Yakɔbɔ 1 - Agɔmɔ ngia wʉ Ɨtakɨ-takɨ

Ɓukuo

¹ Ɛmɛ Yakɔbɔ bayo ʉ Asʉɓɨɨ nʉ wʉ Makʉʉɓɨɨ Yeso Klisito kʉ mʉnɨtɨndakɨa inu ɓaanza ɓʉ Asʉɓɨɨ kʉ ɓuɓomu ngiɓa na꞉nanzana akʉ ɨtaka kʉ uɓomu ʉbalʉa nguakɛ. Muniɓukuo kʉ ɓukuoo.

Baya nʉ pɨa ɓʉka‑ɓʉkaɨ

² Inu ɓayoo ɓʉsɛmɛ, ɓieni tʉkʉ nʉ ɨgyagya nadɨndɨ ati ngia lɨngbaa lʉ moni lɔɔ ɓʉka‑ɓʉkaɨ kʉ di di di la꞉ɓio‑ɔɔ ninu kʉgbʉka.

³ Jʉ nakʉmbɨa iɗo ɓɔ ndʉ baya ngiindɛnʉ yaɓio kʉɓaa amati ʉ ɓʉka‑ɓʉkaɨ, iinanɨ yaninu kunziso 'ʉtʉma wɔɔ pɨɛ moni.

⁴ Yɨkwanana ɓɔ 'ʉtʉma wɔɔ pɨɛ moni nguʉnanɨ wunikiso kuɓio tiga ɓombi ɓɔɔ ɓʉkwananakɛ amati lɨngbaa lʉ moni kʉ liɓomu, kʉ ɓwanɨ nambukuɓio nʉ nangyɨa yɨ ɨkyɛmɛ gʉkʉ mɨngana.

⁵ Ndʉ mʉngana ʉndɛnʉ aya 'ʉtʉma wɔɔ pimise moni, ʉʉta Asʉɓɨɨ, a꞊munzo ɛwɔ tʉkʉ nzoni. Jʉ Asʉɓɨɨ aanzo ɓombi kʉ ɓuɓomu ɨkyɛmɛ chʉkɔmʉ nʉ mbomboko ɓombi, nʉ tʉkʉ nʉ 'ʉtʉma wɔɔ uɗo.

⁶ Ɨkyɛmɨngana, yɨkwanana mombi ɔngɔ ʉta nʉ baya chʉkɔmʉ nʉ ɓatanga, jʉ mombi ngia aakyɨa nʉ ɓatanga, a ngbanga ndʉ ɨbʉbʉ yɨ ɗei ɔɔ 'ʉja iya yaatʉkanɨa nʉ mahuo, wambuɓio kugiso engo magba kʉ mabɔbɔ.

⁷ Ikanzi yɨ mombi ngiinanɨ ɔɔɓiokɔmʉ kʉkwanaka ɓuu ɓɔ a꞊nyɨa nʉ ɨkyɛmɛ kʉʉngwa ɔɔ Makʉʉɓɨɨ,

⁸ jʉ a mombi ʉ maɗaɗa kapɨnɨ. Nʉ aanɨtananaka tʉkʉ ndʉ manɨ kʉ pambaa akʉ lɨngbaa lʉ moni ngilangɔ kʉ liɓomu.

Ɓombi ɓʉ ɓanangyɨa nʉ ɓombi ɓʉ lɨkyɛmɛ

⁹ Ayoo ngia a amati ʉ ɓanangyɨa uɓio nʉ ɨmbʉka jʉ Asʉɓɨɨ anayɔ kuzono nɨkʉʉ,

¹⁰ ɨkyɛmɨngana ayoo ngia anʉ lɨkyɛmɛ uɓio nʉ ɨmbʉka jʉ Asʉɓɨɨ anayɔ kijiso nɨsɨ. Jʉ mombi ʉ lɨkyɛmɛ aaɓaa tʉkʉ ndʉ ɨwʉa yɨ 'ututu.

¹¹ Iya ɨpá yaayakoko, ʉhʉ wʉ dyaa wɔngɔ wambʉmɔkɔkiso lɨgbɛɛ lɔngɔ, ɨwʉa yɛngɔ yambʉɓwana akɛsɨ kija ɓuɗo ɓɔngɔ ɓatambɨa. Ya ngbanga kʉ ɓwanɨ akʉ mombi ʉ lɨkyɛmɛ, jʉ ɛyɔ a꞊ngɨtɨa i꞉nyeni tʉkʉ amati ʉ kuu ngiangɔ.

Kʉɓaa amati ʉ kanyo

¹² Ya ɨgyagya nʉ mombi ngia aamaa ɓʉ ngbɔmʉ amati ʉ kanyo, jʉ ndʉ aɨɓaa angu, a꞊nyɨa tiga nʉ ɨgaɨ yɨ ɓʉngama yɨ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá ngia Asʉɓɨɨ a꞉panaka ɓombi ngiɓa ɓaamʉkʉnda.

¹³ Ndʉ mombi aɓio amati ʉ kanyo, ɔɔsigokɔmʉ ɓɔ: « Tʉkʉ Asʉɓɨɨ anɛmɛ kukanyo ». Jʉ Asʉɓɨɨ ambakaɓaa amati ʉ kanyo kʉkyɨa ɓʉɓɨɓɨ, nʉ ɛyɔ makʉɔngɔ ambakasingo mombi gʉkʉ mʉngana amati ʉ kanyo kʉ ɓwanɨ.

¹⁴ Ɨkyɛmɨngana, tʉkʉ taa yɛɛ ɓɨɓɨ yɨ ndʉtʉ ngia yɨ mombi kʉ nangana nangana yaamupitikio nʉ nayɔ kusingo amati ʉ kanyo.

¹⁵ Ndʉ taa yɨ ndʉtʉ yɛɛ ɓɨɓɨ ngiinanɨ yaasɨngana nʉpɛɛ, kija yaanʉta tiga ɓʉɓɨɓɨ. Nʉ tiga ndʉ ɓʉɓɨɓɨ ɓa'ʉtɨa, ɓaanʉta tii tʉkʉ ingyo.

¹⁶ Kʉ ɓwanɨ, inu ɓayoo ɓʉsɛmɛ ɓʉ ɓʉkʉnda, mombi ɔɔnipitikiokɔmʉ ekoo ʉ moni ngikakɛ.

¹⁷ Apɛpɛ ɔɔ uɗo kʉ uɓomu nʉ ɔɔ 'ʉkwananakɛ kʉ 'uɓomu, aaʉngwa ekoo ʉ ɓisi, ɔɔ Asʉɓɨɨ ngia a꞉kyɨa kumbo kʉ uɓomu ngia aajɨa ekoo ʉ ɓisi. Ngbanga kʉndʉ kumbo ngiinanɨ, ɛyɔ ambakanɨtananaka, nʉ amati angɔ umomo wambʉkɔmʉ gʉkʉ ɗɛkɛkɛ.

¹⁸ Aka ekoo ɓʉkʉnda ngiɓangɔ makʉɔngɔ, a꞉tinzo ʉɓɨɨ ɨngbaa akʉ ɨsaʉ ngiangɔ yɨ ingono, ambʉ kuɓio ndʉ 'ʉtʉ wʉ pɛɛ amati ʉ kumbo ngia ɛyɔ a꞉kyɨa.

Kʉkɔ mapanʉ nʉ nakɔ kʉkyananakɨa

¹⁹ Inu ɓayoo ɓʉsɛmɛ ɓʉ ɓʉkʉnda, tungueni moni ngikakɛ kusigo ɓɔ mombi kʉ 'uɓomu ati ʉndɛnʉ ʉkwanana kuɓio gagaa kutikio moni, ɨkyɛmɨngana ɔɔɓiokɔmʉ ʉɗaɗa gagaa, nʉ ɔɔɓiokɔmʉ gagaa kupuno.

²⁰ Jʉ mombi wʉ ʉnganga ambakakyɨa moni kɔɔ ngbingbii apɛɛ ʉ Asʉɓɨɨ.

²¹ Kʉ ɓwanɨ, sieni ɨkyananakɨa yɛɛ ɓɨɓɨ, nʉ moni kʉ muɓomu ngika kʉ isikisiki. Bayeni Ɨsaʉ ngia Asʉɓɨɨ a꞉hʉna amati ʉ mɨtʉma ngiindɛnʉ nʉ 'ʉtʉma wɔɔ ijisinise nɨsɨ, jʉ iiya ya꞊kwanana ninu kuhiiso.

²² Nɔɔɓiokɔmʉ amati ʉ ɓujangi‑jangi kʉkɔ Ɨsaʉ yɨ Asʉɓɨɨ tʉkʉ nʉ muchwei ɨsʉkʉɓwanɨ. Nʉkwanana kupananiso moni ngika nakʉkɔ engo nʉ ɨkyananakɨa.

²³ Jʉ mombi ngia aakɔ ɨsaʉ chʉkɔmʉ ambʉɨkyananakɨa, a ngbanga ndʉ mombi ngia aakangana ɨngbaa yɨ mesu ngiangɔ amati ʉ ɨkanganɨa, kija aanana ngbanga tʉkʉ ndʉ aka‑ɔɔ.

²⁴ Mbise ʉ kangana, ambʉsa, kija a꞊paa tʉkʉ nɨma ngiinanɨ aka aakyɨa sa‑ɔɔ kʉnyɨa.

²⁵ Pɛpɛ mombi ngia aakpingbikiso mapanʉ kɔɔ ngbingbii ngika kaanzo mombi ɓununikio, aakyɨa lɨngbaa lʉ moni ngilalɛ: aaɓoto mapanʉ ngikʉnanɨ kingono, ambuɓio nakɔ kʉkɔ nʉ kʉkyananakɨa engo tʉkʉ ndʉ akʉ ka‑ɔɔ kusigo, chʉkɔmʉ ambʉkʉpaa. Ikanzi yɨ mombi ngiinanɨ Asʉɓɨɨ a꞊mumbuiso amati ʉ lɨngbaa lʉ moni ngilangɔ kʉ liɓomu.

²⁶ Ndʉ mombi aɓio kʉkwanaka ɓuu ɓɔ a꞉baya Asʉɓɨɨ kingono, chʉkɔmʉ ambuɓio kʉpɨmakɨa ʉɗaɗa nguangɔ, a tʉkʉ amati ʉ ɓujangi‑jangi, nʉ baya ngiangɔ ya tʉkʉ ɨsʉkʉɓwanɨ.

²⁷ Ɨngbaa ngia Asʉɓɨɨ Tidoo aapimiso‑ɔɔ ɓɔ baya ngia yɨ mombi ya iɗo nʉ ɓɔ yambʉkɔmʉ nʉ ɨɗa yɛɛ ɓɨɓɨ, ya tʉkʉ kʉpɨmakɨa miwei nʉ ɓawoko amati ʉ ɓʉka‑ɓʉkaɨ ngiɓa ɓa amati ɔngɔ, nʉ chʉkɔmʉ kukpulunio amati ʉ ɓʉɓɨɓɨ ɓʉ ɨtaka ngiakɛ.