عئبرانئلره 1 - کتاب مقدس به زبان آذربایجانی جنوبی - گویشیملکلردن باش 1 تاری کی، قدئم زامانلاردا دفهلر ائنن پیغمبرلر واسئطه سی ائنن و جوربهجور یوللار ائنان آتالاریمیزا دانیشدی، 2 بو آخیرکی گونلرده بئزه اوغلونون واسئطهسی ائنن دانیشیب کی، اونی هر شیئن وارئثی تعیئن الهدی و اونون واسئطهسی ائنن دونیانی یاراتدی. 3 و او، تارینین جلالینین شفقی و اونون ذاتینین تامام شمایئلیدئر و هر شیی اؤز قودرتئنئن کلامی ائنن ساخلاییر. او، گوناهلارین تمئزله مک ائشئنی باشا چاتدیراندان سورا، اوجالاردا عظمتلی اولانین صاغیندا اوتوردی. 4 و ملکلردن داها اعلا بئر آدی مئراث آلدیغی اوچون، اولاردان داها دا باش اولوبدور. 5 چونکی تاری ملکلرئن هانسی بئرئنه دیئب کی: «سن منئم اوغلومسان، بو گون من سنه آتا اولدوم.» و یا: «من اونا بئر آتا اولاجاغام، او دا منه بئر اوغول اولاجاق؟» 6 آمّا ائلک دوغولانی گئنه بو دونیایا گتئردئیی زامان دیئر: «قوی تارینین بوتون ملکلری اونا سجده الهسئنلر.» 7 و ملکلر بارهسئنده دیئر: «او، اؤز ملکلرئنی یله دؤندَرئر، اؤز خئدمتچئلرئنی اود آلووسونا.» 8 آمّا اوغول حاقّیندا دیئر: «ای تاری، سنئن سلطنت تختئن ابددن ابدهجک دئر. پادشاهلیغینین عصاسی ائنصاف عصاسیدیر. 9 سن صالحلئیی سوئرسن، پئسلئکدن نئفرت الهیئرسن؛ اونون اوچون ده تاری، سنئن تارین، یولداشلارینین ائچئندن سنی شادلیق یاغی ائنن مسح الهیئب.» 10 و: «باشلانیشدا، سن یارب، یرئن بونؤورهسئنی قوردون، و گؤیلر سنئن اللرئنئن ائشیدئر. 11 اولار محو اولاجاقلار، آمّا سن قالیرسان. اولارین هامیسی پالتار کئمی کؤهنهلهجکلر، 12 پالتار کئمی اولاری بوکهجکسن؛ پالتار کئمی اولار دا دیئشئلهجکلر. آمّا سن دیئشئلمزسن، ائللرئن اصلا قورتارماز.» 13 آمّا ملکلرئن هانسی بئرئنه اولوب کی، دسئن: «صاغیمدا اوتور، او زاماناجاق کی، من دوشمنلرئنی آیاقلارینین آلتینا سالام؟» 14 مگر اولارین هامیسی خئدمت الهین روحلار دیئللر کی، نئجاتی مئراث آلانلارین خاطئری اوچون، خئدمت الهمهیه گؤندَرئلئرلر؟! |
@ 2024 Korpu Company