Matɨyui 1 - Yipma

Jizaazai Kɨraazɨtɨyarɨ Ne Sɨnnawɨnyaraavɨre Yayangɨnesɨra.

¹ Jizaazai Kɨraazɨtɨyai yɨma'nanne'na Ne Kuvɨdaarava Ne Kwɨyakwaravaavɨne yayangɨ. Ne Devitɨmɨre yɨsavaakɨdaa'nyɨ Jizaazai yɨma'nyɨna. Ne Evɨraamɨmɨre yɨsavaakɨdaa'nyɨ Devitɨ yɨma'nyɨna. Yagaala da' Jizaazai Kɨraazɨtɨyarera sɨnnawɨ yɨma'nɨnɨkeraavɨnesɨ.

² Evɨraamɨ Aazakɨmɨ ganɨmaangelyɨ. Aazakɨ Jaikopɨmɨ ganɨmaangei. Jaikopɨ Jutharɨjɨ gathaa'gahwaaravaavɨjɨ ganɨmaangei.

³ Juthai Perezarɨjɨ Jeraamɨjɨ ganɨmaangei. Perezarɨ ganaange' avaalyagaa' kɨdaraarɨ maarake' Temaa'. Perezai Ezɨronɨmɨ ganɨmaangei. Ezɨronɨ Raamɨmɨ ganɨmaangei.

⁴ Raamɨ Aminɨthapɨmɨ ganɨmaangei. Aminɨthapɨ Naazonɨmɨ ganɨmaangei. Naazonɨ Saalɨmonɨmɨ ganɨmaangei.

⁵ Saalɨmonɨ Bowaazarɨ ganɨmaangei. Bowaazarɨ ganaange' Rayaa'. Bowaazai Wovetɨmɨ ganɨmaangei. Wovetɨmɨ ganaange' Rutɨya'. Wovetɨ Jeziyarɨ ganɨmaangei.

⁶ Jeziyai Kingɨya Devitɨmɨ ganɨmaangei. Devitɨ Solomonɨmɨ ganɨmaangei. Solomonɨmɨ ganaange' kwala mudɨ'maa'nya' Yuraayarɨ maa'nakesɨra. Yuraayai kabala' Devitɨ maaraka Solomonɨmɨ wɨmwaaiha'.

⁷ Solomonɨ Rɨyavowaamɨmɨ ganɨmaangei. Rɨyavowaamɨ Avaazarɨ ganɨmaangei. Avaazai Ezarɨ ganɨmaangei.

⁸ Ezai Jewozapatɨmɨ ganɨmaangei. Jewozapatɨ Joraamɨmɨ ganɨmaangei. Joraamɨ Azaayarɨ ganɨmaangei.

⁹ Azaayai Jotaamɨmɨ ganɨmaangei. Jotaamɨ Ayaazarɨ ganɨmaangei. Ayaazai Ezɨkaayarɨ ganɨmaangei.

¹⁰ Ezɨkaayai Manaazarɨ ganɨmaangei. Manaazai Emozarɨ ganɨmaangei. Emozai Jozaayarɨ ganɨmaangei.

¹¹ Jozaayai Jekonaayarɨjɨ gahwaaravaavɨjɨ ganɨmaangei. Sagaa' Bavɨlonɨ mwaalyara Yɨzɨrelɨyaraavɨ tamakeva makwaweva Anga Bavɨlonɨ menyawɨnna wɨmwaaihe'.

¹² Anga Bavɨlonɨ kalavuzɨwawɨnya yadaapi Jekonaayai Sɨyalɨtiyalɨmɨ ganɨmaangelyɨ. Sɨyalɨtiyalɨ Seravaavelɨmɨ ganɨmaangei.

¹³ Seravaavelɨ Avaayatɨmɨ ganɨmaangei. Avaayatɨ Elaayakimɨmɨ ganɨmaangei. Elaayakimɨ Ezorɨ ganɨmaangei.

¹⁴ Ezoi Sethokɨmɨ ganɨmaangei. Sethokɨ Ekimɨmɨ ganɨmaangei. Ekimɨ Elaayatɨmɨ ganɨmaangei.

¹⁵ Elaayatɨ Elɨyaazarɨ ganɨmaangei. Elɨyaazai Mataanɨmɨ ganɨmaangei. Mataanɨ Jaikopɨmɨ ganɨmaangei.

¹⁶ Jaikopɨ Jozepɨyarɨ ganɨmaangei. Jozepɨyai Maarɨyaavɨ kwalaangai yɨma'na'. Maarɨyaa' Jizaazarɨ maarakelyɨ. Jizaazai sahwai Kɨraazɨtɨyai wo'nɨkelyɨ. Gotɨyai dahɨlakakelyɨ.

¹⁷ Sarevɨdaa'nyɨ aayawɨ Ne Evɨraamɨ mwalyaakegaa'daasɨ saamɨnaangegaa' Ne Devitɨ yɨma'nyɨna. Evɨraamɨmɨdaa'nyɨ mɨjɨyɨma'nɨgaveva sɨvɨlyɨrɨdaa'nyɨ daraai daraalyara (14) yɨma'nyaasare. Nabaai aayawɨ Devitɨ mwalyaakegaa'daasɨ saamɨnaangegaa' Anga Bavɨlonɨ kalavuzɨwawɨnya yaasagaa' yɨma'nyɨna. Yɨ Devitɨmɨdaa'nyɨ mɨjɨyɨma'nɨgaveva sɨvɨlyɨrɨdaa'nyɨ daraai daraalyara yɨma'nyaasare. Nabaai Bavɨlonɨ kalavuzɨwawɨnya yaasagaa'daasɨ mɨjɨyɨma'nɨgaveva sɨvɨlyɨrɨdaa'nyɨ daraai daraalyai yɨma'na' Kɨraazɨtɨyai.

Jizaazai Kɨraazɨtɨyarɨ maarake'nesɨ.

¹⁸ Jizaazai Kɨraazɨtɨyai yɨma'nakegaa' dara yɨma'nɨnɨkesɨ. Jizaazarɨ ganaange' Maarɨyaa' sɨdɨraaya' yɨma'naka Jozepɨyarɨna dahɨlakɨna yesa' Jozepɨyai kwala mamaaryadɨ'nyɨ Gotɨyare Kuryai Maarɨyaavɨre munyɨkɨ mihakɨna kya' dara wanganake' “O, Maarɨyaa' kaimɨraavɨmunnake' daaka!”

¹⁹ Kwalaangei Jozepɨyai a'mwe yɨda'nanyai “Wagɨla wɨjaavɨma!” majai. Sarei “Kave makwasakɨna yɨma!”

²⁰ yawɨ'daa'nyɨ, yɨthaanyi, wajavɨ Naangere mamaayai ejelɨyai yɨma'naabɨna. Sara yɨma'naabɨna yaka wɨdɨna “Jozepɨyaigɨ, Devitɨmɨre gawaalɨ'gɨ Maarɨyaavɨ maarya'nevɨna yawɨta kwalaalya minnera! Sare' dare'nesɨ. Kaimɨraavɨmunya sa' Kurya Tewaanyai wɨjaavakesɨra.

²¹ Kaimalei maaradelyɨ. Kamaarojɨ gannya yaya' ‘Jizaazala,’ duthathelyɨ. Sare' dare'nesɨ. Gamɨreraavɨ kumɨre kayaa'nanya jɨpalasɨ'nojɨ padaihasamaarade'na ‘Jizaazala (Padaihasamaa'dela),’ duthathelyɨra,” mamaayai wɨda'.

²² Kɨgaakuna Naangei pɨropetɨyarɨ (Gotɨyarɨ wɨ'nawɨjɨwaakaderɨ) kujaa' sai pɨkarya yɨdayaa'. Gotɨyai “Sare' yunebanna yɨma'nana!” kada' Maarɨyaa' kaimɨraavɨmunnake' yɨma'na'. Pɨropetɨyare yagaalya dara dɨnɨ'

²³ “Yɨthaanyi, sɨdɨraaya' a'mwelyɨ mye'mwannarya' Kaimɨraavɨmunya wannyɨna yojɨ Kaimalei maarɨna yadelyɨ. Gannya yaya' ‘Yɨmanyɨwelɨma,’ wɨdɨpɨ'dei.” Yayavɨ aaya kaavɨlya' daresɨ. Gotɨyai nemɨjɨ ye'mwannemwaaihonoya'.

²⁴ Jozepɨyai waja ya'naka dɨkaa'na yaka Naangere mamaayai wɨdakabaaibɨ' sara ya'. Maarɨyaavɨ maarɨna ya'.

²⁵ Sare' kɨrɨ' mye'mwannarya' yune kaimɨraayai maarakegaa'na. Maarɨyaa' kamaara' gamɨre yaya' “Jizaazala,” wɨdɨna ya'.