Malɨkɔ 1 - Mʉkpanganɨa nɔ Agɔmɛ ɔ Ɨtakɨtakɨ

Yɔanɨ ngɨa a꞉tɨɓatisa ɔɓɨakɨɔ Ɨsaʉ yɔ Yeso

^1-2 Ɨsaʉ yɛta Iɗo ngɨyɔ Yeso Klisito, Mwana ɔ Asɔɓɨɨ, ngbanga ndʉ aka ɓa꞉tɛndakɨa-ɔɔ amati ɔ ɨtaɓʉ ngɨyɔ ɨgbɛ Isaya, ya꞉pʉnganɨa ɓɔ: «Na꞊tʉma sina titima ngɨasɛmɨ apɛɨ asɔɔ, nɔwɛ akɔtambanakɨa ɨngbaa.

³ Iso yɔ titima ngɨananɨ, yatʉɓɨa, mʉsɨna amukengu akɔsugo ɓɔ: ‹Tambanakeni ɨngbaa ngɨyɔ Makwɔɓɨɨ, yomokeni lingbaa ngɨlɛ lɛta lipingonokie.›»

⁴ Titima ɔngɔ a꞉ɓio Yɔanɨ, ngɨa a꞉tɨɓatisa. Ɨyɔ akɛ, a꞉chwɛanɨa amukengu, nɔ, ɔ꞉pʉnga ɓɨakɨa ɓombi ɨsaʉ ɓɔ: «Kweni uɓatiso, akɔpananiso ɓɔ nánecho mʉkyananakɨa ngʉweno nachoni, iɗo ambɔ Asɔɓɨɨ ɨnɨpaakɨa ɓʉɓɨɓɨ ngʉɓeno.»

⁵ Kʉdɔ, ɓombi ɓaɓomu ngʉɓɔ ihoi yɔ Yudɛa, nɔ ʉɓɔ gʉlʉ ɔ Yelusalɛma, ɓɛ꞉ka apɛɨ ɔ Yɔanɨ ga hɨtɔɔ. Ɓɔ꞉pʉnga panjaka ɓʉɓɨɓɨ ngʉɓeɓo aɓʉmba, nɔ, Yɔanɨ ɔ꞉ɓuɓatisa amati ɔ lisini ngɨa ino ɓɔ Yɔlɔdanɨ.

⁶ Ɨpʉkʉ ngɨyɛ Yɔanɨ a꞉ɓio nayɔ ɨpɛnɨɛ, ɓa꞉ɨkɨa nɔ mata kɔ ngamɨa, nɔ, ɔ꞉ɨnamangana nɔ muki wɔ ʉmba wɔ nama aɨɓʉnɨ. Idyo ngɨangɔ, ya꞉ɓio ɓanɛmɛnɛ, ɨhɔ nɔ ɓɛʉ.

⁷ A꞉ɓio akɔɓɨakɨa Ɨsaʉ ɓɔ: «Mombi mʉngana ɛ꞊ka suo ambise asɛmɨ, ɨya, a꞊ɓio nɔ angu nɔgbɛ nɛmɨ anagaaka. Ɨmɨ, nɔkwananɔmʉ pɔ atʉkʉma apɛɨ angɔ, nayɔ aɓoo muki wɔ lɨkpakʉ ngɨlangɔ.

⁸ Ɨmɨ, na꞉nɨɓatiso pɔngɔ amati nɔ mipo, yakamɛngana ɨyɔ, a꞊nɨɓatisa suo tɨa nɔ Mʉtɨma wɔta Tu.»

Sɨtanɨ ɔkanio Yeso ambise ɔ uɓatiso ngʉangɔ

⁹ Ɓisi mʉngana, Yeso a꞉ngwa anɔ Najalɛtɨ, ɨkʉmbʉ mɛngana amati ɔ ihoi yɔ Galilaya, ɛ꞉ka anɔ Yɔlɔdanɨ aki Yɔanɨ a꞉muɓatisa-ɛɛ.

¹⁰ Ɨyɛ ndʉ a꞉ɓio tɨa achwɛa amipo, ta gagaa ngɨananɨ, ɛ꞉na ɓisi akɔganananɨa, nɔ Mʉtɨma wɔta Tu anujo akʉʉ angɔ ndʉ anjua.

¹¹ Iso mɛngana, yɔ꞉kanɨa akʉʉ ɔ ɓisi ɓɔ: «Ʉwɛ, wa mwana ngɨasɛmɨ ɔ ɓʉkʉnda nɔgbɛ. Na꞉napɨana mʉtɨma ngʉwɔsɛmɨ akʉʉ asɔɔ.»

¹² Ta gagaa ngɨananɨ, Mʉtɨma wɔta Tu wɔ꞉mʉtʉma Yeso anɨsa amukengu.

¹³ Inani, Yeso a꞉kɨa makwaa ɓatɛkɛɓɛ ɓɔgɨna, nɔ ɓanama ɓɔ iju ɓaɓio kʉ inani. Angbinga muɓomu ngɨananɨ, Sɨtanɨ ɔ꞉mʉkanakio. Kʉdɔ, ɓamalaika ɓɛ꞉ka nayɔ akyananakɨa.

Yeso esoko ɓakpata ɓɔgɨna

¹⁴ Ambise ngɨa ɓa꞉fa-ɔɔ Yɔanɨ aboloko, Yeso ɔ꞉sa anɔ Galilaya, akɔɓɨakɨa ɓombi Ɨsaʉ yɛta Iɗo ngɨa Asɔɓɨɨ.

¹⁵ A꞉ɓio asugo ɓɔ: «Ngbinga ɔndanɔ tɨa ndananɨ, nɔ Ɓʉngama ngʉɓɔ Asɔɓɨɨ ɓa tɨa tinene, sieni ɓʉɓɨɓɨ ngʉɓeno, nɔ, bayeni Ɨsaʉ yɛta Iɗo.»

¹⁶ Ɨyɛ ndʉ a꞉ɓio achana amutii wɔ ipuu ngɨyɔ Galilaya, ɔ꞉tɛna tɨa gue mʉngana ino ɓɔ Simoni, ɨɓɔ nɔ manye Andɛlɛa. Ɨɓɔ, anunoko mayia amati ɔ ipuu, dɔ ɓa꞉ɓio ɓombi ngʉɓa ɓafa sipe.

¹⁷ Ga Yeso naɓɔ ɓɔ: «Anakpateni, dɔ na꞊nɨnatakanakiso nɛmɨ ahatɨa tɨa ɓombi.»

¹⁸ Ta gagaa ngɨananɨ, ɓɔ꞉sɨa mayia ngɨyeɓo, nɔ, ɓɔ꞉mʉkpata.

¹⁹ Anɨsɨnganaka mwana ɔngɔ ɗu ɓɔ, ɔ꞉tɛna tɨa atɨ Yakɔɓɔ, mwana ɔ Jɛbɛdayɔ, ɨɓɔ nɔ manye Yɔanɨ. Ɓa꞉ɓio, amati ɔ ɨngbɔɔ, akɔtambanaka mayia ngɨyeɓo.

²⁰ Ta gagaa ngiananɨ, Yeso a꞉ɓisoko-ɔɔ, ɓɔ꞉sɨa atɨ ɨsɛ eɓo Jɛbɛdayɔ, ɨhɔ nɔ ɓombi ɓɔ tɛa inani amati ɔ ɨngbɔɔ ga vu, nɔ, ɓɔ꞉pʉnga nayɔ akpata.

Yeso ɔheiso mombi mʉtɨma wɔ idu amati ɔ ɨkáá yɔ nɨta

²¹ Kʉdɔ, ɓa꞉ngwɨa kyɛnda anɨsa anɔ Kapalanaumu. Akɔ ɓisi ɓɔ nuhomuo ngʉɓɔ Ɓayuda, Yeso ɔ꞉kumonio aɨkáá yɔ nɨta ngɨyɔ Ɓayuda, nɔ ɔ꞉pʉnga panɨa.

²² Mapanʉ ngʉkangɔ kɔ꞉ɓʉmbangɨa ta mbangɨa, dɔ, mapanʉ kɔngɔ, ka꞉ɓio nɔ angu nɔgbɛ akɔnagaaka ʉka, kɔ ɓapananakɨa ɓɔ mapanʉ.

²³ Ambenigɔ ɓɔ pe, inani amati ɔ ɨkáá yɔ nɨta ngɨyeɓo, mombi mʉngana a꞉ɓio nɔ mʉtɨma wɔ idu. Ɔ꞉pʉnga nachokoo ɓɔ:

²⁴ «Ɨyeso nenu yɔkwa tanɨ, ha Yeso ngɨyɔ Najalɛtɨ-ei! Wɛkɔ-ndɨ nesu adʉka? Isu tanɨmbɨa iɗo ɓɔ, ʉwɛ, wa anɨ. Ʉwɛ, wa mombi ata Tu ngɨyɔ Asɔɓɨɨ.»

²⁵ Yakamɛngana, Yeso ɔ꞉nyakɨa mʉtɨma wɔ idu ngʉwɔnanɨ ɓɔ: «Ʉwɛ, gbaa ta gbaa, nɔ, chwɛa amati ɔ mombi ngɨa!»

²⁶ Kʉdɔ, mʉtɨma wɔ idu ngʉwɔnanɨ, wɔ꞉mugugumiso mombi ngɨananɨ ɓɔ kpu kpu kpu, wɔ꞉mʉchwɛa, nɔ, nachokoo ɓɔ waa, waa.

²⁷ Yaka ngɨyɛnɛnɨ, yɔ꞉ɓʉmbangɨa ɓombi ɓaɓomu, ga ɨɓɔ ɓɔ: «Eeeɓe! Ɨkananja yɔ yaka nga ya ino tanɨ ɨyayɛ? Ya ndʉ ʉpanʉ wɔ angu wɔ ɨtakɨtakɨ! Gue ngɨa anyakɨa kʉ nɔ mɨtɨma yɔ madu, nɔ yɔmʉkumo ta kumo!»

²⁸ Pɔ gbalakɨa, awɨa ngɨyɔ Yeso ɔ꞉pʉnga nʉndanaka alindu lɔ Galilaya liɓomu.

Yeso ɔheiso inyenguu yɔ Simoni

²⁹ Ɨyɛ ndʉ atɨ Yeso ɓa꞉chwɛa ananɨ aɨkáá yɔ nɨta, ɨɓɔ nɔ atɨ Yakɔɓɔ nɔ Yɔanɨ, ɓɔ꞉sa tɨa atɨ Simoni nɔ Andɛlɛa.

³⁰ Inani, ɓɔ꞉tɔgbʉka ndʉtʉ yɔgbʉndanieni inyenguu yɔ Simoni nɔ kaɓu, ɨyɔ tɨta ɓakwaɛ. Yeso a꞉ɓɔya ta ɓɔya ɓɔ, ɓɔ꞉pʉnga nayɔ aninjo ɨsaʉ yɔ kaɓu.

³¹ Kʉdɔ, Yeso ɔ꞉mɨsɨnganɨa, ɔ꞉mʉpoto ɨkɔndɔ, nɔ, ɔ꞉mimaiso ga gba. Ndʉtʉ yɔ꞉mʉkataka nɔ ɔ꞉pʉnga naɓɔ akyananakɨa.

Yeso ɔheiso ɓombi ɓɔ ɓakaɓu ɓaja

³² Tɨa nɛpasɨ yɔngɔ, ɨyɛ ɨpá ya꞉kwa nayɔ ɓanɨ, ɓombi ɓɔ꞉mɨkɨa Yeso nɔ ɓombi ɓɔ ɓakaɓu ɓaɓomu, nɔ ʉɓa ɓɔmɔ mɨtɨma yɔ madu yaɓʉjɛnganakiso.

³³ Ɓombi ɓɔ gʉlʉ ngɨananɨ ɓaɓomu, ɓɛ꞉ka agbuchonokio tɨta ananɨ anambamba ɔ umongu wɔ ɨkáá ngɨyɛnɛnɨ ɓɔ kyɔ kyɔ kyɔ.

³⁴ Kʉdɔ, a꞉heiso ɓombi ɓɔ ɓakaɓu di di di, nɔ chwɛiso mɨtɨma yɔ madu ɨja. Yakamɛngana, ɔ꞉gbɛma madu ɓɔ katɨsamʉamʉ pɔ samʉa, dɔ, ɓa꞉ɓio anɨmbɨa iɗo ɓɔ ɨyɔ Yeso, anɨ.

Yeso ɔɓɨakɨɔ Ɨsaʉ yɛta Iɗo anɔ Galilaya

³⁵ Nekuɓa yɔngɔ nɔ igbandindi, umomo sɨ ta kʉɔ, Yeso ɔ꞉chwɛa aɓei, nɔ, ɔ꞉sa anɨta Asɔɓɨɨ akɔ ʉmʉa ngʉwa ɓombi ɓangɔmʉ-ɛɛ.

³⁶ Ambise ɔngɔ bele, atɨ Simoni, ɨhɔ nɔ ɓombi ngʉɓa ɓa꞉ɓio naɓɔ, ɓɔ꞉sa nayɔ ahata.

³⁷ Ndʉ ɓa꞉mɨna, ga ɨɓɔ nayɔ ɓɔ: «Ɓombi ɓaɓomu ɓanɔwɛ ahata tɨta hata!»

³⁸ Yakamɛngana, Yeso ɔ꞉ɓutosio ɓɔ: «Tiseni aki tabi-ɛɛ, alɨkʉmbʉ ngɨlɛ la tinetine aka! Yɔkwananɔ ɓɔ nɨɓɨakɨa Ɨsaʉ inani kʉ ɓɨakɨa, nɛ꞉kɔ ɨyanɨ akɔ yaka ngɨyɛnɛnɨ.»

³⁹ Kʉdɔ, ɔ꞉chanaka amati ɔ ihoi iɓomu yɔ Galilaya, akɔpanɨa amati ɔ lɨkáá lɔ nɨta ngɨlɔ Ɓayuda, nɔ chwɛiso ɓombi mɨtɨma yɔ madu.

Yeso ɔheiso mombi ɔ keɓukeɓu

⁴⁰ Ɓisi mʉngana, keɓukeɓu mʉngana a꞉mɨsɨnganɨa, ɔ꞉kwa nɔ mawu apɛɨ angɔ ga kpru, nɔ, ɔ꞉mʉndɨanɨa ɓɔ: «Hii aba, wɔkʉndeni, wa ta adaa ngɨa wanagyaɓaka-ɔɔ nɔ kaɓu ngɨa gyaɓakanɨ»

⁴¹ Kʉdɔ, Yeso ɔ꞉mɨnɨa ikoko, ɔ꞉yomo ɨkɔndɔ, nɔ, ɔ꞉mʉɓoto. Ɔ꞉musigio ɓɔ: «Ii, nɔbáyɔ bayanɨ, gyaɓanakɨa!»

⁴² Ta gagaa ngɨananɨ, keɓukeɓu ɔ꞉mʉngwa ga ngwa, nɔ, ɔ꞉gyaɓanakɨa.

⁴³ Yakamɛngana, Yeso ɔ꞉mutoiso gbɛgbɛ ta ananɨ, nɔ, ɔ꞉goniso nɔgbɛ,

⁴⁴ nayɔ asigio ɓɔ: «Kanganɨa iɗo, watɨɓɨamʉ mombi pɔ mʉngana yaka ngɨyɛnɛnɨ. Yakamɛngana, sa apanana apɛɨ ɔ kumukumu. Nɔ, wenjo mutebii ngʉwɔ mʉgyaɓa, ngbanga ndʉ mapanʉ kɔ Musa ka꞉sugo. Ɨyɛnɛnɨ yapananiso aɓʉmba ɓɔ wɔhɛyɔ hɛyanɨ.»

⁴⁵ Yakamɛngana, ɨyɔ mombi ngɨananɨ ɔ꞉sa ɨyɔ tɨta apanjaka, nɔ, nʉngaka ɨsaʉ ngɨyɛnɛnɨ ʉmʉa uɓomu. Kʉdɔ, Yeso a꞉ɓio tii ɓata adaa ngɨa akumonio-ɔɔ amati gʉlʉ aɓʉmba. Nɔ, ɔ꞉ɓio tɨta akɔ ɨda ngɨyɛ mombi angɔmʉ-ɛɛ. Ɓombi ɓɔ꞉sa nayɔ anijeyo tɨta inani, anɨngwa alɨda di di di.