Tiite 1 - Buamu Laa

Tìɛníkɛrɔ́

¹ Hɔ̀ iè ǹpe Pooli lɛ iè Dɔfĩn tɔntɛ́ ɛ̀ ǹ lò iè Yiezu Kirisa tɔnkɛrɔ ɛ́ te lepe vɛ̃hṹ sɔ lɛ ɛ́ wĩ́. Dɔfĩn ɛ́ lerɛ mi nɛ buie mí bienù ɛ̀ lɛ́ ɓɛ́ nìnbirìe lɛ ɛ́ Hɔ́ munɛ ǹ, ɛ̀ ɓɛ̀ dàá dɛsĩ̀, ɛ̀ ǹ zɛ̃́ní hɔ́ bɔ̀berà ɛ̀ lɛ́ ɓà ǹ, hɔ̀pe bɔ̀berà lɛ ɛ́ wóò lɛ́ à nìnbírɔ ɛ̀ dàá dũń hɔ́pe Dɔfĩn wṹn bènlɔ́,

² bòo lɛ ɛ́ wé ɛ̀ ɓɛ̀ dàá hìé àá ńdɛsĩ̀nlɔ́ nɛ ɓɛ́ ɓén yí lé mɛkɛ̃nì lɛ ɛ́ yá vé. Lèpe mɛkɛ̃nì lɛ yá vé lɛ ɛ́ hɔ́pe Dɔfĩn lɛ yáà ɓúukɛ ɓúo ɛ́ hàarí lɛ́ mí ɲunù lɛ kɛ́ lé dímíɲɛ́ dàa ɲɛùn mí, nɛ mí ɓén lɛ́ kiè ǹ.

³ Ɛ́ hɔ́ lɛ ɛ́ lé yìi lɛ ɛ́ hɔ́pe Dɔfĩn hàarí lerɛ ɛ́ ɓɛrɛ dɛ̃un, ɛ́ Hɔ́ zɛ̃́niɛ mí bienù hɔ̀pe bòo lɛ ɛ́ Hɔ́ lɛ́ mi ǹ nɛ buie hũn, lèpe bienù lɛ ɛ́ hɔ́pe Dɔfĩn lɛ iè kè fuenírɔ ɛ́ te le ɲunù ɛ́ lɛ́ mi ǹ ɛ́ ǹ dàa ɛ́ lè buie.

⁴ Ɛ́ nín lèpe vɛ̃hṹ sɔ lɛ ɛ̀ wĩ́ ɛ́ nin lɛ́ kɔ́pe Tiite ǹ, kɔ̀pe lɛ iè nìn yɛ̀nù àá bɔ̀bín hɔ̀ ńdɛsĩ̀nlɔ́ lɛ ɛ́ ké lɔ̀ nin hũn. Nɛ kìe Yàá Dɔfĩn àá ké fuenírɔ Yiezu Kirisa ɛ̀ wé hiì àá kɔ ɛ̀ ɓɛ̀ lɛ́ hũn-wiɛ̀ kɔ̀ ǹ.

Dɔfĩn zũnu hándí bòo lɛ á sãawi à dàá dìń

⁵ Ń fuɛrɛsí kɔ ǹ hɔ̀ Kɛrɛti pɛ̃̀hɛ̃ hũn bòo lɛ ɛ́ wé ɛ̀ kɔ̀ wookɛ hɔ bòo lɛ ɛ́ kɛ́ wi yán lɛ ɛ́ fɔ́ɓán àá wookɛrɔ́ míkùi, ɛ̀ kɔ̀ lenkɛ ɓɛ nìkĩ́ɛ ɛ̀ bìsíkɛ hɔ́ Dɔfĩn zĩhĩ́ɛ hũn hɔ̀ lóoniɛ míkùi hũn kɛ̀a bòo lɛ ɛ́ ń dàa ɛ́ zɛ̃́niɛ hɔ̀ ɛ́ lɛ́ kɔ ǹ sãa sãa.

⁶ Ɛ́ ɓɛ́pe nìkĩ́ɛ sɔ ɛ́ hɔ́rɔ ɛ́ sãawi à wé nìnbírɔ lɛ ɛ́ ńwékhemù ɛ́ mínɛ nin, à fɔ́ɓán à wé hɛ̃́-cóoní ɓàasɔ, ɛ̀ piè nìɛ ɛ́ fɔ́ɓán ɛ̀ ɓɛ̀ wé nìɛ lɛ ɲúuhɛ̃ ɛ́ cã̀aní, ɛ̀ nìnbirìe dàá bí dàń ɛ̀ bie nɛ ɓɛ́ wóò wekɛ kũ̀n tàá ɛ̀ ɓɛ̀ bí wé nìɛ lɛ ɛ́ yáà ɲí bòo wɛ̀.

⁷ Ɛ́ Dɔfĩn zũnù hándí ɛ́ fɔ́ɓán à wé nìnbírɔ lɛ ɛ́ ńwékhemù dɔ̀ ɛ́ yá mi nin, iè hɔ̀ lɛ á te le Dɔfĩn zũnù bòo ɛ́ wóò húi. Ɛ́ sí iè hɔ̀pe á dàa yí fɔ́ɓán à wé nìnbírɔ lɛ yìe tú mí yɛ̀rɛ́, à yí fɔ́ɓán à wé nìnbírɔ lɛ tĩì sɔ tàá ɲɛ-khĩɛɓɛ̃́ tàá bencɛ̀, à lò yí fɔ́ɓán à wé nìnbírɔ lɛ ɛ́ hɛ̀ wɛ hɔ màa fúu ɛ́ á wóò wé hɔ́ lùwiè bòo ɛ̀ dàa yí hɔ́ wɛ̀.

⁸ À sãawi à wé nìnbírɔ lɛ ɛ́ wóò pen ɓɛ̀ nɛ̀hãà ǹ, à wé nìnbírɔ lɛ ɛ́ wɛ hɔ̀ bɔ̀tente, à wé nìnbírɔ lɛ ɛ́ wóò wé hɔ́ bòo lɛ ɛ́ te mí yìe, nìnbírɔ lɛ ɛ́ cã̀aní, nìnbírɔ lɛ can dɛ̃̀ Dɔfĩn, nìnbírɔ le ɛ́ dɛ̀ míte ɛ́ wóò dàá.

⁹ À sãawi à wóo cɛ mí kuò ɛ̀ dĩń hɔ́ ńdɛsĩ̀nlɔ́ biehĩ́ bierɔ́ hũn, ɛ̀ ɓáaníɓán àá hɔ́ bòo lɛ ɛ́ ɓɛ́ kɛ̀rɛa àá ɔ́. Ɛ́ kɛ̀amu á den wo ɛ́ dɛ̀ ɓɛ̀lɛ kɛ́ tĩɛ̀ ɛ́ hĩ̀iníkɛ àá hɔ́ bɔ̀berà kɛ̀ránlɔ́, á den wo ɛ́ dàń ɓɛ́pe lɛ ɛ́ wóo ɓɛ ɛ̀ wũ̀aní-ɛ ńwékhemù ɛ́ zɛ̃́ní ɛ̀ lɛ́ ɓà ǹ.

Ɓɛ̀ ɓúo kɛ̀ránliè bòo

¹⁰ Ɛ́ ɓɛ́ ɲɛkɛ̃ndĩɛ̀ ɓàasiè ɛ́ den buò cɛ̃̀un. Bɛ̀ wóò bie hɔ biehĩ́ lɛ ɛ́ ɲún mí ɛ̀ dàá khɛ̃̀níkɛ ɓɛ nìnbìriè ɛ̀ vĩ́iní. Ɓàasiè sɔ̀ ɛ́ den hɛ̀ wóokɛa buò ɓɛ̀ Zuifuɓɛ lɛ ɛ́ khie wɔ́ ɓɛ́ ńdɛsĩ̀riè tĩ́ihṹ.

¹¹ Ɓàasiè sɔ ɛ́ mí lɛ́ nɛ ɓɛ dań bòo dɔ̀ ɛ̀ bie iè hɔ̀ lɛ ɛ́ ɓɛ́ wóò wua hɔ zũ-ɲúuhɛ̃ bɔ̀kùi àá ɓɛ́ kɛ̀ranlɔ́ lɛ ɛ́ yí te mí yìe, ɛ̀ dàá yí ɓɛ́ lùwiè yírɛ́.

¹² Ádɔ̀ peɓɛ̀ tĩ́ihṹ lɛ iè peɓɛ̀ bɔ̀dũnbíɛ dɔ̀ ɛ́ bie ɛ́ nɛ: Ɓɛ̀ Kɛrɛti siè ɛ́ iè ɓɔ́ɓúukɛriè hàarí, ɓɛ̀ dɛ̃̀ kɛ̀a ie ɓɛ mɛ-biè lɛ ɛ́ mɛkɛ̃nɲiì wi, ɓɛ̀ iè miikɛ paariè lɛ ɛ́ iè peɓɛ̀ vùkuò bòo ɛ́ ɓɛ́ wóò nùún mí dòonún.

¹³ Ɛ́ hɔ́pe bòo lɛ á mɔn ɛ́ bie ɛ́ hɛ̀ iè pe bɔ̀berà hɛ̀lɛ̀lɛ̀, ɛ́ sí iè hɔ̀ pe ɛ́ kɔ́ dàá fi àá ɓɛ́ cɛ̃̀un bòo lɛ ɛ́ wé ɛ̀ ɓɛ̀ dàá dàá hɔ́ ńdɛsĩ̀nlɔ́ àá bɔ̀bín,

¹⁴ ɛ̀ ɓɛ̀ dàa bí bĩní wóo vɛ cɛ dìń ɓɛ́ Zuifuɓɛ ɓáǹyíe bòo lɛ ɛ́ ɓɛ́ nìnbirìe te hɛ̀ bierɔ́ ǹ, ɛ̀ ɓɛ̀ lò bí wóo ɲí ɓɛ́ nìnbirìe lɛ ɛ́ yí tɛ̀ hɔ̀ bɔ̀berà bòo biehĩ́ wɛ̀.

¹⁵ Ɛ́ hɔ̀ bòo míkùi ɛ́ ce ɓɛ nìnbirìe lɛ ɛ́ hũn ce viì, kɛ́ hɛ̀rí bòo dɔ̀ ɛ́ yá ce ɓɛ nìnbirìe lɛ ɛ́ hũn lɔ̀n ɛ̀ ɓɛ̀ lò ɛ́ yí dɛsĩ̀ viì wɛ̀. Iè hɔ̀ lɛ ɛ́ peɓɛ̀ hɛciri àá peɓɛ̀ hũn nùnlé ɛ́ hɔ́ dìinì ɛ́ wi nin.

¹⁶ Ɓɛ̀ wóò nɛ ɓɛ́ dũ Dɔfĩn, kɛ́ peɓɛ̀ bɔ̀werà ɛ́ den ɛ́ wóo zɛ̃́ní kɛ́ ɓɛ́ yí dṹ Hɔ wɛ̀. Ɛ́ ɓɛ́ hɛ̀ fɔ́ɓán àá ɲìirɔ́, peɓɛ̀ ɲɛkɛ̃̀a ɛ́ hɛ̀ dɛ̃un ɛ̀ ɓɛ̀ lò yí dɛ̀ bòo dɔ̀ lɛ ɛ́ sãa ɛ́ yáà wé wɛ̀.