یعقوب 1 - کتاب مقدس به زبان آذربایجانی جنوبی - گویشی1 تاری و رب عئسا مسئحئن قولی یعقوبدان، اونائکی قبئلهیه کی آیری یرلره داغیلیبلار: سالام. ائمانیزین ائمتاحانی 2 قارداشلاریم، جوربهجور ائمتاحانلار ائنان راستلاشدیغیز زامان، اونی بؤیوک شادلیق حساب الهیئن، 3 چونکی بئلئرسئز کی، ائمانیزین ائمتاحانی تحمّول بارا گتئرئر. 4 قویون تحمّول ده اؤز کامئل نتئجهسئنه چاتسین، اِله کی، سئز، هچ بئر شیئز اسکئک اولمادان، کامالا چاتیب کامئل اولاسیز. 5 آمّا اگر سئزلردن بئرئنئن حئکمتی اَسکئکدئر، قویون تاریدان ائستهسئن کی، هر کسه سخاوت ائنن مذمّتسئز عطا الهیئر و اونا عطا اولوناجاق. 6 آمّا بونی گرک ائمان ائنان ائستهسئن و هچ شوبهه اِله مهسئن، چونکی شوبهه الهین آدام، دهنزئن شپهلرئنه بنزهیئر کی، کولک اونی قالخیزیب تلاطومه سالیر. 7 بله آدام گومان اله مه سئن کی، ربدن بئر شی آلاجاق، 8 فئکرئنی دیئشن آدام هچ بئر یولوندا ثابئت دیئل. 9 آمّا وضعئیّتی حقئر اولان قارداش اؤز بؤیوک منصبئنه فخر اله سئن، 10 وارلی اولان دا اؤز حقئرلئیئنه، چونکی وارلی آدام چؤل اوتونون چئچهیی کئمی سولوب گدهجک. 11 دوغرودان دا گون، یاندیران حرارت ائنن چیخیر، اوت قورویور، چئچهیی تؤکولور و اوزونون گؤزَللئیی محو اولور. وارلی آدام دا گؤردویی ائشلرده اِله سولاجاق. 12 خوش او آدامین حالینا کی، ائمتاحان آلتیندا تاب گتئرئر، چونکی تصدئق اولوناندان سورا، او حیات تاجینی آلاجاق کی، رب اونی سِونلره وعده ورئب. 13 هچ کس وسوسهیه دوشَن زامان دمهسئن: «من تاری طرفئندن وسوسه اولونورام.» چونکی تاری پئسلئک ائنن وسوسه اولونا بئلمز. او اؤزی ده هچ کسی وسوسه اله مئر. 14 آمّا هر کس او زامان وسوسهیه دوشور کی، اؤز شهوتی طرفئنه چکئلئب اونا آلدانیر. 15 او زامان شهوت بویلی اولوب گوناهی دوغور، گوناه دا عمله گلدئکده اؤلوم گتئرئر. 16 عزئز قارداشلاریم، آلدانمایین. 17 هر بئر یاخشی شی و هر کامئل عطا یوخاریدان، نورلارین آتاسیندان نازئل اولور کی، اوندا نه دیئشئلمک وار نه ده دؤنمکلئک کؤلگهسی. 18 او، اؤز ائرادهسئنی عمله گتئرنده، بئزی حقئقتئن کلامی ائنن تؤولئد الهدی، اِله کی، بئز اونون مخلوقلاری آراسیندا بئر جور نوبارالیق میوهسی کئمی اولاق. کلامی اشئدئب اونا عمل الهمک 19 عزئز قارداشلاریم، بونی سئز بئلئرسئز: هر کس گرک اشئتمکده ائتی، دانیشماقدا کوند و حئرصده یاواش اولسون. 20 چونکی ائنسانین حئرصی تارینین صالحلئیئنه نایئل اولمور. 21 بونا گؤره ده، بوتون کثئفلئیی و هر نهیی کی شرارتدن قالیب ترک الهیئن و اَکئلمئش کلامی حلئملئک ائنن قبول الهیئن کی، جانلاریزی قورتارماغا قادئردئر. 22 آمّا ثابئت الهیئن کی، آنجاق کلامی اشئدئب اؤزلرئنی آلداتان دیئلسئز، کلاما عمل الهینلرسئز. 23 چونکی اگر بئری کلاما عمل الهین یوخ، کلامی آنجاق اشئدندئر، او آداما بنزهیئر کی، اؤز طبئعی اوزونه گوزگوده باخیر. 24 چونکی او، اؤزونه بئر باخیب گدئر و آنَن نجه بئر آدام اولدوغونی یاددان چیخاردیر. 25 آمّا کئم کامئل شرئعته کی، آزادلیق شرئعتی دئر دئقّت ائنن باخیر و اوندا داوام الهیئر و یاددان چیخاردان بئر اشئدن یوخ، بلکی اونا عمل الهیندئر، بو آدام الهدئیی هر ائشده موبارک اولاجاق. 26 اگر بئر کس وار کی، اؤزونی دئندار گومان الهیئر، آمّا اورهیئنی آلدادیب حله ده دئلئنه جئلوو باغلامیر، بو آدامین دئندارلیغی دَیَرسئزدئر. 27 آتا تارینین نظرئنده تمئز و لکهسئز دئندارلیق بودور: یتئملرئن و دوللارین سیخینتی زامانلاریندا اولارین گؤروشویونه گتمک و اؤزونی دونیادان لکهسئز ساخلاماق. |
@ 2024 Korpu Company