۳یوحنّا 1 - کتاب مقدس به زبان آذربایجانی جنوبی - گویشی

¹ من آغساقّالدان، حقئقتده سودئیئم عزئز غایوسا.

² ای عزئز، دوعا اله‌یئرم کی، جانین کامینا چاتدیغی کئمی، سن ده هر باخیمدان کامینا چاتیب صاغ-سالامات اولاسان.

³ چوخ سوئندئم اوندا کی، بعضی قارداشلار گلئب، سنئن حقئقته باغلی اولدوغون باره‌ده شهادت وردئلر، یعنی، نجه سن حقئقتده رفتار اله‌یئرسن.

⁴ من اوچون بوندان داها بؤیوک شادلیق یوخدور کی، اؤولادلاریمین ’حقئقتده‘ یاشادیغینی اشئدئم.

⁵ ای عزئز، قارداشلار اوچون، هم ده قرئب اولانلار اوچون نه اله‌یئرسن، اؤز وفالی‌لیغینی گؤرسدئرسن.

⁶ اولار دا کئلئسانین حوضوروندا سنئن محبّتئن حاقّیندا شهادت ورئبلر. اگر اولاری تارییا لایئق بئر شکئلده یولا سالاسان، یاخشی ائش گؤررسن.

⁷ چونکی اولار اونون آدی خاطئرئنه یولا چیخدیلار و قیری‌‌یهودئلردن هچ بئر شی قبول اله‎ مه‌دئلر.

⁸ بونا گؤره، بئز بله آداملارا کؤمک اله‌مه‌لی‌یئک کی، اولار ائنان حقئقته همکار اولاق.

⁹ کئلئسایا بئر شی یازدیم، آمّا آرالاریندا ریئس اولماغی سِوَن دئیوترِفِس بئزئم ددئیئمئزی قبول اله‎ مئر.

¹⁰ پس اگر گلسم، اونون اله‌دئیی ائشلرئنی اوزه چیخارداجاغام. او، بئزه، ناحاق یره، پئس سؤزلر‌ ائنن ائتّئهام وورور و بونا دا قانع اولماییب قارداشلاری اؤز یانینا قبول اله‎ مئر؛ و بونی اله‌مک ائسته‌ین آداملارا دا مانع اولور و اولاری کئلئسادان قووور.

¹¹ ای عزئز، پئسلئیه یوخ، بلکی یاخشیلیغا نومونه اول؛ یاخشیلیق اله‌ین تاریداندیر، پئسلئک اله‌ین تارینی گؤرمه‌یئب.

¹² هامی دئمئترئیوس حاقّیندا یاخشی بئر شهادت ورئر، حتّا حقئقتئن اؤزی. بئز ده بونا شهادتئمئزی علاوه اله‌یئرئک و بئلئرسن کی، بئزئم شهادتئمئز دوغرودور.

¹³ سنه یازمالی چوخ شیلرئم وار، آمّا ائسته‌مئرم کی، اولاری قلم و مورکّب‌ ائنن یازام.

¹⁴ اومئدئم وار کی، تزلئک‌ ائنن سنی گؤرم و اوز-اوزه دانیشاق.

¹⁵ سالاماتلیق سن‌ ائنن اولسون! دوستلار سنه سالام گؤندَ‌رئرلر. دوستلارا آدباآد سالام یتئر.