LEVITIK 6 - Bible en langue Bulu

Miñyeʼelan mevale meva e be betuni Ñyeʼelan ajô bityiʼa bia diʼibane ngumba

¹ Ane Nti a nga kobô Môze a jô na:

² Bendéʼé Aron a bone bé na: Atiñ da fombô bityiʼa bia diʼibane ngumba nde di: Bityiʼa bia diʼibane ngumba bia ye tabe, e di ataʼa metunaʼa ngum alu a kui mametyé, nduane ya ataʼa metunaʼa ja ye yôñ été.

³ Ntuni a ye jaé alôʼô ndombo dé a jaé fe mekuba me ndombo e nyôle jé; a ye vaa asube da kutane nduane ja diʼi bityiʼa ataʼa metunaʼa yôp a kute de e fefel ataʼa metunaʼa.

⁴ A ye vaa mengômesane mé a jaé mefe asu ya kee asup e minkan atan, e vôm a ne te mvin.

⁵ Nduan ja ye yôñ ataʼa metunaʼa yôp, ja ye bo te dim. Mametyé mese, ntuni a ye futi nduane njaʼa, a bôé bityiʼa bia diʼibane ngumba été yôp, a a ye diʼi avoñ étyiʼa ya nlatane ngbwa.

⁶ Nduan ja ye yôñ éyoñ ése teke dim.

⁷ Atiñ da fombô mveane ya mefub nde di: Bone bʼAron ba yiane ve wô asu Nti mesu me lôô be ataʼa metunaʼa.

⁸ Ntuni a ye kandé, e mveane ya mefub été, ngum doé mbamba avut; mbon a meyemete mʼélé ma nyume mvaé me bete e mveane te yôp, a a ye diʼi biôme bite ataʼa metunaʼa yôp, bi too jôme ya simesan é ne mbamba menyum e be Nti.

⁹ Aron a bone bé ba ye di mebukaʼa ya mveane te wo so mefup, ba ye di me e vôm a nʼétyi, e nseñe ya nda éndelé bendôbaʼan.

¹⁰ Ba ye bo te yame mebukaʼa mete a mvusu. E ngabe me nga ve be e bityiʼa biam bia diʼibane nduan nje le. Jôme te é nʼétua étyi aval ane metunaʼa ya njaman abé a ma ma vaa mekua.

¹¹ Fam ése ya bone bʼAron ja ye di mebukaʼa mete. Mvinda ya biyoñ bise nje le asu miaé mienan, mfaʼa ya bityiʼa bia diʼibane nduan asu Nti, jôm ése ja ye nambe bie ja ye teléban étyi.

¹² Ane Nti a nga kobô Môze na:

¹³ Mvean Aron ba be bone bé ba ye ve Nti e môse ba ye teléban ñwô wu: kili mbamba avut éla: mveane ya biyoñ bise ñwô le, éfase jia mametyé, éfas évok mamengôʼé.

¹⁴ Mveane te wo ye yamban e fulafan été a mbon; wo ye zuu wô ane mveane ya mefup, ñyamane bifus, ô too mbamba menyum e be Nti.

¹⁵ Ntuni ya bone bʼAron a ye woʼobane mbon ya tyendé nye e nye a ye bo mveane ya mefub ôte. E ne mvinda ya biyoñe bise e be Nti. Mveane te wo ye diʼibane ngumba.

¹⁶ Mveane ntuni ôse ya mefup wo ye diʼibane ngumba; wo ye bo te diban.

Ñyeʼelan ajô metunaʼa asu njaman

¹⁷ Ane Nti a nga kobô Môze na:

¹⁸ Kobôʼô Aron ba be bone bé na: Atiñ da fombô metunaʼa ya njaman nde di: E vôme ba tyiʼi étyiʼa ja diʼibane ngumba nye ba ye tyiʼi étyiʼa ja veban asu njaman ôsu Nti: é ne jôm é nʼétua étyi.

¹⁹ Ntuni a ye ve étyiʼa asu njaman , a ye di je; ba ye di je e vôm a nʼétyi, e nseñe nda éndelé bendôbaʼane.

²⁰ Jôm ése ja ye nambe minsône mié ja ye teléban étyi. Nge metyi me nga fas a nambe ngômesan, a ye sôb afôla metyi me nga kabetan e vôm a nʼétyi été.

²¹ Ba ye bôé vieʼ ékoon be nga yamʼétyiʼa te; nge ô ne wu mvot, ba ye sé a suʼusu wô mendim.

²² Fam ése ya betuni ja ye di je, é ne jôm é nʼétua étyi.

²³ Ve ba ye bo te di étyiʼa ése é ne asu njaman abé nje be nga zuu metyi e nda éndelé bendôbaʼan asu mboone mame ya njaman abé e vôm a nʼétyi: ja ye diʼibane nduan.