HÉBRE 1 - Bible en langue Bulu

Mebatan

¹ Zambe, éyoñ a maneya kobô be ésaa bangan e melu kôa, biyoñ abui a mezen mevale meva, e be bekulu mejô,

² a nga kobô bia e melu ma suʼulane ma e be mone wé. A nga telé nye miene élik ya mame mese, a a nye fe, a nga té bimo.

³ Mon ate a faé éfufup ya étôtoʼo Zambe, a litiʼi fe avale Zambe a né. A beʼe biôme bise a ajô dé e ne ngu; éyoñ a maneya bo metunaʼa ya mam abé , a nga tabe si e mbo nnôme ya éjijine Zambe e mevôme ma dañ ôyabe yôp,

⁴ amu nkôñ ôyabe wé a dañe beéngele, nde a nga nyoñe jôé da dañ éndap ane ngap.

Mone Zambe a dañe beéngele

⁵ Mbé ya beéngele a nga tame jôô nye na: O ne Mone wom, e môse wu, ma, me biaéya wo? A fe na: Ma, ma ye bo nye ésaa, a nye a ye bo me mon?

⁶ Ve éyoñ a lôme ntôle mone si nyô, a kobô na: be éngele be Zambe bese be kute meboñe si asu dé!

⁷ Mfaʼa beéngele a jô na: Nyô a bo beéngele bé bivuñulu, a bebo bisaé bé nkabaʼa nduan.

⁸ Ve mfaʼa mon a jô na: éto njôane jôé, a Zambe, é too nnôm éto! A na: Ntume ya zôsôô ô ne ntume ya éjôé jôé.

⁹ O nga nyeʼe zôsôô a vini abé , ajô te a Zambe, e Zambe wôé a ve wo ñwoʼone mbone mevak, ve saa bemvôé bôé.

¹⁰ A na: Wo, aso atataʼa, a Nti, ô nga bo si, yôp e ne ésaé ya mo môé.

¹¹ Bise bia ye jañ, ve wo ô too to, yaa, bise, aval ane ngômesan, bia ye yômbô,

¹² a aval ane ba bo alôʼô, wo ye vuluku bie, aval ane ngômesan, yaa, bia ye tyendéban, ve wo, ô ne ve avale da a mimbu miôé mia ye bo te tyiʼi étun.

¹³ A, mbé ya beéngele a nga tame jôô nye na: tabeʼe si e mbo nnôme wom, akekui ma ye bo besiñe bôé ételé mebo jôé?

¹⁴ Ye bese be nji bo minsisim mia bo bisaé a minlôman ya ésaé, mfaʼa mvaé ya ba ba yiane nyoñe nyian ane ngap?