Ɓalɔma 1 - Agɔmɔ ngia wʉ Ɨtakɨ-takɨ

Pɔlɔ uɓukuo ɓombi ɓʉ baya ngiɓa ɓʉ Lɔma

¹ Ɛmɛ Pɔlɔ kʉ mʉtɨndakɨa ʉbalʉa ngua, ɛmɛ ngia ma bayo wʉ Yeso Klisito iya Asʉɓɨɨ a꞉nasoko kuɓio titima, aka ekoo ɓɨakɨa ɓombi Ɨsaʉ yɛɛ Iɗo ngiangɔ.

² Ɨsaʉ yɛɛ Iɗo ngiinanɨ Asʉɓɨɨ a꞉sigo jɛnɛ kʉpɛɛ ɓɔ a꞊tɨɓɨakɨa 'upi akʉ lɨgbɛ ngilangɔ ɓɔ a꞊tiɓaisio ɛyɔ tʉkʉ ndʉ aka ɓa꞉tɨndakɨa‑ɔɔ amati ʉ Mubio kɔɔ Tu.

³ Ɨsaʉ yɛɛ Iɗo ngiinanɨ ya aka ekoo Mwana angɔ Makʉʉndɛsʉ Yeso Klisito, iya a꞉nʉtanɨa ndʉ mombi akʉ ɨɓwanakɨa ngia yɨ ngama Daudi.

⁴ Ɨkyɛmɨngana, 'upi akʉ 'Ʉtʉma wɔɔ Tu, Asʉɓɨɨ amati ʉ angu ngiangɔ, a꞉mʉnapɨa kuɓio Mwana angɔ ati ngia a꞉mʉjʉkaniso‑ɔɔ akʉ ingyo. Ɛyɔ a Yeso Klisito Muhiiso nguʉndɛsʉ.

⁵ Ya 'upi akʉ Yeso iya ɛmɛ ma꞉nyɨa‑ɔɔ nʉ ɨjɨɔ yɨ Asʉɓɨɨ kʉka titima. Ya꞉kyananakɨa ɓwanɨ aka ekoo ngia ɓɔ ɓombi kʉ ɓuɓomu ngiɓa ɓambʉkɔmʉ Ɓayuda ɓʉbaya Yeso, ɓambʉmʉkɔ.

⁶ Inu na kʉ akʉ 'ʉpaa wʉ ɓombi ngiɓʉnanɨ, jʉ Asʉɓɨɨ a꞉nisoko kuɓio ɓombi ɓʉ Yeso Klisito.

⁷ Maninu kʉtɨndakɨa inu ɓombi kʉ ɓuɓomu ngiɓa ɓʉ gʉlʉ ʉ Lɔma ngiɓa Asʉɓɨɨ aanɨkʉnda, iɓa a꞉nisoko kuɓio ɓombi ɓangɔ ɓɔɔ Tu. Asʉɓɨɨ Tidoo ngiʉndɛsʉ nʉ Makʉʉndɛsʉ Yeso Klisito ɓuninzo Majɨɔ nʉ ɨjɨɔ.

Pɔlɔ ɨzɔ nʉ ɓaklisito ngiɓa ɓʉ Lɔma

⁸ Pɛɛ ʉ moni kʉ muɓomu, makutuisio Asʉɓɨɨ ngiasɛmɛ ɨbɨba aka ekoo ʉndɛnʉ kʉ ɓuɓomu 'upi akʉ Yeso Klisito, jʉ ɨsaʉ yɨ baya ngiindɛnʉ yakʉnanzana ɨtaka kʉ iɓomu.

⁹ Ati ngia maakyɨa‑ɔɔ kʉɓɨakɨa Ɨsaʉ yɛɛ Iɗo ngia yɨ Mwana ʉ Asʉɓɨɨ, maabibiso Asʉɓɨɨ nʉ 'ʉtʉma nguʉsɛmɛ kʉ uɓomu. Ati ngia maakyɨa‑ɔɔ kʉta Asʉɓɨɨ, maachwiyo muno kʉndɛnʉ makwaa kʉ muɓomu, nʉ Asʉɓɨɨ akʉmbɨa ɓɔ moni ngika makusigo engo ka kingono.

¹⁰ Amati ʉ nɨta ngiisɛmɛ, maata Asʉɓɨɨ wati kʉ uɓomu ɓɔ ʉkʉndeni, ʉ꞊naganɨa ɨngbaa kʉsa ninu kʉkanga.

¹¹ Jʉ makʉtananɨa nadɨndɨ ɓɔ kʉnana gɔ‑zʉ ninu, mʉ꞊nɨɓɨa ɨsaʉ ekoo apɛpɛ ngia wʉ 'Ʉtʉma wɔɔ Tu ambʉ ɓieni tʉkʉ nʉ angu.

¹² Nʉ ɓata, manʉ igue‑gue 'upi akʉ baya ngiindɛnʉ, nʉ inu nanʉ igue‑gue 'upi akʉ baya ngiisɛmɛ.

¹³ Inu ɓayoo ɓʉsɛmɛ, makʉkʉnda ninu kumbiiso ɓɔ nɨsɨ maja maatananɨa ɓɔ ambʉ mʉsa gɔ‑zʉ ninu kʉkanga. Ɨkyɛmɨngana, kʉɓʉya kʉndʉ ɓʉɓʉnɨ ngiakɛ, ɨngbaa yɛngɔ yambʉgananɨakɔmʉ. Ma piɛ kʉkʉnda ɓɔ kuu ngiisɛmɛ yinzo masɔɔ andɛnʉ kʉndʉ iya yaanzo‑ɔɔ masɔɔ akʉ mababa kʉ ɓombi nga kɔmɔ.

¹⁴ Mʉkwanana kʉsa kʉkanga ɓombi kʉ ɓuɓomu. Yiɓio iɓa ɓa ɓabʉla ɓɔngɔ kʉndʉ iɓa ɓa ɓasenzi ɓɔngɔ, yiɓio ɓombi ɓʉ mbɨmbanaka, kʉndʉ iɓa ɓambʉkʉ nʉ mbɨmbanaka.

¹⁵ Ya aka ekoo moni ngikʉnanɨ iya ma‑ɔɔ kʉtananɨa nadɨndɨ ɓɔ ambʉ mʉsa gɔ‑zʉ kʉ kʉɓɨakɨa Ɨsaʉ yɛɛ Iɗo ati ʉndɛnʉ ɓombi ngiɓa na ɨkʉmbʉ anʉ Lɔma.

Angu wʉ Ɨsaʉ yɛɛ Iɗo

¹⁶ Ɛmɛ maaɓɨakɨa Ɨsaʉ yɛɛ Iɗo chʉkɔmʉ nʉ soni. Jʉ Ɨsaʉ yɛɛ Iɗo ngiinanɨ ya angu wʉ Asʉɓɨɨ aka ekoo hiiso ɓombi kʉ ɓuɓomu ngiɓa ɓaabaya. Pɛɛ‑zʉ Ɓayuda, mbise ɔngɔ tiga ɓombi ngiɓa ɓambʉkɔmʉ Ɓayuda.

¹⁷ Jʉ Ɨsaʉ yɛɛ Iɗo yaapana ɨngbaa tɨmanɨ iya Asʉɓɨɨ aanicho‑ɔɔ mombi kʉka ngbingbii apɛɛ angɔ 'upi akʉ baya. Ɓa꞉tɨndakɨa ɓata amati ʉ Mubio kʉ Asʉɓɨɨ kʉ ɓɔ: « Mombi ɔɔ ngbingbii aɓio kʉkʉʉ 'upi akʉ baya. »

Ɓombi kʉ ɓuɓomu ɓa tʉkʉ nʉ ɓʉɓɨɓɨ

¹⁸ Kʉʉngwa ekoo ʉ ɓisi, Asʉɓɨɨ akʉpananiso 'ʉnganga nguangɔ ekoo ɓombi ngiɓa ɓaakyɨa ɓʉɓɨɓɨ nʉ mɨgbʉ yɨ ɓamoni yɛɛ ɓɨɓɨ ɓɨɓɨ kʉ iɓomu. Jʉ lɨkyananakɨa lɔɔ ɓɨɓɨ ngilʉndaɓʉ laanangyo ɓombi kupimiso ingono.

¹⁹ Ʉna tɔ, moni kʉ muɓomu ngika kaambɨanɨa ekoo ʉ Asʉɓɨɨ ka ɓʉ ngbɛlɛ ngbɛlɛ akʉ ɛɓɔ, jʉ Asʉɓɨɨ makʉɔngɔ a꞉ɓʉpana ɛkɔ kʉ ɓʉ ngbɛlɛ ngbɛlɛ.

²⁰ Kʉʉngwa aka Asʉɓɨɨ a꞉kyɨa‑ɔɔ ɨtaka, ɓamoni ngiɓangɔ iɓa ɓambakaɓʉna akʉ mesu, iya yakusigo ɓɔ angu ngiangɔ wʉ mɨtʉ yɨ ɨpá nʉ mɨtʉ yɨ ɨpá, nʉ ʉɓɨɨ nguangɔ aka a‑ɔɔ Asʉɓɨɨ, ɓombi ɓa'ʉna kingono 'upi akʉ kuu ngiangɔ. Kʉ ɓwanɨ, yambʉkɔmʉ aka ɓa꞊kwanana‑ɔɔ kʉpɨa ɓombi ngiɓʉnanɨ.

²¹ Jʉ abana ndʉ ɓaambɨa Asʉɓɨɨ kititi, ɨkyɛmɨngana ɓambakamubibiso ndʉ aka yɨkwanana‑ɔɔ kʉkyɨa akʉ Asʉɓɨɨ, nʉ ɓambakamutuisio ɨbɨba kʉ ɓwanɨ. Ʉna tɔ, itungwio yɛɛ ɓɨɓɨ ngiindaɓʉ yi꞉nye tii tʉkʉ kʉ gbaɨ ekoo Asʉɓɨɨ, nʉ mbɨmbanaka ngiindaɓʉ yi꞉nye tii tʉkʉ amati ʉ umomo.

²² Ɓaabandana ɓɔ ɓanʉ 'ʉtʉma wɔɔ pimise moni, ʉna tɔ ɓambakambɨa ɨkyɛmɛ.

²³ Nʉ ɓata, akʉ izi nga yɛɛ bibise Asʉɓɨɨ ngia ambakawo, ɛɓɔ ɓi꞉nye tiga kubibiso madupepe ngia ɓa꞉ituo ndʉ mombi ngia aawu woni, yɛmo ndʉ ɓunoi, nʉ ndʉ ɓanama ngiɓa ɓaaɗuɗono mamaa akɛsɨ.

²⁴ Ya aka ekoo moni ngikʉnanɨ iya Asʉɓɨɨ a꞉ɓʉsɨa‑ɔɔ kʉkpata moni kʉ 'ʉsʉgʉ, nʉ tananakɨa yɛɛ ɓɨɓɨ yɨ mɨtʉma ngiindaɓʉ, ambʉ ɓuɓio kutambiso ndʉtʉ ngiindaɓʉ kʉkyɨa moni kʉ soni ati ʉndaɓʉ.

²⁵ Ɓaanicho moni kingono ngika kʉ Asʉɓɨɨ kʉka tiga moni kʉ yakanaka. Ɓakubibiso kumbo ngia Asʉɓɨɨ a꞉'ʉkyɨa, chʉkɔmʉ ɓambuɓio kubibiso Asʉɓɨɨ ngia a꞉kyɨa kumbo ngiinanɨ, iya anʉ ɨbɨba akʉ mɨtʉ yɨ ɨpá nʉ mɨtʉ yɨ ɨpá! Ya ɓwanɨ.

²⁶ Tiga kʉ ɓwanɨ, Asʉɓɨɨ a꞉ɓʉsɨa ɓɔ ɓuɓio kʉkpata taa yɨ moni kʉ soni ngikʉndaɓʉ. Ɓoi ɓʉndaɓʉ ɓambakajunikio tii ndʉ ɔɔ gue nʉ moi. Ɨkyɛmɨngana, ɓoi ɓaajunikio tiga kʉ ati ʉndaɓʉ ɓoi.

²⁷ Ɓugue ngbanga kʉ ɓwanɨ, ɓa꞉sɨa kujunikio ndʉ ɔɔ gue nʉ moi sɨaa. Ɓa tiga nʉ ɨvamʉ kujunikio kʉ ati ʉndaɓʉ ɓugue. Iinanɨ yanaɓɔ kʉnapɨa nʉ 'ʉkɔmbɔ uwa wʉkwanana nʉ ikanzi yɨ ɨkyananakɨa ngiinanɨ.

²⁸ Ndʉ ɓombi ngiɓʉnanɨ ɓambikinye kʉkʉnda kʉmbɨa Asʉɓɨɨ, ɛyɔ ambʉɓʉsɨa tii tʉkʉ kʉkpata mbɨmbanaka yɛɛ ɓɨɓɨ ngiindaɓʉ. Iiya ɓa tiga‑ɔɔ tii tʉkʉ kʉkyɨa moni ngika kʉkwananakɔmʉ.

²⁹ Ɓaɓuhue nʉ mɨgbʉ yɨ moni kʉ iɓomu ngia yambʉkɔmʉ ngbingbii, ndʉ ɓʉɓɨɓɨ, 'ʉtʉma wɔɔ tananakɨɛ kumbo, ɓʉkaɨ, imi, 'ʉtʉma wɔɔ dʉkɛ ɓombi, mangoi, ɓufili nʉ pɨtanaka, nʉ chwio ɓombi nʉ moni ɨsʉkʉɓwanɨ.

³⁰ Ɓaayakana ati ʉndaɓʉ ɓɨɓɨ, nʉ ɓa ɓakwa ɓʉ Asʉɓɨɨ, ɓombi ɓɔɔ ɓʉzɨakɛ ɓangɛ, ɓombi ɓʉ 'ʉtʉma wɔɔ nanɛ nɨkʉʉ, nʉ 'ʉtʉma wɔɔ ʉja. Ɛɓɔ ɓaakyɨa kʉhata ɨngbaa yɛɛ kyɨɛ ɓamoni ɓɔɔ ɓɨɓɨ, nʉ ɓambakakɔ ɓɨsɛ nʉ ɓinye ɓʉndaɓʉ.

³¹ Ɓʉya mbɨmbanaka, nʉ ndʉ ɓaayaka moni, ɓambaka kʉkyɨa ndʉ aka ɓa꞉yaka‑ɔɔ, nʉ ɓambʉkɔmʉ nʉ ɓʉkʉnda, gʉkʉ ikoko.

³² Ɓaapimiso ɓɔ mapanʉ kʉ Asʉɓɨɨ kaasigo ɓɔ ɓombi ngiɓa ɓakʉkyɨa ikanzi yɨ moni ngikʉnanɨ ɓʉkwanana nʉ ingyo. Abana ɓwanɨ kititi, ɓa tʉkʉ kʉsɨnganaka nʉ kyɨa ɓa moni ngiɓʉnanɨ, chʉkɔmʉ tʉkʉ kʉkyɨa engo, ɨkyɛmɨngana ɓaabaya ɓombi ngiɓa ɓaakyɨa ikanzi yɨ moni ngiinanɨ.