وحی 1 - کتاب مقدس به زبان آذربایجانی جنوبی - گویشیباشلانیش 1 عئسا مسئحئن وحیی. تاری بونی اونا وردی کی، تزلئک ائنن باش ورمهسی واجئب اولان شیلری اؤزلرئنی اونا قول اله مئشلره گؤرسدسئن. او دا اؤز ملهیی واسئطهسی ائنن بونی اؤز قولی یوحنّایا آشکار الهدی. 2 او دا تارینین کلامینا و عئسا مسئحئن شهادتئنه، یعنی گؤردوکلرئنئن هامیسینا شهادت وردی. 3 خوش او آداملارین حالینا کی، بو نبئلئیئن کلامینی اوخویورلار، اشئدئرلر، و اوندا یازیلان شیلره عمل الهیئرلر، چونکی واخت یاخیندیر. یدّی کئلئسایا سالام 4 یوحنّادان آسئیا ایالتئنده اولان یدّی کئلئسایا: وار اولان، وار اولموش و گلهجک اولاندان و اونون تختئنئن حوضوروندا اولان یدّی روحدان سئزه فیض و سالاماتلیق اولسون. 5 هم ده امئن شاهئد، اؤلولردن ائلک دوغولان و یر اوزونون پادشاهلارینین ریئسی عئسا مسئحدن کی، بئزی سِوئر و اؤز قانی واسئطهسی ائنن بئزی گوناهدان آزاد الهدی 6 و بئزی بئر پادشاهلیق و اونون آتا تاریسی اِوئنه کاهئنلر تعیئن الهیئب. اونا ابدهجک جلال و قودرت اولسون. آمئن. 7 باخین، او، بولودلار ائنان گلئر، و هر گؤز اونی گؤرهجک، حتّا اونون بدنئنی دِشَنلر بله؛ دونیانین بوتون قبئلهلری اونون اوچون یاس توتاجاقلار. بلی، بله اولاجاق. آمئن. 8 رب تاری دیئر: «منم ”اَلئف“ و ”ی“؛ وار اولان، وار اولموش و گلهجک اولان، او قادئری-موطلق.» عئسا یوحنّایا ظاهئر اولور 9 من، یوحنّا، سئزئن قارداشیز کی عئسادا اولان سیخینتییا، ملکوتا، و صبره سئز ائنن برابر شرئکم، تارینین کلامی و عئسانین شهادتی اوچون پَطموس دیئلن جزئرهده ائدئم. 10 ربّئن گونونده روحدا ائدئم، و آرخامدا شیپور سسئنه اوخشار بؤیوک بئر سس اشئتدئم 11 کی دیئردی: «گؤردویونی بئر کئتابا یاز و یدّی کئلئسایا گؤندَر: اِفسوسا، اِسمئرنایا، پِرقاموما، تئیاتئرایا، ساردئسه، فئلادلفئیایا و لاودئکئیهیه.» 12 او زامان دؤندوم کی، من ائنن دانیشان سسی گؤروم. دؤنَنده یدّی قیزیل چیراقدان گؤردوم 13 و چیراقدانلارین آراسیندا ائنسان اوغلونا بنزهین بئرئسئنی گؤردوم کی، آیاقلاریناجاق یتئشن اوزون بئر پالتار گیمئش، سئنهسئنه ده قیزیلدان بئر شال تاخمیشدی. 14 اونون باشی و ساچلاری یون و قار کئمی آغ ائدی، گؤزلری ده بئر اود آلووسی کئمی ائدی. 15 آیاقلاری کورهده یانان پارلاق بورونج کئمی ائدی، سسی ده بئر چوخ سولارین گورولتوسونه بنزهیئردی. 16 صاغ الئنده یدّی اولدوز ساخلامیشدی، آغزیندان دا ائکی آغیزلی بئر ائتی قیلینج چیخیردی. اوزی بوتون قودرتئنده پارلایان گون کئمی ائدی. 17 اونی گؤرَنده اؤلی کئمی آیاقلارینا دوشدوم. آمّا او صاغ اَلئنی منئم اوستومه قویوب ددی: «قورخما! منم، بئرئنجی و آخیرینجی اولان، 18 همئشه دئری اولان. اؤلموشدوم، و باخ، همئشهلئک دئرییَم و اؤلوم و اؤلولر دئیارینین آچارلاری مندهدئر. 19 بونا گؤره گؤردوکلرئنی، ائندی اولان شیلری و بولاردان سورا باش ورهجک شیلری یاز. 20 صاغ اَلئمده گؤردویون یدّی اولدوز و یدّی قیزیل چیراقدانین سئرّی بودور: یدّی اولدوز، یدّی کئلئسالارین ملکلریدئر. یدّی چیراقدان دا یدّی کئلئسالاردیر. |
@ 2024 Korpu Company