Tito 1 - Agɔmɔ ngia wʉ Ɨtakɨ-takɨ

Pɔlɔ uɓukuo Tito

¹ Ɛmɛ Pɔlɔ, bayo ʉ Asʉɓɨɨ nʉ titima wʉ Yeso Klisito, ɛmɛ kʉ mʉnatɨndakɨa ʉbalʉa nguakɛ. Kʉndʉ wakʉmbɨa Asʉɓɨɨ a꞉natʉma ɓɔ musingo ɓombi ngiɓa a꞉ɓʉchwa amati ʉ baya nʉ mʉɓʉpanɨa mapanʉ kingono muɗo ika ka꞊ɓʉsalɨa kʉkɨndaka ngbingbii apɛɛ ʉ Asʉɓɨɨ.

² Nɨngbaa ngiinanɨ ɓʉnapɨa itungwio kʉnyɨa nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá uwa Asʉɓɨɨ ngia ambakayaka yakanaka, a꞉panaka ɓombi ngiɓangɔ pɛɛ ʉ wati wʉ 'ʉkpanganɨa.

³ Akʉ wati ngua a꞉napɨa‑ɔɔ, Asʉɓɨɨ a꞉pananiso ʉɓɨɨ nguʉnanɨ ɨngbaa kʉɓɨakɨa Ɨsaʉ yɛɛ Iɗo. Ʉpanʉ nguʉnanɨ, Asʉɓɨɨ ngia a Muhiiso nguʉndɛsʉ a꞉nanzo ɛmɛ ɓɔ mʉɓɨakɨa tiga ɓangɛ kʉ ɓɨakɨaa.

⁴ Tito, mʉ꞉natɨndakɨa ʉbalʉa nguakɛ, ɔwɛ ngia wa ndʉ mwana asɛmɛ ɔɔ ʉnʉtɛ amati ʉ baya. Asʉɓɨɨ Tidoo nʉ Yeso Klisito ngia a꞉tihiiso ʉnambuiso, nʉ ʉpananiso ɨjɨɔ ngiangɔ ekoo asɔɔ, ambunanzo majɨɔ.

Ɨkyananakɨa yɨ mombi ngia ɓaamʉchwa kʉmaya kuu yɨ Asʉɓɨɨ

⁵ Ma꞉nasɨa akʉ oji wʉ Kɛlɛtɛ ambʉ pipo kuu ngia ma꞉nanzo tʉkʉ pipoo. Nʉ napɨa ɓombi kuɓio ɓʉkʉʉ ɓʉ kanisa amati ʉ ɓagʉlʉ kʉ ɓuɓomu ngiɓa ɓombi ɓʉ baya ɓa‑ɛɛ.

⁶ Mombi ngia wa꞊mʉchwa kuɓio 'ʉkʉʉ wʉ kanisa uɓio mombi ngia ɓambakamuchwio nʉ lɨngbaa lʉ moni lɔɔ ɓɨɓɨ. Gue ʉ moi tʉkʉ mʉngana. Ɓana ɓangɔ ɓʉkwanana kuɓio ɓombi ngiɓa ɓa꞉baya Yeso bayaa, iɓa ɓambakaɓuchwio nʉ lɨngbaa lʉ moni lɔɔ ɓɨɓɨ, nʉ chʉkɔmʉ ɓana ɓʉ ɨndambʉ, nʉ chʉkɔmʉ ɓana ɓʉ ambɛlɛ‑mbɛlɛ.

⁷ 'Ʉkʉʉ wʉ kanisa wʉkwanana kuɓio mombi ngia ɓambakamuchwio nʉ lɨngbaa lʉ moni lɔɔ ɓɨɓɨ, jʉ a mombi ngia aamaya kuu yɨ Asʉɓɨɨ. Ɔɔɓio mombi ɔɔ ʉpananɛ, chʉkɔmʉ mombi ɔɔ 'ʉtʉma gbititi, chʉkɔmʉ mombi ʉ ɨdamʉ, chʉkɔmʉ mombi ɔɔ ɓʉkaɨ, chʉkɔmʉ mombi ngia aahata kumbo nɨngbaa yɛɛ ɓɨɓɨ.

⁸ Ɨkyɛmɨngana, ʉkwanana kuɓio mombi ɔɔ pʉkɨɛ ɓombi, mombi ngia aakʉnda moni kuɓio muɗo. Ɔɔɓio mombi ʉ amama ɨkyɛmɨngana uɓio mombi ɔɔ ngbingbii, mombi ɔɔ tu wʉ Asʉɓɨɨ, nʉ mombi ɔɔ 'ʉtayanɨɛ.

⁹ Uɓotono nʉ Ɨsaʉ yɛɛ Iɗo ngia yɨ Yeso Klisito ɓʉ ngbɔmʉ, ngbanga tʉkʉ ndʉ akʉ ɓa꞉mʉpanɨa‑ɔɔ, aka ɓombi ɓakwanana‑ɔɔ kʉbaya engo. Kʉ ɓwanɨ, akwanana kunzo ɓombi igue‑gue nʉ ʉpanʉ nguʉnanɨ wɔɔ ngbingbii, nʉ kʉpana iɓa ɓakʉtata ʉpanʉ nguʉnanɨ ɓɔ ɓa amati ʉ dingonoko. Ɨsaʉ ngiinanɨ iiya isu kakʉpanɨa engo.

Pɨmɨeni mapanʉ kʉ yakanaka pɨmɨaa

¹⁰ Jʉ yanʉ ɓombi ɓaja anʉ Kɛlɛtɛ, aka ekoo 'ʉtʉma wɔɔ ʉja, ɓakʉna ʉpanʉ ngua wʉ ɓʉkʉʉ ɓʉ kanisa tʉkʉ ɨsʉkʉɓwanɨ. Ya nadɨndɨ Ɓayuda ngiɓa ɓa ɓaklisito ɓɔngɔ ngana ngana iɓa ɓakʉpanɨa ɓɔ ɓaklisito kʉ ɓuɓomu ɓʉkwanana kutiniso ganza, kʉkpatanakɨa nʉ mapanʉ kʉ Ɓayuda. Ɓombi ngiɓʉnanɨ kʉ ɓuɓomu ɓakʉpanɨa moni ngika kambʉkʉsalɨa ɓaklisito, nʉ ɓaapɨtaka ɓombi nʉ moni kʉ yakanaka.

¹¹ Tito, wɔɔsɨakɔmʉ ɓombi ngiɓʉnanɨ kʉpanɨa ɓombi ngiɓa ɓa꞉baya. Ɓakubunzo baya yɨ ɓombi kʉɓʉya kʉ akʉ mifini kʉ iɓomu. Ɓakʉpanɨa ɓombi moni ngika kʉkwananakɔmʉ, ambʉ ɓuɓio naɓɔ tʉkʉ kʉdyɨa falanga.

¹² Mombi mʉngana 'Ʉkɛlɛtɛ wɔngɔ, mʉngana wʉ lɨgbɛ lʉndaɓʉ, asigo ɓɔ: « Ɓombi ɓʉ Kɛlɛtɛ ɓa ɓombi ɓʉ yakanaka. Ɓa ndʉ ɓanama ɓɔɔ ɓʉka‑ɓʉkaɨ, nʉ ɓa ɓadʉɓa, nʉ kʉ ɓombi ɓʉ 'ʉhʉmʉ wʉ idyo. »

¹³ Moni ngikʉnanɨ a꞉sigo ka kingono. Kʉ ɓwanɨ, ɓʉgʉmʉa nʉ angu, ambʉ ɓʉbaya mapanʉ ngika ka kingono.

¹⁴ Nʉ ɓɔɔkpatakɔmʉ muduɓa kʉ yakanaka ngika kʉ Ɓayuda. Nʉ ɓɔɔkyananakɨakɔmʉ mapanʉ kʉ ɓombi ngiɓa ɓaayaa moni kɔɔ ngbingbii.

¹⁵ Ɓombi ngiɓa ɓaakyɨa nʉ mɨtʉma yɛɛ ɨjaɓanakɨɛ apɛɛ ʉ Asʉɓɨɨ, moni kʉndaɓʉ kaakyɨa kʉ mʉjaɓanakɨɛ. Ɨkyɛmɨngana, ɓombi ngiɓa ɓaakyɨa ɓʉɓɨɓɨ, mbɨmbanaka ngiindaɓʉ yaakyɨa kʉ ɨtambɨɛ, abana iyo yɨ mɨtʉma ngiindaɓʉ yaakyɨa kʉ ɓɨɓɨ.

¹⁶ Ɓapananakɨa ɓʉ yakanaka ngiɓʉnanɨ ɓaabandana ɓɔ ɓaambɨa Asʉɓɨɨ, ɨkyɛmɨngana moni kɔɔ ɓɨɓɨ ngika ɓakʉkyɨa engo, kakʉpananiso tʉkʉ ɓɔ ɓambakamʉmbɨa gʉkʉ ɗɛkɛkɛ. Nʉ ɓaakyɨa moni ngika kambakamʉkataa, nʉ ɓambakamʉkɔ kʉ ɓwanɨ. Ɓambʉkɔmʉ ikanzi ngia ɓakyɨa moni kɔɔ muɗo gʉkʉ ɗɛkɛkɛ.