Yo 4 - Bible en langue Bulu

Zambe a bili ajô a meyoñe bikuu

¹ Eyoñe te, nalé Nti a jô, ma ye beta telé Yuda a Yérusalém nnôm été wop.

² Ma ye sulane meyoñe bikuu, a siliki mese e mbiʼili ba loone na: Yôsafat. Vôm ate ma ye loone be e ntyiʼane mejô asu mam mese be nga bo Israél, ayoñe bôt e nʼéndam: be nga mane mialane nye e meyoñ bikul été a kabane si jam.

³ Be nga kabane bôte ya ayoñe dam a mboon asimba; be nga kuane bobefam asu ya yaʼane binga bʼébamba, a kuane fe bobebinga asu ya kuse bilam.

⁴ A dañe dañe mia, bitisone Tir a Sidoñ, a mia bese mesi Befilisteñ, mia kômbô bo me jé? Ye mia kômbô bo akunaʼa be ma? Nge jam bi bili nde le, ma ye bo te yange bulane mia mboone wônan été été.

⁵ Mi nga nyoñe argent a or wom, akume dam da dañ édima. A kee de e menda me zambe menan.

⁶ Mfaʼa bôte be too Yuda a Yérusalém, mi nga kuane be e be Begrék na be ke si jab ôyap.

⁷ Ve ma ma ye beta soo be vôm mi nga kuane be. A ma ye bulane mia abé mi nga bo.

⁸ Ma ye kuane bobefam a bobebinga benan e be bôte be too Yuda. Be ki ba ye beta kuane be e be bôte ya Saba, mbe be too si é nʼôyap. Jame ma Nti ma yemete nde le.

Mewosan ma suʼulan a ntyiʼan ajô

⁹ Be yôtane foé e be meyoñ bikule na: Kômesaʼane mewosan, a bo bewosane benane na be tabe nkômesan. Bezimbi bese be ntoo ve taté dulu.

¹⁰ Kôñelaʼan bibaʼa ya beminsini ba senane si bi bo minkpwaté mekôn a beta bʼatyeñe benan be bo mekoñ. Bôte ba dañe minwôwoñ be boʼo bebien be yeme na be ne mimben.

¹¹ Boʼon avôle ya zu, mia meyoñ me bôt mese ma bôman Israél, sulaʼan e mbiʼili wua. A wo, a Nti lôme bôte mewosane bôé be wosane be.

¹² Meyoñ me ntoo ve taté dulu, nalé Nti a jô be zaʼak e mbiʼili ba loone na: Yôsafat. Nne ma ye tabʼéto ya tyiʼi meyoñ ma bôman Israél mejô valé.

¹³ Nyoñan avioñ ya tyiʼi be ane bidi bi tôlôbôya. Zaʼane koʼone be ane ébuma ndik ja jalé vôm ba miate je; Befandé be nga fuluku, ésase jabe fe é nembaneya.

¹⁴ Eyoñe te ñhe minkunda minsamba mi ne tekʼalañé mia suan e mbiʼili Ntyiʼane mejô, amu môse Nti a ye liti ayaa dé ô ntoo bebé.

¹⁵ Jôp a ngon bi nji ke fe faé, ateté e nga dimili mfaane wop.

¹⁶ Nti a bam e nkôle siône yôp, tyiñe jé ja wôʼé ane zoʼoyañ e Yérusalém. Yôp a si ba fôʼôban! Be Nti a kamane bôte bé, a ne asoé asu bone bʼIsraél.

¹⁷ Mia ye yeme na ma me ne Nti e Zambe wônan, nalé a jô be, e ma me too Siôn, nkôle wom ô nʼétyi. Yérusalém ase a ye beta bo éñwom, bikuu bia ye bo te beta nyiin été môs éziñ.

Mfefé meyaé ya ayoñe bôte Zambe

¹⁸ Eyoñ ja zu nje minkô mia ye yô abui bibuma bi ndiʼi woon, a mimbame biyem mia ye ve abui menyañ e bone minkôle yôp. Mendim ma ye lôt atôñe ya Yuda, ôtôñ mendim wo ye vam e Nda Zambe Nti a ve mbiʼili be akasia mendim.

¹⁹ Ejipte ja ye bo teke fe bôt, si yʼEdome ki bilik, amu be nga bo si ya Yuda njet Eyoñ be nga wôé bôt be ne te bijô.

²⁰ Ve si ya Yuda bôt ba ye tabʼété éyoñ ése, nalé fe Yérusalém ataté miaé wu a kui miaé wu.

²¹ Ma ye fubu metyi map mme me nga bo teke fubu, a Nti a ye tabe Siôn.