LEVITIK 4 - Bible en langue Bulu

Etyiʼa ya nyoñe njaman

¹ Ane Nti a nga kobô Môze a jô na:

² Kobôʼô bone bʼIsraél na: Éyoñe môt éziñ a ye bo abé e fuʼan a ntyaman abendé da ya mebendé me Nti, ve bo e jam é ne te yian:

³ Nge ntuni a ne ñwoʼone mbon nye a nga bo abé , a a zule mekua e be bôt amu abé te, a ye ve Nti étoñe nnôme nyak é too mvoʼé ne selem amu abé a nga bo asu ya nyoñe njaman .

⁴ A ye zuu nnôme nyak anyiine nda éndelé bendôbaʼane, ôsu Nti, a ye beté wo wé e nlô nnôme nyak ate, a tyiʼi nye tyiñ asu Nti.

⁵ Ntuni a ne ñwoʼone mbon a ye nyoñe metyi me nnôme nyak a zuu me e nda éndelé bendôbaʼan été;

⁶ a ye dubʼônyu vié e metyi, a a ye miame me biyoñe zamgbwal asu Nti, éndelé é tyele e zañe nda éndelé bendôbaʼan éfas é lôô vôm a nʼétyi.

⁷ Ntuni a ye woʼo metyi e minlaʼa mi ataʼa metunaʼa ya ôlobinda a nyume mvaé e ne asu Nti, e nda éndelé bendôbaʼan été; a ye miame metyi me nnôme nyaʼa mese e mbôkaʼa yʼataʼa metunaʼa ma diʼibane ngumba e nʼayiine nda éndelé bendôbaʼan.

⁸ A ye vaa avoñ ese ya nnôme nyak da veban asu njaman abé, avoñ ése é yale miñya a avoñ ese e ne miñya ,

⁹ mimbañ mi ôtam mibaé a avoñ da bômane mie, di é yale mevel a ndalebôbô é yale ések, nje a ye kandé bebé a mimbañ mi ôtam:

¹⁰ a vaa bie e be nnôme nyak, aval fe ane étyiʼa ya nlatane ngbwa, ntuni a ye diʼi bie ataʼa metunaʼa ma diʼibane ngumba.

¹¹ Vʼékôbe nnôme nyak, minsône mié mise, nlô wé, mimbiaé mié, miñya mié a mebi mé,

¹² a ye kee ngume nyaʼa ôse e minkan atan, e vôm ba kut asup, a diʼi wô nduan e njaʼa yôp: a wo ye mane dik avis asube yôp.

¹³ Nge bôte bese yʼIsraél mbe be nga bo abé e fuʼan te na bebien be yeme nalé a ntyaman abendé da ya mebendé me Nti ve bo mam me ne te yian a ve bebiene mekua,

¹⁴ a éyoñ abé te e kulaneya, bôte bese ba ye ve nnôme nyak e metunaʼa asu njaman abé a zuu nye ôsu ya nda éndelé bendôbaʼan.

¹⁵ Bemvendé be bôt ya nsamba ba ye beté mo mab e nlô nnôme nyak asu Nti, a ba ye tyiʼi nnôme nyaʼa tyiñ asu Nti.

¹⁶ Ntuni a ne ñwoʼone mbon a ye zuu metyi me nnôme nyak e nda éndelé bendôbaʼan été;

¹⁷ Ntuni a ye dubʼônyu vié e metyi a miame me biyoñe zamgbwal asu Nti, ôsu éndelé ja kandé vôm a nʼétyi a vôm a dañ étyi.

¹⁸ A ye woʼo metyi e minlaʼa mi ataʼa metunaʼa e ne asu Nti e nda éndelé bendôbaʼan été. Metyi ma buk a ye sôé mese mbôkaʼa ataʼa metunaʼa ma diʼibane ngumba, nde e nʼanyiine nda éndelé bendôbaʼan été.

¹⁹ A ye vaa avoñ ese e be nnôme nyak ate a diʼi de ataʼa metunaʼa yôp.

²⁰ A ye belane nnôme nyak ate avale fe a belane nyô a veban asu njaman abé; a ye bo avale da. Avale di nde ntuni a ye bo asu njaman abé wop, a abé te da ye jambane be.

²¹ A ye kee nnôme nyak e minkan atan a diʼi nye avale a nga diʼi nnôme nyaʼa ôsu. Metunaʼa mete me ne asu njaman abé ya bôt.

²² Nge évet éziñ yʼayoñ nje ja ye bo abé e fuʼan a ntyaman abendé da ya mebendé me Nti, e Zambe wé, ve bo mam me nji ke yian a ve émiene mekua,

²³ éyoñ a yemeya abé a nga bo, a ye ve nnôm ékela a too mvoʼé ne selem.

²⁴ A ye beté wo wé e nlô nnôm ékela, a tyiʼi nye e vôm be wôʼô tyiʼi étyiʼa ja diʼibane ngumba asu Nti: Etyiʼa te é ne asu njaman abé.

²⁵ Ntuni a ye nyoñe metyi ya étyiʼa ja veban amu njaman abé a ônyu vié, a ye woʼo me e minlaʼa mi ataʼa metunaʼa ma diʼibane ngumba.

²⁶ A ye diʼi avoñ ese ataʼa metunaʼa yôp avale fe ba bo avoñ étyiʼa ya nlatane ngbwa. Avale te nde ntuni a ye bo mfaʼa évet éte asu njaman ya abé dé, a da ye jambane nye.

²⁷ Nge môt éziñ yʼayoñ a bo abé e fuʼan a ntyaman abendé da ya mebendé me Nti ve bo mam me nji ke yian a wua émien e mekua été,

²⁸ nge ba bo nye na a yem abé a nga bo, a ye zuu ngale ékela a too teke ayeñ asu abé a nga bo.

²⁹ A ye beté wo wé e nlô étyiʼa ja te veban asu njaman abé; a ye tyiʼi éyem éte tyiñ vôme metunaʼa ma diʼibane ngumba.

³⁰ Ntuni a ye nyoñe metyi ya étyiʼa éte a ônyu vié a woʼo me e minlaʼa mi ataʼa metunaʼa ma diʼibane ngumba a sôé metyi mevoʼo mese e tin ataʼa metunaʼa si.

³¹ A ye kandé avoñ ése avale ba kandé avoñ étyiʼa ya nlatane ngbwa, a ye diʼi de ataʼa metunaʼa, a da ye bo di mbamba menyum e be Nti. Avale te nde ntuni a ye bo mame ya njaman abé asu môt ate, a abé te da ye jambane nye.

³² Nge a ve ngale ntômba asu njaman abé, a ye ve nyô a ne mvoʼé ne selem.

³³ A ye beté wo wé e nlô étyiʼa ja veban asu njaman abé; a ye tyiʼi je tyiñ é ne étyiʼa asu njaman abé e vôm ba wôé bityiʼa bia diʼibane ngumba.

³⁴ Ntuni a ye nyoñe metyi ya étyiʼa asu njaman abé a ônyu vié, a ye woʼo me e minlaʼa mi ataʼa metunaʼa ma diʼibane ngumba a sôé metyi mevoʼo mese e tine ataʼa metunaʼa si.

³⁵ A ye kandé avoñ avale ba kandé di ntômba e metunaʼa ya nlatane ngbwa, a a ye diʼi de ataʼa metunaʼa e too jôm ja bebe e étyiʼa ja diʼibane nduane yôp asu Nti. Avale te nde ntuni a ye bo mfaʼa môt ate asu njaman ya abé a nga bo, a abé te da ye jambane nye.