Yo 2 - Bible en langue Bulu

Môse Nti ô ntoo bebé

¹ Loñane toñe nlak e Sioñ! Yôtaʼane tyiñ e nkôle wom ô nʼétyi! Bôte bese be too si nyô be fôʼôbaʼan! Amu môse Nti wo zu, amu ô ntoo bebé.

² Môs ô ne dibi a ékukut môs ô ne nkut ne ziʼili. wo zu ane melenda me tyé e minkôle yôp. Tame yen ane nkane bitandak wo zu, bi too abui a angôndô, éfunan anʼalu e minkôle yôp. Avale jame di e ngenane te tame yené, a ba ye bo te beta yene de.

³ Ba ndamane jôm ése ba koone je avalʼane nduan ja diʼi a tyame biôm, e mvuse jap ba liʼi ve si si. Te na be lôté, si é mbe afub Eden, mvuse valé, é ntoo ve biliʼi ya ko woñ: teke jôm é nga famelane be!

⁴ O yeʼe jô na nkane bikabela, nge na bewulu bikabela ba sembʼôsu.

⁵ Ba yôô akôlô nkôle wu a kui wu ôvok wo ye buni na wo wôʼô éduñe bevagoñ bita, nge ntôtane minkabaʼa mi nduan mia diʼi minkôte bilok. Ba zu ane nsamba ô ne ngu, be tele minnoñ asu ya wosan.

⁶ Eyoñ ba subu bebé môt ase a ko woñ, woñ wo bo mesu mese ékukut.

⁷ Ba ke wosan ane bezimbi, ba bete mimfin ane bewosan. Môt ase a ke nlô ô tele ôsu vié teke yale fefele ya zene jé.

⁸ Be nji tômetan amu môt ase a baʼale nnoñ wé a tôñe zene jé. Ba tulan jôm ése ja tebe be ngame yat a bo be ékolé ôbak; teke jôm é ne ngul ya telé dulu dap.

⁹ Ba mialan e tison été, ba mate mimbil e mimfine mekok , ba nyiine menda, be lôte bevundi ane miñwuwup.

¹⁰ Si ja fôʼôban éyoñ ba zu bebé, Yôb ebiene fe vʼane jôm ja ye ku, jôp a ngon teke fe faé, ateté da dimili mfaane wop.

¹¹ Nti a bete tyiñe jé ôsu ya nkane bita wé. Minsamba mia bo mebendé mé mi nʼabui a éko woñ. Yaa, môse Nti ô nʼangôndô, ékowoñ avale môt éziñ a ye bo teke nyiñ.

Eyoñe ya bulane be Nti

¹² Eyoñe ji éyoñ é ngenane na mi bulane be ma nalé Nti a jô. Boʼone jame te a nleme wônan ôse: tyiane bidi, Yônan a yeʼelane ma.

¹³ Mvolan ô nji bo na mi nyap ve mengômesane menan, ve minleme mienan mmie mia yiane tyendé. Yaa, bulaʼan e be Nti, Zambe wônan: a ne mvam a éngôngo, njiban a mbamba môt. Nkômesan éyoñ ése ya jôʼé ayaa dé.

¹⁴ Ndôʼôtô a ye tyendé ôsimesan, a jalé mia ne lut a mbamba be mam. Eyoñe te ñhe bia ye bo nguleya soo nye mimveane mi fôn a woon.

Eyoñe ya tyi bidi a yeʼelane Zambe

¹⁵ Loñane toñ e Siôn, Bendaʼan éyoñe ya tyi bidi bañetaʼan ékôane bôt.

¹⁶ Kôʼane bôt asu beta ékôan. Sulaʼane minnôm a bisoé bi bôt, jaʼan ayôme bongô; bôte bebiene fe be ndôme luʼan be liʼik étune nda ya éliʼiti jap.

¹⁷ Betuni ba saane Nti be yônôk e Nda Zambe été e zañ étune nda ba jaé biôm a ataʼa metunaʼa, a yeʼelane Zambe ana: A Nti ko bia ayoñe bôte dôé éngôngo, te kañese ve bôte bôé ôsone nyô, te kañese na meyoñ bikuu me woé bia be jôʼô na: E Zambe wop a bo ñhe jé éyoñe ji?

Nti a yalan ayoñe bôte dé

¹⁸ Nti a nyeʼe si jé a ko ayoñe bôte dé éngôngo

¹⁹ a yalane meyeʼelane mé ana: Ma ye beta ve mia fôn, woon a mbon. Biôm bite bia ye ve mia avak! Ma ye bo te beta kañese na mi ku e bikpweʼele ya meyoñ mefe été.

²⁰ Ma ye titane besiñe benan be nga so mfaʼa yʼakôé, ma ye tindi be ôyap mfaʼa mesi me ne bilik a nkôt, ma ye sôʼôlô asuzoʼo ya nkane bita wé évele mañ, nkane bita wé ya ô tele mvus ñwô ma ye sôʼôlô e beta mañ été. Mimbime miap mia ye mialane mbia ényum a ye ndamane mfep. Nalé ate ba be nga bo mia abim abé te ba ye jañ.

²¹ A wo, a si, te beta ko woñ! A ntoo ve bôlé a mevak, amu Nti a bo beta be mam.

²² Mia, betit, te beta koone woñ! Biloʼo ya si ôzôm bi nga beta bo mimfefé, bilé bi mbeʼe bibuma, befigié a mindiʼi mi woon bi ntoo ne joʼolan.

²³ A mia, bôte be too Siôn, muñan a mevak, amu Nti, e Zambe wônan. E suʼu ésep a lôme mia, a noo mveñ ôyôn a mveñ ésep avalʼane melu mvus.

²⁴ Mekañ me ntoo njalan a fôn befandé ba fuluku a woon a mbon.

²⁵ Yaa, Nti a jô na ma tañe bidi mi nga yiane kôan mbie nsamba ôdiidii me nga lôme mia ô nga mane di: minkôñ, bitandak, fos, a bembaʼa.

²⁶ Mia ye di a jaé, mia ye kañe ma Nti, e Zambe wônan, nyô a bo bitua bi mam asu denan. A teke fe na ayoñe bôte dam da ye beta bili ôson.

²⁷ Eyoñe te mia ye yeme na me ne zañe jenan éyoñ ése a bone bʼIsraél, na ma me ne Nti, e Zambe wônan, teke môte mfe! Teke foʼo bebé, ayoñe bôte dam da ye bo te beta bili ôson.