EFISÖS 1 - TÖHET LĪPÖRE (Re-edited) Bible (BSI)

¹ Pôl, tanīnöṙô Kristū Yēsū, löö i yip töhet i Efisös, yip tökô-en inrē nö in Kristū Yēsū:

² Inlōnti yēḵ in yīö, kumchikṙen inrē, aṅ im Tēv Yöng hī, ngam Mā inrē Yēsū Kristū.

Töhet Inkòlò In Kristū

³ Tökôlò an yēḵ ngam Tēv Yöng ngam Mā hī Yēsū Kristū, ngam mahakôlò hī tö aṅ i töhet inkôlò el halīöngö in Kristū:

⁴ Sā tī Ò nö katöllen hī in Ò, urēhĕkūö ranehlö ngih panam, pò hī hōtu het, öt kasutka i kūö Ò, im hanāngenlōn:

⁵ Ngaich nö lā-urĕh nö halēnngen hī, töharuklöngö kūön, lökten in Yēsū Kristū, öi in Ò, sā ngam tölöök lōn Ò,

⁶ Nö ineū-euṅ ngam kanôlò ngam in Ò inlōnti, ngam kahëtö Ò nö in hī nöng öt ṙāyu, i yip Hanāngenlōn:

⁷ Ngam lökten hī inyöökuṙen lökten i mahām Ò, ngam inṙēlö nup tökööl hī, sā ṙôken kanôlò Ò tö inlōnti;

⁸ Ngam töpōyen tī Ò nö in hī, i nup taṙòkhöre mikah, chanöhlōn inrē,

⁹ Keuheūt hë tī nö mikahtö lōn hī tö ngam lōn Ò öt mikahkūö sin; sā ngam tölööklōn Ò, ngam chööḵnyö Ò, nö in Ò,

¹⁰ I ṙinūöhnyö ngam sanööḵtökūö minë ṙētak, nö hamūllö nup taṙòkhöre in Kristū, nup el halīöngö, tö nup ing panam inrē, in Ò.

¹¹ Ngam, chūök hī vītu amīnuvö, ngaich nö la-urĕh nö halēnngen hī, sā ngam chööḵnyö Ò, ngam vamī taṙòkhöre, sā ap lōn Ò:

¹² Pò hī hōtu ineū-euṅ ngam kanôlò Ò, ayī-ö tö ngaich urĕh in Kristū:

¹³ In Ò yin yī-ö inrē, ngaich öi hang ngam ṙô kanô-en; ngam inhangkö inyööken, ngaich öi ṙātö ellōnre inrē, in Ò yī-ö haköpi tö ngam Töhet Fanöinylö kinlēḵngô,

¹⁴ Ngam rupīö kinlēḵngô ngam amin hī, invānö ngam inlānen ngam Tēv, nö ineū-euṅ ngam kanôlò Ò.

Ṙô Pôl Nö Vë-ekūötēv

¹⁵ Angū-ö an lökten chu chu-ö inrē, höng hangtöre tö ngam mikah yīö im Mā Yēsū, ngam hameuktö yīö, i yip töhet nö ṙòkhöre,

¹⁶ Ötṙākenre chööḵnyôten yīö ha-öiny, ṙôten yīö i nup ṙô chu vë-ekūötēv;

¹⁷ Hòṅ ngam Tēv, ngam Mā hī Yēsū Kristū, ngam Yöng kanôlò, nö kē-ĕkūö yīö tö ma-alaha mikah, inmeukti inrē im inkaha aṅ in Ò;

¹⁸ Ahatlöngö elmat ngam mat ngam ellōn yīö, hòṅ yīö akahalōn tö ngam maheūṅkköre im invëtö yīö, tö kanôlò ngam kanôlò, ngam amin Ò i yip töhet,

¹⁹ Tö ṙôkö ngam minhôiṅyö Ò nö in hī öi ṙamātö ellōnre, sā tī ngam kumlēḵ ngam minhôiṅyö Ò,

²⁰ Ngam tī Ò nö in Kristū, hē Ò nö hachōhlen Ò nö ṙā-ang i yip tökapah, ngaich ha-ūichlen Ò nö lahāmö Ò nö el halīöngö,

²¹ Marô-òl chūök tö taṙòkhöre inyöngö, chöngö, minhôiṅyö, pūlngö, nup taṙòkhöre töminënyu, öt höng i ngih panam, tön i ngam töyihihvö inrē:

²² Ngaich anga-aṅ inrē nö ṙātö taṙòkhöre nö elkatòh röön Ò, ngaich kē-ĕkūö Ò nö hayöng taṙòkhöre im Māṅ,

²³ Ngam alaha Ò, ngam sanööḵlö Ò, mahatöḵlö taṙòkhöre tö tökeuheūttöre.