Zuude 1 - Buamu Laa

Tìɛníkɛrɔ́

¹ Hɔ̀ iè ǹpe Zuude lɛ iè Yiezu Kirisa tɔnkɛrɔ ɛ̀ ǹ lò iè Zaake ɓà zuú ɛ́ te lepe vɛ̃hṹ sɔ lɛ ɛ́ wĩ́ ɛ́ nín lɛ́ mípe lɛ ɛ́ Dɔfin ɛ́ te vɔn, mìpe lɛ ápe Yàá Dɔfĩn ɛ́ wɛ, àpe Yiezu Kirisa ɛ́ lò te miɛ ɛ́ hìénin:

² Nɛ Dɔfĩn ɛ̀ mi mi miinɛ̀ ɛ̀ Hɔ̀ ɛ̀ lɛ́ lé hũn-wiɛ̀ àá lé wanminu miɛ ǹ.

Lè lɔ̀nbiè lɛ ɛ́ ɓén yí ɓɛ́ ɓúo kɛ̀ránliè bòo

³ Kìe nìɛ lɛ ǹ wɛ, ń den hṹn cɛ̀ cɛ̃̀un ɛ̀ ǹ wĩ́ lé vɛ̃hṹ dɔ̀ ɛ̀ bie le fuerɛ̀ lɛ ɛ́ ké páaniɛ lɔ̀nin bòo yán ɛ̀ lɛ́ miɛ ǹ. Kɛ́ ń den ɓen nin síɛ húi ɛ̀ ǹ fɔ̀ɓán ɛ̀ ǹ wĩ́ lé ɛ̀ dàá lɛ́ hɔ́ bénlɔ́ miɛ ǹ nɛ mi wóo sɛ hɔ sɛrɔ́ hɔ̀ ńdɛsĩ̀nlɔ́ bòo hũn, hɔ̀pe ńdɛsĩ̀nlɔ́ lɛ ɛ́ hɔ́ Dɔfĩn ɛ́ lɛ́ ɓɛ́ nìnbirìe lɛ bòo sɛ̃̀ Hɔ̀ ǹ sí-cóoní ɛ́ hɔ́ wo vɔ́.

⁴ Ɓɛ̀ nìnbí-kùahɛ̃ dɔ̀ ɛ́ den píɛkɛasí ɛ́ zɔn mì tĩ́ihṹ. Ɓɛ̀ iè nìɛ lɛ yìe ɛ́ yáà tí Dɔfĩn wɛ̀; ɓɛ̀ den wóò zɛ̀ní lépe kè Dɔfĩn hiì ɛ̀ dàá khíi wé ɓɛ́ ńwékɛkũǹ bòo. Ɛ́ ɓɛ́ iè pe wo pɛ̃́ ápe Yiezu Kirisa lɛ iè kè Kɛ̀ránlɔ àá ké Ɲunsɔ mí dòonún kɛ̀amu. Ɛ́ bòo lɛ ɛ́ peɓɛ̀ lɔ̀n ɛ́ dàa ɓén be ɛ́ wɛ̃́ wi le Dɔfĩn bienù vɛ̃hṹ hũn hɛ̀rí hàarí.

⁵ Mí ɛ́ dṹ hɔpe lɛ míkùi ɛ́ van víeniɛ, kɛ́ ń den pɛ́wi wɛ ɛ́ nin ɛ̀ liení miɛ. Ɲunsɔ ɛ́ hàarí fuieniɛ ɓɛ̀ Yizarayɛɛle nìɛ ɛ́ líeniɛ hɔ̀ wɔnyáamu hũn hɔ̀ Eziputi cɛ̃̀mɛ̀nɛ́ hũn; kɛ́ máahṹ lɔ̀n, ɛ́ ɓɛ́pe lɛ ɛ́ hàarí ɛ́ yí dɛsĩ̀-ɛ ǹ á hàarí ɓɔ́.

⁶ Ɓɛ̀ mɛlɛkɛɓɛ lɛ hàarí nɛ ɓɛ́ yá kansí lé viì lɛ ɛ́ Dɔfĩn ɛ́ dɔ́ ɓɛ́ hũn ɛ̀ ɓɛ̀ khie lɔ́ ɓɛ́ kùrú zɔnlén, ɛ́ hɔ́pe Dɔfĩn ɛ́ wo van siɛ can dĩ̀niɛ hɔ̀ fiì hũn síbínú hũn, ɛ́ ɓɛ́ wo dɛ̃̀ yán fúu ɛ́ dàa ɛ́ hɔ̀ lìe lènlɔ́ sí-bɛhɔ́ ɛ̀ hìé.

⁷ Ɛ̀ ɓɛ̀ Sodɔɔmu àá ɓɛ́ Komɔɔre nìɛ àá ɓɛ́pe lóoniɛ lɛ hàarí lúwikɛ ɓà ǹ nìɛ lò: ɓɛ̀ ɓiɛ̀ hàarí ɛ́ wé kɛ̀a ie ɓɛpe mɛlɛkɛɓɛ sɔ. Ɓɛ̀ hàarí wóò dàaníkɛ ɓán kũǹ, ɛ̀ ɓɛ̀ yɛ̀rɛ́ hàarí ɛ́ wóò vɛ cɛ̀ ɓɛpe bìe dɔ̀ lɛ yí ɓɛ́ nìnbirìe ɛ́ ɓɛ ɛ̀ dàá dɛ. Ɛ́ ɓɛ́ wo lɔ̀n ɛ́ zɔn ɛ́ be hɔ dṹn lɛ yá hí yá mi hũn, ɛ́ hɔ́pe sí ɛ́ wo iè zeǹ ɲìninlɔ́ ɓɛ̀ nìnbirìe ɓɛ́kùi viì.

⁸ Ɛ́ sí iè pe ɛ́ ɓɛ́pe nìɛ lɛ ɛ́ píɛkɛasí zɔn mì tĩ́ihṹ ɛ́ ɓiɛ̀ wóò wé kɛ̀amu: peɓɛ̀ bòo lɛ ɛ́ ɓɛ́ wóò dɛ̀wuò nin ɛ́ wóò vɛ́ ɓɛ́ ɛ̀ ɓɛ̀ vɛ liení ɓɛ́ kùrú sɛ̃́hṹ, ɛ̀ peɓɛ̀ yìe ɛ́ yáà tí Dɔfĩn pànkɛ́, ɛ̀ ɓɛ̀ wóò tòokɛ hɔ hóohũn bɔ̀mìiriè lɛ ɛ́ hɔ́ ɓàarɔ́ ɛ́ winin.

⁹ Hɛ̀rí àpe mɛkɛkɛɓɛ ɲúnsɔ̀ Misiɛle ɛ́ yɛ̀rɛ́ yí wé hɔ́pe sí wɛ̀. Hɔ̀ lɛ á dàa hàarí ɛ́ wũ̀aní àá ɔ́ Sitũanɛ pɛ̃̀hṹ lɛ ɛ́ ɓɛ́ dàa ɛ́ fi-e Moyiize nìheemu lɔ̀n, á yɛ̀rɛ́ yí tɛ̀ ɛ̀ zɔ tòo ɔ wɛ̀. Kɛ́ á den zɔn bie lɛ́ à ǹ nɛ: Nɛ Ɲunsɔ ɛ̀ vɛ kɔ́ ɲɛkɛ̃̀a!

¹⁰ Kɛ́ ɓɛ́pe nìɛ sɔ sí ɛ́ pe den wóò tòokɛ hɔ bòo lɛ ɛ́ ɓɛ́ yí dũ wɛ̀. Ɓɛ̀ wóò wékɛ kũǹ kɛ̀a ie ɓɛ bìlaàsiè lɛ hũn vanminù mí bòo sí; ɛ́ sí iè hɔ̀pe lɛ ɛ́ te ɓɛ wóò yáaní.

¹¹ Ɛ́ peɓɛ̀ yìi ɓén mi hɔ iè hɔ̀ lɛ á Kaɲɛ wṹn lɛ á hàarí bɔ̀ iè pe ɛ́ ɓɛ́ ɓiɛ̀ bɔ̀; ɛ̀ hɔ̀ màa lɛ ɛ́ ɓɛ́ ɛ́ cɛ̀ ɛ́ lɛ́ ɛ́ ɓɛ́ fùɛrɛ̀sí ɓɛ́te ǹ ɛ́ ɓɛ́ ɛ́ vṹnun kɛ̀a ie Balaamu bòo lɛ á hàarí wɔ́; ɛ́ ɓɛ́ iè pe wo ɛ́ yaa iè hɔ̀ lɛ ɛ́ ɓɛ́ hĩ́nà pɛ̃́ dɛ̃̀ kɛ̀a ie Koore bòo lɛ á hàarí wɔ́.

¹² Ɓɛ̀ ɓen wi mi ńkóoɓánlɔ̀n díe dínlén ɛ̀ ɓɛ̀ wóò yáakɛ hɔ. Ɓɛ̀ den wóò wé ɓɛ́te ɓɛ́-dòonún bòo ɛ̀ ɓɛ̀ ɛ̀ nùún ɛ̀ ɓɛ̀ temu dí dí kɛ́ ɓɛ́ yá lùwi wɛ̀. Ɓɛ̀ ɛ́ dɛ̃̀ kɛ̀a ie hɔ dùndùó lɛ ɛ́ ɲumu mi hũn lɛ ɛ́ lé pinpinù ɛ́ súuní dàa cɔ́, ɛ̀ ɓɛ̀ ɛ́ dɛ̃̀ kɛ̀a ie hɔ vɛ̃̀hɛ̃ lɛ ɛ́ yáà hɛ hɔ bie hɔ̀ vɛ̃̀hɛ̃ hánlɔ́ yìi hũn wɛ̀; vɛ̃̀hɛ̃ lɛ ɛ́ ɓɛ́ bùinkɛa ɛ́ hɔ́ wo ɛ́ húrunkɛ yìe hĩ̀ɲu.

¹³ Ɓɛ̀ ɛ́ dɛ̃̀ kɛ̀a ie ɲun-bɛhɔ́ lɛ ɛ́ sànbɔ̀níkɛ àá pànkɛ́. Ɛ́ ɓɛ́ iè pe wo ɛ́ wóò khàaní ɓɛ́ lùwiè bɔ̀werà ɛ̀ líení kɛ̀a ie hɔpe ɲun-bɛhɔ́ lɛ ɛ́ sànbɔ̀níkɛ ńkùbánnín bòo sí. Ɛ̀ ɓɛ̀ ɛ́ dɛ̃̀ kɛ̀a ie ńpĩ́inàwuò lɛ ɛ́ vĩ́ikɛ cɔ́. Ɛ́ Dɔfĩn ɛ́ sɛ́sɛ́a hɔ̀ síbínú lɛ cící ɛ́ bɔ̀sí ɛ́ dàa ɛ́ ɓɛ̀ hìé lé pɛ̃̀hṹ lɛ yá vé hũn.

¹⁴ Ápe Henɔɔke lɛ iè ɓɛ̀pe kìe zĩkĩ́nɓɛ̀ hùuɲulán ɛ̀ dàá vɛ mìí ɔ́ Hɛdɛmɛ pɛ̃̀hṹ ǹ, ɛ́ lò ɓiɛ̀ hàarí háaniɛ Dɔfĩn bòo peɓɛ̀ bòo hũn ɛ́ nɛ: Mì húi, à Ɲunsɔ ɛ́ vaá-ɓen àá mí mɛlɛkɛɓɛ tentiè muasié bìkukuì,

¹⁵ ɛ́ mii ɓen lè ɓɛ̀ nìnbirìe ɓɛ́kùi lìe. Á wo ɓén vɛ́ ɓɛ́pe bɔ̀konwériè ɓɛ́kùi ɲɛkɛ̃̀a peɓɛ̀ bɔ̀werà lɛ yí sãa bòo hũn, hɔ̀pe lɛ ɛ́ ɓɛ́ wóò wé iè hɔ̀ lɛ ɛ́ ɓɛ́ yáà mɛ̀ndɛ̃ mípe Dɔfĩn, à ɓén vɛ́ ɓɛ́pe nìɛ sɔ lɛ yáà mɛ̀ndɛ̃ mípe Dɔfĩn ɓɛ́kùi ɲɛkɛ̃̀a peɓɛ̀ benkhɛa lɛ ɛ́ ɓɛ́ bie lɛ́ à ǹ bòo hũn.

¹⁶ Ɛ́ ɓɛ́pe nìɛ sɔ sí ɛ́ den hɛ̀ iè nìɛ lɛ ɛ́ yáà wɛní ɓɛ́te ɛ̀ mi wɛ̀; ɓɛ̀ temu wóò fi fúu hɔ̀ bòo lɛ ɛ́ ɓɛ̀ wé nin bòo hũn, ɛ̀ hɔ̀ bòo lɛ ɛ́ peɓɛ̀ tĩɛ̀ ɛ́ wɛ iè pe ɛ́ ɓɛ́ wóò bè máahṹ, ɛ̀ hɔ̀ miikɛ ben-bɛ̃hɛ̃ ɛ́ temu wóò lé àá peɓɛ̀ ɲihĩ́ɛ, ɛ̀ ɓɛ̀ wóò khɛ̃̀níkɛ ɓɛ nìnbirìe ɛ̀ dàá yí bòo dɔ̀ peɓɛ̀ viì.

Hɔ̀ bérɛ́ lɛ ɛ́ lɛ́ ɓɛ́ ńdɛsĩ̀riè ǹ

¹⁷ Kɛ́ hɔ́ ɓen kɛ́ mípe, mìpe kìe nìɛ lɛ ɛ́ ń wɛ, ɛ̀ mì síɛ liení hɔ́ bòo lɛ ɛ́ ké Ɲunsɔ Yiezu Kirisa tɔnkɛriè ɛ́ hàarí sɛ̃̀nɛ́hã̀ bie ǹ.

¹⁸ Ɓɛ̀ hàarí wóò bie lɛ́ miɛ ǹ nɛ: «Hɔ̀ mɛ́n-sí hũn, ɛ̀ ɓɛ̀ nìnbirìe dɔ̀ ɛ́ wóo ɓén dĩ miɛ ɛ́ yáakɛ, ɛ̀ peɓɛ̀ kùrú tĩɛ̀ bòo iè pe ɛ́ ɓɛ́ wóo ɓén bè máahṹ kɛ́ ɓɛ́ yá mɛ̀ndɛ̃ Dɔfĩn wɛ̀».

¹⁹ Ɓɛ̀pe ɛ́ te hɔ ńsankɛà ɛ́ wóò dé ɓɛ́ ńdɛsĩ̀rìe tĩ́ihṹ; peɓɛ̀ ńwékɛkũǹ ɛ́ te peɓɛ̀ híɛhɔ́ ɛ́ dú, ɛ̀ lè Mɛkɛ̃n-Sãanu ɛ́ mí ɓà ǹ wɛ̀.

²⁰ Kɛ́ mípe kìe nìɛ lɛ ɛ́ ń wɛ, mì vɛ àá híɛhɔ́ ɛ̀ lɛ́ pànkɛ́ mìte ǹ hɔ̀ mì ńdɛsĩ̀nlɔ́ lɛ ɛ́ ce hũn, ɛ̀ mì wóò hɛ̃un Dɔfĩn àá lé Mɛkɛ̃n-Sãanu pànkɛ́.

²¹ Mì kań Dɔfĩn wanminu hũn ɛ̀ dàá hìé nɛ ke Ɲunsɔ Yiezu Kirisa àá mí sãamu ɛ̀ lɛ́ lé mɛkɛ̃nì lɛ yá vé miɛ ǹ.

²² Mì wóò mi ɓɛlɛ tĩɛ̀ ɛ́ titikɛ miinɛ̀.

²³ Ɛ̀ ɓɛ̀dɔ̀ ɛ́ wi yán ɛ́ mí khũa líení hɔ́ dṹn hũn ɛ̀ fuení nin. Ɛ̀ ɓɛ̀dɔ̀ bĩniɛ wi yán ɛ́ mí wóo mi miinɛ̀ kɛ́ mí lò den zán ɓɛ́, ɛ̀ hɛ̀rí peɓɛ̀ bɔ̀zìriè lɛ ɛ́ peɓɛ̀ nìnbí-yáamu ɛ́ lieniɛ ɛ́ mí wóo ɲìí.

Dɔfĩn ɓàaníninlɔ́ tɛmu

²⁴ Ɛ́ hɔ́pe Dɔfĩn lɛ temu dɛ̀ miɛ ɛ́ zɛ̃nkɛnin ɛ́ mí yá kenkení ɛ́ kùén, ɛ̀ Hɔ̀ ɛ́ lɛ́ ɛ́ mí ɛ́ vɛ́ dìń pehɔ̀ híɛhɔ́ pehɔ̀ ɓàarɔ́ hũn kɛ́ mí tú àá lé tĩwiɛ̀ kɛ́ hɛ̀rí ńwénkhenù dɔ̀ ɛ́ yá mi miɛ ǹ,

²⁵ Hɔ̀pe Dɔfĩn mí dòonún lɛ ɛ́ bɔ̀ kè Ɲunsɔ Yiezu Kirisa ǹ ɛ́ dàa fueniɛ kie ǹ, ɛ́ hɔ́ ɓàarɔ́ àá lé bɛ́záanú àá hɔ́ pànkɛ́ àá lé ɲunù ɛ́ bòo ɛ́ sɛ̃̀ Hɔ̀ ǹ hɛ̀rí hàarí àá sáalɛ àá pɛ̃̀hṹ lɛ ɛ́ yá vé hũn! Amiina.