Ɓalɔma 1 - Mʉkpanganɨa nɔ Agɔmɛ ɔ Ɨtakɨtakɨ

Pɔlɔ ɔɓokuo ɓaklisito ɓɔ Lɔma

¹ Ɨmɨ Pɔlɔ, ɓaya ɔ Yeso Klisito akɛ nɔnɨtɛndakɨɔ ʉbalʉa ngʉa. Ɨmɨ, ngɨa Asɔɓɨɨ a꞉nesoko akɔɓio titima, nɔ ɔ꞉napɨa akɔɓɨakɨa Ɨsaʉ yɛta Iɗo ngɨangɔ.

² Ɨsaʉ yɛta Iɗo ngɨyɛnɛnɨ, Asɔɓɨɨ a꞉sugo jɛnɛ ɨngbaa akɔ monu kɔ magbɛ ngʉkangɔ ɓɔ atɨchanisio ɨyɔ, ngbanga ndʉ ya꞉tɛndanakɨa amati ɔ Mabii kɔta Tu.

³ Ɨsaʉ ngɨyɛnɛnɨ, ya akʉʉ ɔ Mwana angɔ, Makweso Yeso Klisito, ngɨa a꞉nɔtanɨa ɨngbaa akɔ ndʉtʉ, amati ɔ ɨfananja ngɨyɔ ngama Dawidi.

⁴ Yakamɛngana, ɨngbaa akɔ Mʉtɨma wɔta Tu, Asɔɓɨɨ a꞉mɨmaiso amati ɔ angu ngɨangɔ ndʉ mwana angɔ, ngbinga ngɨa a꞉jʉkaniso-ɔɔ Makweso Yeso Klisito akɔ ingwo.

⁵ Ya akʉʉ angɔ, ɨyɛ ɨmɨ Pɔlɔ, nɛ꞉nɨanɨa-ɔɔ nɔ ɨjɨɔ yɔ Asɔɓɨɨ akɔnatana titima. Ya꞉kyanakɨa ɓanɨ, ambɔ mababa kɔ ɓombi maɓomu ɓɨmʉbaya ɨyɔ Yeso, nɔ ɓɔkyananakɨa ʉpanʉ ngʉwangɔ.

⁶ Inu, ná kʉ amati ɔ ɓombi ngʉɓɔnanɨ, dɔ, Asɔɓɨɨ a꞉nisoko akɔɓio ɓombi ɓɔ Yeso Klisito.

⁷ Inu ɓaɓomu ngʉɓa ná inani anɔ Lɔma, Asɔɓɨɨ a꞉nɨkʉnda kʉndanɨ, nɔ, ɔ꞉nɨsoko akɔɓio ɓombi ɓangɔ ɓɔta tu. Asɔɓɨɨ Aba, nɔ Makwɔɓɨɨ, Yeso Klisito ɓinutio, ɨjɨɔ nɔ majɨɔ-ɛ!

Pɔlɔ ɔtatanɨɔ anɨna ɓaklisito ɓɔ Lɔma

⁸ Apɛɨ ɔ yaka iɓomu, nakɔtosio Asɔɓɨɨ ngɨasɛmɨ ʉbɨba, ɨngbaa akɔ Yeso Klisito, akʉʉ eno ɓaɓomu. Dɔ, awɨa ɔ báya ngɨyeno, anɨsa amati ɔ dɔdɔ tɨta muɓomu.

⁹ Ɨmɨ, nakɨnitunguo ta masi maɓomu. Dɛmʉ asɛmɨ ta Asɔɓɨɨ ngɨa, nakɨmʉkyananakɨa nɔ mʉtɨma ngʉwɔsɛmɨ uɓomu, ɨngbaa akɔɓɨakɨa Ɨsaʉ yɛta Iɗo ngɨyɛ mwanangɔ.

¹⁰ Ngbinga muɓomu amati ɔ nɨta ngɨyɛsɛmɨ, nakɨsigio Asɔɓɨɨ ɓɔ, yɔɓɨeni ɓʉkʉnda ɓangɔ, ɨnaɓookio gɔ pɛngɛ-sɨ ɨngbaa ta ɓookioni, ɨmɨ, anɨsa nenu akanga.

¹¹ Dɔ, nakɔtatanɨa nɔgbɛ, ɓɔ tɨnana gɔ pɛngɛ-sɨ nenu ta ɨnananɨ, ɨɗo ambɔ nɨnɨchanisio kʉɔ ʉɓʉnga ngʉwɔ Mʉtima wɔta Tu, nɔ, nenu aninjo iguegue.

¹² Nɔ ɓata nɔgbɛ, nakʉnda ɓio ɨhɔ nenu, dɔ, tinjoneni iguegue amati ɔ báya ngɨyeso.

¹³ Inu ɓanduku, nakʉnda ɓɔ ɨmbɨeni ɓɔ, nafa pɔngɔ kwaisio kyɛnda kʉ ɨjɛnɛ nenu anɨka akanga. Yakamɛngana, aɓɔya kʉndʉ ɓʉɓʉnʉ, ɨngbaa yɔngɔ yangɔɓoonokio kɔmʉ-sɨ. Mʉsasa, wa ɓɔ tɛa ngɨyɛsɛmɨ, yɨnɔta gɔ pɛngɛ masɔɔ inani andeno, ngbanga kʉndʉ yakɔnɔta amati ɔ ɓombi nga ɓɔmɔ, ʉɓa, ɓangɔmʉ Ɓayuda.

¹⁴ Ɨmɨ, nanɔ uɓu anɨsa atɨ ɓombi ta ɓaɓomu: yiɓio ɓanɛbaya, kʉndʉ ʉɓa, ɓangɔmʉ ɓanɛbaya, yiɓio ʉɓa ɓeyo balʉa, kʉndʉ ʉɓa, ɓangeyomʉ balʉa.

¹⁵ Ya akʉʉ ɔ yaka ngɨyɛnɛnɨ, ɨyɛ, na-ɔɔ nɔ mʉsasa anɨsa nenu aɓɨakɨa Ɨsaʉ yɛta Iɗo, inu ngʉɓa ná inani anɔ Lɔma.

Ɨsaʉ yɛta Iɗo yanɔ angu

¹⁶ Kʉɓanɨ, ɨmɨ, nangɔkwamʉ soni aɓɨakɨa Ɨsaʉ yɛta Iɗo. Ɨyɔ, ya ndʉ angu ngɨyɔ Asɔɓɨɨ akɔheiso ɓombi ɓaɓomu ngʉɓa ɓanɔ báya, apʉnganɨa nɔ Ɓayuda, akpatanɨa tɨa kʉ nɔ, ʉɓa, ɓangɔmʉ Ɓayuda.

¹⁷ Dɔ, Ɨsaʉ yɛta Iɗo yakɔpana ɓɔ, Asɔɓɨɨ asɨka mombi ndʉ a ngbingbii apɛɨ angɔ, ta ambɔ mombi ɔngɔ anɔ báya. Nɔ, yatɛndanakɨa amati ɔ Mabii ɓanɨ ɓɔ: «Mombi ata ngbingbii a꞊dya uɓei ta ingbaa akɔ báya.»

Ɓombi ɓaɓomu ɓakɨa ɓʉɓɨɓɨ

¹⁸ Asɔɓɨɨ a꞉pananiso ʉnganga ngʉwangɔ anɨngwa akʉʉ ɔ ɓisi, akʉʉ ɔ ɓombi ɓaɓomu ngʉɓa ɓakɨa migbo yɔ mɨkyananakɨa yɛta ɓɨɓɨ di di di. Mɨkyananakɨa yɛta ɓɨɓɨ ngɨyɛnɛnɨ yeɓo, ya꞉nangyo ɓɔ ingono yatiɓiomʉ anɨnɨanɨa.

¹⁹ Ɨnadɔ, yaka iɓomu ngɨyɛ yanɨtanɨa anɨmbɨa akʉʉ Asɔɓɨɨ, ya ta aɓʉmba apɛɨ eɓo, dɔ ɨyɔ makwɔngɔ, a꞉ɓʉnayɨamʉ ɨkyɛmʉ pɔ mɛngana.

²⁰ Mombi angɔkwanamʉ anɨna Asɔɓɨɨ nɔ mesu. Yakamɛngana, ɓombi ɓɔkangeni yaka ngɨangɔ a꞉ɨkɨa akɔ dɔdɔ, ɓapemiso tɨa kʉ nɔ yaka ngɨyɛ mesu kangɔkwananamʉ anɨna. Ɓapemiso ɓɔ ɨyɔ a, Asɔɓɨɨ ingono, nɔ, angu ngɨangɔ angɔsiomʉ. Ya akʉʉ ɔ yaka ngɨyɛnɛnɨ, ɨyɛ mʉkɔmbʉ wa-ɔɔ amʉtʉ weɓo.

²¹ Yaɓanɨ dɔ, gʉtʉ ndʉ ɓanɨmbɨa Asɔɓɨɨ, ɓangɔmʉ nayɔ atʉkʉa ndʉ aka yɔkwanana-ɔɔ, gʉtʉ pɔ nayɔ atosio ʉbɨba. Ambenigɔɓɔpe, itungwio ngɨyeɓo yɛka tɨa ɓɨɓɨ, nɔ, mɨtɨma ngɨyeɓo sɔkɔmʉ nɔ nɨmbɨmbɨanaka, yɛ꞉ka tɨta ndʉ umomo.

²² Ɨɓɔ, ɓakɔsɨkana ndʉ ɓa ɓombi ɓɔ nɨmbɨmbɨanaka, ɨnadɔ ɓɔɓieni ta nɔ ɓujangijangi.

²³ Akɔ ɨda ngɨyɛ bibiso Asɔɓɨɨ ngɨa angɔwo, ɨɓɔ, ɓabibiso tɨta lisisenio lɔ ɓombi ngʉɓa ɓawo woni, nɔ lisisenio lɔ ɓanoi, nɔ ɓanama, nɔ ɓasɨɨ.

²⁴ Tɨa kʉ ananɨ, Asɔɓɨɨ a꞉ɓʉsɨa-ɔɔ tɨta sɨa ɓɔ, ɓɨkɨa ɓʉjɛka ta ndʉ aka mʉsasa wɔ mɨtɨma ngɨyeɓo ya-ɔɔ, nɔ, ɓɨyapanakiso ndʉtʉ ati eɓo, akɔkɨa ɓayaka ɓɔ soni.

²⁵ Ɓa꞉sɨa yaka yɔ ingono ngɨyɔ Asɔɓɨɨ, nɔ, ɓɔpʉnga kpataka tɨta mʉjɛɛ. Ɓɔɓio abibiso nɔ kyananakɨa lɨkyɛmʉ ngɨlɛ Asɔɓɨɨ a꞉kɨa, ɓɔsɨa nayɔ abibiso ɨyɔ makwɔngɔ ngɨa a꞉kɨa lɨkyɛmʉ liɓomu. Ɨyɔ, ɔkwananɔ nɔ ʉbɨba masi ta maɓomu! Yaɓanɨ.

²⁶ Ya akʉʉ ɔ yaka ngɨyɛnɛnɨ, ɨyɛ, Asɔɓɨɨ a꞉ɓʉsɨa-ɔɔ akpataka mʉsasa wɔ ndʉtʉ ngʉwa wenjiso soni. Kʉɓanɨ, ɓoi ngʉɓeɓo ɓa꞉sɨa jonokio nɔ ɓague tɨta sɨa, nɔ, ɓɔɓio ajonokio tɨta ati eɓo ɓoi.

²⁷ Ngbanga kʉɓanɨ, ɓague ɓɔsɨa anujonokio nɔ ɓoi, nɔ, ɓɔɓio anɨkwa mʉsasa wɔ ndʉtʉ tɨa kʉ ati eɓo ɓague. Ya yaka yɔ soni ɓague akɨana ati eɓo ɓanɨ. Kʉɓanɨ, ɓakɔhatanaka ɓʉkaɓʉkaɨ ngʉɓa ɓɔsisekio nɔ ɓʉjɛka ngʉɓɔnanɨ, tɨta eɓo ɓakwɔɓɔngɔ.

²⁸ Ndʉ ɨɓɔ ɓa꞉yaa anɨmbɨa Asɔɓɨɨ, kʉdɔ, ɨyɔ, Asɔɓɨɨ a꞉ɓʉsɨa akɔkpata tɨta nɨmbɨmbɨanaka yɛta ɓɨɓɨ ngɨyeɓo, nɔ, ɓɔɓio akɨa yaka ngɨyɛ yɔsisekiomʉ ɓɔ mombi ɨkɨa.

²⁹ Ɓaɓahue nɔ migbo iɓomu yɔ janga ɓungbingbii: ɓʉɓɨɓɨ, umongu, yaanaka, imi, maa ɓombi, mangoi, pɛtanaka, ɓʉkaɓʉkaɨ, nɔ ɗinganaka ɓangɛ,

³⁰ yakanakɨa ɓangɛ, ɓio ɓakwa ɓɔ Asɔɓɨɨ, sɛsanaka ati eɓo, nɔ ɓahue nɔ aɗia, ɓombi ɓɔ bɨbana, ɓʉngwadeni, ɓʉɗɛa sɔkɔmʉ ɓɔɓio akumo ɓɛsɛ, nɔ ɓinye ɓeɓo.

³¹ Ɓanɔ ɓujangijangi, ɓa ɓafili, ɓangɔmʉ nɔ ɓʉkʉnda ga pɔ ikoko.

³² Ɨnadɔ, ɓanɨmbɨa ta iɗo ɓɔ ʉpanʉ wɔ Asɔɓɨɨ wakɔsugo ɓɔ, ɓombi ngʉɓa ɓakɔkɨa ɨkananja yɔ yaka ngɨyɛnɛnɨ, ɓɔkwananɔ nɔ ingwo. Gʉtʉ ɓanɨ, ɓɛsɨnganaka ɨɓɔ akɨa ngbanga ta ɓanɨ, nɔ, ɓio anʉkana nɔ ɓombi ngʉɓa ɓakyananaka kʉɓanɨ.