mɔ ga nyaa lè.»

¹⁴ Gee na pe wi nyɛ́ɛri lè a wi fɔ̀lɔ gi na be ma, a wi be sɛʔɛ n wéle canya kɛɛ fúngo ni.

¹⁵ A canya kɛɛ ga kwɔ́ɔ, a nìjanra pye be yɛ́ɛyi na, a be wɔ́ɔ̀ kpólo céri na n sɔ̀lɔ pe nìgɔcarinyɛn-zanbèle myɛ na, poro bele pe da ni fànʔafɔw lìidaanna líi lè.

¹⁶ A koro gi kaan a lìíli kaanfɔlɔ i lìidaanni, ní dùvɛɛnw lée ni syée níì kòro ni nángwɔɔw yafálara yagana kaangi be ma.

¹⁷ A Kolocɔlɔɔ kérigèle cánna fúnyo kaan nìgɔcaribèle bee sicɛrɛ ma, sɛ́bɛri cánna, ní sícilimi myɛ kàbaan na. A Danyɛli yanyaayi myɛ, ní ŋúnɔyi myɛ kɔ́rɔ cán.

¹⁸ Lǎlee si fànʔafɔw Nebukadinezari da tɛ́ʔɛ be pan ní be ní woro ma lè, loro baa nan lè, a falipyenǎnbèle kùndigi kári ní be ní wi yɛʔɛ̀ ma.

¹⁹ A fànʔafɔw joolo kpéʔele ní be ní. Nìgɔcaribèle bee myɛ ni, wi ga Danyɛli, ní Hananya, ní Misyayɛli, ní Azariya félege nyaa be ni í. Koro na pe be le fànʔafɔw fáli ni.

²⁰ Kérigèle myɛ ge nyɛ lè sícilimi wòʔolo, ní cánni wòʔolo, gele na fànʔafɔw da ni be yíbe lè, a wi be nyaa a be sɔ̀lɔ woro fǎngi tɛ́nɛmɛ myɛ yíbefɔɔlɔ, ní kacánbèle myɛ na tɔlɔyɔ kɛɛ.

²¹ A Danyɛli kòro yaà fwɔɔ n taa n baa nan fànʔafɔw Sirusi fǎngi yɛɛzelile na.