Ɓaɛfɛsɔ 1 - Agɔmɔ ngia wʉ Ɨtakɨ-takɨ

Ɓukuo

¹ Inu ɓombi ɓʉ Asʉɓɨɨ ngiɓa na anʉ Ɛfɛsɔ, iɓa naɓujubunie nʉ ɔɔ Yeso Klisito, mu꞉niɓukuo kʉ ɓukuoo. Ɛmɛ Pɔlɔ, titima wʉ Yeso Klisito akʉ ɓʉkʉnda ɓʉ Asʉɓɨɨ, kʉ mʉ꞉nɨtɨndakɨa ʉbalʉa nguakɛ.

² Asʉɓɨɨ Tidoo ngiʉndɛsʉ nʉ Makʉʉɓɨɨ Yeso Klisito ɓunitio 'ʉtʉma wʉ ɨjɨɔ nʉ majɨɔ.

Iɗo ngia Asʉɓɨɨ aatɨkyɨa 'upi akʉ Klisito

³ Kubibiseni Asʉɓɨɨ, Ɨsɛ ʉ Makʉʉndɛsʉ Yeso Klisito iya a꞉titio ʉmbʉa kʉ uɓomu ngua wʉ 'Ʉtʉma nguangɔ kʉʉngwa ekoo ɓisi, 'upi akʉ jubunio ngiindɛsʉ nʉ ɔɔ Klisito.

⁴ Kʉ ɓwanɨ, pɛɛ ɔɔ kyɨɛ ɨtaka, Asʉɓɨɨ a꞉timbomboko jɛnɛ ɓɔ kaɓio ɓaandɔngɔ 'upi akʉ Klisito aka ekoo ngia ɓɔ kuɓio ɓʉjaɓanakɨɛ, chʉkɔmʉ nʉ ɨɗa yɛɛ ɓɨɓɨ apɛɛ angɔ. Aka ekoo ʉ ɓʉkʉnda,

⁵ Asʉɓɨɨ a꞉maiso jɛnɛ kʉpɛɛ ɓɔ a꞊tinicho kuɓio ɓana ɓangɔ 'upi akʉ Yeso Klisito. A꞉kʉnda kʉkyɨa ɓwanɨ jʉ ya꞉mʉkataa ɓwanɨ.

⁶ Kubibiseni tɔ Asʉɓɨɨ jʉ a꞉tinzo apɛpɛ wʉ imbangumba yɨ 'ʉtʉma wʉ ɨjɨɔ, 'upi akʉ Mwana angɔ wʉ ɓʉkʉnda.

⁷ Aka ekoo ngia Klisito a꞉nzɨlakiso‑ɔɔ miniki ngikangɔ, iiya ka꞉ɓwanaka‑ɔɔ akʉ ɓʉɓɨɓɨ, kambʉnyɨa nʉ ʉpɨa wʉ ɓʉɓɨɓɨ ngiɓʉndɛsʉ. Nɨngbaa ngiinanɨ, Asʉɓɨɨ a꞉pananiso ɓʉjanana ɓʉ ɨjɨɔ ngiangɔ,

⁸ iya a꞉tinzo ɨja, ambutinzo 'ʉtʉma wɔɔ pimise moni nʉ mbɨmbanaka kʉ nzoo.

⁹ Aka ekoo ʉ iɗo ngiangɔ, a꞉timbiiso moni kʉ ɓaɗi ngikangɔ ika ɛyɔ makʉɔngɔ a꞉maiso jɛnɛ kʉpɛɛ 'upi akʉ Klisito.

¹⁰ Moni ngikʉnanɨ, Asʉɓɨɨ a꞊kwanana nakɔ kʉndaniso akʉ ɓisi ɓʉ 'upipio. Moni ngikʉnanɨ ka tʉkʉ kʉmʉma moni kʉ muɓomu ngika ka ekoo ʉ ɓisi nʉ ika ka ya akʉ ɨtaka, kuɓio ɛsɨ ʉ ʉpanʉ wʉ ngama mʉngana iya ʉnʉ ɓɔ Klisito.

¹¹ Amati ʉ jubunio ngiindɛsʉ nʉ ɔɔ Klisito, isu ka꞉nyɨa nʉ ɓʉhɨa jʉ Asʉɓɨɨ a꞉timbomboko jɛnɛ kʉpɛɛ kʉkpatanakɨa nʉ itungwio ngiangɔ, ambʉkyɨa kumbo kʉ uɓomu kʉkpatanakɨa tʉkʉ nʉ moni ngika ɛyɔ a꞉maiso nʉ ika a꞉kʉnda.

¹² Kubibiseni ɓʉja ngiɓa ɓʉ Asʉɓɨɨ, isu ngiɓa ki꞉nye ɓombi ɓʉ pɛɛ kʉnapɨa itungwio akʉ Klisito!

¹³ Abana inu, ati ngia na꞉kɔ‑ɔɔ ɨsaʉ yɨ ingono, iya ya Ɨsaʉ yɛɛ Iɗo ngia ya꞉ninzo ɓʉhɨa, iiya na꞉baya tiga‑ɔɔ Klisito. Kʉ ɓwanɨ, Asʉɓɨɨ a꞉nɨɗɨa tiga ibio ngiangɔ ninu kunzo 'Ʉtʉma wɔɔ Tu ngua a꞉panaka jɛnɛ.

¹⁴ 'Ʉtʉma wɔɔ Tu nguʉnanɨ wa 'ʉtʉmbɨa wʉ ɨjangɨa ngua Asʉɓɨɨ a꞉tɨpanaka ɓɔ ka꞊nyɨa ɓisi ongo nawɔ tʉkʉ nyɨaa. Ka꞊nyɨa nʉ kumbo ngiinanɨ ati ngia ka꞊ɓwanaka‑ɔɔ kingono akʉ ɓʉɓɨɓɨ. Kʉ ɓwanɨ, kubibiseni ɓʉja ngiɓa ɓʉ Asʉɓɨɨ!

Pɔlɔ akʉtɨa ɓombi ɓʉ baya ɓʉ Ɛfɛsɔ

¹⁵ Aka ekoo ʉ moni ngikʉnanɨ kʉ muɓomu, kʉʉngwa aka ma꞉kɔ pongo‑ɔɔ ɨsaʉ ekoo ʉ baya ngiindɛnʉ amati ʉ Makʉʉɓɨɨ Yeso nʉ ekoo ʉ ɓʉkʉnda ngiɓʉndɛnʉ ekoo ʉ ɓombi ngiɓa ɓa꞉baya kʉ ɓuɓomu,

¹⁶ ɛmɛ mambʉkɔmʉ kʉsɨa kutuisio Asʉɓɨɨ ɨbɨba ekoo ʉndɛnʉ. Maanitunguo amati ʉ nɨta ngiisɛmɛ,

¹⁷ nʉ maata Asʉɓɨɨ ngia wʉ Makʉʉndɛsʉ Yeso Klisito, Tidoo ngia wʉ ɨbɨba ɓɔ uninzo 'ʉtʉma wɔɔ pimise moni. Kʉ ɓwanɨ, wa꞊nɨpananiso Asʉɓɨɨ nʉ nayɔ kupimiso kingono.

¹⁸ Makʉta ɓɔ nyɨeni nʉ wanga amati ʉ mbɨmbanaka ngiindɛnʉ, nambupimiso kusigo ɓɔ Asʉɓɨɨ a꞉nisoko aka ekoo itungwio tɨmanɨ iya na‑ɔɔ kʉnapɨa 'ʉtʉma, nʉ ikanzi yɨ imbangumba yɨ ɨjangɨa tɨmanɨ iya Asʉɓɨɨ a꞉ɓusio ɓombi ngiɓangɔ.

¹⁹ Nʉ angu 'ʉgbʉ tɨmanɨ iya Asʉɓɨɨ anayɔ ekoo ʉndɛsʉ ɓombi ngiɓa ka꞉baya. Angu ngiinanɨ iiya Asʉɓɨɨ a꞉pananiso nʉ angu ngiangɔ ɔɔ 'ʉja,

²⁰ ati ngia a꞉jʉkaniso‑ɔɔ Klisito akʉ ingyo ambumuwuliso akʉ ɨkɔndɔ yɨ guɔngɔ ngiangɔ ekoo ʉ ɓisi.

²¹ Na ekoo ʉ ɓisi, Asʉɓɨɨ a꞉napɨa Klisito ekoo ʉ ɓʉngama kʉ ɓuɓomu, ekoo ʉ ʉpanʉ kʉ uɓomu, ekoo ʉ angu kʉ uɓomu, ekoo ɨbɨba ngia yɨ ɓʉngama nʉ ekoo ʉ ɨkyɛmɛ kʉ iɓomu ngia ya akʉ ɨtaka ngia yɨ ɓʉɓʉnɨ, abana kʉndʉ akʉ iya ya꞊ka ɓisi ongo.

²² Asʉɓɨɨ a꞉napɨa kumbo kʉ uɓomu ɛsɨ ʉ ʉpanʉ wʉ Klisito, ambʉmʉnapɨa kuɓio 'ʉtʉ wʉ kanisa.

²³ Kanisa a ndʉtʉ yɨ Klisito. Nʉ ɛyɔ Klisito a kingono amati ʉ kanisa nʉ Asʉɓɨɨ a kingono amati ʉ Klisito.