2 Timoti 1 - Yipma

¹ Timoti, Polɨnyɨ pɨkarya da' yɨda'manɨgeinyɨ. Gotɨyai gannya sɨmunyavɨ Kɨraazɨtɨyai Jizaazare Nyɨdaasadeinyɨ yɨma'nya'neinyɨna yawɨraka nyɨdahɨlakakeinyɨ. Nabaai Gotɨyai yune naanga nebulya'na wɨdake'na a'mwera Kɨraazɨtɨyai Jizaazarɨ wɨlamwaaibɨza' yune gaalyabwi wɨjaaya'nei Apozelɨyainyɨ nyɨdahɨlakakeinyɨ.

² Yɨ sareinyɨ Timotigɨnyɨ gɨmɨnyɨna nyɨvu'nadeigɨ nɨmɨre kaimɨraayaigɨnyɨ githawasɨwaabeigɨnyɨ. Gotɨyai Nenɨmaangelyɨ Kɨraazɨtɨyai Jizaazai nemɨre Naangelyɨ yanga gaimwange'na gika! Kale'na gaimwange'na gika! Kwaamu'nanyabwi tewaanya gwakika!

“Su! Su!” wɨdaka yagaala tewaanyavɨna sɨmunyavɨ yɨvaimwagake'nesɨ.

³ Gɨmɨ Kɨraazɨtɨyai Jizaazarɨ nayaa nebulya'na lɨmwaga'dɨnyavɨna nɨmɨ Gotɨyarɨ “Su! Su!” wɨdadɨnyainyɨ. Sahwarɨ nɨmɨre Ne sɨnnawɨnyara yɨlaaya yamaryaatabaaibɨ' nɨmɨ kwainyɨ yɨlaaya yamaryadɨnyainyɨ. Nɨmɨre sɨmunyai padaihɨrakyarɨ yɨbwakɨmanɨge. Nɨmɨ Gotɨyarɨna yɨvanɨge dazabwi nebwina yɨda'maraangebwi midaaka! Nabaai nɨmɨre Naangerɨ yɨdaangadɨnyagaa' sawɨsavɨjɨ yɨrɨkegaasɨ yuyagaa' gɨmɨnyɨna yawɨ'dɨ Gotɨyarɨ “Su!” wɨdadɨnyainyɨ.

⁴ Nɨmɨ gɨmɨnyɨ yagalya'mavegaa' gɨmɨre tɨnnyarɨ kɨdalaalyai gwalaabake'na yawɨ'dɨnyavɨna “Nɨmɨ yɨlaaya yune nebwina yɨma!” dadɨ gɨmɨnyɨ tɨnna wanganya'na tewaanya nyɨvu'nadeinyɨ.

⁵ Nɨmɨ ayɨna gyawɨ'manɨge. Gɨmɨre dɨragɨnna lɨmwagasa' nebwina lɨmwaga'dɨnyɨ. Dɨragɨnna lɨmwagata sasare sabwi aayagaa' gɨmɨre Ne jakaanga Loyɨzɨyavɨ gɨmɨre gwaanga Yunɨzɨya' kɨrɨvɨjɨ warakabaaibɨsasɨ. Nabaai nɨmɨ nebwina yawɨ'manɨge. Dɨragɨnna lɨmwagata dazabwi gɨmɨ kwaigɨnyɨ gwarɨkesɨ.

⁶ Sare'na nɨmɨ “Gɨmɨre sɨmunya' dɨhaa'bwarɨma!” dadɨ yɨvanɨge. Yɨ Gotɨyare yanga daza' sɨhumale' gwarɨke'na jawɨ'de'nanyɨ. Kɨgaa' nɨmɨ gɨmɨre mɨnyagɨnyavɨ asɨraai kilagwake Gotɨyarɨ yanga daza' maaragɨnyaigɨnyɨ. Dahaa' gɨmɨ a'mwei dɨke' pwa'nyɨ ya'daa'nyɨ naanga yɨdamakidevaaibɨ' Gotɨyare wawɨnya ya'neigɨ gɨnnya yanga daza' naanga gɨrya'ne' yawɨradɨkaa'na ja!

⁷ Sare' darevɨnyɨ. Gotɨyai gamɨre Kurya Tewaanyarɨ yanga nejaavakelyɨ. Kurya sai nemɨnyɨ lɨka ya'neinaavɨ nemwaaihadei mɨ'. Aawa. Sai dɨragɨnya mwaalya'neinaavɨ, nevu'nya'neinaavɨ, sɨmunya nayaa pada'galayawɨ'daa maremwaainya'neinaavɨ nemwaaihadelyɨ.

⁸ Sarevɨdaa'nyɨ nemɨre Naangerɨna jalɨkurakya'na gɨmɨ wagɨla magɨvwa'nannera! Nabaai nɨmɨnyɨnajɨ sahwarɨna kalavuzangevɨ nyɨrakesainyɨna wagɨla magɨvwa'nannera! Aawa. Gɨmɨ Gotɨyare dɨragɨnya' maara'gɨzɨya'na yagaala tewaanya' wɨgaimwagya'neigɨ nɨmɨjɨ taanga dɨnye'mwannamaaka!

⁹ Gotɨyai sai mena nevadaihasamaarakei nemɨ tewaanyaina yɨma'nya'neinaavɨ jaka mena nejɨvwaramaarakelyɨ. Yɨ nemɨ tewaanya yagongɨna myawɨryada jaka sara nejɨvwaramaarakenna mɨ'. Aawa. Yune gamɨre yawɨsavɨdaa'nyɨ nemɨnyɨ yanga gaimwange'na neyada nemɨnyɨ jaka sara nejɨvwaramaarakelyɨ. Sɨnnawɨ kɨgaakuna, Gotɨyai Kwaakeva' mwakyaakegaa' Kɨraazɨtɨyai Jizaazarɨna yanga gaimwanga daza' nemɨnyɨna nejaaya'neinaavɨ nedahɨlakyaakelyɨ.

¹⁰ Dazagaa' dahɨlakake' kɨrɨ' dathahaasagaa' nemɨre nevadaihasamaa'dei Kɨraazɨtɨyai Jizaazai walaabakevɨ yanga daza' ku'maayaba mena yɨma'nɨwaabɨ'. Yɨ sarevɨna pɨrɨ' daresɨ. Kɨraazɨtɨyai Jizaazai balya'ne dɨragɨnya' wavɨla'nɨkelyɨ. Yɨ pɨrɨ' daresɨ. Yagaala tewaanyavɨ gaalyabwi kayaaka minyɨ ya'ne' marima'naabakelyɨ. Yɨ Kɨraazɨtɨyai Jizaazai sara yoimavakesɨ.

¹¹ Yagaala tewaanya dazavɨne wawɨnyavɨ nɨmɨ wɨjɨwakamarya'neinyɨ mwaaidɨ Apozelɨyainyɨ wɨjɨwɨryainyɨ nyɨdaasa'neinyɨ nyakakeinyɨ.

¹² Sare'na nabaai taanginya daza' a'mwera nyɨjaavadɨvɨsainyɨ. Kɨrɨ' nɨmɨ dazavɨna wagɨla nyɨvwa'nadeinyɨ mɨ'. Sare' darevɨnyɨ. Nɨmɨ dɨragɨnna lɨmwaga'dɨnya dazarɨna mena yawɨ'dɨnyainyɨ. Nabaai yagaala tewaanya nɨmɨre asɨrɨ nyakaka dazavɨ sai dame yɨnɨga wi'na daavannei midaaka! Yɨ nebwina sara yawɨ'dɨnyainyɨ. Yɨ nabaai daza' yuyagaa' nayaa warɨbainada yune Yɨrɨka naanga yɨma'naabathe sagaa'na. Warɨbainadesɨ.

¹³ Timoti, yagaala tewaanya maamɨdarya' nɨmɨre maangikɨ kadɨka nyu'nagɨnya yɨ sa a'mweraavɨ avaaina wɨjɨwaakya'ne kuna dɨlɨmwagaka! Yɨ gɨmɨ Kɨraazɨtɨyai Jizaazarɨ nayaa dɨragɨnna lɨmwadɨ Gotɨyarɨnajɨ a'mweraavɨnajɨ gɨvu'nada nabaai sasare sabwi yagaala sangɨ dɨragɨnna dɨlɨmwagaka!

¹⁴ Gotɨyai yagaala daza' gɨmɨre asɨrɨ gwakake' dameigɨ nayaa dɨthaaka! Nabaai Kurya Tewaanyai nemɨnyɨ wɨlanemwaalɨkei wawɨnya dazavɨna yɨnɨga wi'na gɨhaimwagathelyɨ.

¹⁵ Dare' mena yawɨ'manɨgɨ. A'mwe lɨmwadɨvɨta yuya Pɨrovijɨ Ezɨya mwaalyara sahwarajɨya Pɨzelaazalyɨ Emozenɨzalyɨ saraai kwaraalyɨ kalavuzainyɨna mena nyagalya'mavesainyɨ.

¹⁶ Kɨrɨ' pɨgasa Wonezɨporaazai nɨmɨre kuryarɨ nyɨvaimwadelyɨ. Nabaai sai nɨmɨre kalavuzangevɨ mwaaidɨnya sa'na wagɨla wɨvwa'nadei mɨ'. Yɨ sare'na Naangei Wonezɨporaazarɨjɨ gamɨre angevɨyaraavɨjɨ kale'na gaimwanga wiana! A'mwe sahwai nɨmɨnyɨna wagɨla wɨvwa'nadei mɨ'.

¹⁷ Aawa. Sai Anga Romɨ davanna bi'ma'na yaka bɨramaasa'na yagɨyagɨ bɨ'da dɨvidaa'nyɨna nyɨbɨramaarakelyɨ.

¹⁸ Yɨrɨka naangegaa'na sahwai Naangerɨ kale'na gaimwange' bɨramaarana! Nabaai Anga Epazaazɨ sahwai kwalaalyanna nyɨdaayada nyɨgaimwagake daza' gɨmɨ saigɨ nayaa mena yawɨ'manɨgɨnyarɨnera.