۲پطروس 1 - کتاب مقدس به زبان آذربایجانی جنوبی - گویشی1 اؤزونی عئسا مسئحه قول الهمئش و اونون حوارئسی شمعون پطروسدان؛ او آداملارا کی، تاریمیز و نئجات ورنئمئز عئسا مسئحئن صالحلئیی واسئطهسی ائنن بئزئم کئمی همن ائمانی آلیبلار: 2 تارینین و ربّئمئز عئسانین معرئفتئنده سئزه بول-بول فیض و سالاماتلیق اولسون. ائلاهی دعوت 3 اونون ائلاهی قودرتی، اونون حقئقی معرئفتی ائنن کی، بئزی اؤز عئزّت و فضئلتئنئن واسئطهسی ائنن دعوت الهدی، حیات و دئندارلیغا عایید اولان هر شیی بئزه عطا الهیئب. 4 او بولارین واسئطهسی ائنن بو قئیمتلی و مؤحتشم وعدهلرئنی بئزه عطا الهیئب، اِله کی، اولارین واسئطهسی ائنن شهوتدن باش آلان دونیادا اولان فساددان قاچیب، ائلاهی طبئعتئن شرئکی اولاسیز. 5 اِله بونا گؤره ده سئز بوتون سعییئزی صرف الهیئن و ائمانیزا اخلاقی فضئلت، اخلاقی فضئلتئزه معرئفت، 6 معرئفته نفسه حاکئم اولماق، نفسه حاکئم اولماغا تحمّول، تحمّوله دئندارلیق، 7 دئندارلیغا قارداش سوگئسی و قارداش سوگئسئنه ده محبّتی علاوه اِله یئن. 8 چونکی اگر بولار سئزده اولسا و آرتسا، ربّئمئز عئسا مسئحئن حقئقی معرئفتئنده سئزی فایداسیز و ثمرهسئز قویمازلار. 9 آمّا هر کئمده کی بولار یوخدور، او کوردور، بصئرتی یوخدور و قاباقکی گوناهلاریندان تمئزلهندئیئنی یاددان چیخاردیب. 10 بونا گؤره، قارداشلار، داها چوخ اللشئن کی، دعوت و سچئلدئیئزی مؤحکملدهسئز، نهقدر کی، بو شیلری الهیئرسئز، هچ واخت بودرهمزسئز. 11 چونکی بو یول ائنان ربّئمئز و نئجات ورنئمئز عئسا مسئحئن ابدی پادشاهلیغینا گئرمک سئزه بول-بول ورئلهجک. کلامین نَبئلئیی 12 بونون اوچون من همئشه حاضیر اولاجاغام کی، بولاری سئزه خاطیرلادیم، گرچی سئز اله ائندی ده بولاری بئلئرسئز و یانیزدا اولان حقئقتده ثابئتقدمسئز. 13 بلی، بله صلاح بئلئرم کی، من بو مسکنده اولانا قدر، خاطیرلاتماق ائنان سئزی اویادیم. 14 چونکی بئلئرم کی، بو تزلئکده بو مسکندن آیریلاجاغام، نجه کی، ربّئمئز عئسا مسئح ده منه آشکار الهیئب. 15 بونا گؤره اللشه جه یم کی، منئم رحلتئمدن سورا دا بولاری یادا سالماغا قادئر اولاسیز. 16 چونکی بئز ربّئمئز عئسا مسئحئن قودرتئنی سئزه بئلدئرن زامان، و اونون گئنه گلهجهیئنی سئزه بئلدئرن زامان، اوستالیق ائنان دوزَلمئش افسانهلرئن دالیسیجا گتمهدئک، آمّا اؤزوموز اونون شؤوکتئنئن شاهئدلری ائدئک. 17 اونا گؤره کی، حؤرمت و جلالی آتا تاریدان آلان زامان، عظمتلی اولان جلالدان بله بئر سس گلدی: «بو منئم عزئز اوغلومدور کی، اوندان چوخ راضییام.» 18 و بئز اؤزوموز موقدّس داغدا اونونان اولان زامان، گؤیدن گلن بو سسی اشئتدئک. 19 بوندان علاوه، پیغمبرلرئن سؤزلری بئزئم یانیمزدا داها چوخ ثابئت اولدی کی، یاخشی دیر اولارا دئقّت الئیهسئز، چونکی بئر چیراق کئمی قارانلیق یرده ائشیلداییر، اله کی گون شاخا و سحر اولدوزی اورَکلرئزده طولوع الئیه. 20 آمّا هر شیدن اوّل بونی بئلئن کی، موقدّس یازیدا اولان هچ بئر نبئلئک شخصئن اؤز تفسئری دیئل. 21 چونکی هچ نَبئلئک هچ بئر زامان ائنسان ائرادهسی ائنن اولونماییب، بلکی ائنسانلار موقدّس روح طرفئندن تاری کلامیندان دانیشدیلار. |
@ 2024 Korpu Company