حوارئلر 1 - کتاب مقدس به زبان آذربایجانی جنوبی - گویشی1 ای تِعوفئلوس، اوّلئنجی کئتابی بوتون او شیلر حاقّیندا یازدیم کی، عئسا اولارین الهیئب اؤیرتمهسئنه باشلادی. 2 تا او گونه کئمی کی، سچدئیی حوارئلره موقدّس روحون واسئطهسی ائنن امرلر ورئب، یوخاری آپاریلدی. 3 کی، عذابلارینی چکندن سورا دا اؤزونی اولارا بئر چوخ ائناندیران دلئللر ائنن گؤرستدی و قیرخ گون عرضئنده اولارا گؤرونوب، تارینین پادشاهلیغی بارهده دانیشدی. 4 و اولاری بئر یره ییغیب اولارا امر الهدی کی، اورشلئمدن آیریلماسینلار، آمّا ددی: «آتانین او وعدهسئنی کی، مندن اِشئدئبسئز، گؤزلهیئن. 5 چونکی یحیا سو ائنن تعمئد وردی، آمّا سئز بئر نچه گونه قدر تارینین موقدّس روحی ائنن تعمئد اولوناجاقسیز.» 6 و بله ده اولار، بئر یره ییغیلدیقلاری زامان، اوندان سوروشدولار: «یارب، آیا پادشاهلیغی ائسرایئله بو زامان قایتاراجاقسان؟» 7 عئسا اولارا ددی: «سئزئن ائشئز دیئل کی، آتانین اؤز ائقتئداری ائنن موعیّن الهدئیی زامان و یا واختلاری بئلهسئز. 8 آمّا موقدّس روح اوستوزه گلندن سورا قووّت آلاجاقسیز و اورشلئمده، بوتون یهودئیه و سامئرهده، حتّا دونیانین لاپ اوزاق یرلرئنه قدر منئم شاهئدئم اولاجاقسیز.» 9 عئسا بو سؤزلری دئیندن سورا، اولارین گؤزلری قاباغیندا یوخاری قالخیزیلدی و بئر بولود اونی اولارین نظرئندن آییردی. 10 عئسانین گؤیه قالخدیغی واخت کی، اولار گؤزلرئنی دئقّت ائنن گؤیه دئکمئشدئلر، قفلتن آغ پالتار گیمئش ائکی کئشی اولارین یانیندا دوردی. 11 اولارا ددئلر: «ای جلئللیلر! نه اوچون دوروب گؤیه باخیرسیز؟ بو عئسا کی، سئزدن آلینیب گؤیه آپاریلدی، اله ده قاییداجاق؛ نجه کی، اونون گؤیه گتدئیئنی گؤردوز.» بالاخانادا 12 او زامان اولار زیتون دیئلن داغدان اورشلئم شهرئنه دؤندولر؛ او داغ اورشلئمدن بئر موقدّس شنبه گونی قدر کی یول گتمهیه ائجازه ورئلمئشدی، اوزاق ائدی. 13 اِوه گئردئکلری زامان، قالدیقلاری بالاخانایا چیخدیلار. بو آداملار بولار ائدئلر: پطروس و یوحنّا و یعقوب و آندریاس، فئلئپوس و توما، بارتولمای و متّا، آلفاعوس اوغلی یعقوب، و وطنپرست شمعون، و یعقوب اوغلی یهودا. 14 بولارین هامیسی بئرلئکده آروادلار ائنان، عئسانین آناسی مریم و اونون قارداشلاری ائنن دائم اؤزلرئنی دوعایا وقف الهیئردئلر. 15 بو گونلرده پطروس یوز ائیئرمی نفره قدر بئر ییغیناقدا قارداشلارین آراسیندا دوروب ددی: 16 «قارداشلار! موقدّس یازینین سؤزی یهودا حاقّیندا کی، عئسانی توتانلارا یول گؤرستدی، یرئنه یتئشمهلی ائدی؛ او یازی کی، موقدّس روح داوودون آغزی ائنن قاباقدان دمئشدی. 17 چونکی او، بئز ائنن ساییلیب بو خئدمتده پایینی آلدی. 18 بو آدام پئسلئیئنئن اوجرتی ائنن بئر زمی آلدی؛ کلّهسی اوسته دوشوب، قارنی اورتادان ییرتیلدی و بوتون باغیرساقلاری اشئیه تؤکولدی. 19 و بو، اورشلئمده یاشایانلارین هامیسینا بئلئندی؛ بونا گؤره ده، او زمئیه اؤز دئللرئنده ”حَقَل-دِما“ دیئلئر، یعنی قان زمئسی. 20 چونکی مزمورلار کئتابیندا بله یازیلیب: ”قوی اونون مسکنی وئران اولسون و هچ کس اوندا ساکئن اولماسین.“ و یازیلیب دا: ”منصبئنی آیری بئری آلسین.“ 21 بله ده، ائندی او آداملاردان کی، رب عئسانین آرامیزا گئرئب چیخدیغی واختین هامسیندا بئز ائنن اولوبلار، 22 یعنی یحیانین تعمئد وردئیی زاماندان عئسانین آرامیزدان گؤیه آلیندیغی گونه قدره کئمی، اولاردان بئری گرک بئز ائنن اونون دئرئلمهسئنه شاهئد اولسون.» 23 ائکی نفری قاباغا قویدولار؛ بارسابا چاغیریلان یوسئفی کی، یوستوس دا چاغیریلیردی و ماتئیاسی. 24 و دوعا الهیئب ددئلر: «سن یارب، ای هامینین اورَکلرئنی بئلن، بو ائکی نفردن هانسینی سچدئیئنی گؤرسد کی، 25 بو خئدمت و حوارئلئیی آلسین. یهودا اونی بوراخدی کی، اؤز یرئنه گتسئن.» 26 و اولارین آراسیندا پوشک آتدیلار؛ پوشک ماتئیاسا دوشدی و او، «اون بئر» حوارئیه قوشولدی. |
@ 2024 Korpu Company