2 Timɔtɛɔ 1 - Agɔmɔ ngia wʉ Ɨtakɨ-takɨ

Ɓukuo

¹ Ɛmɛ Pɔlɔ, kʉ mʉtɨndakɨa ʉbalʉa nguakɛ, ɛmɛ ngia Asʉɓɨɨ a꞉nachwa kuɓio titima wʉ Yeso Klisito, ambunanzo kuu yɛɛ ɓɨakɨɛ ɓombi ɨsaʉ yɨ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá uwa a꞉tɨpanaka amati ʉ Yeso Klisito.

² Timɔtɛɔ mwana asɛmɛ wʉ ɓʉkʉnda, mʉnatɨndakɨa ʉbalʉa nguakɛ, ɔwɛ ngia maanakʉnda ndʉ mwana asɛmɛ ɔɔ ʉnʉtɛ. Asʉɓɨɨ Tidoo nʉ Yeso Klisito Makʉʉndɛsʉ ɓunanzo ɨjɨɔ nʉ majɨɔ, ɓambʉnanɨa ikoko.

Pɔlɔ akutuisio Asʉɓɨɨ ɨbɨba

³ Makutuisio Asʉɓɨɨ ɨbɨba iya maamubibiso nʉ iyo yɨ 'ʉtʉma yɛɛ iɗo, ngbanga ngbanga tʉkʉ ndʉ akʉ ɓakuku Ɓayuda ɓi꞉nye kyɨa jɛnɛ‑ɔɔ pɛɛ. Nuɓutu kʉ ndʉ nʉ 'usoti, maakyɨa nɔwɛ tʉkʉ kutunguo amati ʉ nɨta ngiisɛmɛ, chʉkɔmʉ nʉ ndokono.

⁴ Maatunguo ndɨa ngia wa꞉ndɨa ati ngia ka꞉sɨana‑ɔɔ nɔwɛ. Nʉ makʉtananɨa nadɨndɨ ɓɔ ambʉ́ kʉnana gʉ‑zʉ ɓata, jʉ ya꞊nakwiso ɓata‑zʉ kʉ ɨgyagya nadɨndɨ.

⁵ Maatunguo baya yɨ ingono ngia wanayɔ akʉ Yeso Klisito, ya ndʉ baya ngia ɔɔ anʉngwanɨ Loisi nʉ anʉ Eunike ɓa꞉nyɨa nayɔ pɛɛ asɔɔ, mʉbaya tiga bayanɨ ɓɔ ɔwɛ wa kʉ nayɔ.

Pɔlɔ akunzo Timɔtɛɔ igue‑gue kuɓio ngbingbii

⁶ Iikwa ma‑ɔɔ nɔwɛ kutungwiso ɓɔ jʉkaniso apɛpɛ ngia wʉ Asʉɓɨɨ, iya wa꞉nyɨa nayɔ kʉʉngwa ati ngia ma꞉nʉnapɨa‑ɔɔ lɨkɔndɔ akʉ 'ʉtʉ.

⁷ Jʉ Asʉɓɨɨ a꞉tinzokɔmʉ 'ʉtʉma wʉ ʉɓa, ɨkyɛmɨngana a꞉tinzo 'ʉtʉma ngua waatihuiso nʉ angu, nʉ ɓʉkʉnda nʉ 'ʉtʉma wɔɔ tayanɨɛ.

⁸ Kʉ ɓwanɨ, wɔɔnakɔmʉ soni kʉɓɨakɨa ɨsaʉ yɨ Makʉʉndɛsʉ, wɔɔnakɔmʉ soni ekoo asɛmɛ kʉ ɓwanɨ, abana ma akʉ boloko kititi jʉ maamʉkyananakɨa. Ɨkyɛmɨngana, ɓio tʉkʉ kʉdya ɓʉka‑ɓʉkaɨ izi mɨngana nɛmɛ aka ekoo ʉ Ɨsaʉ yɛɛ Iɗo, akʉ angu ngia Asʉɓɨɨ aananzo.

⁹ Ɛyɔ kʉ a꞉tihiiso, ambutisoko kuɓio ɓombi ɓangɔ, chʉkɔmʉ jʉ ka꞉kyɨa ɓamoni ɓɔɔ manzanza, ɨkyɛmɨngana a꞉tisoko jʉ i꞉nye ukwaisieni ɓwanɨ nʉ jʉ ɨjɨɔ ngiangɔ yi꞉nye ekoo ʉndɛsʉ. A꞉tinzo ɨjɨɔ ngiinanɨ 'upi akʉ Yeso Klisito pɛɛ ɔɔ kyɨɛ ɨtaka.

¹⁰ Ɨkyɛmɨngana, ɨtakɨ‑takɨ ngiakɛ ɨjɨɔ ngiinanɨ ya ɨpananɨɛ ati ʉndɛsʉ jʉ Muhiiso wʉndɛsʉ Yeso Klisito a꞉ka akʉ ɨtaka, ambupipo angu ʉ ingyo, ambupananiso ʉɓɨɨ ngua wambʉkɔmʉ ɓata wʉ ingyo, ingbaa akʉ Ɨsaʉ yɛɛ Iɗo.

¹¹ Asʉɓɨɨ a꞉nanzo ɛmɛ kuu yɛɛ ɓɨakɨɛ Ɨsaʉ yɛɛ Iɗo ngiakɛ, ndʉ titima, mʉpananakɨa nʉ mombi ɔɔ nze ʉpanʉ wʉ Asʉɓɨɨ.

¹² Ya aka ekoo kuu ngiinanɨ iya ma‑ɔɔ amati ʉ kɨnganaka akʉ boloko. Ʉna tɔ, mambʉkɔmʉ nʉ soni kuɓio akʉ boloko aka ekoo ʉ Klisito, jʉ makʉmbɨa iɗo ɓɔ a mombi ngia ma꞉napɨa baya ngiisɛmɛ ekoo angɔ, nʉ ɛyɔ akwanana kʉpɨmakɨa ɨkyɛmɛ ngia a꞉nanzo, kʉɓʉya tʉkʉ akʉ ɓisi ɓʉ 'Ʉkɔmbɔ.

¹³ Pɨmakɨa moni kingono ngika ma꞉napanɨa, amati ʉ baya nʉ amati ʉ ɓʉkʉnda ngiɓa kanaɓɔ akʉ Yeso Klisito. Moni ngikʉnanɨ kuɓio andɔɔ isisinio.

¹⁴ Akʉ angu wʉ 'Ʉtʉma wɔɔ Tu ngua wa amati ʉndɛsʉ, pɨmakɨa Ɨsaʉ yɛɛ Iɗo ngia Asʉɓɨɨ a꞉nanzo pɨmakɨaa.

¹⁵ Kʉndʉ wakʉmbɨa, ɓombi ɓaja ngiɓa ɓa꞉baya amati ʉ gɨpa ʉ Azia ɓa꞉nasɨa sɨaa, ati ʉ ɓombi ngiɓʉnanɨ ya Figelo nʉ Ɛlɛmɔgɛnɛ.

¹⁶ Makʉʉɓɨɨ ʉpananiso anza wʉ Ɔnɛsɨfɔlɔ 'ʉtʉma wʉ ikoko nguangɔ, jʉ i꞉nye kyɨa kʉka kʉ gomu nɛmɛ kunzo igue‑gue. A꞉nakɔmʉ soni ekoo asɛmɛ jʉ ma akʉ boloko.

¹⁷ Ɨkyɛmɨngana, ati ngia a꞉ɓʉya‑ɔɔ akʉ gʉlʉ ʉ Lɔma, a꞉nahata nʉ kɛkɛɛ kʉɓʉya tʉkʉ aka a꞉sa nachwio‑ɔɔ.

¹⁸ Wakʉmbɨa iɗo nadɨndɨ kuu kʉ iɓomu ngia a꞉nakyɨa anʉ Ɛfɛsɔ. Makʉʉɓɨɨ upananiso 'ʉtʉma wʉ ikoko nguangɔ ekoo angɔ apɛɛ ʉ Asʉɓɨɨ, akʉ ɓisi ngiɓʉnanɨ ɓʉ 'Ʉkɔmbɔ.