تئطوسا 1 - کتاب مقدس به زبان آذربایجانی جنوبی - گویشی1 اؤزونی تارییا قول اِلهمئش و عئسا مسئحئن حوارئسی پولوسدان، تارینین سِچئلمئشلرئنئن ائمانی و حقئقتئن معرئفتی اوچون کی، دئندارلیغا موطابئقدئر، 2 ابدی حیاتین اومئدئنده کی، یالان دانیشا بئلمهین تاری اونی چوخ عصرلردن قاباق وعده وردی. 3 آمّا موعیّن زاماندا اؤز کلامینی وعظده ظاهئر الهدی کی، نئجات ورنئمئز تارینین امری ائنن منه امانت ورئلدی. 4 موشترک ائماندا منئم حقئقی اوغلوم تئطوسا: آتا تاریدان و نئجاتورنئمئز مسئح عئسادان سنه فیض و سالاماتلیق اولسون. آغساقّاللار حاقّیندا 5 سنی اونون اوچون کرئت جزئره سئنده قویوب گتدئم کی، قالان ائشلری تاماملاییب هر شهرده سنه تاپشیردیغیم کئمی آغساقّاللار تعیئن الئیهسن. 6 او گرک تقصئرسئز بئر کئشی اولسون، بئر آروادین اَری، عیاشلیق و یا عوصیانچیلیق تؤهمتی آتیلان اؤولادلارین آتاسی یوخ، ائمانلی اؤولادلارین آتاسی اولسون. 7 چونکی کئلئسانین ناظئری تارینین موباشئری دئر و گرگ تقصئرسئز اولسون. عئنادکار، تز حئرصلهنَن، شراب اسئری، زور دئین و یا حاقسیز قازانجین دالیسیجا قاچان اولماسین. 8 آمّا قوناقسِوَن، یاخشیلیغی سِوَن، اؤزونه حاکئم اولان، عادئل، اؤزونی وقف الهمئش و نفسئنه حاکئم اولان بئری اولسون. 9 تعلئم ائنن موطابئق اولان امئن کلامی جئدّئیّت ائنن توتسون کی، هم اساس تعلئملرده تشوئق اِلئیه بئلسئن، هم ده ضئدّ دورانلاری توبئخ الئیه بئلسئن. 10 چونکی عاصی، بوشبوغاز و حئیلهگر آداملار چوخدورلار، خوصوصَن ختنه اولونانلار آراسیندا 11 کی، اولارین آغزی گرک باغلانسین. اونا گؤره کی، عایئلهلری تامامن کؤکوندن ییخیب، حاقسیز قازانج اوچون اِله تعلئملر ورئرلر کی، گرک ورمهسئنلر. 12 اولارین اؤز پیغمبرلرئندن بئری بله دیئب: «کرئتلیلر همئشه یالانچی، شرور جاناوارلار و تنبل قارینپالاردیرلار.» 13 بو شهادت دوغرودور. بو سببدن اولاری جئدّی توبئخ اله کی، ائماندا دوروست اولسونلار 14 و یهودی افسانهلره و حقئقتدن اوز دؤندَرَن آداملارین احکامینا قولاق آسماسینلار. 15 پاک اولانلار اوچون هر شی پاکدیر، آمّا ناپاک اولانلار و ائمانسیزلار اوچون هچ بئر شی پاک دیئل، بلکی اولارین هم فئکئری هم ده وئجدانلاری نجئس اولوب. 16 اولار ائدّئعا الهیئرلر کی، تارینی تانیییرلار، آمّا عمللری ائنن ائنکار الهیئرلر. اولار مکروه و ناموطئعدئرلر، هچ بئر یاخشی ائشه ده یارامازلار. |
@ 2024 Korpu Company