Ɓakɔlɔsai 1 - Agɔmɔ ngia wʉ Ɨtakɨ-takɨ

Pɔlɔ uɓukuo Ɓakɔlɔsai

¹ Ɛmɛ Pɔlɔ, titima wʉ Yeso Klisito akʉ ɓʉkʉnda ɓʉ Asʉɓɨɨ, ɨzɔ nʉ ayoo ʉndɛsʉ Timɔtɛɔ kuniɓukuo kʉ ɓukuoo.

² Kʉ꞉nɨtɨndakɨa inu ɓombi ɓʉ Asʉɓɨɨ ngiɓa na anʉ Kɔlɔsai ʉbalʉa nguakɛ, inu ɓayoo ɓʉndɛsʉ ɓɔɔ ɓʉbayanɨɛ amati ʉ Klisito. Asʉɓɨɨ Tidoo ʉndɛsʉ uninzo 'ʉtʉma wʉ ɨjɨɔ nʉ majɨɔ.

Pɔlɔ akutuisio Asʉɓɨɨ ɨbɨba ekoo Ɓakɔlɔsai

³ Iya kaakyɨa‑ɔɔ ninu kʉtɨa Asʉɓɨɨ, kaatuisio Asʉɓɨɨ, Ɨsɛ ʉ Yeso Klisito, ɨbɨba makwaa kʉ muɓomu,

⁴ iinanɨ kʉ iɓomu, ya tʉkʉ jʉ ka꞉kɔ pongo ɨsaʉ ekoo baya ngia nanayɔ akʉ Yeso Klisito nʉ ɓʉkʉnda ngiɓa nanaɓɔ ekoo ɓombi ɓʉ Asʉɓɨɨ kʉ ɓuɓomu.

⁵ Baya nʉ ɓʉkʉnda ngiɓʉnanɨ ya aka ekoo napɨa itungwio ngia nanayɔ kʉnyɨa nʉ kumbo ngia Asʉɓɨɨ a꞉niɓusio ekoo ʉ ɓisi. Na꞉kɔ moni kʉ napɨa itungwio ngiinanɨ akʉ kɨnda ngia yɨ pɛɛ ɓa꞉nɨɓɨakɨa‑ɔɔ Ɨsaʉ yɛɛ Iɗo.

⁶ Tʉkʉ Ɨsaʉ yɛɛ Iɗo yakʉnanzana akʉ ɨtaka kʉ iɓomu, nʉ yakunzo masɔɔ akʉ ʉɓɨɨ kʉ uɓomu. Ya kʉkyɨanɨa ngbanga kʉ ɓwanɨ kʉndʉ ya꞉kyɨanɨa jɛnɛ na andɛnʉ, kʉʉngwa tʉkʉ isiya na꞉faniso‑ɔɔ kʉkɔ nʉ mbɨa moni ekoo ɨjɨɔ yɨ ingono ngia yɨ Asʉɓɨɨ.

⁷ Tʉkʉ Epafala iya a adii asɛmɛ wʉ ɓʉkʉnda ngia kaakyɨa naɓɔ kuu ɨzɔ a꞉nɨpanɨa ɨsaʉ ngiinanɨ. Ɛyɔ a mombi ʉ kuu ɔɔ ngbingbii wʉ Yeso Klisito iya aanapɨa moni ngikʉndɛsʉ akʉ 'ʉtʉma.

⁸ Ɛyɔ kʉ a꞉tɨngakɨa pongo ɨsaʉ ekoo ɓʉkʉnda ngiɓa nanaɓɔ iɓa ɓakʉʉngwanakɨa nʉ 'Ʉtʉma wɔɔ Tu.

⁹ Kʉʉngwa aka ka꞉kɔ‑ɔɔ ɨsaʉ ngiinanɨ, kaakyɨa ninu tʉkʉ kʉtɨa Asʉɓɨɨ ɓɔ unimbiiso ɓʉkʉnda ngiɓangɔ kingono, ambunihuiso nʉ 'ʉtʉma wɔɔ pimise moni, ambuninzo mbɨmbanaka ngia yɨ 'Ʉtʉma wɔɔ Tu.

¹⁰ Kʉ ɓwanɨ, na꞊kwanana kʉkɨndaka akʉ ɓungbingbii apɛɛ ʉ Makʉʉɓɨɨ nʉ kʉkyɨa tʉkʉ moni ngika kaamʉkataa. Nɨngbaa ngiinanɨ na꞊kwanana kʉkyɨa lɨngbaa lʉ moni lɔɔ manzanza kʉ liɓomu nʉ na꞊sɨnganaka nʉ mbɨa Asʉɓɨɨ tiga iɗo.

¹¹ Kakʉta Asʉɓɨɨ ɓɔ unihuiso nʉ angu wʉ ɨbɨba ngiangɔ, aka ekoo ngia ɓɔ ɓieni kʉpɨa moni kʉ muɓomu nʉ 'ʉtʉma wɔɔ ʉta, kʉpɨa ɓʉka‑ɓʉkaɨ nʉ ɨgyagya.

¹² Tuisieni Asʉɓɨɨ ɨbɨba nʉ ɨgyagya, jʉ kʉ ɛyɔ a꞉ninzo angu kʉnyɨa nʉ ɨjangɨa yɨ Ɓʉngama ɓʉ wanga ngiɓa a꞉ɓusio ɓombi ngiɓangɔ.

¹³ Jʉ kʉ ɛyɔ a꞉tɨɓwanakiso akʉ angu wʉ bubayo ɓʉ umomo wʉ Abɨa, ambutisingo akʉ Ɓʉngama ɓʉ Mwana angɔ ngia wʉ ɓʉkʉnda.

¹⁴ Ya 'upi akʉ ɛyɔ iya ka꞉nyɨa‑ɔɔ nʉ ɓununikio, ambʉtɨpɨa ɓʉɓɨɓɨ ngiɓʉndɛsʉ.

Klisito nʉ kuu ngiangɔ

¹⁵ Klisito a isisinio yɨ Asʉɓɨɨ ngia ɓambakamʉna. Ɛyɔ a pʉta wʉ ɨkyɛmɛ kʉ iɓomu ngia Asʉɓɨɨ a꞉kyɨa.

¹⁶ Ya 'upi akʉ ɛyɔ iya Asʉɓɨɨ a꞉kyɨa‑ɔɔ kumbo kʉ uɓomu ngia akʉ ɨtaka nʉ iya ekoo ʉ ɓisi, kumbo ngia aanyɨa akʉ mesu nʉ iya ambakanyɨa. Yiɓio angu wʉ ɓamalaika, ɓombi ɓʉ angu, ɓangama, nʉ ɓombi ɓʉ ʉpanʉ, moni ngikʉnanɨ kʉ muɓomu Asʉɓɨɨ a꞉kʉkyɨa 'upi akʉ ɛyɔ nʉ tʉkʉ akʉ ɛyɔ.

¹⁷ Klisito a apɛɛ ʉ kumbo kʉ uɓomu, nʉ ya aka ekoo angɔ iya kumbo ngiinanɨ a‑ɔɔ izi mɨngana.

¹⁸ Ɛyɔ a 'ʉtʉ wʉ ndʉtʉ, ndʉtʉ ngiinanɨ ya kanisa. Ɛyɔ a 'ʉkpanganɨa, nʉ pʉta ati ʉ ɓombi ngiɓa ɓa꞉dʉka. Ɛyɔ kʉ a꞉kpanga jʉkana aka ekoo ngia ɓɔ uɓio tʉkʉ apɛɛ ʉ kumbo kʉ uɓomu.

¹⁹ Yakʉndaniso Asʉɓɨɨ ɓɔ uɓio 'uhue tʉkʉ kʉ 'uɓomu amati ʉ Mwana angɔ,

²⁰ nʉ ya 'upi akʉ Mwana angɔ iya Asʉɓɨɨ a꞉tuiso‑ɔɔ kɔnɔ ati ʉ ɨtaka kʉ iɓomu nʉ ɛyɔ. 'Upi akʉ miniki kʉ Mwana angɔ ika ka꞉chichio ekoo ʉ mʉsalaba, Asʉɓɨɨ a꞉nzo majɨɔ ati ʉ kumbo kʉ uɓomu ngia a ekoo ʉ ɓisi kʉndʉ iya a akʉ ɨtaka.

²¹ Abana gʉ inu, ni꞉nye pɛɛ danga nʉ Asʉɓɨɨ, ni꞉nye ɓakwa ɓʉ Asʉɓɨɨ aka ekoo itungwio yɛɛ ɓɨɓɨ nʉ kyananaka yɛɛ ɓɨɓɨ ngiindɛnʉ.

²² Asʉɓɨɨ a tiga nʉ ɓayo ninu 'upi akʉ ingyo ngia Mwana angɔ a꞉wo akʉ ndʉtʉ aka ekoo ngia ɓɔ ɓwanɨeni apɛɛ angɔ ninyeni ɓʉjaɓanakɨɛ, chʉkɔmʉ nʉ ɨɗa yɛɛ ɓɨɓɨ, gʉ ɓɔ ɨngbaa yɨ moni yɛɛ ɓɨɓɨ gʉ kʉ mɨngana.

²³ Kʉ ɓwanɨ, yɨkwanana ɓieni ɓʉmaɨ ɓʉ ngbɔmʉ nʉ kuɓio nʉ angu amati ʉ baya. Nɔɔɓiokɔmʉ bata bata, nʉ nɔɔyangisokɔmʉ napɨa itungwio ngia na꞉nyɨa nayɔ ati ngia na꞉kɔ‑ɔɔ Ɨsaʉ yɛɛ Iɗo. Nʉ Ɨsaʉ yɛɛ Iɗo ngiinanɨ ɓa꞉ɨɓɨakɨa ɓombi ɓʉ ɨtaka kʉ ɓuɓomu. Ɛmɛ Pɔlɔ ma꞉nɨtanaka tiga bayo ɔɔ ɓɨakɨɛ ɨsaʉ ngiinanɨ.

Kuu ngia yɨ Pɔlɔ amati ʉ kanisa

²⁴ Ɨtakɨ‑takɨ ngiakɛ makʉkwa ɨgyagya akʉ ɓʉka‑ɓʉkaɨ ngiɓa makʉdya engo aka ekoo ndɛnʉ. 'Upi akʉ ndʉtʉ ngiisɛmɛ makʉndaniso moni ngika ka꞉ya akʉ ɓʉka‑ɓʉkaɨ ngiɓa ɓʉ Klisito ekoo ndʉtʉ ngiangɔ iya ya kanisa.

²⁵ Ɛmɛ ma꞉nɨtanaka tiga bayo ʉ kanisa kʉkpatanakɨa nʉ kuu ngia Asʉɓɨɨ a꞉nanzo kʉkyɨa ekoo ʉndɛnʉ. Kuu yɛngɔ ya tʉkʉ kʉɓɨakɨa Ɨsaʉ ngiangɔ akʉ ɓingono.

²⁶ Moni ngikʉnanɨ ka moni kʉ ɓaɗi ika a꞉kʉnayɨa ɓombi kʉ ɓuɓomu kʉʉngwa kʉ jɛnɛ, ɨkyɛmɨngana ɨtakɨ‑takɨ ngiakɛ ʉkʉpana tiga ɓombi ngiɓangɔ akʉ ɓʉmba.

²⁷ Jʉ Asʉɓɨɨ a꞉kʉnda naɓɔ kʉpana moni kʉ ɓaɗi ika kanʉ ɨjangɨa nadɨndɨ nʉ ka muɗo nadɨndɨ ika a꞉tambanakɨa mababa kʉ ɓombi kʉ muɓomu. Moni kʉ ɓaɗi ngikʉnanɨ ɨkɔ ikakɛ: Klisito a amati ʉndɛnʉ nʉ kʉ ɛyɔ aanzo napɨa itungwio amati ʉ mɨtʉma ngiindɛsʉ kusigo ɓɔ kumunieni sina amati ʉ ɨbɨba ngia yɨ Asʉɓɨɨ kʉ kumunioo.

²⁸ Ya aka ekoo moni ngikʉnanɨ iya ka‑ɔɔ kʉpanɨa ɓombi kʉ ɓuɓomu ɓɔ Klisito a anɨ. Kakʉɓɨakɨa nʉ kʉpanɨa ɓombi kʉ nangana nangana nʉ 'ʉtʉma wɔɔ pimise moni kingono kusigo ɓɔ ɓombi kʉ ɓuɓomu ɓuɓio ɓʉkwananakɛ apɛɛ ʉ Klisito.

²⁹ Kʉ ɓwanɨ, makʉkyɨa kuu nʉ kʉmana kingono nʉ angu ngia wʉ Klisito iya akʉkyɨa kuu amati asɛmɛ iɗo.