Ɓakɔlɔsai 1 - Mʉkpanganɨa nɔ Agɔmɛ ɔ Ɨtakɨtakɨ

Pɔlɔ ɔɓɔkuo Ɓakɔlɔsaɨ

¹ Ɨmɨ Pɔlɔ akɛ nɔnɨtɛndakɨɔ ʉbalʉa ngʉa, isu nɔ awai eso Tɨmɔtɛɔ. Ɨmɨ, na titima wɔ Yeso Klisito, ɨngbaa akɔ ɓʉkʉnda ɓɔ Asɔɓɨɨ.

² Isu tɔ꞉nɨtɛndakɨɔ inu, ɓombi ɓɔ Asɔɓɨɨ ngʉɓa ná anɔ Kɔlɔsaɨ, inu ɓanduku ngʉɓa ná ɨkyɛmʉ mɛngana nɔ atɨ Klisito amati ɔ báya. Tɔnɨtʉmɨɔ ɨjɨɔ nɔ majɨɔ anɨngwa atɨ Asɔɓɨɨ Aba ngɨyeso.

Pɔlɔ ɔtosio Asɔɓɨɨ ʉbɨba akʉʉ ɔ Ɓakɔlɔsaɨ

³ Ngbinga muɓomu ngɨa takɨa-ɔɔ nenu anɨtɨa, takɨtɔsio Asɔɓɨɨ Aba ngɨa ɔ Makweso Yeso Klisito ʉbɨba.

⁴ Tɔ꞉ka pɔngɔ ɨsaʉ ʉkanɨ, akʉʉ ɔ báya ngɨyɛ nánayɔ akɔ Yeso Klisito, nɔ ɓʉkʉnda ngʉɓa nánaɓɔ akɔ ɓombi ɓɔ Asɔɓɨɨ.

⁵ Ngbinga ngɨa ɨsaʉ yɔ ingono, ngɨyɛ ya Ɨsaʉ yɛta Iɗo, ya꞉pʉnga-ɔɔ akɔɓɔya andɛnɔ, inu, nápemiso ɨjangɨa pemisoni, ɨyɛ, Asɔɓɨɨ a꞉niɓosio akʉʉ ɔ ɓisi. Yasugo ɓɔ, baya ɨhɔ nɔ ɓʉkʉnda ngʉbeno, ɓaɓɛmaɛ akʉʉ ɔ ɨjangɨa ngɨyɛnɛnɨ nánapɨana-ɔɔ mʉtɨma.

⁶ Ɨsaʉ yɛta Iɗo ngɨyɛnɛnɨ, yakɔnanjana nɔ nɔta masɔɔ dɔdɔ muɓomu. Yakɔkɨa ngbanga kʉndʉ ya꞉kɨa jɛnɛ inani andɛnɔ, anɨngwa ta nɔ ɓisi ngʉɓa nɔ́꞉ka-ɔɔ, nɔ nɔ́pemiso ɨjɨɔ yɔ ingono ngɨyɛ Asɔɓɨɨ.

⁷ Mombi ngɨa a꞉nɨpanɨa jɛnɛ ɨsaʉ gɨyɛnɛnɨ, ya꞉ɓio Ɛpafala. Ɨyɔ, a awai eso akɔ tɛa yɔ Asɔɓɨɨ, nɔ ɓata kʉ baya ɔ Yeso Klisito, ngɨa akɔkɨa tɛa ngɨyɛ isu tɔkwananɔ pɛngɛ kɨa akʉʉ ɔ eno.

⁸ Ɨyɔ akɛ, a꞉tɨnjo pɔngɔ ɨsaʉ yɔ ɓʉkʉnda ngʉɓa Mʉtɨma wɔta Tu wa꞉ninjo.

Pɔlɔ anɨtɨa ɓangɛ

⁹ Tɨa kwananɨ, anɨngwa nɔ ɓisi ngʉɓa tɔ꞉ka-ɔɔ ɨsaʉ ngɨyɛnɛnɨ, isu, tangɔmʉ asɨa nenu anɨtɨa Asɔɓɨɨ. Tanɨta Asɔɓɨɨ ɓɔ, ɨkwanana nenu animbiiso ɓʉkʉnda ngʉɓangɔ, nɔ ɔnihuiso nɔ nɨmbɨmbɨanaka, nɔ kʉ nɔ itungwio yɔ Mʉtɨma ngʉwangɔ.

¹⁰ Kʉdɔ, ná꞊kwanana tɨa kyɛndaka ngbingbii apɛɨ ɔ Makwɔɓɨɨ, nɔ akɔkɨa ta yaka ngɨyɛ yamɨkataa masi maɓomu. Nɔ ɨngbaa ngɨyɛnɛnɨ, ná꞊ɓɔya akɔkyananaka manjanja, migbo yɔngɔ ta iɓomu nɔ nɛ́꞊sɨnganaka apemiso Asɔɓɨɨ nɔgbɛ.

¹¹ Takɔnɨta ɓɔ Asɔɓɨɨ ɔnihuiso nɔ angu ɔ ʉbɨba ngʉwangɔ, dɔ ɓieni akɔpɛa yaka ta iɓomu, amati ɔ mʉtɨma wɔta ʉta.

¹² Mutosieni Asɔɓɨɨ Aba ʉbɨba nɔ ɨgyagya, dɔ ɨyɔ akɛ, a꞉nɨganɨa ɨngbaa anɨanɨa nɔ ɨjangɨa yɔ ɓʉngama ɓɔ ʉwanga ngʉɓa, a꞉napɨa jɛnɛ ndʉ akoti akɔ ɓombi ngʉɓangɔ.

¹³ Dɔ ɨyɔ akɛ, a꞉tɨchʉchwakiso amati ɔ angu ɔ umomo, nesu akumoniso tɨa amati ɔ Ɓʉngama ngʉɓɔ Mwana angɔ ɔ Ɓʉkʉnda.

¹⁴ Ya ɨngbaa kʉ akɔ Mwana ngɨananɨ, ɨyɛ Asɔɓɨɨ a꞉tɨchʉchwakiso-ɔɔ aɓubaya nɔ nesu anɨpaakɨa ɓʉɓɨɓɨ.

Klisito a Makwɔɓɨɨ ɔ dɔdɔ

¹⁵ Klisito akɛ a isisenio yɔ Asɔɓɨɨ ngɨa, isu tangɔmʉ nayɔ anɨna. Ɨyɔ akɛ, a tapio nɔ akʉ akʉʉ wɔ lɨkyɛmʉ ta liɓomu ngɨlɛ Asɔɓɨɨ a꞉kɨa.

¹⁶ Ya ɨngbaa ta akɔ ɨyɔ, ɨyɛ, Asɔɓɨɨ a꞉kɨa-ɔɔ iɓomu ngɨyɛ ya ɛsɨ ɨpá nɔ akʉʉ ɔ ɓisi, gʉtʉ kʉnɔ lɨkyɛmʉ ngɨlɛ lanɨnɨa, kʉndʉ ɨlɛ langɛnɨanɨamʉ. Yiɓio ɓʉngama, angu ɔ abɨɨ, ga pɔ angu, ga pɔ ʉpanʉ. Yaka ngɨyɛnɛnɨ iɓomu, Asɔɓɨɨ a꞉ɨkɨa ta ɨngbaa akɔ ɨyɔ, nɔ kʉ nayɔ.

¹⁷ Klisito a꞉ɓio ɨyɔ ta akɔ uɓei, pɛɨ ngɨa ɓa꞉kɨa-ɔɔ lɨkyɛmʉ liɓomu, nɔ kʉ akɔ yaka yangɔ, ɨyɛ lɨkyɛmʉ ngɨlɛnɛnɨ liɓomu la-ɔɔ alɨda ngɨleɓo.

¹⁸ Ɨyɔ akɛ, a mʉtʉ wɔ kanisa ngɨa a ndʉtʉ ngɨangɔ, nɔ kʉ ɨyɔ akɛ a itindindi yɔ uɓei ngʉwɔ ɨtakɨtakɨ. Nɔ kʉ ɨyɔ a ndʉ tapio, nɔ kʉ ɨyɔ akɛ a꞉pʉnga jʉkana ati ɔ mɨnda, dɔ iɓio ndʉ mombi ɔ pɛɨ ɔ yaka iɓomu.

¹⁹ Oi, Asɔɓɨɨ akɛ a꞉kʉnda akɔɓio muɓomu amati ɔ Mwana ɔ angɔ,

²⁰ nɔ kʉ ɨngbaa akɔ Mwanangɔ, ɨyɛ Asɔɓɨɨ a꞉kwaisio-ɔɔ atoiso ɨkɔɔ ati ɔ dɔdɔ muɓomu, nɔ ɨyɔ makwɔngɔ. Ɨngbaa akɔ ingwo ngɨyɛ Mwanangɔ akʉʉ ɔ mʉsalaba, Asɔɓɨɨ e꞉njo majɨɔ akɔ lɨkyɛmʉ liɓomu, yiɓio ɨlɛ la akʉʉ ɔ ɓisi, kʉndʉ ɨlɛ la akɔ dɔdɔ.

²¹ Yakamɛngana, inu, ná꞉ɓio jɛnɛ pɛɨ ɗu nɔ Asɔɓɨɨ, ngbanga kʉɓanɨ, nɔ nɔ́ɓio kʉ ɓamʉyaa ɓangɔ, ɨngbaa akɔ itungwio nɔ ɓʉɓɨɓɨ ngʉɓa na꞉ɓio akɨa.

²² Yakamɛngana tɨa ɓʉɓʉnʉ, ɨngbaa akɔ ingwo ngɨyɔ Mwana angɔ, ɨyɔ, Asɔɓɨɨ a꞉toiso ɨkɔɔ ati angɔ nenu, ɓɔ dɔ ɨnɨchweiso amesu kangɔ, tɨa ndʉ ɓombi ɓɔta tu, ɓajaɓanakɨɛ nɔ sɔkɔmʉ nɔ ɨɗa yɔ ɓʉɓɨɓɨ pɔ mɛngana.

²³ Kʉɓanɨ, ɨmaeni inu ta ɓumu amati ɔ báya. Nátɨsɨanenimʉ nɔ Ɨsaʉ yɛta Iɗo, yaka ngɨyɛ ta꞉napɨana-ɔɔ mʉtɨma ngʉweso ɨyɛnɛnɨ. Ɨsaʉ ngɨyɛ nɔ́꞉ka, ɨyɛ ɓa꞉ɓɨakɨa ɓombi ɓaɓomu adɔdɔ aka. Tɨa kwananɨ ɨmɨ Pɔlɔ, nɛ꞉ka-ɔɔ baya wɔ ɓɨakɨa Ɨsaʉ ngɨyɛnɛnɨ.

Pɔlɔ akɔkɨa tɛa yɔ Kanisa

²⁴ Ɨtakɨtakɨ ngɨyɛ, nanɨkwa ɨgyagya akʉʉ ɔ ɓʉkaɓʉkaɨ ngʉɓa nanɨdya akʉʉ eno. Ɨngbaa akɔ ɓʉkaɓʉkaɨ ngʉɓɔnanɨ, nakɔndanakiso ɓʉkaɓʉkaɨ ngʉɓa yanɨtanɨa pɛngɛ ɓɔ Klisito ɨdya ɓata akʉʉ ɔ Kanisa, ɨya, a ndʉtʉ ngɨangɔ.

²⁵ Ɨmɨ, nɛ꞉ka tɨa baya ɔ Kanisa akɔkpatanakɨa nɔ tɛa ngɨyɛ Asɔɓɨɨ a꞉nenjo akʉʉ eno. Tɛa yɔngɔ ya ta akɔɓɨakɨa Ɨsaʉ ngɨangɔ iɓomu.

²⁶ Yaka ngɨyɛnɛnɨ, ya yaka yɔ ɓaɗi ngɨyɛ a꞉naya jɛnɛ akɔ ɓombi ɓaɓomu anɨngwa akɔ mʉkpanganɨa, yakamɛngana, ɨtakɨtakɨ ngɨyɛ, ɔɨpana tɨa ɓombi ngʉɓangɔ aɓʉmba.

²⁷ Dɔ Asɔɓɨɨ akʉnda akɔpananiso ɓombi ngʉɓɔnanɨ aɓʉmba ɨsɨ yɔ yaka yɔ ɓaɗi ngɨangɔ ɨyɛ, yanɔ dada nɔgbɛ. Yaka yɔ ɓaɗi ngɨyɛnɛnɨ ya ɓɔ: Klisito a amati eno, nɔ kʉ ɨyɔ akɨnjo yaka ngɨyɛ tanapɨana-ɔɔ mɨtɨma ngɨyeso, dɔ tiɓio sina amati ɔ ʉbɨba ngʉwɔ Asɔɓɨɨ.

²⁸ Tɨa kwananɨ, ta-ɔɔ akɔɓɨakɨa ɨsaʉ yɔ Klisito akɔ ɓombi ɓaɓomu. Taɓɨakɨa nɔ panɨa ɓombi di di di nɔ mʉtɨma wɔ pemiso yaka nɔ ingono, dɔ ɓombi ɓaɓomu ɓɨkɨa ɓakʉʉ ɨkyɛmʉ mɛngana nɔ atɨ Klisito.

²⁹ Kʉɓanɨ, nakɔkɨa tɛa yɔngɔ nɔ ɓɛndana nɔ angu ngɨa anɨngwa atɨ Klisito ngɨa akɔkɨa tɛa amati asɛmɨ.