2 Pɛtɛlɔ 1 - Mʉkpanganɨa nɔ Agɔmɛ ɔ Ɨtakɨtakɨ

Ɓokuo

¹ Ɨmɨ Simoni Pɛtɛlɔ, baya nɔ titima ɔ Yeso Klisito, nanenu atɛndakɨa ʉbalʉa ngʉa, inu ɓombi ngʉɓa nɛ́nɨanɨa nɔ báya mɛngana yɔ ɨjangɨa kʉndʉ ɨyɛ eso tanayɔ. Báya yɔ ɨjangɨa ngɨyɛnɛnɨ, isu tanayɔ akɔ ingono yɔ Asɔɓɨɨ ngɨyeso, nɔ Muheiso Yeso Klisito.

² Ɨjɨɔ, nɔ majɨɔ kiɓio ɨhɔ nenu maja nɔgbɛ, dɔ nánɨmbɨa Asɔɓɨɨ nɔ Makweso Yeso.

Asɔɓɨɨ achwa nɔ nisoko ɓombi ɓangɔ

³ Ɨngbaa akɔ angu ngɨangɔ, Asɔɓɨɨ a꞉tinjo ɨkyɛmʉ iɓomu ngɨyɛ yakwanana salɨa uɓei ngʉweso, nɔ, aɓio nɔ kɛkɛɛ akɔ tɛa yɔ Asɔɓɨɨ. A꞉timbiiso mombi ngɨa a꞉tisoko akumonio akɔ ʉbɨba wɔta ʉja, nɔ akɔ iɗo iɗo ngɨangɔ.

⁴ Kʉdɔ, a꞉tinjo lɨkyɛmʉ lɛta manjanja, nɔ ɨlɛ lɛta lɨja ngɨlɛ a꞉tɨpanaka jɛnɛ. Iɗo ambɔ, angbinga ngɨa nɛ́nɨanɨeni-ɔɔ nalɔ, mʉsasa wɔ dɔdɔ ngɨa ayangaa yangaanɨ akɛ, watɨnɨɗuɗuomʉ ɓata, nɔ, nɔ́ɓio tɨa kʉ ɨkyɛmʉ mɛngana nɔ Asɔɓɨɨ.

⁵ Ta akʉʉ ɔ yaka mɛngana ngɨyɛnɛnɨ, kɨeni angu akɔmatɨa mʉkyananakɨa wɔta uɗo, akʉʉ ɔ báya ngɨyeno. Nɔ, akʉʉ ɔ mʉkyananakɨa wɔta uɗo, nɔ́matɨa nɨmbɨmbɨanaka yɔ ingono ngɨa Asɔɓɨɨ.

⁶ Nɔ, akʉʉ ɔ nɨmbɨmbɨanaka, nɔ́matɨa nɨfana mʉtɨma. Nɔ, akʉʉ ɔ nɨfana mʉtɨma, nɔ́matɨa mʉtɨma wɔta ʉta. Nɔ, akʉʉ ɔ mʉtɨma wɔta ʉta, nɔ́matɨa potono nɔ Asɔɓɨɨ.

⁷ Nɔ, tɨa akʉʉ ɔ potono nɔ Asɔɓɨɨ, matɨeni ɓio nɔ nɔtana. Nɔ akʉʉ ɓio nɔ nɔtana, nɔ́matɨa ɓio nɔ ɓʉkʉnda akɔ ɓanduku.

⁸ Mɨkyananakɨa ngɨyɛ nɔ́kwananɔ ɓio nayɔ ɨyɛnɛnɨ. Nɔ, ndʉ náɓio nayɔ ɨja ɓanɨ, náɓio tɨa nɔ ɓusiasia, nɔ tɨa kʉ ɓɔndanɛ akɔpemiso Makweso Yeso Klisito.

⁹ Yakamɛngana, mombi ɔɓienimʉ nɔ mɨkyananakɨa ngɨyɛnɛnɨ, a ngbanga ndʉ mombi ngɨa angɔmʉ anɨna iɗo, nɔ ɨya a꞉chweyo mesu. Mombi ɔngɔ, anɨpaa ɓɔ a꞉jaɓanakɨa jɛnɛ aɓʉɓɨɓɨ jaɓanakɨanɨ.

¹⁰ Yaɓanɨ inu ɓanduku, kɨeni ɓata angu mʉja, anɨmaa ɓʉmʉ akɔ nisoko ngɨyɛ Asɔɓɨɨ a꞉nisoko-ɔɔ, nɔ, nɨchwa ngɨyɛ a꞉nɨchwa-ɔɔ. Dɔ, nɔ́kɨeni ɓanɨ, nángɔkwananamʉ anɨkwa amati ɔ ɓʉɓɨɓɨ pɔ bele.

¹¹ Yaka ngɨyɛ ɓa꞊nɨsɨa sina-ɔɔ ɨngbaa ɓwau akumonio akɔ Ɓʉngama ɓɔ mago nɔ mago, ʉɓa ɓɔ Makweso, nɔ Muheiso weso Yeso Klisito, mʉtʉ wɔngɔ wa ɓanɨ.

¹² Kʉɓanɨ, naɓio nenu atungwiso yaka ngɨyɛnɛnɨ masi ta maɓomu, gʉtʉ ndʉ nánɨmbɨa kʉ iɗo, nɔ, ná kʉ ɓɔndanɛ akɔkpataka ingono ngɨyɛ nɛ́꞉nɨanɨa jɛnɛ nayɔ.

¹³ Yakamɛngana, ngbinga ngɨa ɨmɨ, na-sɨ-ɔɔ kʉ nɔ ndʉtʉ yɔ ɨtaka, nɛnɔ iɗo nenu akɔtungwiso yaka yɔngɔ, nɔ, nenu ajʉkaniso.

¹⁴ Dɔ, nanɨmbɨa iɗo ɓɔ, ngbinga ɔ ingwo ngɨyɛsɛmɨ, nakɔchɛya amati ɔ ndʉtʉ ngɨyɛ. Makweso Yeso Klisito, a꞉naɓɨa pɔngɔ ɓɨanɨ.

¹⁵ Nakɨa angu ɓɔ gʉtʉ nɔweni, ɓieni atunguo yaka ngɨyɛnɛnɨ masi ta maɓomu.

Ʉbɨba wɔ Klisito

¹⁶ Ngbinga ngɨa ta꞉nɛɓiakia-ɔɔ ɓɔ Makweso Yeso Klisito a꞊tɔa sina nɔ angu ngɨangɔ, ya꞉ɓiomʉ ɨngbaa akɔ migenu yɛta ɓʉtʉʉ ɓʉtʉʉ, ngɨyɛ ya꞉chwɛanɨa nɔ ɓakɔkɔ ɓɔ ɓombi. Yakamɛngana, isu ɓakwɔɓɔngɔ, tɛ꞉na ɓʉjanana ngʉɓangɔ nɔ mesu.

¹⁷ Ya ingono ɓɔ, ɛ꞉nɨanɨa nɔ ʉbɨba nɔ ɨbɨba ngɨyɔ Asɔɓɨɨ Aba, ngbinga ngɨa iso yɔ Asɔɓɨɨ ngɨa ɔ angu ya꞉sugo-ɔɔ ɓɔ: «Mwana ngɨasɛmɨ ɔ ɓʉkʉnda ɨyɔ ɨyakɛ. Nanɨkwa ɨgyagya akʉʉ angɔ nɔgbɛ!»

¹⁸ Isu ɓakwɔɓɔngɔ, tɔ꞉ka iso ngɨyɛnɛnɨ ʉkanɨ anɨngwa akʉʉ ɔ ɓisi, ngbinga ngɨa ta꞉ɓio-ɔɔ nɔ atɨ Yeso akʉʉ ɔ ɨkpangba yɛta tu.

¹⁹ Nɔ ɓata, ta kʉ abaya ɨsaʉ ngɨyɛ magbɛ kɔ Asɔɓɨɨ ka꞉sugo jɛnɛ. Inu, nákɔkɨa iɗo, akɔnapɨana mʉtɨma akʉʉ ɔngɔ. Ɨsaʉ ngɨyɛnɛnɨ, ya ngbanga ndʉ ʉwanga ngʉwa wapɔya umomo, akɔɓɛtaka ɓisi ɓɔta ɓʉyɛ, nɔ angbinga ngɨa ʉndata wɔ apɛlʉ wa-ɔɔ ajɛa amati ɔ mɨtɨma ngɨyeno.

²⁰ Apɛɨ ɔ yaka iɓomu, nɔ́kwananɔ anɨmbɨa ɓɔ: akɔ itungwio ngɨyɔ mombi ingainga, mombi pɔ mʉngana angɔkwananamʉ akwananakiso yaka ngɨyɛ magbɛ kɔ Asɔɓɨɨ ka꞉sugo amati ɔ Mabii.

²¹ Dɔ, yaka ngɨyɛ magbɛ kɔ Asɔɓɨɨ ka꞉sugo, ya꞉ngɔtɨchwɛanɨamʉ akɔ ɓʉkʉnda ɓɔ mombi. Yakamɛngana, ɓa꞉tɨsugo yaka ngɨyɛ ya꞉tɨngwa atɨ Asɔɓɨɨ, akɔ angu ɔ Mʉtɨma wɔta Tu.