Yiila 1 - WEN GBAŊKA

¹ Suipeentik a bo le ka waai ale a zɛri wabaata nyam sinsaga la jigi, yaase waai ale kan a va wabaata nyam suik la, yaase waai ale kan a kali ale wabaata nyam la.

² Alege a nya ka suipeentik a nyini Naawen sinsaŋŋa po la, alege a poli wa sinsaŋŋa zuk kantueŋ ale yok la.

³ Kula nyɔnɔwa a nye ase ka tiib ate ba vuk beli naŋsa nyiam nɔi la ate bu a yɔni yɔna diipo ale magsi la alege ate bu vaata a kan wiiri la. Wa dii meena ate wa a nye la a niak kama.

⁴ Alege ku daa di ale wabaata nyama. Ba a nye ase ka vɔtta ate viok a fuk a basi la.

⁵ Wabaata nyam kan baga a zaani a tu Naawen buusaŋa, yaase wabaata nyam a gum wayɔrisima nyam po.

⁶ Diila Naawen a nya wayɔrisima nyam suiku kama, alege wabaata nyam a bo ka suik po a cheŋ kaasuŋ jigi.