2 Pɛtɛlɔ 1 - Agɔmɔ ngia wʉ Ɨtakɨ-takɨ

Ɓukuo

¹ Ɛmɛ Simoni Pɛtɛlɔ, bayo nʉ titima wʉ Yeso Klisito, maninu kʉtɨndɨakɨa ʉbalʉa nguakɛ, inu ɓombi ngiɓa na꞉nyɨa nʉ baya mɨngana yɨ ɨjangɨa kʉndʉ iya isu kanayɔ akʉ ingono ngia yɨ Asʉɓɨɨ, nʉ iya yɨ Muhiiso wʉndɛsʉ Yeso Klisito.

² 'Ʉtʉma wʉ ɨjɨɔ nʉ majɨɔ ngua wʉ Asʉɓɨɨ wuɓio ekoo ʉndɛnʉ nadɨndɨ jʉ nakʉmbɨa Asʉɓɨɨ nʉ Yeso Makʉʉndɛsʉ iɗo.

Kʉkɔ soko yɨ Asʉɓɨɨ

³ Akʉ angu ngiangɔ, Asʉɓɨɨ a꞉tinzo ɨkyɛmɛ kʉ iɓomu ngia yakwanana nisu kʉsalɨa akʉ ʉɓɨɨ nguʉndɛsʉ kuɓotono nʉ Asʉɓɨɨ. A꞉timbiiso mombi ngia a꞉tisoko kukumunio akʉ imbangumba nʉ akʉ iɗo ngiangɔ.

⁴ Iikwa a꞉tinzo nayɛ kumbo ɔɔ manzanza nʉ ɔɔ 'ʉkwananakɛ. A꞉tinzo kumbo ngia ɛyɔ makʉɔngɔ a꞉panaka jɛnɛ, aka ekoo ngia ɓɔ ndʉ mombi anyɨa nayɔ, a꞊himbo ɓʉtɨpɨ ɓʉ ɨtaka ngiɓa ɓaatito akʉ ingyo, nʉ kuɓio kʉkpata tʉkʉ angu wʉ Asʉɓɨɨ.

⁵ Aka ekoo moni ngikʉnanɨ, kyɨeni ɓʉmʉ kʉmatɨa ɨkyananakɨa yɛɛ iɗo ekoo ʉ baya ngiindɛnʉ, nʉ akʉ ɨkyananakɨa ngiindɛnʉ nambʉmatɨa mbɨmbanaka kʉ matɨaa.

⁶ Kyɨeni angu kʉmatɨa ekoo mbɨmbanaka ngiindɛnʉ 'ʉtʉma wɔɔ gbʉmanakɛ, nʉ ekoo ʉ 'ʉtʉma wɔɔ gbʉmanakɛ nambʉmatɨa 'ʉtʉma wɔɔ ʉta, nʉ ekoo ʉ 'ʉtʉma wɔɔ ʉta nambʉmatɨa kuɓotono nʉ Asʉɓɨɨ.

⁷ Tiga ekoo ʉ ɓotono nʉ Asʉɓɨɨ matɨeni ɓʉkʉnda akʉ ɓadii ɓʉndɛnʉ, nʉ ekoo ʉ ɓʉkʉnda akʉ ɓadii nambʉmatɨa ɓʉkʉnda.

⁸ Ndʉ naɓio nʉ lɨngbaa lʉ moni ngilakɛ kʉ liɓomu nambʉsɨnganakiso kyɨa engo nʉpɛɛ, lakwanana ninu kunicho ambʉ nɔɔɓiokɔmʉ lipio ila lambakamɔ lipumo ikanzi ngia ɓambɨa‑ɔɔ Makʉʉndɛsʉ Yeso Klisito.

⁹ Ɨkyɛmɨngana, mombi ngia ambʉkɔmʉ nʉ lɨngbaa lʉ moni ngila ɓu꞉lipopo akɛ, a ngbanga ndʉ mombi ngia a꞉chwio mesu iya a mesu mukutunikie. Mombi ngiinanɨ akʉpaa ɓɔ a꞉jaɓanakɨa jɛnɛ akʉ ɓʉɓɨɓɨ jaɓanakɨaa.

¹⁰ Kʉ ɓwanɨ, inu ɓayoo, kyɨeni angu ɓʉmʉ kʉmaa ɓʉ ngbɔmʉ akʉ soko ngia Asʉɓɨɨ a꞉nisoko nʉ nɨchwa ngia Asʉɓɨɨ a꞉nɨchwa. Jʉ nʉkyɨeni ɓwanɨ, nambʉkɔmʉ nakwanana kʉkwa akʉ ɓʉɓɨɓɨ gʉkʉ ɗɛkɛkɛ.

¹¹ Iikwa ɓa꞊nɨsɨa‑ɔɔ ɨngbaa kuno kukumunio akʉ Ɓʉngama ɓʉ mɨtʉ yɨ ɨpá nʉ mɨtʉ yɨ ɨpá iɓa ɓʉ Makʉʉndɛsʉ nʉ Muhiiso wʉndɛsʉ Yeso Klisito.

¹² Kʉ ɓwanɨ, maɓio ninu kutungwiso moni ngikʉnanɨ makwaa kʉ muɓomu, abana ndʉ nambɨa moni ngikʉnanɨ muɗo nʉ na ngbingbii kʉkpata ingono ngia na꞉nyɨa nayɔ.

¹³ Nʉ mʉ꞉na iɗo ɓɔ ati ngia ma‑zʉ‑ɔɔ kʉ ya akʉ ɨtaka, mʉnɨjʉkaniso ninu kutungwiso moni ngikakɛ.

¹⁴ Makʉmbɨa iɗo ɓɔ wati wʉ ingyo nguʉsɛmɛ wa tiga kʉ tinene. Makʉʉndɛsʉ Yeso Klisito a꞉nambiiso ɛwɔ mbiisoo.

¹⁵ Ma꞊kyɨa angu ɓɔ abana ndʉ maɓio muweni, ɓieni tʉkʉ kutunguo moni ngikakɛ wati kʉ uɓomu.

¹⁶ Ɨsaʉ ngia kaninu kumbiiso engo akɛ ya ekoo tʉa ngia Makʉʉndɛsʉ Yeso Klisito a꞊tʉa‑ɔɔ nʉ angu ngiangɔ. Ɨsaʉ ngiinanɨ, ya꞉ʉngwanakakɔmʉ akʉ mingenu yɨ yakanaka nʉ yɛɛ ɨkyɨkyɨɓʉmʉ. Isu ka꞉na ɓʉngama ngiɓangɔ nʉ mesu.

¹⁷ Ya kingono ɓɔ a꞉nyɨa nʉ ɨbɨba nʉ imbangumba yɨ Asʉɓɨɨ Tidoo, ati ngia iyo yɨ Asʉɓɨɨ ngia wʉ angu kʉʉngwa ekoo ya꞉sigo‑ɔɔ ɓɔ: « Mwana ngiasɛmɛ ngia wʉ ɓʉkʉnda iyakɛ. Ɛyɔ iya ma꞉mʉchwa, aanakataa nadɨndɨ. »

¹⁸ Iyo ngiinanɨ ya꞉ʉngwa ekoo ʉ ɓisi, isu ɓakʉɓɔngɔ ka꞉ɨkɔ ati ngia ki꞉nye‑ɔɔ nʉ ɔɔ Yeso ekoo ɨkpangba yɛɛ tu.

¹⁹ Nʉ ka ɓata kʉ nʉ ɨsaʉ ngia lɨgbɛ lʉ Asʉɓɨɨ la꞉yaka jɛnɛ. Ɨsaʉ ngiinanɨ ya kingono nʉ yɨkwanana nanapɨa mesu ekoo ɔngɔ ngbanga ndʉ wanga ngua wakʉpʉya mʉa ngua wanʉ umomo, kusiɓo wanga wʉ ɓisi ɓɔɔ ɓʉyɛ nʉ ʉndata ngua waajɨa akʉ ɓisi ɓaakyɨa‑ɔɔ kʉya, wujiiso mɨtʉma ngiindɛnʉ.

²⁰ Pɛɛ ʉ moni kʉ muɓomu, nʉkwanana kʉmbɨa ɓɔ, mombi gʉkʉ mʉngana ambʉkɔmʉ ikanzi ngia a꞊ngakanakiso moni ngika lɨgbɛ la꞉yaka amati ʉ Mubio kʉ Asʉɓɨɨ akʉ itungwio ngiangɔ ɛyɔ makʉɔngɔ.

²¹ Jʉ ɨsaʉ gʉkʉ mɨngana yambikinye ɓʉa akʉ ɓʉkʉnda ɓʉ mombi mʉngana. Ɨkyɛmɨngana, ɓi꞉nye yaka moni ngika ki꞉nye ʉngwa ɔɔ Asʉɓɨɨ nʉ angu ʉ 'Ʉtʉma wɔɔ Tu.