1 Pɛtɛlɔ 1 - Mʉkpanganɨa nɔ Agɔmɛ ɔ Ɨtakɨtakɨ

Ɓokuo

¹ Ɨmɨ Pɛtɛlɔ, titima ɔ Yeso Klisito akɛ, nɔnɨtɛndakɨɔ ʉbalʉa ngʉwa. Nɔnɨtʉmɨɔ inu, ɓombi ngʉɓa Asɔɓɨɨ a꞉nɨchwa jɛnɛ, nɔ ná꞉panjaa, nɔ nɔ́ɓio tɨa ndʉ ɓɛɛka amati ɔ lihoi lɔ Pɔtɔ, nɔ Galatɨa, nɔ Kapadɔkɨa, nɔ Ajia, nɔ Bɛtania.

² Inu ngʉɓa, Asɔɓɨɨ Aba a꞉nɨchwa jɛnɛ kʉ pɛɨ, akpatanakɨa nɔ ɓʉkʉnda ngʉɓangɔ. Kʉdɔ, ɔ꞉nɨnapɨa kʉ di, anɨka ɓombi ɓɔta tu, ɨngbaa akɔ Mʉtɨma wɔta Tu, iɗo ambɔ, kpatakeni mapanʉ kɔ Yeso, nɔ, jaɓanakɨa nɔ menike ngʉkangɔ ka꞉njɨlaka. Ɨjɨɔ nɔ majiɔ majanana, kiɓio ɨhɔ nenu.

Tosio Asɔɓɨɨ ʉbɨba akʉʉ ɔ ɓʉhɛa

³ Asɔɓɨɨ, Aba ngɨa ɔ Makweso Yeso Klisito, ɨsɨka ʉbɨba sɨkanɨ-a! Ya akʉʉ ɔ ikoko ngɨangɔ yɛta ɨja, ɨyɛ isu, tɛnɨanɨa-ɔɔ nɔ nɔtanɨa ngɨyɔ machaa kapɨnɨ. Kʉɓanɨ, jʉkana ngɨyɔ Yeso Klisito akɔ ingwo, ya꞊tinjo sina tɨa itungwio yɔ ɓʉhɛa,

⁴ ngbinga ngɨa ta-ɔɔ aɓɛtaka mʉgyɛndɔ wɔ maɓɨɨ ngʉwa Asɔɓɨɨ a꞉tɨɓɔsio akʉʉ ɔ ɓisi. Mʉgyɛndɔ wɔ maɓɨɨ wɔngɔ, wangɔyanakamʉ, nɔ wangɔfamʉ makaku, nɔ wangɔpɔwamʉ kʉɓanɨ.

⁵ Nɔ inu, ngʉɓa ɨngbaa akɔ báya, angu ngɨa Asɔɓɨɨ anenu apɛmakɨa, iɗo ambɔ ɨnɨanɨeni nɔ ɓʉhɛa. Ɓʉhɛa ngʉɓɔnanɨ, ɓa꞊pananɨa sina aɓʉmba akɔ ɓisi ɓɔ mupipio.

⁶ Akʉʉ ɔ yaka ngɨyɛnɛnɨ, nɔ́kwananɔ anɨkwa ɨgyagya nɔgbɛ, gʉtʉ ndʉ ɨtakɨ ngɨyɛ, yanɨtanɨa ɓɔ dyeni ikoko, dɔ nákɔchana amati ɔ likanio di di di akɔ angbinga bele.

⁷ Likanio ngɨlɛnɛnɨ, lakɔpananiso ɓɔ báya ngɨyeno, ya ndɨ kʉ ɓumu. Ɨna dɔ báya, yanɔ dada anagaaka ɔlɔ. Ɔlɔ ngɨa akɨyanaka ta yanakanɨ, gʉtʉ ɓɔmupombeni ta adyaa ɓɔ ngelele. Kʉɓanɨ, ɓisi ngʉɓa Yeso a꞊chwɛanɨa sina-ɔɔ naɓɔ, Asɔɓɨɨ a꞊nɨbibiso sina, nɔ, nenu atʉkʉa, nɔ, nenu atʉmba nɛkʉʉ.

⁸ Gʉtʉ ndʉ nángɔmʉ anɨna Yeso nɔ mesu, yakamɛngana, nánayɔ akʉnda nɔ nɔ́mʉbáya. Kʉɓanɨ, nánɨkwa ɨgyagya ɨja nɔgbɛ, ɨkananja yɔngɔ, yangɔmʉ aka, nɔ, yanɔ ʉbɨba.

⁹ Ná꞊ɓio nɔ ɨgyagya ɓanɨ, dɔ ná tɨa anɨnɨanɨa nɔ ɓʉhɛa. Ɨyɛ, ya ndʉ mʉkaya, aka ná꞉baya-ɔɔ Yeso.

¹⁰ Magbɛ kɔ Asɔɓɨɨ ka꞉hata, nɔ, kɔ꞉kpengbiso yaka ɨja akʉʉ ɔ ɓʉhɛa ngʉɓɔnanɨ. Ɨɓɔ, ɓa꞉sugo kʉɔ yaka akʉʉ ɔ apɛpɛ ngɨa Asɔɓɨɨ a꞉nɨpanaka.

¹¹ Mʉtɨma wɔ Klisito wa꞉ɓio amati eɓo. Nɔ mʉtɨma ngʉwɔnanɨ, wa꞉ɓɨakɨa kʉ pɛɨ, ɓʉkaɓʉkaɨ ngʉɓa Klisito a꞉ɓio anɨsa anɨdya, nɔ ʉbɨba ngʉwa, wakpata ambise ɔngɔ. Magbɛ ka꞉hata nɔ angu, anɨmbɨa angbinga, nɔ ɓɔ yaka ngɨyɛnɛnɨ yakyananakɨa tanɨ.

¹² Kʉdɔ, Asɔɓɨɨ a꞉ɓimbiiso ɓɔ ɓa꞉ɓiomʉ aninjo ɨsaʉ ngɨyɛnɛnɨ akɔ ɨɓɔ, yakamɛngana, ya꞉ɓio akʉʉ eno. Ɓapananakɨa ngʉɓa ɓanenu aɓɨakɨa Ɨsaʉ yɛta Iɗo ɨtakɨtakɨ ngɨyɛ, ɓa꞉nɨɓɨa pɛ ɨsaʉ ngɨyɛnɛnɨ ɨngbaa akɔ angu ɔ Mʉtɨma wɔta Tu ngʉwa, ɓa꞉ʉtʉma anɨngwa akʉʉ ɔ ɓisi. Ɨna dɔ, gʉtʉ ta ɓamalaika ingainga, ɓatatanɨa nɔgbɛ ɓɔ ɓɨmbɨa gɔ ɨsaʉ ngɨyɛnɛnɨ kʉ ɨmbɨanɨ.

Mʉkyɛndakɨa wɔ ɓana ɓɔ Asɔɓɨɨ

¹³ Kʉɓanɨ, ɓieni ɓɔndanɛ akɨa tɛa, nɔ kanganakɨeni kanganakɨanɨ. Nápɨeni itungwio ngɨyeno iɓomu amati ɔ ɨjɨɔ ngɨyɛ, nɛ́꞊nɨanɨa sina nayɔ aka Yeso a꞊tɔa-ɔɔ.

¹⁴ Kumeni Asɔɓɨɨ kumoni, nɔ, nɔ́sɨa kpataka mʉsasa ngʉwa ná꞉ɓio jɛnɛ nawɔ pɛɨ, angbinga ngɨa ná꞉ɓio-ɔɔ ɓɔ nángɛmbɨenimʉ Yeso.

¹⁵ Asɔɓɨɨ ngɨa a꞉nɨsoko a Tu, kʉɓanɨ inu, ɓieni kʉ tu amati ɔ mʉkyananakɨa ngʉweno uɓomu.

¹⁶ Dɔ, amati ɔ Mabii ya꞉tɛndanakɨa ɓɔ: «Ɓieni tu, dɔ ɨmɨ, na kʉ Tu.»

¹⁷ Amati ɔ nɨta ngɨyeno, nákyɛsoko Asɔɓɨɨ ɓɔ «Aba», ɨyɔ, ngɨa akio mʉkɔmbʉ wɔ ɓombi akpatanakɨa nɔ mʉkyananakɨa ngʉwɔ mombi nɔ mombi, sɔkɔmʉ naɓɔ anagbonyoko amababa. Kʉɓanɨ, ngbinga ngɨa, ná-sɨ-ɔɔ ta akɔ dɔdɔ aka, mʉkyananakɨa ngʉweno, wiɓio ta nɔ ʉɓá wɔ Asɔɓɨɨ.

¹⁸ Mʉkyananakɨa ngʉwa ná꞉sɨka nɔ ɓatɔ ɓeno, wangɔmʉ nɔ dada pɔ bele. Yakamɛngana, nánɨmbɨa iɗo ɓɔ, Asɔɓɨɨ a꞉nɨkaya nɔ ɨgabʉ yɛta ɓumu, nenu achʉchwakiso amati ɔ mʉkyananakɨa wɔta ɓɨɓɨ ngʉwɔnanɨ. Ɨgabʉ yɔngɔ, ya꞉ɓiomʉ ɨngbaa akɔ ɓayaka ɓɔta ɓayanakɛ ndʉ ɔlɔ, ga pɔ ɓagyɛgyɛ.

¹⁹ Yakamɛngana, a꞉nɨɓwanakiso ɨngbaa akɔ menike kɔ ɨgabʉ, ngʉkɔ Yeso Klisito, ɨya a꞉ɓio ngbanga ndʉ mwana ɔ kɔndɔlɔ ngɨa angɔmʉ nɔ majangi, nɔ sɔkɔmʉ nɔ ɨɗa kʉɓanɨ.

²⁰ Asɔɓɨɨ a꞉mʉchwa jɛnɛ kʉ pɛɨ, angɔnapienimʉ pɔ muɓumba wɔ dɔdɔ pɔ napɨa. Kʉdɔ, tɨa akʉʉ ɔ yaka yeno, Asɔɓɨɨ ɔ꞉tɔmʉpananiso tɨa aɓʉmba, akɔ angbinga ngɨa ɔ mupipio akɛ.

²¹ Ya ɨngbaa akɔ Klisito, ɨyɛ inu nábaya-ɔɔ Asɔɓɨɨ ngɨa a꞉mʉjʉkaniso akɔ ingwo, nɔ ɔ꞉minjo ʉbɨba. Ɨsɨ yɔ yaka ngɨyɛ ná-ɔɔ anapɨa báya, nɔ itungwio ngɨyeno akɔ Asɔɓɨɨ, ya ɓanɨ.

²² Inu, nágyaɓanakɨa gyaɓanakɨanɨ amɨtɨma ngɨyeno, ɨngbaa akɔkpataka mʉkyananakɨa wɔ ingono, nɔ, nɔ́kʉndana ati eno kʉ nɔ ingono ndʉ ɓanduku. Kʉɓanɨ, ɨsɨnganakeni tɨta kʉndana nɔ kɛkɛɛ nɔ mʉtɨma mʉngana.

²³ Ná꞉nɔtanɨa pɔngɔ ɓata, sɔkɔmʉ ɨngbaa akɔ ɓʉsɔɔ ngʉɓa ɓayanaka, yakamɛngana, ɨngbaa akɔ ɓʉsɔɔ ngʉɓa ɓangɔyanakamʉ. Ɓʉsɔɔ ɓɔngɔ, ya ʉpanʉ wɔ Asɔɓɨɨ ngʉwa wa nɔ ɓʉhɛa, nɔ, wagbalɨa amati ɔ mago nɔ mago.

²⁴ Amati ɔ Mabii ya꞉tɛndanakɨa ɓɔ: «Ndʉtʉ ngɨyɔ mombi muɓomu, ya ta ndʉ yanja, nɔ, ʉbɨba wɔngɔ ndʉ ɨʉa. Yanja yakyɔmaka, nɔ ɨʉa yɔɓwana.

²⁵ Yakamɛngana, ʉpanʉ wɔ Makwɔɓɨɨ, wagbalɨa amati ɔ mago nɔ mago.» Nɔ ʉpanʉ wɔngɔ, ya Ɨsaʉ yɛta Iɗo ngɨyɛ ɓa꞉nɨɓɨakɨa jɛnɛ.