LEVITIK 3 - Bible en langue Bulu

Etyiʼa ya nlatane ngbwa

¹ Nge mveane môt éziñ ô ne étyiʼa ya nlatane ngbwa, nge a ve nyak é too nnôm nge ngal, a ye ve je asu Nti é too mvoʼé ne selem.

² A ye beté wo wé e nlô yʼétyiʼa jé, éyoñe te a tyiʼi je tyiñ anyiine nda éndelé bendôbaʼan, a betuni, bone bʼAron, ba ye miame metyi mbômaʼan a ataʼa metunaʼa.

³ Etyiʼa ya nlatane ngbwa te, a ye nyoñ avoñ e yale miñya a avoñ ese e ne abum été, a ve de metunaʼa ma diʼibane nduan asu Nti;

⁴ mimbañe mi ôtam mibaé a avoñ da bômane mie, nalé fe avoñ e yale mevel a ndalebôbô é yale ések, nje a ye vaa bebé a mimbañe mi ôtam.

⁵ Bone bʼAron ba ye diʼi biôme bite ataʼa metunaʼa yôp, bia lat a étyiʼa ja diʼibane ngumba ja ye bebe e njaʼa é ne mfutane di yôp. Etyiʼa ja diʼibane nduan le a mbamba menyum e be Nti.

⁶ Nge mveane wé ô ne ntômba, ékela, nnôm nge ngal, ô too étyiʼa ya nlatane ngbwa asu Nti, a ye ve wô ô too mvoʼé ne selem.

⁷ Nge a ve étoñe ntômba, a ye zuu je asu Nti.

⁸ A ye beté wo wé e nlô étyiʼa te, a tyiʼi je tyiñ ôsu ya nda éndelé bendôbaʼane, a bone bʼAron ba ye miame metyi mé mbômaʼan a ataʼa metunaʼa.

⁹ A ye nyoñ avoñ yʼété, a tyiʼi fe njem bebé nkoñ a nyoñe fe avoñ ese e yale miñya a avoñ ese e ne abum été a ve bie ane metunaʼa ma diʼibane nduan asu Nti,

¹⁰ wôna mimbañ mi ôtam mibaé a avoñ da bômane mie, di é yale mevel a ndalebôbô é yale ések nje a ye kandé.

¹¹ Ntuni a ye diʼi biôm bite ataʼa metunaʼa yôp: bi ne bidi bia diʼibane nduan asu Nti.

¹² Nge mveane wé ô nʼékela, a ye zuu wô asu Nti.

¹³ A ye beté wo wé e nlô étyiʼa jé, a tyiʼi je tyiñ ôsu ya nda éndelé bendôbaʼane; bone bʼAron ba ye miame metyi yʼété mbômaʼan a ataʼa metunaʼa.

¹⁴ A ye nyoñ avoñ e yale miñya a avoñ ese e ne abum été, a ve bie ane metunaʼa ma diʼibane nduan asu Nti,

¹⁵ mimbañe mi ôtam mibaé a avoñ e yale mie yôp, a di e yale mevel, nalé fe ndalebôbô é yale ések nje a ye kandé bebé a mimbañ mi ôtam.

¹⁶ Ntuni a ye diʼi biôme bite ataʼa metunaʼa yôp. Bi ne bidi bia diʼibane nduan, bi too mbamba menyum. Avoñ ese e ne jôme Nti.

¹⁷ Jame di da ye bo mvinda ya melu mese e miaé mi bôte mienan na: E vôm ase mia ye tabe mia ye bo te di avoñ nge metyi.