Yuda 1 - Mʉkpanganɨa nɔ Agɔmɛ ɔ Ɨtakɨtakɨ

Ɓokuo

¹ Ɨmɨ Yuda, baya ɔ Yeso Klisito, nɔ ɨmɨ manye ɔ Yakɔɓɔ akɛ, nakɔtɛndakɨa ʉbalʉa ngʉwa. Nanenu atɛndakɨa inu ngʉɓa Asɔɓɨɨ Aba a꞉nisoko, ɨyɔ ngɨa a꞉nɨkʉnda, nɔ ɔ꞉nɨpɛmakɨa ɨngbaa akɔ Yeso Klisito.

² Ikoko ngɨyɛ Asɔɓɨɨ, majɨɔ nɔ ɓʉkʉnda ngʉɓangɔ ɓiɓio nenu nɔgbɛ!

Bapananakɨa ɓɔ mʉjɛɛ ɓadya sina ɓʉkaɓʉkaɨ

³ Inu ɓawai ɓɔ ɓʉkʉnda, na꞉ɓio pɔngɔ atatanɨa nɔgbɛ ɓɔ, nɨnɨtɛndakɨa ʉbalʉa akʉʉ ɓʉhɛa ngʉɓa tɛ꞉nɨanɨa naɓɔ isu ɓaɓomu. Yakamɛngana, ɨtakɨtakɨ ngɨyɛ, yɛtanɨɔ tɨta ɓɔ nɨnɨtɛndakɨa ʉbalʉa ngʉwa, nenu aninjo iguegue. Ʉweni agbanga akʉʉ ɔ báya ngɨyɛ Asɔɓɨɨ e꞉njo ɓombi ngʉɓangɔ, tɨta imbi mɛnga akɔ ingono.

⁴ Nanenu atɛndakɨa dɔ, ɓombi ɓɔta ɓɨɓɨ ɓɛ꞉ka pɛ inani ná-ɛɛ ɨngbaa aɓaɗi. Ɓombi ɓɔta ɓɨɓɨ ngʉɓɔnanɨ, ɓayangiso ɨsaʉ yɔ ɓʉkʉnda ngɨyɔ Asɔɓɨɨ ngɨyeso, dɔ ɓɨnɨanɨa nɔ ɨda akɨa muso. Ɓakɔyaa Yeso Klisito ngɨa ɨyɔ nangana akɛ, a Ngama nɔ Makweso. Ɨnadɔ, yasugo ɓɔ, anɨngwa ta ɨjɛnɛ, Mabii kɔta tu kakɔsugo ɓɔ, ɨɓɔ ɓa꞊dya sina ɓʉkaɓʉkaɨ ngʉɓeɓo ta dyanɨ.

⁵ Inu, nánɨmbɨa yaka ngɨyɛ nanenu asigio iɗo. Yakamɛngana, nɔbayɔ ɓata nenu atungwiso ɓɔ, Makwɔɓɨɨ a꞉chʉchwakiso ɓombi ngʉɓangɔ aɓubaya, anɨngwa anɔ Misili, yakamɛngana, ɔ꞉dʉka ɓiga ngʉɓa ɓa꞉yaa báya.

⁶ Tungueni kʉ nɔ ɨsaʉ yɔ ɓamalaika ngʉɓa, ɓa꞉yaa pɛmakɨa ɓʉngama ngʉɓa, ɓa꞉ɓʉnapɨa-ɔɔ akɔkɨa tɛa. Yakamɛngana, ɓa꞉sɨa ɨda yɔ ʉbɨba ngɨyɛnɛnɨ yeɓo ta sɨa. Tɨa kwananɨ, Asɔɓɨɨ anaɓɔ akɔpɛmakɨa amati ɔ ɨda yɔ umomo, ɓasangɛ nɔ ɓaselegeni amati mago nɔ mago, akɔɓɛtɨa ɓisi ɓɔta ɓʉja ngʉɓɔ kio mʉkɔmbʉ.

⁷ Tungueni kʉ nɔ ɨsaʉ ngɨyɛ ɓombi ɓɔ Sɔdɔmʉ nɔ Gɔmɔla, ɨhɔ nɔ ɓagʉlʉ ngʉɓa ɓa꞉ɓio anɔ ambamba ɔngɔ. Ɨɓɔ, kʉndʉ ɓamalaika ngʉɓɔnanɨ, ɓa꞉kɨa muso, ɨhɔ nɔ mʉsasa wɔ ndʉtʉ ngʉwa mombi ɔ ingono ɔsisekiomʉ kɨa. Ɨtakɨtakɨ ngɨyɛ, ɓombi ngʉɓɔnanɨ ɓanɨdya mʉkɔmbʉ ngʉweɓo amati ɔ dyaa ngɨyɔ mago nɔ mago. Ɨyɛnɛnɨ, ya isisenio akɔ ɓombi ngʉɓɔmɔ ɓaɓomu.

⁸ Mʉkyananakɨa wɔ ɓombi ngʉɓɔnanɨ ɓɛ꞉ka pɛ andɛnɔ, wa ngbanga ta ɓanɨ. Akpatanakɨa nɔ litungwio lɛta gbaɨ gbaɨ ngɨlebo, ɨɓɔ, ɓakɨa ɓʉɓɨɓɨ ta akʉʉ ɔ ndʉtʉ ngɨyeɓo, nɔ, ɓɔɓio anunokio kʉ nɔ Ɓʉngama ngʉɓɔ Makwɔɓɨɨ, nɔ, ɓɔsɛaka kʉ nɔ ɓamalaika ngʉɓɔ ʉbɨba.

⁹ Gʉtʉ ta Mikaili, malaika wɔta ʉja ngʉwɔ Asɔɓɨɨ, a꞉kɨamʉ ɓanɨ ngbinga ngɨa ɓa꞉ɓio-ɔɔ akɔɗuɗuono nɔ Abɨɨ akʉʉ ɔ ndʉtʉ yɔ Musa. Ɨyɛ a꞉ɓio-ɔɔ akio mʉkɔmbʉ ngʉwangɔ, ɨyɔ Mikaili a꞉mʉsɛakamʉ Abɨɨ pɔ sɛaka. Yakamɛngana, a꞉musigio ta ɓɔ «Ta Asɔɓɨɨ akɛ a꞊nadyiso ɓʉkaɓʉkaɨ».

¹⁰ Kwananɨ, ɨɓɔ ɓombi ɓɔta ɓɨɓɨ ngʉɓɔnanɨ, ɓakɔsɛaka yaka ngɨyɛ ɓangɔmʉ apemiso. Nɨmbɨmbanaka ngɨyeɓo, yakpatanakɨa nɔ gbali ngɨyeɓo, ndʉ ɓanama ngʉɓa ɓangɛmbɨa ɨkyɛmʉ, nɔ yaka ngɨyɛ yanaɓɔ akɔdʉka, ɨyɛnɛnɨ.

¹¹ Ikoko naɓɔ, dɔ, ɓa꞉kpataka medi ngʉkɔ Kaina. Ɨɓɔ ɓa꞉kwa amati ɔ ɓʉɓɨɓɨ ndʉ ʉɓa Balamʉ a꞉kɨa, dɔ, ɓɨnɨanɨa nɔ lɨkyɛmʉ. Nɔ ɓa꞉dʉka, dɔ ɓa꞉sɨkanakɨa kʉndʉ Kɔla a꞉kɨa jɛnɛ.

¹² Ɨɓɔ ɓombi ngʉɓɔnanɨ aɓɛ, ɓayanakiso mambɔ ngʉkeno kɔ ɓunduku. Ɓadyakaka nɔ mʉgbʉmʉ, nɔ sɔkɔmʉ nɔ soni, nɔ ɓɔɓio atungwono ta ɨɓɔ ɓakwɔɓɔngɔ. Ɨɓɔ, ɓa ndʉ lɨkʉɓa lɔ ʉgbaá ngɨlɛ, mahuo katutuo, sɔkɔmʉ ʉgbaá wɔngɔ wineyo. Ɨɓɔ, ɓa kʉndʉ matɨ ngʉka kangɔmomʉ lipumo, gʉtʉ ta akɔ angbinga ɔngɔ, nɔ kʉndʉ matɨ ngʉka kaɗuonokio nɔ kowo tɨta niwo.

¹³ Mʉkyananakɨa wɔ soni ngʉwɔnanɨ weɓo, wanɨnɨanɨa aɓʉmba, ndʉ lihuu lɔ lɨsana lɔ mipo amʉtɨmanɨ. Ɓa ɓata kʉndʉ, ndata ngɨyɛ yayɛnganaka kʉ gbaɨ. Asɔɓɨɨ a꞉ɓʉtambanakɨa ɨda akɔ ʉmʉa wɔ umomo ngʉwɔ ta nji nɔgbɛ, wɔ mago nɔ mago.

¹⁴ Mombi ɔ mɛɗɨanɛka, amati ɔ lɨnɔtanakɨa ngɨlɔ Adamʉ, ino bɔ Ɛnɔka, a꞉sugo yaka akʉʉ ɓombi ɓɔta ɓɨɓɨ ngʉɓɔnanɨ, ndʉ ɨgbɛ ɓɔ: «Makwɔɓɨɨ anɨka nɔ mutunduga wɔ ɓamalaika ɓɔta tu ngʉɓangɔ ɓɔ hooo.

¹⁵ Anɨka akio mʉkɔmbʉ wɔ ɓombi ɓaɓomu. A꞊napɨa ɓombi ɓɔta ɓɨɓɨ nɔ mʉkɔmbʉ, akʉʉ ɔ mʉkyananakɨa wɔta ɓɨɓɨ uɓomu ngʉweɓo ɓa꞉mʉkɨa, nɔ yaka yɛta ɓɨɓɨ iɓomu ngɨyɛ ɓa꞉sugo akʉʉ angɔ, sɔkɔmʉ ɓɨmʉkumo.»

¹⁶ Ɓombi ngʉɓɔnanɨ, ɓakɨa ta amati ɔ ndʉndʉanaka, nɔ, yakanakɨa ɓangɛ. Uɓei ngʉweɓo, wa ta akʉʉ ɔ mʉsasa wɔta gbaɨ ngʉweɓo. Ɓanɔ aɗia, nɔ ɓamemekiso ɓombi nɔ maduɓa kɔta manjanja, dɔ ɓɨnɨa nɔ ɨkyɛmʉ amʉkɔngʉ weɓo.

Mapanʉ akʉʉ ɔ ɓaklisito

¹⁷ Yakamɛngana, inu ɓawai ɓɔsɛmɨ, nátɨɓʉsaamʉ yaka ngɨyɛ ɓatitima ngʉɓɔ Makweso Yeso Klisito ɓa꞉sugo jɛnɛ.

¹⁸ Ɓa꞉nɨsigio ɓɔ: «Akɔ ɓisi ɓɔ mupipio, ɓombi ɓa꞊chwɛanɨa sina, ʉɓa, ɓaɓio nenu anɨnakanakɨa, nɔ, ɓɔɓio akpataka tɨta mʉsasa wɔta ɓɨɓɨ wɔ ndʉtʉ ngʉweɓo.»

¹⁹ Ɨkananja yɔ ɓombi ngʉɓa ɓakɔkumoniso nagbonyonoko ati ɔ ɓaklisito, ʉɓɔnanɨ. Mʉsasa wɔ ndʉtʉ waɓʉfa ɓubaya fanɨ, nɔ ɓangɔmʉ nɔ Mʉtɨma wɔ Asɔɓɨɨ.

²⁰ Yakamɛngana, inu ɓawai ɓɔsɛmɨ, ɨsɨnganakeni anɨmaa ta ɓumu amati ɔ báya ngɨyeno yɛta tu nɔgbɛ, nɔ nɨta ɨngbaa akɔ angu ɔ Mʉtɨma wɔta Tu.

²¹ Inu, ɓieni ta amati ɔ ɓʉkʉnda ngʉɓa Asɔɓɨɨ, akɔɓɛtɨa ɓisi ngʉɓa Makweso Yeso Klisito, a꞊nɨnɨa-ɔɔ ikoko, nɔ nenu aninjo uɓei wɔ mago nɔ mago.

²² Inu, ɓieni nɔ ikoko akʉʉ ɔ ɓombi ngʉɓa, ɓa-sɨ ta nɔ ɓajatuoko amati ɔ báya.

²³ Ya nɔ ɓombi ngaɓɔmɔ, ʉɓa nákwanana naɓɔ aheiso, nɔ naɓɔ achwʉchwakiso adyaa. Akɔ ɓɔmɔ ɓata, ɓɨnɨeni ikoko ɨnɨanɨ. Yakamɛngana, ɓieni kʉ nɔ ʉɓá naɓɔ, nɔ, nɔyaa kʉ nɔ lɨpʉkʉ ngɨleɓo la lɨyanakɛ nɔ mʉkyananakɨa wɔta ɓɨɓɨ.

Tosio Asɔɓɨɨ ʉbɨba

²⁴ Asɔɓɨɨ anɔ angu nenu apɛmakɨa, dɔ, nátɨkwamʉ aɓʉɓɨɓɨ pɔ bele. Ɨyɔ akɛ, a mombi ngɨa akwanana nenu aɓoiso apɛɨ ɔ ʉbɨba ngʉwangɔ, sɔkɔmʉ nɔ majangi, nɔ amati ɔ ɨgyagya yɛta ɨja.

²⁵ Ɨyɔ nangana, a Asɔɓɨɨ, nɔ Muheiso ngʉweso, ɨngbaa akɔ Makweso Yeso Klisito. Ʉbɨba, nɔ ɓʉmbangɛ, nɔ angu, nɔ ɓʉngama ɓiɓio ɓangɔ, anɨngwa amʉkpanganɨa, ɨtakɨtakɨ ngɨyɛ, nɔ amati ɔ mago nɔ mago! Yaɓanɨ.