۲تئموتاعوسا 1 - کتاب مقدس به زبان آذربایجانی جنوبی - گویشی1 تارینین ائرادهسی ائنن مسئح عئسادا اولان حیاتین وعدهسئنه گؤره، مسئح عئسانین حوارئسی پولوسدان، 2 عزئز اوغلوم تئموتاعوسا: آتا تاری و ربّئمئز مسئح عئسادان فیض، رحمت، و صولح و سالاماتلیق اولسون. سنه تاپشیردیقلاریمی مؤحکم ساخلا 3 گجه-گوندوز سنی دوعالاریمدا دائم خاطیرلایاندا تارییا شوکور الهیئرم، اله او تارییا کی منده اجدادلاریم کئمی تمئز وئجدان ائنان، اونا خئدمت الهیئرم. 4 و سنئن گؤزیاشلارینی خاطیرلادیقجا سنی گؤرمهیه حسرت چکئرم. اِله کی، شادلیقدان دولام. 5 سنده اولان خالئص ائمانی یادا سالیرام کی، اوّلجه سنئن بؤیوک آنان لویئس و آنان یونئسده ساکئن اولدی و اَمئنم کی، سنده ده ساکئندئر. 6 بو سببدن سنه خاطیرلادیرام کی، منئم اَل قویماغیمین واسئطهسی ائنن سنده اولان تارینین عطاسینی تزهدن آلوولاندیراسان. 7 چونکی، تاری بئزه قورخی روحونی یوخ، بلکی قودرت، محبّت و ائنضئباط روحونی ورئب. 8 بونا گؤره ربّئمئزئن شهادتئندن اوتانما، نه ده مندن کی، ربّئن زئندانئسییَم. بلکی ائنجئلئن عذابلاریندا تارینین قودرتئنه گؤره شرئک اول. 9 او تاری کی، بئزه نئجات وردی و بئزی موقدّس بئر دعوت ائنن چاغیردی، عمللرئمئزه گؤره یوخ، بلکی اؤز مقصد و فیضئنه گؤره کی، ازلدن مسئح عئسادا بئزه عطا اولوندی. 10 آمّا ائندی نئجات ورنئمئز مسئح عئسانین ظوهوری ائنن آشکار اولوب کی، اؤلومی محو الهدی و ائنجئلئن واسئطهسی ائنن حیات و بقانی ائشیقلاندیردی. 11 کی، اونون اوچون من بئر واعئظ، بئر حواری و بئر موعلّئم تعیئن اولموشام. 12 بو سببدن ده بو عذابلاری چکئرم، آمّا اوتانمیرام. چونکی کئمه ائناندیغیمی بئلئرم و یقئنئم واردیر کی، اونا امانت وردئیئمی او گونه کئمی حئفظ الهمهیه قادئردئر. 13 مسئح عئسادا اولان ائمان و محبّتده، مندن اشئتدئیئن صحئح تعلئمی اؤزونه نومونه اله. 14 بئزده ساکئن اولان موقدّس روحون وسئلهسی ائنن سنه امانت ورئلن خزئنهنی حئفظ اله. 15 بو مطلبدن خبرئن وار کی، بوتون آسئیا منطقه سئنده اولانلار مندن اوز دؤندَرئبلر و فئگِلوس و هِرموجِنِس ده اولارین آراسیندادیر. 16 رب رحمتئنی اونسئفوروسون اِو اهلئنه عطا الهسئن، چونکی دفهلر ائنن جانیمی تزهلندئردی و منئم زنجئرلرئمدن ده اوتانمیردی. 17 بلکی اوندا کی روما یتئشدی، جهد ائنن منی آختاریب تاپدی. 18 رب اونا عطا الهسئن کی، «او گونده» ربدن رحمت تاپسین. و سن چوخ یاخشی بئلئرسن کی، اِفِسوسدا نه خئدمتلر الهدی. |
@ 2024 Korpu Company