Mataio 1 - Tii Iitihi: Élele Iitihi na mwo Coho

Ni watihe Iésu Kériso

¹ Wo Iésu *Kériso, ke e wie mu ko *Davita, pa piebehi *Abérama. Ke woélé-ni ni watihe Iésu:

² Abérama Isaaka Iakobo *Juda (me lépwo âjiénen)

³ Pérès (me Zéra; nyaa telu, ke wo Tamar) Esron Ram

⁴ Aminadab Nachon Salma

⁵ Booz (nyaa ten, ke wo Rahab) Obed (nyaa ten, ke wo Rut) Jessé

⁶ Davita. Wo Davita, ke pa daame [ne *Isaraéla. Ke é alecehen, ke ni béé watihe Iésu, ke wo]: *Solomona (nyaa ten, ke ê mwode Uri ânebun)

⁷ Roboam Abia Asa

⁸ Josafat Joram Ozias

⁹ Iotam Akaz Ézékia

¹⁰ Manassé Amon Josias

¹¹ Iékonia (me ni âjiénen). Ke é ha a benaamwon naa, ke lé pawie lépwo Isaraéla mu ha amu telé, ke lé péélé nge *Babulona me lépwo *apenem tice ja kon.

¹² Ke é ne alecehen, [ke ni béé watihe Iésu, ke wo]: Salatiel Zorobabel

¹³ Abihoud Éliakim Azor

¹⁴ Sadok Akim Élioud

¹⁵ Élazar Matan Iakobo

¹⁶ Josef. Ê mwode Josef, ke wo Maria, ê nyaa te Iésu na pii kon pie Kériso.

¹⁷ Woélé naa ati a jéhi ni watihe Iésu Kériso. Tabuhi mu ko Abérama, die ko Davita, ke pwo 14 ni niide apulie. Ke tabuhi mu ko Davita, die ko a bwo pé wie a bele Isaraéla mu Juda nge Babulona, ke pwo 14 ni niide apulie. Ke é mulang, ke 14 mwo ni niide apulie die ko a bwo pituie te pa *Mesia.

A bwo âbeele te Iésu

¹⁸ Weengi a jepule ko a bwo pituie te Iésu Kériso, pa Mesia: Wo Maria, ê nyaa ten, ke mwo te ju pinimelu kolu me Josef. Ke é ânebuhe a bwo piaten delu, ke caa pwoapulie kon, na e pwaadeniin bé na a *Jenen Iitihi.

¹⁹ Ke e niimihi wo Josef pie, me e ne mwo Maria. Kehe icehi ana pa apulie na e te pipwoiipieng, ke time e uce pii pwaatihi, beme time uce tanim Maria ne he pwahamii ni apulie.

^20-21 É he e ko pitautinaado ne ko anaa, ke e bwo alihi ne ha a niûn pa *âcélo te Padaame, na e pii ten pie: «Josef, pa piebehi Davita, go nemwo pwo me mwotiko me go pé Maria. Be mepwo é ne ko pa cuwo ewa aiu na e kon, ke e pwaadeniin bé na a Jenen Iitihi. Ke mepie e bo pituie, ke go bo ne me a niin pie Iésu. Be o bo weeng pana e bo *celuimi a bele ten mu he ni ta pwo ten.»

²² Ke ati ni naado naa, ke e tuie, beme pacuwohi ali e pii wo Padaame, na e pwaadeniin bé wo pa *péroféta ten pie:

²³ O bo pwoapulie ko êgi toomwo, ke e bo picile pa ewa aiu. Ke bo ne me a niin pie Émanuéla, a bwopiinen pie, e pelenye wo Padué. Ésaïe 7.14

²⁴ Ke me e ûmiê wo Josef, ke e pwo ana e pii ten wo pali âcélo. Ke e pé Maria ê mwoden ne pelen.

²⁵ Kehe icehi ana time lu uce pipule dieli ko a bwo piâbeele ewa te Maria. Ke wo Josef, ke e ne me a nii pali cuwo ewa pie Iésu.