Kolɔɔsi Siè 1 - Buamu Laa

Tìɛníkɛrɔ́

¹ Ǹpe Pooli lɛ ɛ́ Dɔfĩn àá mí tĩì bòo ɛ́ lɛ́ ɛ́ n iè ɔ̀ Yiezu Kirisa tɔnkɛrɔ, àá kìe zuú Timote, ɛ́ te lepe vɛ̃hṹ lɛ ɛ́ wĩ́ ɛ́ ke ɛ̀ lɛ́

² mípe nìɛ lɛ ɛ́ bòo sɛ̃̀ hɔ̀pe Dɔfĩn lɛ ɛ́ wi hɔ Kolɔɔsi lóo hũn, mìpe kìe zɛ̀ɓɛ̀ lɛ ɛ́ dũmuasɛ̃̀ à Yiezu Kirisa ǹ. Nɛ kìe Yàá Dɔfĩn hiì àá pehɔ̀ hũn-wiɛ̀ ɛ̀ wé àá miɛ!

Pooli ɛ́ Dɔfĩn bɛrikɛ ɛ̀ dé

³ Ké Dɔfĩn bɛrikɛ ɛ̀ dé, Hɔ̀pe lɛ iè kè Ɲunsɔ Yiezu Kirisa ɓà Yàá, ɛ̀ kè lò wóò hɛ̃un hɔ̀pe Dɔfĩn ɛ̀ lɛ́ miɛ ǹ fúu.

⁴ Ké ɲɛ́ hɔ́ ńdɛsĩ̀nlɔ́ lɛ ɛ́ mí dàa ɔ̀ Yiezu Kirisa hũn àá lé wanminu lɛ ɛ́ mí dàa àá ɓɛ́ ńdɛsĩ̀riè ɓɛ́kùi bòo.

⁵ Ɛ́ hɔ́ lɛ ɛ́ mí hàarí ɲɛ́ lé bɔ̀berà bienù lɛ iè lè Bentĩnu, ɛ́ mí dũnɛ hɔ̀ bòo lɛ ɛ́ Dɔfĩn ɛ́ sɛ́sɛ́a bɔ̀sí hɔ́ hóohũn ɛ́ dàa ɛ́ mì hìé, ɛ́ mí ńdɛsĩ̀nlɔ́ àá mí wanminu ɛ́ wo fɛ́sí dɛ̃̀ hɔ̀pe bòo lɛ ɛ́ mí ɛ́ hìé lɔ̀n.

⁶ Lèpe Bentĩnu ɛ́ saà ɛ̀ vɛ dɛ̃ le dímíɲɛ́ míkùi hũn, ɛ̀ lè ɛ́ hɔ̀ biè ɛ̀ hɛ cɔ́, kɛ̀a bòo ɛ́ lé dàa ɓiɛ̀ hàarí han hɔ̀ bie mì tĩ́ihṹ, ɛ̀ vɛ mìí àá bòo lɛ ɛ́ mí dàa hàarí ɲɛ́ Dɔfĩn hìi bòo, ɛ́ mí wo dũnɛ lèpe hiì sɔ bòo lɛ ɛ́ lé te dàa ɛ́ dɛ̃̀ àá bɔ̀bín.

⁷ À Epafaraase lɛ iè kè ńkɔnù tɔntɛ́ lɛ ɛ́ ké wɛ cɛ̃̀un ɛ́ te hɔpe bòo sɔ ɛ́ kɛ̀rɛa àá miɛ. À cã̀aniɛ mí ɲún ɛ́ dàa ɛ́ hɔ̀ tɔnlɔ́ ɛ̀ tɛ́ mí bòo hũn, kɛ̀a bòo lɛ á Kirisa tɔntɛ́ dàa wóò cã̀aní mí ɲún bòo sí.

⁸ Ɛ̀ lè wanminu lɛ ɛ́ lé Mɛkɛ̃n-Sãanu ɛ́ lɛ́ ɛ́ mí dàa á ɛ́ bie bòo àá kie.

⁹ Ɛ́ sí iè hɔ̀ pe, ɛ́ képe ɓiɛ̀, ɛ̀ vɛ mìí àá lé yìi lɛ ɛ́ ké dàa ɲɛ́ kɛ́ ɓɛ́ ɛ́ mì bòo ɛ̀ bie, ɛ́ ké wóò hɛ̃un Dɔfĩn fúu mì bòo hũn nɛ Dɔfĩn Mɛkɛ̃nì ɛ̀ lɛ́ hɔ́ bɔ̀dũmunù àá hɔ́ hɛ́círí miɛ ǹ. Ɛ́ kɛ̀amu, ɛ́ mí wo ɛ́ dũń bòo lɛ ɛ́ hɔpe Dɔfĩn ɛ́ cɛ̀ nɛ mi wé ɛ́ ciiní.

¹⁰ Ɛ́ kɛ̀amu, ɛ́ mí wo wóo ɓén dàá míte kɛ̀a ie nìɛ lɛ bòo sɛ̃̀ à Ɲunsɔ ǹ, ɛ́ mí wo wóo ɓén wé hɔ́pe bòo lɛ ápe Ɲunsɔ ɛ́ wɛ ɛ́ mí ɛ́ wé fúu. Mí wóo ɓén wé hɔ́ bɔ̀tente ɛ́ mí ɛ́ wé bòo míkùi hũn, ɛ̀ mì ɛ́ vɛ àá híɛhɔ́ Dɔfĩn dũnlɔ́ hũn.

¹¹ Nɛ Dɔfĩn lɛ ɛ́ hɔ́ ɓàarɔ́ àá hɔ́ pànkɛ́ bòo ɛ́ sɛ̃̀ nin ɛ̀ lɛ́ ɛ̀ mì yí hɔ́ pànkɛ́ àá bɔ̀bín ɛ̀ mì dàá wóo hĩ̀ mì hũn ɛ̀ mì fɛ́sí dìń sãaní hɔ́ bòo míkùi hũn.

¹² Mì wɛní míte ɛ̀ mì dé Yàá Dɔfĩn bɛrikɛ, Hɔ̀pe temu lɛ́ ɛ́ mí dàa bòo wi hɔ yírɛ́ lɛ ɛ́ Hɔ́ ɛ́ sɛ́sɛ́a bɔ̀sí mí ńpiemu bɛ́záanú hũn ɛ́ dàa ɛ́ ɓɛ̀ nìɛ lɛ bòo ɛ́ sɛ̃̀ Hɔ̀ ǹ ɛ̀ hìé.

¹³ Hɔ̀ lerɛ kie ɛ́ lɔ́ hɔ́ síbínú pànkɛ́ hũn, ɛ́ khie van dɔ́ mí Zuú lɛ ɛ́ Hɔ́ wɛ cɛ̃̀un bɛ́záanú hũn.

¹⁴ Hɔ̀ iè ɔ̀pe bòo hũn ɛ́ hɔ́pe Dɔfĩn ɛ́ dàa lerɛ kie lɔ́ hɔ́ bɔ̀koohɔ́ núnú hũn ɛ̀ Hɔ̀ ɛ́ dɔ́ ké bɔ̀koohɛ̃ sɛ́wɛ́rí ɛ́ lɛ́ kie ǹ.

Dɔfĩn Zuú Yiezu Kirisa àá mí tɔnlɔ́ bòo

¹⁵ Yiezu Kirisa ɛ́ iè Dɔfĩn lɛ yí dɛ̀ yá mi àá yìe ńwĩ́ihṹ. Àpe ɛ́ temu iè pe Dɔfĩn hán zɛ̀-terà lɛ ɛ́ wi hɔpe Dɔfĩn bɔ̀míriè míkùi ɲún hũn.

¹⁶ À iè ɔ̀pe ɛ́ hɔ́pe Dɔfĩn ɛ́ bɔ̀nin ɛ́ dàa mɛ́ hɔ́ bòo lɛ wi hɔ hóohũn àá lé súsũ̀nù míkùi, hɔ̀lɛ loo àá yìe àá hɔ́lɛ ɛ́ yí loo àá yìe, hɔ̀ bòo lɛ pànkɛ́ wi àá hɔ́ bɛ́záahĩ́ àá ɓɛ́ ɲunhɛ̃siè àá ɓɛ́ pànkɛ́ ɓàasiè. Dɔfĩn ɛ́ bɔ̀-a ǹ ɛ́ dàa mɛ́ hɔ́ bòo míkùi, ɛ́ hɔ́ bòo míkùi ɛ́ wo bòo sɛ̃̀-a ǹ.

¹⁷ Àpe Kirisa ɛ́ wɔ́ cɔ́ bòo míkùi, àpe temu lɛ́ ɛ́ hɔ́pe bòo míkùi ɛ́ dàa dɛ̃̀ mí dĩ̀nlén.

¹⁸ Àpe ɛ́ temu iè hɔ̀ tɛkɛ̀a ɲún, hɔ̀pe tɛkɛ̀a lɛ ɛ́ iè lè Dɔfĩn zunù. Àpe ɛ́ temu iè hɔ̀ bòo míkùi fìi ɓánlén, àpe ɛ́ temu iè ɔ̀ hán zɛ̀-terà lɛ vìé lɔ́ hɔ́ húmú hũn, bòo lɛ ɛ́ wé àpe ɛ̀ temu wé hándí bòo míkùi hũn.

¹⁹ Iè hɔ̀ lɛ ɛ́ Dɔfĩn ɛ́ wɛniɛ nɛ mí bòo lɛ ɛ́ mí te dàa dɛ̃̀ míkùi ɛ̀ ɓiɛ̀ ɲunù ɛ́ tí mí Zuú ǹ,

²⁰ ɛ̀ hɔ̀ bòo lɛ ɛ́ wi lé sṹsùnù àá hɔ́lɛ ɛ́ wi hɔ hóohũn míkùi ɛ̀ dàá bì-e pe mí Zuú ǹ ɛ̀ dàá khũ̀á ɲíɓán àá mípe Dɔfĩn. Ɛ́ hɔ́ iè hɔ̀ lɛ ɛ́ pehɔ̀ Zuú sɔ ɛ́ húrun lè ɓáalén dã̀anù lɔ̀n ɛ́ Hɔ́ dàa lɛ́ lé hũn-wiɛ̀ ɓɛ̀ nìnbirìe ɓɛ́kùi ǹ.

²¹ Mìpe ɛ́ lò ɓiɛ̀ hàarí viì ni àá Dɔfĩn. Mí hàarí iè Dɔfĩn ɓà ńbíyanliè mì hũn vànminù àá mí bɔ̀werà lɛ yí sãa bòo hũn.

²² Kɛ́ kɛ̀a sáalɛ, ɛ́ bòo lɛ ɛ́ pehɔ̀ Zuú ɛ́ dàa wɔ́ á nìnbirɔ́ ɛ́ húrun bòo hũn, ɛ́ hɔ́pe Dɔfĩn ɛ́ lɛ́ ɛ́ mí khũ̀a khie ɛ́ ɲíɓán àá mí, bòo lɛ ɛ́ wé ɛ̀ mípe Dɔfĩn ɛ̀ lɛ́ ɛ̀ mì dàá dìń mí híɛhɔ́ kɛ́ mí ɛ́ ce, kɛ́ fĩnɛ̀ dɔ̀ ɛ́ mí miɛ ǹ, ɛ̀ ńwékhemù dɔ̀ ɛ́ lò yá mi miɛ ǹ wɛ̀.

²³ Kɛ́ mí sãawi ɛ̀ mì kań hɔ́ ńdɛsĩ̀nlɔ́ hũn, ɛ̀ mì fɛ́sí dìń sãàní, ɛ̀ mì bí làá ɛ̀ mì kɛ́ hɔ́ bòo lɛ ɛ́ mí ɛ́ ɲɛ́ lé Bentĩnu hũn wɛ̀, hɔ̀pe lɛ ɛ́ mí ɛ́ hìé àá ńdɛsĩ̀nlɔ́. Ɛ́ lé iè lèpe Bentĩnu sɔ ɛ́ ké ɛ́ buie ɛ̀ lɛ́ ɓɛ́ nìnbirìe ɓɛ́kùi ǹ lè dímíɲɛ́ hũn. Ɛ́ ńpe Pooli ɛ́ iè Dɔfĩn tɔntɛ́ lɛ ɛ́ ɓiɛ̀ ɛ́ lèpe Bentĩnu sɔ ɛ̀ buie.

Hɔ̀ tɔnlɔ́ lɛ ɛ́ Pooli ɛ́ tɛ́ Dɔfĩn zũnù nìɛ bòo hũn

²⁴ Ɛ́ kɛ̀a sáalɛ ɛ́ ń wɛ niǹte, iè hɔ̀ lɛ ɛ́ niǹ lɔ̀n lɛ ɛ́ be mipe mì bòo hũn. Niǹ lɔ̀n ɛ́ bé kɛ̀amu ɛ́ dàa ɛ́ ɔ̀ Kirisa lɔ̀nbiè lɛ kɛ́ ɲunù ɛ̀ tíiní, lèpe lɔ̀nbiè lɛ ɛ́ ń sãawi ɛ̀ yí piè tɛkɛ̀a bòo hũn, hɔ̀pe piè tɛkɛ̀a lɛ iè lè Dɔfĩn zunù.

²⁵ Ɛ́ ń wo iè lèpe Dɔfĩn zũnù tɔntɛ́ ɛ̀ ɓáaniɛɓán àá pehɔ̀ tĩì bòo. Hɔ̀pe Dɔfĩn ɛ́ te hɔpe tɔnlɔ́ sɔ ɛ́ dɔ́ niǹ núnú hũn nɛ ń bie mí bienù ɛ̀ tíiní ɲunù lɛ́ miɛ ǹ.

²⁶ Lèpe bienù sɔ ɛ́ iè Dɔfĩn bòo lɛ ɛ́ Hɔ́ hàarí wɛ ɛ́ mii wé, kɛ́ Hɔ́ den hàarí tànkɔ̀niɛ hɔ̀ fúu ɓɛ̀ nìnbirìe ɓɛ́kùi ǹ, kɛ́ kɛ̀a sáalɛ ɛ́ Hɔ́ den zɛ̃́niɛ hɔ̀ ɛ́ lɛ́ mí nìɛ ǹ.

²⁷ Dɔfĩn ɛ́ den wɛniɛ nɛ mii zɛ̃́ní hɔ́pe mí bòo sɔ lɛ ɛ́ tànkɔniɛ ɛ̀ lɛ́ ɓà ǹ, hɔ̀pe lɛ ɛ́ iè hɔ̀ yírɛ́ bɔ̀bɛhɔ́ lɛ ɛ́ ɓàarɔ́ ɛ́ wi nin, lɛ ɛ́ Hɔ́ sɛ́sɛ́a hɔ̀ dàa míkùi nìɛ bòohũn. Ɛ́ lɛ ɛ́ den iè hɔ̀pe bòo lɛ ɛ́ hɔ́ hàarí ɛ́ tànkɔniɛ: à Kirisa ɛ́ wi miɛ ǹ, ɛ́ mí wo dàa tĩì bènlén nɛ mí ɓén yí Dɔfĩn ɓàarɔ́.

²⁸ Á iè ɔ̀pe Kirisa sɔ bòo ɛ́ ké ɛ́ buie kɛ̀amu ɛ̀ lɛ́ ɓɛ́ nìnbirìe ɓɛ́kùi ǹ àá ɓɛ́ nì-cóohɛ̃ cóohɛ̃. Ké wóò ɲì hɔ́rɔ zeǹ lɔ̀n, ɛ̀ kè bé hɔ́rɔ àá hɔ́ bɔ̀dũmunù míkùi, bòo lɛ ɛ́ wé ɛ̀ hɔ́rɔ ɛ̀ wóò dɛ̃ hɔ ńdɛsĩ̀nlɔ́ hũn piè ńcɛɓánlɔ́ àá ɔ́ Kirisa bòo hũn.

²⁹ Ɛ́ sí iè hɔ̀pe bòo hũn ɛ́ ń dàa ɛ́ hɔ̀ tɔnlɔ́ ɛ̀ tɛ́, ɛ̀ ǹ lò ɛ́ hɔ̀ sɛrɔ́ ɛ̀ sɛ àá hɔ́ pànkɛ́ lɛ á Kirisa ɛ́ lɛ́ mi ǹ, hɔ̀pe pànkɛ́ lɛ ɛ́ mí tɔnlɔ́ ɛ̀ tɛ́ cɛ̃̀un niǹ hũn.