Yuda 1 - Agɔmɔ ngia wʉ Ɨtakɨ-takɨ

Ɓukuo

¹ Ɛmɛ Yuda, mombi ʉ kuu wʉ Yeso Klisito, manye ʉ Yakɔbɔ, mʉtɨndakɨa ɓombi ngiɓa Asʉɓɨɨ Tidoo a꞉ɓusoko ambʉɓʉkʉnda, ʉbalʉa nguakɛ. Ɛɓɔ ɓa ɛsɨ ʉ pɨmakɨa ngia yɨ Yeso Klisito.

² Asʉɓɨɨ unipananiso 'ʉtʉma wʉ ikoko nguangɔ, nʉ majɨɔ nʉ ɓʉkʉnda ɓaja nadɨndɨ.

Ɓapananakɨa ɓʉ mapanʉ ɓʉ yakanaka

³ Inu ɓayoo ngiɓa ɓʉ ɓʉkʉnda, mi꞉nye kyɨa pongo nʉ taa nadɨndɨ mʉnɨtɨndakɨa moni ekoo ʉ ɓʉhɨa ngiɓa Asʉɓɨɨ atijubuniso‑ɔɔ isu kʉ ɓuɓomu. Ma꞉na pongo ɓɔ mʉkwanana kingono ninu kʉtɨndakɨa ʉbalʉa nguakɛ aka ekoo ngia ɓɔ muninzo igue‑gue, ambʉ ɓieni tʉkʉ kʉmana agbanga ʉ baya ngia Asʉɓɨɨ a꞉nzo ɓombi ɓɔɔ tu ngiɓangɔ tii kingono.

⁴ Ɓombi ngana ngana iɓa ɓa꞉baya Asʉɓɨɨ ɓa꞉kumunikio pongo ati ʉndɛnʉ akʉ ɓaɗi. Ɓombi ngiɓʉnanɨ ɓambʉkɔmʉ nʉ baya, nʉ ɓaatata Yeso Klisito ngia ɛyɔ kʉ nangana a Ngama nʉ Makʉʉɓɨɨ. Ɛɓɔ ɓaanicho inyi yɨ ɨjɨɔ ngia yɨ Asʉɓɨɨ kuɓio ndʉ moni kɔɔ mʉkpatɛ ɨndambʉ. 'Ʉkɔmbɔ nga wʉndaɓʉ ɓa꞉ʉtɨna jɛnɛ tɨnaa ngbanga kʉndʉ aka Mubio kʉ Asʉɓɨɨ ki꞉nye kusigeni‑ɔɔ.

⁵ Maninu kutungwiso ɓata moni ngika maambɨa iɗo nadɨndɨ ika Asʉɓɨɨ a꞉hiiso‑ɔɔ ɓombi ɓangɔ Ɓaɨsalaɛlɛ anʉ Misili. Ɨkyɛmɨngana, a꞉dʉka ɓiga ngiɓa ɓakʉndakɔmʉ nayɔ kʉbaya.

⁶ Tungueni moni kʉ ɓamalaika ngiɓa ɓakʉndakɔmʉ izi ngia ɓa꞉ɓʉnapɨa‑ɔɔ kʉkyɨa kuu, ɓambʉsɨa izi ngiindaɓʉ yɨ ɨbɨba ekoo ʉ ɓisi. Asʉɓɨɨ a꞉ɓʉnapɨa tiga akʉ mʉa wʉ umomo, ambʉɓʉsanga nʉ ɓaselegeni akʉ mɨtʉ yɨ ɨpá nʉ mɨtʉ yɨ ɨpá, kusiɓo ɓisi ɓɔɔ ɓaja ngiɓa ɓʉ 'ʉkɔmbɔ.

⁷ Tungueni aka ɓombi ɓʉ Sɔdɔmɔ nʉ Gɔmɔla nʉ ɓombi ɓʉ ɓagʉlʉ ngiɓa ɓa꞉nabanakɨa naɓɔ ɓa꞉dʉka‑ɔɔ nʉ dyaa ngia yɨ mɨtʉ yɨ ɨpá nʉ mɨtʉ yɨ ɨpá. Ɨkyananakɨa yɨ ɓombi ɓʉ ɓagʉlʉ ngiɓʉnanɨ yi꞉nye ngbanga ndʉ ɛɓɔ ɓamalaika ngiɓʉnanɨ. Ɓi꞉nye kyɨa ɨndambʉ nʉ 'ʉmvɨkɨlɨ iya yɨkwananakɔmʉ kʉkyɨanɨa, nʉ kʉkɨnda kʉgbaɨ. Ɓʉka‑ɓʉkaɨ ngiɓa ɓagʉlʉ ngiɓʉnanɨ ɓa꞉za‑ɔɔ ya isisinio akʉ ɓombi kʉ ɓuɓomu.

⁸ Ɨkyananakɨa yɨ ɓombi ngiɓʉnanɨ ya ɓata ngbanga tʉkʉ nʉ iya yɨ ɓombi ɓʉ ɓagʉlʉ ngiɓʉnanɨ. Aka ekoo tananaka yɛɛ ɓɨɓɨ, ɓaakyɨa tʉkʉ kutambiso ndʉtʉ ngiindaɓʉ. Ɛɓɔ ɓakʉtata angu ɔɔ ʉja ngia wʉ Asʉɓɨɨ, nʉ kʉzɨaka ɓombi ɓʉ ɨbɨba ngiɓa ɓa ekoo ʉ ɓisi.

⁹ Ʉna tɔ, abana ati ngia Malaika wɔɔ ʉja Mikaili ɓi꞉nye‑ɔɔ kʉngbanganakiso moni nʉ kʉwana ndʉtʉ yɨ Mʉsa nʉ Abɨa, a꞉mugbosokɔmʉ gʉkʉ ɗɛkɛkɛ. A꞉musigio tʉkʉ ɓɔ: « Makʉʉɓɨɨ ʉ꞊nadyiso ɓʉka‑ɓʉkaɨ. »

¹⁰ Ɨkyɛmɨngana, ɓombi ngiɓʉnanɨ ɓakʉzɨaka ɨkyɛmɛ ngia ɓambʉkʉkɔmʉ kʉmbɨa engo kʉ ɓwanɨ. Moni nga ɓakʉmbɨa engo kʉkpatanakɨa nʉ itungwio ngiindaɓʉ ya ndʉ iya yɨ ɓanama ngiɓa ɓambakambɨa ɨkyɛmɛ, nʉ iiya yanaɓɔkuwisiso.

¹¹ Ya ikoko naɓɔ, jʉ ɓa꞉kpata ɨkyananakɨa ngia yɨ Kaina. Aka ekoo falanga, ɓa꞉kwa ɓata kʉndʉ Balamʉ a꞉kwa. Nʉ ɓata ɓambuwo jʉ ɓa꞉chakanaka ɓambʉnɨtanaka ɓakwa ɓʉ Asʉɓɨɨ ngbanga kʉndʉ Kola.

¹² Iya ɓombi ngiɓʉnanɨ ɓaachoo‑ɔɔ akʉ mʉmbɔ kʉdyakaka ɓambukpolo moni. Kija ɓaadyakaka nʉ 'ʉhʉmʉ chʉkɔmʉ nʉ soni, nʉ kutungwono tʉkʉ ɛɓɔ ɓakʉɓɔngɔ nʉ ɓaakʉnda kuɓio ɓapɨmakɨa ɓʉ ɓombi. Ɓa ngbanga tʉkʉ ndʉ lɨkʉɓa ngila mahuo waalɨyɨnganakiso kʉgbaɨ, chʉkɔmʉ ikanzi ngia ʉgbaa wamʉmanakɨa‑ɔɔ ekoo ɔngɔ. Ɓa ngbanga ndʉ matɨ ngika kambakamɔ lipumo abana akʉ ɨjɨjɨ yɨ ʉgbaa. Ati ngia ɓaakuɗuo‑ɔɔ kija kaawo.

¹³ Ɓʉɓɨɓɨ ngiɓʉndaɓʉ ɓa ngbanga kʉndʉ ndata yɛɛ yɨnganakɛ kʉgbaɨ chʉkɔmʉ nʉ 'upipio iya yakusiɓo kʉkwa akʉ umomo ngua wa ɓʉ sangɨ sangɨ akʉ mɨtʉ yɨ ɨpá nʉ mɨtʉ yɨ ɨpá.

¹⁴ Ɛnɔka ngia i꞉nye mombi wʉ ʉmalɨanɨka kʉʉngwa aka Adamʉ a꞉sigo jɛnɛ moni kʉ ɨgbɛ kusigo ɓɔ: « Ukeni! Makʉʉɓɨɨ a꞊ka nʉ ɓombi ngiɓangɔ ɓɔɔ tu ɛlɛfʉ nʉ ɓa ɛlɛfʉ ɓaja.

¹⁵ Akʉka kʉtɨna 'ʉkɔmbɔ wʉ ɓombi ɓʉ ʉɓɨɨ. Asʉɓɨɨ a꞊fa ɓombi ɓɔɔ ɓɨɓɨ kʉ ɓuɓomu nʉ 'ʉkɔmbɔ aka ekoo ʉ ɓʉɓɨɓɨ kʉ ɓuɓomu ngiɓa ɓa꞉kyɨa, nʉ mɨgbʉ yɨ moni kɔɔ ɓʉka‑ɓʉkaɨ kʉ iɓomu ngia ɓombi ngiɓʉnanɨ ɓambakakumo moni ɓa꞉mʉyakɨa. »

¹⁶ Ɓombi ngiɓʉnanɨ ɓaakyɨa tʉkʉ kʉngbʉkʉmaka nʉ gʉa ɓangɛ jʉ ɓaana ɓɔ ɛɓɔ ɓambʉkɔmʉ iɗo. Ɓaakpata tʉkʉ taa yɨ ndʉtʉ ngiindaɓʉ. Ɓaayaka moni nʉ 'ʉtʉma wɔɔ ʉja, nʉ ɓaapitikio ɓombi naɓɔ tʉkʉ kʉdyɨa mʉa.

Mapanʉ akʉ ɓombi ɓʉ baya

¹⁷ Ɨkyɛmɨngana, inu ɓadii ɓʉsɛmɛ ɓʉ ɓʉkʉnda, inu pɛpɛ nɔɔpaa moni ngika ɓatitima ngiɓa ɓʉ Makʉʉndɛsʉ Yeso Klisito ɓa꞉nɨpanɨa jɛnɛ.

¹⁸ Ɓa꞉nɨɓɨa ɓɔ: « Sina akʉ 'upipio ɓombi ɓaɓio sina ninu kʉnʉa, ɓambuɓio kʉkpata taa yɛɛ ɓɨɓɨ yɨ ndʉtʉ ngiindaɓʉ. »

¹⁹ Ɓombi ɓɔɔ ɓʉɗʉkanise ɓombi ngiɓʉnanɨ. Ɓambʉkɔmʉ nʉ 'Ʉtʉma wʉ Asʉɓɨɨ, ɨkyɛmɨngana itungwio yɨndaɓʉ yaakyɨa tʉkʉ akʉ ɓamoni ɓʉ ɨtaka.

²⁰ Ɨkyɛmɨngana, inu ɓadii ɓʉsɛmɛ ɓʉ ɓʉkʉnda, ɓieni tʉkʉ kʉsɨnganaka nʉ maiso ʉɓɨɨ nguʉndɛnʉ ekoo ʉ baya yɛɛ ngbingbii ngiindɛnʉ, nambuɓio kʉta akʉ angu wʉ 'Ʉtʉma wɔɔ Tu.

²¹ Maeni ɓʉ ngbɔmʉ amati ʉ ɓʉkʉnda ngiɓa ɓʉ Asʉɓɨɨ, kusiɓo ɓisi ngiɓa Makʉʉndɛsʉ Yeso Klisito a꞊pananiso‑ɔɔ 'ʉtʉma wʉ ikoko nguangɔ, nʉ ninu kunzo ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá.

²² Ɓombi ngiɓa ɓaɓio kuningunio moni ngikakɛ ɓʉnɨeni ikoko.

²³ Nʉkwanana kuhiiso iɓa ɓɔmɔ naɓɔ kiso akʉ dyaa yɨ 'ʉkɔmbɔ. Nɨeni iɓa ɓɔmɔ ikoko tʉkʉ nɨaa, ɨzɔ nʉ ʉɓa. Nɔɔɗɨɗanakɔmʉ naɓɔ, jʉ lɨpʉkʉ ngilʉndɛnʉ la litubunie nʉ 'ʉmvɨkɨlɨ wɔɔ ɓɨɓɨ wʉ taa yɨ ndʉtʉ ngiindaɓʉ.

^24-25 Kutuisieni Asʉɓɨɨ ɨbɨba jʉ a꞉tihiiso 'upi akʉ Yeso Klisito muhiiso wʉndɛsʉ. Ɛyɔ kʉ nangana a Asʉɓɨɨ, nʉ akwanana ninu kʉpɨmakɨa ambʉ nɔɔkwakɔmʉ akʉ ɓʉɓɨɓɨ, nambuhuo nʉ ɨgyagya, apɛɛ ʉ Asʉɓɨɨ. Ɨbɨba, ingono, angu, nʉ ʉpanʉ wuɓio amati ʉ imbangumba ngiangɔ, kʉʉngwa jɛnɛ kʉpɛɛ, nʉ ɨtakɨ‑takɨ ngiakɛ, nʉ tiga sina akʉ mɨtʉ yɨ ɨpá nʉ mɨtʉ yɨ ɨpá. Ya ɓwanɨ.