Luka 1 - Agɔmɔ ngia wʉ Ɨtakɨ-takɨ

Moni ngika Luka a꞉ngakɨa Tiofilo

¹ Ayoo Tiofilo, ɓombi ɓaja ɓa꞉kanyo pongo kʉtɨndakɨa masaʉ kʉ moni ngika ka꞉kyɨanɨa pongo ati ʉndɛsʉ.

² Ya ngbanga ngbanga tʉkʉ ndʉ akʉ ɓombi ngiɓa ɓa꞉na moni ngikʉnanɨ nʉ mesu ɓa꞉tɨngakɨa‑ɔɔ kʉʉngwa akʉ 'ʉkpanganɨa. Nʉ ɛɓɔ ɓa꞉nɨtanaka tiga ɓabayo ɓɔɔ ɓʉ ɓɨakɨɛ Ɨsaʉ yɨ Asʉɓɨɨ.

³ Kʉ ɓwanɨ, ayoo wʉ ɨbɨba Tiofilo, ndʉ ɛmɛ ma꞉kpingbikiso pongo moni ngikʉnanɨ kʉ muɓomu kʉ tine tine kʉʉngwa tʉkʉ akʉ 'ʉkpanganɨa wɔngɔ, ya꞉nanyɨa pongo iɗo ɓɔ mʉnatɨndakɨa nʉ mʉnakpatanakisio ɛkɔ ngbanga ngbanga tʉkʉ ndʉ akʉ moni ngikʉnanɨ ka꞉kyɨanɨa‑ɔɔ.

⁴ Mʉkyɨa ɓwanɨ ambʉ pimiso ingono yɨ mapanʉ ngika ɓa꞉napanɨa.

Malaika ʉɓɨa kʉpɛɛ ɨsaʉ yɨ nʉtanɨa ngia yɨ Yʉanɨ ngia i꞉nye ɓatiso ɓombi

⁵ Ati ngia Ɛlɔdɛ i꞉nye‑ɔɔ ngama ɔɔ 'ʉja wʉ gɨpa ʉ Yudɛa, kumu‑kumu mʉngana i꞉nye nani ino ɓɔ Jakalɨa. Ɛyɔ i꞉nye akʉ 'ʉpaa wʉ ɓakumu‑kumu ngua wʉ Abia. Moi angɔ i꞉nye ino ɓɔ Alɨsabɛtɨ, mwana ʉ ɓanɔnɔ wʉ Aluna ngia i꞉nye kumu‑kumu ɔɔ 'ʉja.

⁶ Ɛɓɔ kʉ ɓuɓomu ɓapɨnɨ ɓi꞉nye ngbingbii apɛɛ ʉ Asʉɓɨɨ. Nʉ ɓi꞉nye kyananakɨa mapanʉ kʉ Asʉɓɨɨ kʉ muɓomu nʉ kɛkɛɛ.

⁷ Ɨkyɛmɨngana, ɓambikinye nʉ mwana, jʉ Alɨsabɛtɨ i꞉nye isude nʉ ɛɓɔ kʉ ɓuɓomu ɓi꞉nye tiga ɓʉdʉɓeni dʉɓanɨ.

⁸ Ɓisi mʉngana, Jakalɨa i꞉nye kʉkyɨa kuu ngiangɔ yɨ ɓukumu‑kumu apɛɛ ʉ Asʉɓɨɨ, jʉ 'ʉtʉ wʉ kuu wi꞉nye tiga akʉ 'ʉpaa nguʉndaɓʉ.

⁹ Kʉkpatanakɨa nʉ ɨkɔɔ gia yɨ ɓakumu‑kumu, ʉgbanda wa꞉mʉkwɨa tʉkʉ ɛyɔ Jakalɨa ɓɔ ukumunio amati ʉ Mʉa ngua wɔɔ Tu, amati ʉ ɨkáa yɨ Asʉɓɨɨ kʉya wadodo.

¹⁰ Ati ngia i꞉nye‑ɔɔ ambɛnɨ kʉya wadodo, ungbutu wʉ ɓombi kʉ ɓuɓomu ngiɓa ɓi꞉nye aɓei, ɓi꞉nye tiga tii tʉkʉ amati ʉ ta Asʉɓɨɨ.

¹¹ Kʉ nɨma ngiinanɨ, malaika wʉ Asʉɓɨɨ wambʉɓwanɨa Jakalɨa, nʉ kʉmaa akʉ ɨkɔndɔ yɨ guɔngɔ akʉ gbɔgbɔ ngia ɓi꞉nye ya‑ɔɔ wadodo.

¹² Iya Jakalɨa a꞉mʉna nayɔ, ambʉmbambania, ambʉkwa ʉɓa nadɨndɨ.

¹³ Ɨkyɛmɨngana, malaika wambumusigio ɓɔ: « Wɔɔkumokɔmʉ Jakalɨa, jʉ Asʉɓɨɨ a꞉kɔ pongo nɨta ngiisɔɔ kɔɔ. Moi asɔɔ Alɨsabɛtɨ a꞊nanʉtɨa mwana ɔɔ gue, kija wa꞊mʉsʉa ino ɓɔ Yʉanɨ.

¹⁴ Nʉ wa꞊huo nʉ ɨgyagya nʉ jananakɨa, kija ɓombi ɓaja ɓa꞊kwa ɨgyagya aka ekoo ʉ nʉtanɨa ngiangɔ.

¹⁵ Jʉ aɓio ɓisi ongo mombi ɔɔ 'ʉja apɛɛ ʉ Makʉʉɓɨɨ. Ambʉkʉmwa ɓisi ongo vinyo gʉkʉ ɗɛkɛkɛ, abana kʉndʉ lɨngɨka lɔɔ ɓʉka‑ɓʉkaɨ. A꞊huo ɓisi ongo nʉ 'Ʉtʉma wɔɔ Tu kʉʉngwa tʉkʉ akʉ ɓʉa ɓʉ inye.

¹⁶ A꞊tuiso ɓisi ongo ɓana ɓʉ Ɨsalaɛlɛ ɓaja ɔɔ Makʉʉɓɨɨ, Asʉɓɨɨ ngiʉndaɓʉ.

¹⁷ Aɓio ɓisi ongo kʉkɨndaka apɛɛ ʉ Makʉʉɓɨɨ ndʉ ɓangapɛɛ, uhueni nʉ 'ʉtʉma nʉ angu kʉndʉ ɨgbɛ Ɛlɨa, a꞊junukiso ɓisi ongo mɨtʉma ngia yɨ ɓɨsɛ ɓʉ ɓana ɨzɔ nʉ iya yɨ ɓana ɓʉndaɓʉ. Kija a꞊tuiso ɓisi ongo ɓombi ngiɓa ɓambakakumo Asʉɓɨɨ kʉkpata ɨkyananakɨa yɨ ɓombi ngiɓa ɓɔɔ ngbingbii apɛɛ ʉ Asʉɓɨɨ, ambʉ ʉtambanakɨa Makʉʉɓɨɨ ɓombi ngiɓa ɓaɓio ɓʉndanɛ nayɔ kʉbaya. »

¹⁸ Ɨkyɛmɨngana, Jakalɨa ambuɓukuo malaika ɓɔ: « Ɨkyɛmɛ tɨmanɨ iya yanambiiso ɓɔ moni ngikʉnanɨ ka kingono? Jʉ ɛmɛ mʉdʉɓa tiga dʉɓanɨ, nʉ moi asɛmɛ a tiga kʉ 'ʉdʉɓɛ. »

¹⁹ Kija malaika wa꞉mutisio ɓɔ: « Ɛmɛ ma Gablieli. Ɛmɛ kʉ maakyɨa ɓʉmaɨ apɛɛ ʉ Asʉɓɨɨ. Ɛyɔ ʉnatʉma kʉka nɔwɛ kʉɓɨa ɨsaʉ yɛɛ iɗo ngia.

²⁰ Ʉna‑zʉ, moni ngikʉsɛmɛ ka꞊kyɨanɨa akʉ wati wɔngɔ. Ndʉ wʉbayakɔmʉ moni ngikʉsɛmɛ, waɓio tʉkʉ ijangi, wambukuɓio tii ɓata kʉyaka kʉɓʉya ɓisi ongo tʉkʉ isiya moni ngikʉnanɨ ka꞊kyɨanɨa‑ɔɔ. »

²¹ Ati ngiinanɨ ɓombi ɓi꞉nye‑ɔɔ aɓei kusiɓo Jakalɨa, yi꞉nye tiga naɓɔ kʉmbangɨa ɓɔ ya tanɨ iya akʉgbalɨa amati ʉ ɨkáa yɨ Asʉɓɨɨ ɨngɔlɨ ɨta ɓwanɨ.

²² Ati ngia a꞉ɓʉa‑ɔɔ aɓei, iya a꞉kanyo naɓɔ samʉa, iyo yambikinye tii ɓata kʉɓʉa. Kija ɓombi ɓa꞉pimiso ɓɔ ʉna moni kɔɔ mʉmbangɛ kʉʉngwa ɔɔ Asʉɓɨɨ akʉ Mʉa wɔɔ Tu, amati ʉ ɨkáa yɨ Asʉɓɨɨ. I꞉nye naɓɔ kʉpanaka mʉa tʉkʉ nʉ lɨkɔndɔ, jʉ ambikinye tii ɓata kʉyaka.

²³ Iya makwaa kʉ kuu ngikangɔ ka꞉sio nayɔ, ambʉtʉa kʉ andɔngɔ.

²⁴ Mbise ʉ makwaa ɗɛkɛkɛ, moi angɔ Alɨsabɛtɨ ambuzio ɨmɨ, ambʉʉɓa ambɛnɨ amati ʉ muyi ɓɔkɔ, kija a꞉sigo ɓɔ:

²⁵ « Ʉna‑zʉ moni ngika Makʉʉɓɨɨ a꞉nakyɨa pongo! A꞉napɨa pongo mesu ngikangɔ ekoo asɛmɛ nɛmɛ kʉʉngwiso soni apɛɛ ʉ ɓombi. »

Malaika ʉɓɨa kʉpɛɛ ɨsaʉ yɨ nʉtanɨa ngia yɨ Yeso

²⁶ Ati ngia Alɨsabɛtɨ i꞉nye tiga‑ɔɔ nʉ ɨmɨ yɨ muyi ʉmalɨa, Asʉɓɨɨ ambʉtʉma malaika wangɔ Gablieli akʉ ɨkʉmbʉ ngia ɓaaisoko ɓɔ Najalɛtɛ amati ʉ gɨpa ʉ Galilaya,

²⁷ ɔɔ mwana ɔɔ moi mʉngana aunabi ɔngɔ ino ɓɔ Malɨa. Ɛyɔ Malɨa ɓi꞉nye ɓʉchwaneni nʉ gue mʉngana ino ɓɔ Yɨjɛfʉ akʉ anza ngia wʉ Ngama Daudi.

²⁸ Malaika wambʉɓwanɨa Malɨa akʉ i꞉nye‑ɔɔ, wambumusigio ɓɔ: « Kwa ɨgyagya Malɨa, jʉ ɔwɛ wʉ꞉nyɨa nʉ ɨjɨɔ ngia yɨ Asʉɓɨɨ. Makʉʉɓɨɨ a ɨzɔ nɔwɛ. »

²⁹ Ɨkyɛmɨngana, moni ngikʉnanɨ kambumbambaniso Malɨa nadɨndɨ ambuɓukuono kusigo ɓɔ: « Ɓukuo ngia inyi yɛngɔ ya tanɨ? »

³⁰ Malaika wambumusigio ɓɔ: « Malɨa! Wɔɔkumokɔmʉ, jʉ ɔwɛ wʉ꞉nyɨa nʉ ɨjɨɔ apɛɛ ʉ Asʉɓɨɨ.

³¹ Ʉna‑zʉ, ɔwɛ wa ɓisi kuzio ɨmɨ, wambʉnʉta mwana ɔɔ gue kija wa꞊mʉsʉa ino ɓɔ Yeso.

³² Aɓio ɓisi ongo mombi ɔɔ 'ʉja, nʉ ɓaɓio nayɔ kusoko ɓɔ Mwana ʉ Asʉɓɨɨ ngia a Ekoo Nadɨndɨ. Asʉɓɨɨ Makʉʉɓɨɨ a꞊munzo sina izi yɨ ɓuwei yɨ ɓʉngama kʉndʉ iya yɨ ɨsʉngʉɛ Daudi.

³³ A꞊dya ɓʉngama akʉ anza ngia wʉ Yakɔbɔ akʉ mɨtʉ yɨ ɨpá nʉ mɨtʉ yɨ ɨpá, nʉ ɓʉngama ngiɓangɔ ɓambukuɓio sina nʉ 'upipio. »

³⁴ Malɨa ambuɓukuo malaika ɓɔ: « Moni ngikʉnanɨ ka꞊kyɨanɨa ɨkyɨkyɨɓʉmʉ tanɨ? Jʉ ma‑zʉ kʉ aunabi. »

³⁵ Malaika wambumutisio ɓɔ: « 'Ʉtʉma wɔɔ Tu wa꞊ka ekoo asɔɔ, kija Asʉɓɨɨ ngia a Ekoo Nadɨndɨ a꞊nakuto nʉ angu ngiangɔ ndʉ igyiɓi. Tiga aka ekoo ʉ moni ngikʉnanɨ, mwana ngia wa ɓisi nayɔ kʉnʉta, aɓio mombi ɔɔ tu, nʉ ɓa꞊ɓumusoko ɓɔ Mwana ʉ Asʉɓɨɨ.

³⁶ Ʉna‑zʉ, Alɨsabɛtɨ iya nanayɔ akʉ anza, ɛyɔ a tiga kʉ nʉ ɨmɨ. Ɛyɔ a꞊nʉta mwana ɔɔ gue, abana ndʉ a tiga 'ʉdʉɓɛ kititi. Ɛyɔ ngia ɓi꞉nye mʉmba pongo ɓɔ a isude, a tiga nʉ ɨmɨ yɨ muyi ʉmalɨa.

³⁷ Jʉ yambʉkɔmʉ nɨngbaa yɨ moni gʉkʉ mɨngana ngia yaakyɨaka Asʉɓɨɨ. »

³⁸ Malɨa ambʉbaya aka ɓɔ: « Ma tʉkʉ bayo ʉ Makʉʉɓɨɨ. Moni ngikʉnanɨ kʉkyɨanɨa ekoo asɛmɛ ngbanga ngbanga tʉkʉ ndʉ akʉ moni kʉsɔɔ kusigo‑ɔɔ. » Kija malaika wa꞉mʉsɨa.

Malɨa ʉsa kʉkanga Alɨsabɛtɨ

³⁹ Amati ʉ makwaa ngikʉnanɨ, Malɨa a꞉ʉngwɨa kɨnda gagaa kʉsa akʉ gɨpa ʉ lɨkpangba akʉ ɨkʉmbʉ mɨngana ngia yɨ Yudɛa.

⁴⁰ Iya a꞉ɓʉya nani, ambukumunio akʉ ɨkáa ngia yɨ Jakalɨa, ambuɓukuo Alɨsabɛtɨ.

⁴¹ Ati ngia Alɨsabɛtɨ a꞉kɔ‑ɔɔ ɓukuo ngia yɨ Malɨa, mwana ambuɗukuo amati ʉ ɓʉa ngiɓa ɓʉ inye. Kija Alɨsabɛtɨ a꞉huo nʉ 'Ʉtʉma wɔɔ Tu.

⁴² Ambʉtʉɓɨa nʉ iyo yɛɛ ɓʉmʉ ɓɔ: « Asʉɓɨɨ u꞉nambuiso ɔwɛ kʉɓaa ɓoi kʉ ɓuɓomu, nʉ mwana ngia wa꞊mʉnʉta ʉmbʉa kʉ mbʉaa.

⁴³ Huu! Ɛmɛ ma ti‑zʉ anɨ! Inye ʉ Makʉasɛmɛ kʉka andɛmɛ?

⁴⁴ Jʉ iya mʉkɔ ɓukuo ngiisɔɔ, mwana ambuɗukuo nʉ ɨgyagya amati ʉ ɓʉa ngiɓʉsɛmɛ.

⁴⁵ Ya ɨgyagya nɔwɛ, jʉ wʉbaya ɓɔ moni ngika Makʉʉɓɨɨ a꞉nasigio pongo ka꞊kyananakɨa kyananakɨaa. »

Ʉmbɔ ngua wʉ Malɨa

⁴⁶ Kija Malɨa a꞉sigo ɓɔ: « 'Ʉtʉma nguʉsɛmɛ wakubibiso ɓʉja ngiɓa ɓʉ Makʉʉɓɨɨ,

⁴⁷ nʉ 'ʉtʉma nguʉsɛmɛ wa uhue nʉ ɨgyagya ekoo ʉ Asʉɓɨɨ, Muhiiso nguʉsɛmɛ,

⁴⁸ jʉ a꞉natunguo pongo ɛmɛ bayo angɔ ngia ɔɔ ɨsʉkʉɓwanɨ. Ʉna‑zʉ, kʉʉngwa ɨtakɨ‑takɨ ngia, ɓanɔnɔ nʉ ɓanɔnɔ ɓa꞊nasigio ɓisi ongo ɓɔ: ‹ Moi ngiakɛ Asʉɓɨɨ a꞉mumbuiso mbuisoo. ›

⁴⁹ Asʉɓɨɨ Makʉʉ Angu a꞉kyɨa pongo moni kɔɔ maja ekoo asɛmɛ. Ino ngiangɔ ya tu.

⁵⁰ A꞉pananiso pongo ikoko ngiangɔ akʉ ɓanɔnɔ nʉ ɓanɔnɔ ekoo ʉ ɓombi ngiɓa ɓaamukumo.

⁵¹ A꞉kyɨa moni kɔɔ mʉkpɔkpɔ nʉ angu wʉ ɨkɔndɔ ngiangɔ, nʉ a꞉ngbingo ɓombi ngiɓa ɓi꞉nye bɨbana amati ʉ mɨtʉma ngiindaɓʉ.

⁵² A꞉ijiso ɓangama nɨsɨ kʉʉngwa akʉ lizi lʉ ɓuwei lʉ ɓʉngama ngilʉndaɓʉ, ambuzono ɓombi ɓɔɔ ɨsʉkʉɓwanɨ nɨkʉʉ.

⁵³ A꞉mutiso ɓombi ngiɓa ɓi꞉nye nʉ taa nʉ kumbo ɔɔ manzanza, ambutuiso ɓombi ɓʉ lɨkyɛmɛ lɨkɔndɔ kuno.

⁵⁴ A꞉salɨa bayo angɔ Ɨsalaɛlɛ, ambutunguo nayɔ kʉnɨa ikoko,

⁵⁵ kʉndʉ aka a꞉panaka jɛnɛ‑ɔɔ Abalama nʉ ɓakuku ngiɓʉndɛsʉ akʉ mɨtʉ yɨ ɨpá nʉ mɨtʉ yɨ ɨpá. »

⁵⁶ Malɨa a꞉kwaa ɔɔ Alɨsabɛtɨ tine tine ndʉ muyi kaatʉ, mbise ɔngɔ, ambʉtʉa kʉ andɔngɔ.

Nʉtanɨa ngia yɨ Yʉanɨ ngia i꞉nye ɓatiso ɓombi

⁵⁷ Iya ʉnɔtɔ wa꞉dʉa nayɔ Alɨsabɛtɨ, ambʉnʉta mwana ɔɔ gue.

⁵⁸ Iya ɓombi ngiɓa ɓa꞉nabanakɨa nayɔ, nʉ anza ngiangɔ ɓa꞉kɔ ɨsaʉ ngiinanɨ Makʉʉɓɨɨ a꞉pananiso‑ɔɔ ɓʉja ɓʉ 'ʉtʉma wʉ ikoko nguangɔ, kija ɓa꞉kwa ɨgyagya ɨzɔ nayɔ.

⁵⁹ Iya makwaa ka꞉pa tiga ʉɓagɨna mbise ʉ nʉtanɨa yɨ mwana, ɓambʉka nayɔ kʉtɨna ganza. Ɓi꞉nye kʉkʉnda nayɔ kʉsʉa ino yɨ ɨsɛ Jakalɨa.

⁶⁰ Ɨkyɛmɨngana, inye a꞉bayakɔmʉ ambusigo ɓɔ: « Chʉkɔɔ, aɓio ino tʉkʉ ɓɔ Yʉanɨ. »

⁶¹ Ɓambumusigio ɓɔ: « Akʉ anza ngiasɔɔ mombi gʉkʉ mʉngana ambʉkɔmʉ nʉ ino ngiinanɨ. »

⁶² Kija ɓa꞉yakɨa ɨsɛ nʉ lɨkɔndɔ kʉhata kʉmbɨa ino ngia i꞉nye kʉkʉnda ɓɔ ɓʉsʉa mwana.

⁶³ Jakalɨa ambʉɓʉta ʉɓaʉ wɔɔ tɨndakɨɛ mubio, kija a꞉tɨndakɨa ɓɔ: « Aɓio ino ɓɔ Yʉanɨ. » Moni ngikʉnanɨ kambʉmbangɨa ɓombi kʉ ɓuɓomu.

⁶⁴ Kʉ nɨma ngiinanɨ, moni kambuɓununio Jakalɨa, ambufaniso yaka kʉtɔ nʉ bibiso Asʉɓɨɨ.

⁶⁵ Moni ngikʉnanɨ ka꞉kiso ɓombi ngiɓa ɓa꞉nabanakɨa naɓɔ kʉ ɓuɓomu ʉɓa, kija ɓombi ɓʉ gɨpa ʉ lɨkpangba ngila lʉ Yudɛa kʉ ɓuɓomu ɓi꞉nye tiga kʉyakanaka ekoo ʉ moni ngikʉnanɨ.

⁶⁶ Ɓombi kʉ ɓuɓomu ngiɓa ɓi꞉nye kʉkɔ moni ngikʉnanɨ ɓi꞉nye kutunguo akʉ 'ʉtʉma nʉ ɓukuono ɓɔ: « Moni kʉ mwana ngia kaɓio ti‑zʉ tanɨ? » Nʉ kingono ɨkɔndɔ yɨ Makʉʉbɨɨ yi꞉nye ekoo angɔ.

Jakalɨa ʉkwa ɨgbɛ amati ʉ ʉmbɔ

⁶⁷ Ɨsɛ Jakalɨa, ambuhuo nʉ 'Ʉtʉma wɔɔ Tu, kija a꞉kwa ɨgbɛ ambufaniso sigo moni kʉʉngwa ɔɔ Asʉɓɨɨ ɓɔ:

⁶⁸ « Makʉʉɓɨɨ ʉchɨka ɨbɨba, Asʉɓɨɨ ngia wʉ ɓana ɓʉ Ɨsalaɛlɛ, jʉ a꞉tunguo anza ngiangɔ nayɔ kisukuo akʉ ɓubayo.

⁶⁹ Ʉ꞉tɨtʉmɨa Muhiiso ngua wʉ angu amati ʉ anza ngia wʉ bayo angɔ Ngama Daudi.

⁷⁰ Kʉndʉ aka a꞉ngaka jɛnɛ‑ɔɔ 'upi akʉ moni kʉ lɨgbɛ ngilangɔ lɔɔ tu ɓɔ:

⁷¹ Ma꞊niɓwanakiso akʉ lɨkɔndɔ lʉ ɓakwa ngiɓʉndɛnʉ, nʉ akʉ lɨkɔndɔ lʉ ɓombi kʉ ɓuɓomu ngiɓa ɓaanɨyaa.

⁷² Kʉ ɓwanɨ, a꞉nɨa ɓakuku ngiɓʉndɛsʉ ikoko tiga a꞉tunguo agɔmɔ ngiangɔ ɔɔ tu,

⁷³ silika ngia Asʉɓɨɨ a꞉tɨna jɛnɛ nʉ kuku ngiʉndɛsʉ Abalama ɓɔ:

⁷⁴ Ma꞊nɨɓwanakiso akʉ lɨkɔndɔ lʉ ɓakwa ngiɓʉndɛnʉ, ambʉ ɓieni nɛmɛ kubibiso chʉkɔmʉ nʉ ʉɓa,

⁷⁵ ambʉ ɓieni kʉkɨndaka apɛɛ asɛmɛ akʉ ɓungbingbii, chʉkɔmʉ nambuɓio kʉkyɨa ɓʉɓɨɓɨ akʉ ʉɓɨɨ nguʉndɛnʉ kʉ 'uɓomu.

⁷⁶ Ɔwɛ mwana asɛmɛ, ɓaɓio tiga nɔwɛ kusoko ɓɔ Ɨgbɛ yɨ Asʉɓɨɨ ngia a Ekoo Nadɨndɨ, jʉ waɓio tiga kʉkɨndaka apɛɛ ʉ Makʉʉɓɨɨ kʉtambanaka lɨngbaa ngilangɔ.

⁷⁷ Nʉ waɓio tiga kusigio ɓombi ngiɓangɔ ɓɔ Asʉɓɨɨ a꞊ɓuhiiso ɨngbaa naɓɔ kʉpɨa ɓʉɓɨɓɨ ngiɓʉndaɓʉ.

⁷⁸ Jʉ Asʉɓɨɨ ngiʉndɛsʉ anʉ 'Ʉtʉma wɔɔ uɗo nadɨndɨ nʉ wʉ ikoko. A꞊tɨpʉya nʉ wanga kʉʉngwa ekoo, ngbanga ndʉ magou kʉ ɨpá

⁷⁹ kʉpʉya ɓombi ngiɓa ɓa amati ʉ umomo, nʉ iɓa ʉɓa wʉ ingyo wa꞉ɓuɓoto, ambʉ ʉkɨndakiso mɨtɨndɨ ngiindɛsʉ akʉ ɨngbaa ngia yɨ majɨɔ. »

⁸⁰ Mwana i꞉nye tiga kuyokoko nʉ kusingo 'ʉtʉma. I꞉nye tii tʉkʉ akʉ 'ukengu, kʉɓʉya tʉkʉ isiya a꞉ɓwanɨa‑ɔɔ apɛɛ ʉ ɓana ɓʉ Ɨsalaɛlɛ.