LEVITIK 2 - Bible en langue Bulu

Mimvean ya Mefup

¹ Nge mveane môt éziñ ô ne jôme ya mefup, mveane te wo ye bo mbamba avut; a ye sôé mbon été yôp a meyemete mʼélé ma nyume mvaé.

² A ye zuu avute te e be betuni, bone bʼAron; a ye jalé mbamba avut ate e wo wé été, mbon ô too nsôan été a meyemete mʼélé ma nyume mvaé; ntuni a ye diʼi biôme bite bise ataʼa metunaʼa yôp, e too jame ya simesan. Ô ne mvean ya mefup wo diʼibane nduan, ô too mbamba menyum e be Nti.

³ Jôm ja ye buk e mvean ôte ja ye bo asu Aron a bone bé; ngab ja dañ étyi e mimvean mia diʼibane nduan asu Nti nje le.

⁴ Nge wo ve biôme ya mefub ñyaman e mbum été, wo yiane belan toʼo mbamba avut toʼo biwôlé bi ne te mvusan, mfuʼan a mbon, nalé fe biwôlé bi nʼékekep bi too te mvusan ve mbon ô too été.

⁵ Nge mveane wôé wo so mefup, ñyañane fulafan, mveane te wo ye bo mbamba avut, mfuʼan a mbon, mvusu momo été,

⁶ wo ye beʼe wô bifuse bifus, a sôé mbon été: ô ne mveane ya mefup.

⁷ Nge mveane ya mefube wôé ô ne ñyaman étañ étyé yôp, mveane te wo ye bo mbamba avut mfuʼan a mbon.

⁸ Wo ye zuu mveane ya mefub ôte ô ne mboon a biôm bite e be Nti, wo ye zu liti wô ntuni a nye a ye bôé wô e fefel ataʼa metunaʼa.

⁹ Ntuni a ye vaa ngab ja yiane veban é too jame ya simesan, a diʼi je ataʼa metunaʼa yôp. Ô ne mveane ya mefub wo diʼibane nduan, ô too mbamba menyum e be Nti.

¹⁰ Ngab ja ye liʼi ja ye bo asu Aron a bone bé; é ne ngab ja dañ étyi e mimvean mia diʼibane nduan asu Nti.

¹¹ Teke mvean éziñ ya mefub wo ye bi mvusu, amu mia ye bo te diʼi jôm éziñ é ne mvusan nge na é bili wôé e biôm bia diʼibane nduan asu Nti été.

¹² Jôm é bili mvusu nge wôé mi ne ve je Nti foʼo vʼane mveane ya bembômô; ve ja ye bo te veban ane mveane ya mefub ô ne mbamba menyum.

¹³ Wo ye futi nku e mimvean mise ya mefup; wo ye bo te liʼi mveane wôé ya mefub te nku ya élate Zambe wôé ajô te mimveane miôé mise mia yiane bi nku.

¹⁴ Nge wo ve Nti bembômô ya mefup, wo ye zuu bezôzô be fôn mbubane nduan, mfefé nlisi ntyaʼan ô too mveane ya bembômô bôé ya mefup.

¹⁵ Wo ye sôé mbon été yôp a meyemete mʼélé ma nyume mvaé; ô ne mveane ya mefup.

¹⁶ Ntuni a ye diʼi ngabe ya mefes me ne ntyaʼan, nalé fe mbon a meyemete mʼélé mese: ô ne mveane ya mefup wo diʼibane nduan asu Nti.