۲یوحنّا 1 - کتاب مقدس به زبان آذربایجانی جنوبی - گویشی

¹ من آغساقّالدان، او سچئلمئش خانیم و اونون اؤولادلارینا کی، اولاری ’حقئقتده‘ چوخ سوئرم؛ و نه فقط من، بلکی حقئقتی تانییانلارین هامیسی طرفئندن سوئلئر.

² او حقئقته گؤره کی بئزده ساکئن دئر و ابده‎ جک بئز ائنن قالار.

³ آتا تاریدان و آتانین اوغلی عئسا مسئحدن، حقئقت و محبّتده، فیض، رحمت و سالاماتلیق بئز ائنن اولاجاق.

⁴ چوخ سوئندئم کی، سنئن اوشاقلارینین آراسیندا، آتادان آلدیغیمیز حؤکمه موطابئق، ’حقئقتده‘ یاشادیقلارینا راست گلدئم.

⁵ ائندی ای عزئز خانیم، سندن خاهئش اله‌یئرم کی، بئربئرئمئزی محبّت اله‌یک. بو سنه یازدیغیم، تزه بئر حؤکم دیئل، بلکی بو اله او حؤکمدور کی اِله او باشلانیشدان واریمیز ائدی.

⁶ و محبّت بودور کی، بئز اونون حؤکملرئنه موطابئق رفتار اله‌یک. بو، باشلانیشدان اشئتدئیئز او حؤکمدور کی، گرک اوندا رفتار الئیه‌سئز.

⁷ چونکی چوخ آلدادانلار دونیایا یاییلیبلار کی، عئسا مسئحئن جئسمده گلدئیئنی قبول اله‎ مئرلر. بونی اله‌ین، اله همن او آلدادان و مسئحه ضئدّ اولاندیر.

⁸ اؤزوزدن موواظئب اولون کی، بئزئم عمله یتئشتئردئیئمئزی الدن ورمه‌یئب، بلکی کامئل بئر پاداشا نایئل اولاسیز.

⁹ حدّی آشیب مسئحئن تعلئمئنه باغلی قالمایان هچ بئر کس‎ده تاری یوخدور. تعلئمه باغلی قالان هر کسده هم آتا وار هم ده اوغول.

¹⁰ اگر بئر کس یانیزا گلئب بو تعلئمی گتئرمئیه، اونی اِوه قبول اله مه یئن. اونونان بله سالاملاشمایین.

¹¹ چونکی اونونان سالاملاشان، اونون شر ائشلرئنده شرئک اولور.

¹² گرچی سئزه یازمالی چوخ سؤزوم وار، آمّا ائسته‌مئرم کی، بو کاغیذ و مورکّب ائنن اولا. اومئدئم بودور کی، یانیزا گلم و اوز-اوزه دانیشام، اله کی، شادلیغیمیز کامئل اولسون.

¹³ سنئن سچئلمئش باجینین اؤولادلاری سنه سالام گؤندَ‌رئرلر. آمین!