Jeemsi 1 - WEN GBAŊKA

¹ Mi, Jeemsi, waai ale ka Wen ale ti Nyɔnɔwa Yeezu Kirisita tomteerɔ la, a puusi nama Izirali diina pi ale buyewa ale waaŋ bo tɛŋka meena po la.

² M suata, ni dan jam nya nyenyaka, ni basi ate ni sue a peenti yegayega.

³ Ni seba ayen ni siaka ale Yeezu a dan baga a zaani nyenyaka de po, ni le baga zaani nyenyaka meena kama.

⁴ Ni dan baga zaani nyenyaka de po, ku a fɛ kama ayen ni zaanaŋa de a basi ate ni kan lo. Nya kude a basi kama ate ni nyeboka a chim nye weleŋ, a kan ŋma a silim jaab jaaboa.

⁵ Wen ta niaka yegayega. Wa kasim pai ka ŋanta nna yegayega a te baai ale a juisi wa la. Dila nyiŋla, yam a dan posim ni ba gela jigi, ni puusi a te Wen ale wa le pai yam a te ni.

⁶ Ni dan puusi te wa, ku a fɛ ate ni ta siaka ale wa abe ni kan ta chichama. Chichama nyɔnɔ a nye ase ka viok ale a fɔbi nyakpiemu ate bu a cheŋ niŋ ale ŋaaŋ diila.

⁷ Nuru wala kaa poli ayen wa le tuesi jaab Naawen jigi ya.

⁸ Wala choa a ta ka popola buye, an baga a lueri wari a nye.

⁹ Nama baai ale ka ŋanjaksa la, ku a fɛ kama ate ni ta suipeentik, dii nyiŋla, Wen pai ni zaani ka niŋ.

¹⁰ Nama baai mɛ ale ka jigsirɔba la, ku a fɛ kama ayen ni basi ate ni sue peenti ale Wen ale pai ni zaani ŋaaŋ la. Ku a fɛ kama ate ni sue peenti dii nyiŋla, ni a nye ase ka puuta ale kan a beni ale a kpi diila.

¹¹ Wenbinni a dan jueli ate kantueŋka a moak yegayega, puutaŋa a jak kama a yuiri ate ti nalimu mɛ a bɛ. Suiku la po jigsirɔma a dan bo ba tuimaŋa po a tom, ba mɛ a kpi kama.

¹² Suipeentik bo ka waai ale baga a zaani nyenyaka la jigi. Naawen be puulim kama ayen wa le te nuru wala choa tiirim. Tiirimu de ale wa nyuvuri dii ale kan ka kpeglimka la ate wa le pai te baai ale a yaali wa la.

¹³ Nyenyaka a dan jam, waai a kan weeni ayen ka, <> Wen a kan pai biem a nye nuru a nya yaase wa nye waai a nya.

¹⁴ Alege ka tidek kɔrisa ale a dari ti ate ti a tom tuimbaata.

¹⁵ Dila nyiŋ kɔrisa a dan yik lɔgi, si a biak ka wabaata ate wabaata yaa dan chim paari, ti yaa biak kum.

¹⁶ M dek suata, ni kan a paasi chaaba.

¹⁷ Jaabuuri meena ate ti ta ate ba nala la, a nyini ka Wen jigi. Wa nye chiŋmarisaŋa meena a pai si a nyo wenŋmazuk ayen si a nyaksi. Wa kan tagri diipo diipo ase yisuŋtaŋa ale a tagri diila.

¹⁸ Ku ka Wen dek yaalika ate wa biak ti a va wa wensie wanni, ate wa yaa basi ate ti dɛ jaabuuri meena ate wa nye la niŋ.

¹⁹ M dek suata, ni a poli wieŋa de. Ni basi ate ni tueŋa a lagri nalimnyiini ate ni a wom, abe ni kan basi ate ni noa a valima abe ni kan basi ate ni sue a kpabi a puuri ale nuruba mɛ,

²⁰ dii nyiŋla, ti dan ta suipuurum ale nuruba, ti kan va Wen ale a yaali diila. Wa a yaali kama ayen ti a tom tuimaŋsa a te wa.

²¹ Dila nyiŋ ku a fɛ ate ni pai ni tuimbaataŋa meena a basi abe ni pai nidek meena a te Wen abe ni tuesi wa wamaŋsaŋa ŋaai ale ŋa baga vari ni a basi la. Wa poom pai wa wamaŋsaŋa a nyo ni suiniima po kama. Dila nyiŋ ku a fɛ kama ayen ni a va ŋa.

²² Ni dan a wom ŋa ale kan va ŋa, ni a paasi ka nidek.

²³ Nuru dan a wom Wen wieŋa ale kan va ŋa, wa a nye ase ka nuru waai a nyiem ale a nya wadek nyaasuŋ po diila.

²⁴ Wa dan nya wadek nyaasuŋku po a nueri, ale basi dula, wa deri a baŋ wa le poom a neensi diila kama.

²⁵ Nuru wala choa a nye se ka waai ale wom Wen Sinsak maŋsaŋa ale deri baŋ la. Ku be a fɛ kama ayen ni kan a nye dila, dii nyiŋla, Wen Sinsak maŋsaŋa a vari ka nuruba a basi. Dila nyiŋ ku a fɛ kama ayen ni ŋmasi wom ŋa nalimnyiini abe ni a va ŋa. Ni dan a nye dila Wen le te ni niaka.

²⁶ Nuru waai a dan a poli ayen wa va ka Wen ale kan yik wadek wa biik po, wa a paasi ka wadek. Wa Wenni vaka ka kinla.

²⁷ Ti Kowa Wen a yaali kama ayen ti a va wa ale wensie. Dila nyiŋla ku a magsi ka ti a maari kpin sii ale pukɔga ŋaai ale a nam la, abe ti kan basi ate tɛŋka demma tuimbaataŋa a chɔgsi ti.