۱تئموتاعوسا 1 - کتاب مقدس به زبان آذربایجانی جنوبی - گویشی1 پولوسدان کی نئجات ورنئمئز تارینین و اومئدئمئز مسئح عئسانین حؤکمونه گؤره، مسئح عئسانین حوارئسی دیر؛ 2 ائماندا حقئقی اوغلوم تئموتاعوسا: آتا تاری و ربّئمئز مسئح عئسادان سنه فیض، رحمت، و صولح و سالاماتلیق اولسون. یالان اولان تعلئملردن آییق اولون 3 مقدونئیّه منطقهسئنه گتدئیئم واخت سندن خاهئش الهدئم کی، افسوس شهرئنده قالاسان و بعضئلره نصئحت ورهسن کی، آیری تعلئملر اؤیرتمهسئنلر، 4 افسانهلر و ساییسیز-حسابسیز نسئلنامهلره ده قولاق آسماسینلار کی، تارینین بئنا اله مهسئنئن ترقّئسئنه کی، ائمانداندیر، باعئث اولمورلار. اولار آنجاق بحثلره باعئث اولورلار. 5 آمّا بئزئم حؤکموموزون هدفی او محبّتدئر کی، پاک اورَکدن، یاخشی وئجداندان و رئیاسیز ائماندان گلئر. 6 چونکی بعضی آداملار بولاردان آزیب، ثمرهسئز بحثلره اوز گتئرئبلر 7 و ائستهیئرلر کی، شرئعت موعلّئمی اولسونلار، حال بو کی، نه ددئکلرئنی آنلاییرلار، نه ده یقئن ائنن ائدّئعا الهدئکلر! 8 آمّا بئز بئلئرئک کی، شرئعت یاخشیدیر اگر بئر کس اونی موناسئب بئر شکئلده ائستئفاده الهسه. 9 بونی دا بئلئرئک کی، شرئعت صالح بئر آدام اوچون قویولماییب؛ بلکی شرئعتسئزلر، عاصئلر، دئنسئزلر، گوناهکارلار، موقدّس اولمایانلار، نجئسلر، آتا و یا آنالارینی اؤلدورنلر، قاتئللر، 10 زئناکارلار، همجئنسبازلار، آدام اوغورلایانلار، یالان دانیشانلار، آندی پوزانلار و صحئح تعلئمئن ضئدّئنه اولان آیری هر شی اوچون قویولوب. 11 او تعلئم کی، موتبارک تارینین شؤوکتلی ائنجئلئنه گؤره منه تاپشیریلیب. ربّئن پولوسا اولان فیضی 12 ربّئمئز مسئح عئسایا شوکور الهیئرم کی، منه قووّت ورئب. چونکی منی امئن بئلئب، خئدمته تعیئن الهدی؛ 13 گرچی اوّللر کوفر دانیشان، عذاب ورن و ظولم اِلئیهنئن بئری ائدئم. آمّا گئنه ده منه رحمت گؤرستدی، بو سببدن کی، ائمانسیزلیقدا، آنلامازلیقدان بولاری الهدئم. 14 و مسئح عئسادا اولان ائمان و محبّت ائنن ربّئمئزئن فیضی حددن داها دا چوخ ائدی. 15 بو سؤز اعتئمادا و هر وجه ائنن قبول اولونماغا لایئقدئر کی، مسئح عئسا گوناهکارلاری قورتارماق اوچون دونیایا گلدی کی، اولارین آراسیندا لاپ یامانی منم. 16 آمّا من محض بو سببه رحمت تاپدیم کی، عئسا مسئح اؤز کامئل صبرئنی اوّلده منه ظاهئر الهسئن. اِله کی، ابدی حیات اوچون سورادا اونا ائنانانلارا نومونه اولام. 17 ائندی ابدی پادشاها، قیریفانی، گؤرونمهین، واحئد اولان تارییا ابددن ابدهجک حؤرمت و شؤوکت اولسون. آمئن. 18 اؤولادیم تئموتاعوس، بولاری، سنئن حاقّیندا قاباقدان دیئلن نبئلئک سؤزلرئنه گؤره، سنه تاپشیریرام کی، اولارین واسئطهسی ائنن یاخشی بئر موبارئزه قاباغا آپاراسان 19 و ائمان و یاخشی وئجدانی حئفظ الئیهسن کی، بعضئلری ردّ الهیئب، ائمانلاری حاقدا سینیق گمی کئمی باتیبلار. 20 بولارین آراسیندا هئمنایوس و ائسکندردئر. اولاری شیطانا تسلئم الهدئم کی، کوفر دمهمهیی اؤیرنسئنلر. |
@ 2024 Korpu Company